Va Faneriwa Hi Ku Kongomisiwa eMinseledyaneni Ya Mati Ya Vutomi

“Xinyimpfana . . . xi ta va risa, xi va kongomisa eminseledyaneni ya mati ya vutomi.”—NHLAV. 7:17.

1. Rito ra Xikwembu ri va hlamusela njhani Vakreste lava totiweke naswona Yesu u va nyike vutihlamuleri byihi?

RITO RA XIKWEMBU ri vula leswaku Vakreste lava totiweke lava langutelaka timhaka ta ntirho wa Kreste emisaveni i “hlonga ro tshembeka ni ro tlhariha.” Loko Kreste a kambela “hlonga” hi 1918, u kume leswaku lava totiweke a va ri karhi va phamela ‘swakudya swa moya hi nkarhi lowu faneleke’ hi ku tshembeka. Hikwalaho, endzhaku ka sweswo, Yesu loyi a nga N’wini, u ri veke “ehenhla ka hinkwaswo leswi nga swa yena.” (Hlaya Matewu 24:45-47.) Hi ndlela yoleyo, vatotiwa va phamela vagandzeri lavan’wana va Yehovha laha misaveni loko va nga si kuma ndzhaka ya vona etilweni.

2. Hlamusela leswaku i yini swilo swa Yesu.

² N’wini u tirhisa swilo swa yena hilaha a lavaka hakona. Swilo swa Yesu Kreste loyi a nga Hosi leyi vekiweke hi Yehovha, swi katsa swilo hinkwaswo leswi fambisanaka na Mfumo emisaveni. “Ntshungu lowukulu” lowu voniweke hi muapostola Yohane exivonweni na wona wa katseka.  Yohane u hlamusela ntshungu lowukulu hi ndlela leyi: “Waswivo, a ku ri ni ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato, wu yime emahlweni ka xiluvelo ni le mahlweni ka Xinyimpfana, wu ambale tinguvu to leha to basa; wu tamele marhavi ya micindzu emavokweni ya wona.”—Nhlav. 7:9.

3, 4. Hi rihi lunghelo lerikulu leri nga ta kumiwa hi lava ntshungu lowukulu?

³ Swirho swa ntshungu wolowo lowukulu i van’wana va lava Yesu a va vitaneke “tinyimpfu tin’wana.” (Yoh. 10:16) Ntshembo wa swona i ku hanya hi masiku emisaveni leyi nga paradeyisi. Swa tiyiseka leswaku Yesu “[u ta swi] kongomisa eminseledyaneni ya mati ya vutomi” nileswaku “Xikwembu xi ta sula mihloti hinkwayo ematihlweni ya [swona].” Leswi swi nga ni ntshembo wolowo, swi ‘hlantswe tinguvu ta swona to leha swi ti endla to basa hi ngati ya Xinyimpfana.’ (Nhlav. 7:14, 17) Swi kombisa ripfumelo egandzelweni ra Yesu, kutani emahlweni ka Xikwembu swi ambale ‘tinguvu to basa.’ Swi vuriwa leswi lulameke tanihi vanghana va Xikwembu, ku fana na Abrahama.

⁴ Ku tlula kwalaho, leswi Xikwembu xi tekaka ntshungu lowukulu lowu andzaka wa tinyimpfu tin’wana wu ri lowu lulameke, wu nga tiyiseka leswaku wu ta pona loko ku herisiwa mafambiselo lawa ya swilo enhlomulweni lowukulu. (Yak. 2:23-26) Wu nga tshinela eka Yehovha, naswona wu ni ntshembo lowu tsakisaka wo pona Armagedoni wu ri ntlawa. (Yak. 4:8; Nhlav. 7:15) A wu tilawuli kambe wu tiyimisele ku kongomisiwa hi Hosi ya le tilweni ni hi vamakwavo va yona lava totiweke lava ha riki laha misaveni.

