Loko Vakreste Va Sefiwa Kukota Koroni

YESU, emahlweninyana ka rifu rakwe, u tsundzuxe vadyondzisiwa vakwe a ku: “[Maswivo,] Sathana u lava hi matimba leswaku a mi sefa kukotisa koroni.” (Luka 22:31) Xana a a vula yini?

Enkarhini wa Yesu, ku tshovela koroni a a swi lava nkarhi wo tala ni matshalatshala. Vatshoveri a va rhanga hi ku hada koroni emasin’wini. Kutani va hundla mahlanga ya koroni exivuyeni kumbe va pana swifuwo swi koka xileyi xo hula koroni. Sweswo a swi endla leswaku koroni yi khumuleleka emahlangeni. Endzhaku ka sweswo, varimi a va yi peperha. Mungu a wu haha ni moya kutani tindzoho ti sala erihlelweni. A va hetelela hi ku sefa tindzoho va suselela leswi nga lavekiki.

Yesu a a tiyisile hakunene, Sathana u kombe vadyondzisiwa va Yesu xa ncila wa bulubulu, naswona wa ha ri na hina exitikini. (Efe. 6:11) Entiyisweni, a hi swiphiqo hinkwaswo leswi hi langutanaka na swona swi vangiwaka hi Sathana. (Ekl. 9:11) Kambe, Sathana a nga tshamanga hi mavoko, u tirhisa xin’wana ni xin’wana leswaku a hi endla hi nga tshembeki eka Yehovha. Hi xikombiso, a nga ha hi ringa leswaku hi hlongorisa rifuwo, hi hlawula vuhungasi lebyi thyakeke kumbe ku tikhoma loko biha hi tlhelo ra rimbewu. A nga ha tirhisa ni vanghana exikolweni kumbe entirhweni ni maxaka lama nga riki Timbhoni leswaku va hi nghenisa moya wo lava ku dyondzeka ngopfu ni ku kuma mintirho leyi holelaka swi nyawula. Ku tlula kwalaho, Sathana a nga ha endla leswaku hi xanisiwa hi ku kongoma hi xikongomelo xa leswaku hi nga tshembeki eka Xikwembu. Ti tele tindlela leti Sathana a ti tirhisaka leswaku a hi sefa hi ndlela yo fanekisela.

Xana hi nga lwisana njhani ni nala loyi wa matimba? A hi nge swi koti ku lwa na yena handle ko pfuniwa. Sathana u ni matimba ku hi tlula; kambe ha swi tiva leswaku Yehovha u ni matimba lamakulu ku tlula Sathana. Loko hi tshembela eka Yehovha hi mbilu hinkwayo, hi khongela hi mbilu hinkwayo leswaku a hi nyika vutlhari ni xivindzi leswaku hi kota ku tiyisela, naswona hi titshega swinene hi nkongomiso wa yena, u ta hi tiyisa leswaku hi hlula marhengu ya Sathana.—Ps. 25:4, 5.

Loko hi ringiwa, hi fanele hi va ni vuswikoti byo “hambanisa leswi lulameke ni leswi hoxeke,” naswona hi papalata ku hambukisiwa hi mano ya Sathana. (Hev. 5:13, 14) Yehovha u ta hi pfuna leswaku hi va ni vuswikoti byebyo. Hikwalaho, hi fanele hi omelela endleleni leyinene hambi ko ba lexi dumaka. Loko hi landzela nkongomiso wa Yehovha hi ku tshembeka, a nge tshiki ku hi seketela leswaku hi tiyimisela hi xivindzi ku endla leswi lulameke.—Efe. 6:10.

Sathana a nga ha ringeta ku hi sefa kukota koroni. Kambe loko Yehovha a hi seketela hi nga lwisana na yena hi tiyile eripfumelweni. (1 Pet. 5:9) Ina, Rito ra Yehovha ra hi tiyisekisa ri ku: “Mi kaneta Diyavulosi, kutani u ta mi balekela.”—Yak. 4:7.