5. Lava ntshungu lowukulu va va seketela njhani vamakwavo va Kreste lava totiweke?

⁵ Vakreste lava totiweke va kanetiwe swinene emisaveni ya Sathana naswona va ha ta hambeta va kanetiwa. Nilokoswiritano, va tiyiseka leswaku vanakulobye va vona lava ntshungu lowukulu va ta va seketela. Hambileswi nhlayo ya Vakreste lava totiweke se yi nga yitsongo laha misaveni, lembe na lembe lava ntshungu lowukulu va engeteleka hi madzana ya magidi. Leswi ku nga ni mavandlha ya Vukreste ya kwalomu ka 100 000 emisaveni hinkwayo, vatotiwa a va nge swi koti ku langutela rin’wana ni rin’wana ra wona. Xisweswo, ndlela yin’wana leyi tinyimpfu tin’wana ti pfunaka vatotiwa ha yona, i ku va vavanuna  lava fanelekaka lava humaka eka ntshungu lowukulu va va vakulu emavandlheni. Va pfuna ku khathalela Vakreste va timiliyoni lava siyiweke emavokweni ya “hlonga ro tshembeka ni ro tlhariha.”

6. Vuprofeta byi swi kombise njhani leswaku Vakreste lava totiweke a va ta seketeriwa hi vanakulobye va vona va tinyimpfu tin’wana?

⁶ Muprofeta Esaya u vule leswaku Vakreste lava totiweke a va ta seketeriwa hi vanakulobye va vona va tinyimpfu tin’wana swi huma embilwini. U tsarile: “Yehovha u te: ‘Vatirhi lava nga hakeriwiki va Egipta ni vabindzuri va Etiyopiya ni Vasebiya, vanhu vo leha, va ta ta eka wena, naswona va ta va va wena. Va ta ku sala endzhaku.’” (Esa. 45:14) Namuntlha Vakreste lava nga ni ntshembo wo hanya emisaveni va famba endzhaku ka ntlawa wa hlonga leri totiweke swin’we ni Huvo ya rona leyi Fumaka, va kongomisiwa hi vona hi ndlela yo fanekisela. Tanihi “vatirhi lava nga hakeriwiki,” lava tinyimpfu tin’wana va tirhisa matimba ya vona ni rifuwo ra vona hi ku tirhandzela ni hi mbilu hinkwayo, va seketela ntirho wo chumayela emisaveni hinkwayo lowu Kreste a wu aveleke valandzeri va yena lava totiweke emisaveni.—Mint. 1:8; Nhlav. 12:17.

7. Ntshungu lowukulu wu leteriwa hi xikongomelo xihi?

⁷ Swirho swa ntshungu lowukulu swi va swi ri eku leteriweni loko swi ri karhi swi seketela vatotiwa, naswona swi ta va vanhu vo sungula emisaveni leyintshwa. Leswi swi nga ta va vanhu vo sungula emisaveni leyintshwa swi fanele swi va leswi tiyeke emoyeni ni ku tiyimisela ku landzela nkongomiso wa N’wini wa swona. Mukreste un’wana ni un’wana sweswi u nyikiwe nkarhi wo kombisa leswaku Hosi Kreste Yesu a nga n’wi tirhisa. Hi ku va ni ripfumelo ni hi ku tshembeka ka yena, sweswo swi kombisa leswaku emisaveni leyintshwa swi ta n’wi olovela ku yingisa nkongomiso wa Hosi.

Ntshungu Lowukulu Wu Kombisa Ripfumelo Ra Wona Hi Mintirho

8, 9. Lava ntshungu lowukulu va ri kombisa njhani ripfumelo ra vona?

⁸ Lava tinyimpfu tin’wana lava nga vanakulobye va vandlha ra Vakreste lava totiweke va tlhela va kombisa ripfumelo ra vona hi tindlela tin’wana. Xo sungula, va seketela vatotiwa hi ku chumayela mahungu lamanene ya Mfumo wa Xikwembu. (Mat. 24:14; 28:19, 20) Xa vumbirhi, va titsongahata loko va ri karhi va kongomisiwa hi Huvo leyi Fumaka.—Hev. 13:17; hlaya Zakariya 8:23.

⁹ Xa vunharhu, swirho swa ntshungu lowukulu swi seketela vamakwavo va swona lava totiweke hi ku hanya hi milawu leyinene ya Yehovha. Swi tikarhatela ku hlakulela “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” (Gal. 5:22, 23) Namuntlha, vanhu a va nge ku rhandzi loko u ri ni timfanelo toleto hikuva va lava u endla “mintirho ya nyama.” Nilokoswiritano, swirho swa ntshungu lowukulu swi tiyimiserile ku papalata “vumbhisa, thyaka, ku tikhoma ko biha, ku gandzela swifaniso swa hava, xiendlo xa vungoma, vulala, dzolonga, mavondzo, swifafa, ku kanetana, ku avana, mimpambukwa, mona, minkarhi ya ku dakwa, minkhuvo ya huwa, ni swilo swo fana ni sweswo.”—Gal. 5:19-21.

10. Swirho swa ntshungu lowukulu swi tiyimisele ku endla yini?

¹⁰ Leswi hi nga hetisekangiki, swi nga ha tika ku kombisa mihandzu ya moya, ku papalata mintirho ya nyama ni ku lwisana ni ntshikilelo lowu vangiwaka hi misava ya Sathana. Nilokoswiritano, hi tiyimiserile leswaku ripfumelo ra hina kumbe ndlela leyi hi rhandzaka Yehovha ha yona yi nga tsanisiwi hi swihoxo swa hina, ku tsana ka hina kumbe mavabyi. Ha swi tiva leswaku Yehovha u ta endla leswi a swi tshembiseke, ku nga ku ponisa ntshungu lowukulu enhlomulweni lowukulu.

11. Hi wahi marhengu lawa Sathana a ma tirhiseke leswaku a tsanisa ripfumelo ra Vakreste?

¹¹ Nilokoswiritano, hi tshama hi xalamukile hikuva ha swi tiva leswaku nala wa hina lonkulu i Diyavulosi, naswona a nga hatli a lan’wa. (Hlaya 1 Petro 5:8.) U ringete ku tirhisa vagwinehi ni vanhu van’wana leswaku va hi khorwisa leswaku tidyondzo leti hi pfumelaka eka tona i ta mavunwa. Kambe minkarhi yo tala rhengu rero a ri tirhanga. Hilaha ku fanaka, hambileswi minkarhi yin’wana nxaniso wu kavanyeteke ntirho wo chumayela, kahle-kahle wu lo tiyisa ripfumelo ra lava xanisiweke. Hikwalaho, Sathana u hambeta  a tirhisa tindlela takwe leti a vonaka leswaku ti ta ri tsanisa swinene ripfumelo ra hina. Loko u hela matimba o vhela a ku tshikilela. Vakreste va lembe-xidzana ro sungula va lemukisiwe hi ta khombo leri loko va byeriwa leswi: “Ehleketisisani hi [Kreste] loyi a tiyiseleke mavulavulelo yo tano yo kaneta ya vadyohi hi ku lwisana ni leswi vuyerisaka vona ntsena.” Ha yini? “Leswaku mi nga karhali mi wa mapa eka mimoya-xiviri ya n’wina.”—Hev. 12:3.

12. Xana ndzayo ya Bibele yi va khutaza njhani lava heleke matimba?

¹² Xana u tshama u titwa u lava ku tshika ku tirhela Yehovha? Xana minkarhi yin’wana u titwa u nga pfuni nchumu? Loko u titwa hi ndlela yoleyo, u nga pfumeleli Sathana a tirhisa swilo sweswo leswaku swi ku sivela ku tirhela Yehovha. Ku dyondza Bibele hi vuenti, xikhongelo lexi humaka embilwini, ku va kona eminhlanganweni nkarhi na nkarhi ni ku va vanghana ni Vakreste-kuloni swi ta tiyisa ripfumelo ra wena ni ku ku tiyisa leswaku u ‘nga wi mapa eka moya-xiviri wa wena.’ Yehovha u tshembise vanhu lava n’wi tirhelaka leswaku u ta tlhela a va nyika matimba, naswona u ta swi endla sweswo. (Hlaya Esaya 40:30, 31.) Tshama u veke tihlo ra wena etimhakeni ta Mfumo. Papalata swilo leswi ku dyelaka nkarhi kutani u tinyiketela ku pfuna van’wana. Sweswo swi ta ku tiyisa leswaku u nga wi mapa hambiloko u hetiwa matimba.—Gal. 6:1, 2.

Va Huma eNhlomulweni Va Nghena eMisaveni Leyintshwa

13. Hi wihi ntirho lowu nga ta endliwa hi lava nga ta pona Armagedoni?

¹³ Endzhaku ka Armagedoni, vanhu vo tala lava nga lulamangiki lava pfuxiweke va fanele va dyondzisiwa tindlela ta Yehovha. (Mint. 24:15) Swi ta boha leswaku va dyondza hi ta gandzelo ra Yesu ra nkutsulo; naswona va fanele va dyondzisiwa ndlela yo va ni ripfumelo egandzelweni leri leswaku va ta vuyeriwa. Va ta boheka ku tshika tidyondzo ta vukhongeri bya mavunwa leti a va ti pfumela ni ku tshika ndlela leyi a va hanya ha yona. Va fanele va dyondza ku ambala vumunhu lebyintshwa lebyi va endlaka va vonaka va ri Vakreste va ntiyiso. (Efe. 4:22-24; Kol. 3:9, 10) Lava tinyimpfu tin’wana lava nga ta pona va ta va ni ntirho wo tala wo wu endla. Wa nga anakanya ndlela leyi swi nga ta tsakisa ha yona ku endlela Yehovha ntirho wolowo, enkarhini lowu ku nga ta va ku nga ha ri na mintshikilelo ni swikavanyeto swa misava leyi yo homboloka!

14, 15. Hlamusela ndlela leyi lava poneke enhlomulweni lowukulu swin’we ni lavo lulama lava pfuxiweke va nga ta rungulela timhaka ha yona.

¹⁴ Malandza yo tshembeka ya Yehovha lama feke Yesu a nga si ta laha misaveni a ta chumayela na wona ma ta dyondza swo tala hi nkarhi wolowo.  Ma ta swi tiva leswaku i mani Mesiya la tshembisiweke, loyi a ma navela ku n’wi vona kambe ma nga n’wi vonangiki. Loko ma nga si fa se a ma swi kombisile leswaku ma tiyimiserile ku dyondzisiwa hi Yehovha. Wa nga anakanya ntsako lowu u nga ta va na wona swin’we ni lunghelo ro ma pfuna—hi xikombiso, u hlamusela Daniyele ndlela leyi vuprofeta lebyi a byi tsaleke byi hetisekeke ha yona, hambileswi a a nga byi twisisi!—Dan. 12:8, 9.

¹⁵ Ina, leswi lava pfuxiweke eku feni va nga ta dyondza swo tala eka hina, na hina hi ta va hi ri ni swivutiso swo tala leswi hi nga ta va vutisa swona. Va ta hi byela vuxokoxoko bya swiendlakalo leswi boxiweke eBibeleni kambe byi nga hlamuseriwangiki hi vuenti. Ehleketa ndlela leyi swi nga ta tsakisa ha yona loko Yohane Mukhuvuri loyi a a ri muzala wa Yesu a hi hlamusela vuxokoxoko byo tala malunghana na Yena! A swi kanakanisi leswaku swilo leswi hi nga ta swi twa hi ku kongoma eka timbhoni toleto to tshembeka swi ta endla leswaku hi ri twisisa swinene Rito ra Xikwembu ku tlula sweswi. Malandza yo tshembeka ya Yehovha lama feke, ku katsa ni lava ntshungu lowukulu lava feke enkarhini wa makumu va ta kuma ku “pfuxiwa ko antswa.” Va sungule ku tirhela Yehovha emisaveni leyi a a yi lawuriwa hi Sathana. Wa nga vona ntsako lowu va nga ta va na wona hi ku va va hambeta va chumayela emisaveni leyintshwa leyi nga ha riki na vuhomboloki.—Hev. 11:35; 1 Yoh. 5:19.

16. Hi ku ya hi vuprofeta, Siku ra Vuavanyisi ri ta fambisa ku yini?

¹⁶ Loko Siku ra Vuavanyisi ri ri karhi ri ya emahlweni ku ta pfuriwa ni tibuku-nsongwa. Hinkwavo lava nga ta va va hanya enkarhini wolowo va ta avanyisiwa hi ku tirhisa tibuku teto swin’we ni Bibele, loko va fanelekela ku hanya vutomi lebyi nga heriki. (Hlaya Nhlavutelo 20:12, 13.) Loko Siku ra Vuavanyisi ri hela, munhu un’wana ni un’wana u ta va a kume nkarhi lowu eneleke wo kombisa loko a byi seketela vuhosi bya vuako hinkwabyo kumbe a nga byi seketeli. Xana u ta titsongahatela Mfumo kutani a pfumela ku kongomisiwa hi Xinyimpfana “eminseledyaneni ya mati ya vutomi”? Kumbe u ta ala ku titsongahatela Mfumo wa Xikwembu? (Nhlav. 7:17; Esa. 65:20) Enkarhini wolowo, vanhu hinkwavo emisaveni va ta va va kume nkarhi wo tiendlela xiboho, va nga kavanyetiwi hi xidyoho lexi va tswariweke na xona kumbe hi vuhomboloki. A nga kona la nga ta sola vuavanyisi bya Yehovha lebyi faneleke, byo hetelela. Lavo homboloka va ta loviseriwa makumu.—Nhlav. 20:14, 15.

17, 18. I yini leswi Vakreste lava totiweke ni tinyimpfu tin’wana va swi languteleke hi mahlo-ngati malunghana ni Siku ra Vuavanyisi?

¹⁷ Namuntlha Vakreste lava totiweke, lava faneriwaka hi ku amukela Mfumo, va swi langutele hi mahlo-ngati ku fuma hi nkarhi wa Siku ra Vuavanyisi. Mawaku lunghelo ronghasi leri va nga ta va na rona! Ntshembo wolowo wu va susumetela ku yingisa ndzayo leyi Petro a yi nyikeke vamakwavo va vona va lembe-xidzana ro sungula a ku: “Endlani hinkwaswo leswi mi nga swi kotaka hilaha ku engetelekeke leswaku mi ku tiyisekisa hi xin’wina ku vitaniwa ni ku hlawuriwa ka n’wina; hikuva loko mi tama mi endla swilo leswi a mi nge tshuki mi khunguvanyeka mi wa hambi rini. Entiyisweni, hi ku endla leswi mi ta hoyozeriwa swinene emfun’weni lowu nga heriki wa Hosi tlhelo Muponisi wa hina Yesu Kreste.”—2 Pet. 1:10, 11.

¹⁸ Tinyimpfu tin’wana ta tsaka leswi vamakwavo va tona lava totiweke va nga ni ntshembo lowu. Ti tiyimisele ku va seketela. Leswi ti nga vanghana va Xikwembu namuntlha, ti susumeteleka ku endla hinkwaswo leswi ti nga swi kotaka entirhweni wa Xikwembu. Hi Siku ra Vuavanyisi, ti ta tsakela ku seketela malunghiselelo ya Xikwembu hi mbilu hinkwayo loko Yesu a ri karhi a ti kongomisa eminseledyaneni ya mati ya vutomi. Kutani eku heteleleni ti ta faneriwa hi ku va malandza ya Yehovha ya laha misaveni hilaha ku nga heriki!—Rhom. 8:20, 21; Nhlav. 21:1-7.

Wa Tsundzuka Xana?

• Xana swilo swa Yesu swi katsa yini?

• Xana lava ntshungu lowukulu va va seketela njhani vamakwavo va vona lava totiweke?

• Hi wahi malunghelo lawa lava ntshungu lowukulu va nga na wona naswona va ni ntshembo wihi?

• Xana Siku ra Vuavanyisi u ri teka njhani?

[Swivutiso swa dyondzo]

[Xifaniso eka tluka 25]

Ntshungu lowukulu wu hlantswe tinguvu ta wona to leha wu ti endla to basa hi ngati ya Xinyimpfana

[Xifaniso eka tluka 27]

I yini leswi u tiyimiseleke ku swi dyondza eka vanhu vo tshembeka lava nga ta pfuxiwa eku feni?