Va Hanyele Xo Xi Tiva—Xana Na Wena U Nga Endla Tano?

MARC, makwerhu wa xinuna wa le Canada, a a thoriwe hi feme yo endla swilo swa thekinoloji leswi tirhisiwaka hi vanhu lava yaka en’wetini. A a nga tirhi masiku hinkwawo naswona a a ri phayona ra nkarhi hinkwawo. Hiloko, mulanguteri wa feme a tshembisa Marc ku n’wi tlakusa entirhweni, kambe a a fanele a tirha masiku hinkwawo naswona a a ta hola mali yo nyawula. Xana Marc u endle yini?

Amy, makwerhu wa xisati wa le Philippine, a a ri phayona ra nkarhi hinkwawo loko a ri karhi a hetisa xikolo. Loko a hetile, u tshembisiwe ntirho lowu a wu ta n’wi dyela nkarhi wo tala kambe mali ya kona a a to yi nusa hi masaka. Hi xihi xiboho lexi Amy a xi endleke?

Marc na Amy va endle swiboho leswi nga faniki, naswona vuyelo bya swiboho swa vona byi kombisa leswaku ndzayo leyi nyikiweke Vakreste va le Korinto wa khale i ya vutlhari. Muapostola Pawulo u tsarile a ku: “Lava tirhisaka misava leyi a va endle onge a va yi tirhisi hi xitalo.”—1 Kor. 7:29-31.

U Nga Yi Tirhisi Hi Xitalo Misava Leyi

Loko hi nga si twa leswi humeleleke Marc na Amy, a hi kambisiseni hi ku komisa leswi rito leri nge “misava” (kumbe koʹsmos hi Xigriki) ri vulaka swona, leri Pawulo a ri tirhiseke epapileni rakwe leri a ri tsaleleke Vakorinto. Rito leri nge koʹsmos, endzimaneni yoleyo ya Bibele ri vula fambiselo ra misava leri hi hanyaka eka rona, ku nga vanhu hinkwavo naswona ri katsa swilo leswi ngo va tshamelo maxelo swo tanihi ndhawu yo tshama eka yona, swakudya ni swiambalo. Leswaku hi kuma swilo sweswo swa siku ni siku vo tala va hina hi fanele hi tirha. Hi boheka ku tirhisa misava leswaku hi hetisisa vutihlamuleri bya le Matsalweni bya leswaku hi tiwundla swin’we  ni mindyangu ya hina. (1 Tim. 5:8) Hambiswiritano, ha swi xiya leswaku “misava ya hundza.” (1 Yoh. 2:17) Hikwalaho hi tirhisa misava leyi hi pima hayi “hi xitalo.”—1 Kor. 7:31.

Vamakwerhu vo tala va kambisise swiyimo swa vona kutani va hunguta nkarhi lowu va wu hetaka entirhweni ni ku hanya vutomi byo olova hileswi va khutaziweke hi ndzayo yoleyo ya le Bibeleni ya ku tirhisa misava leyi va pima. Loko va endle tano va hatle va swi xiya leswaku se va hanyela xo xi tiva hikuva se va heta nkarhi wo tala ni mindyangu ya vona ni le ntirhweni wa Yehovha. Ku tlula kwalaho, vutomi bya vona lebyi olovisiweke byi endle leswaku va titshega swinene hi Yehovha ku nga ri hi misava leyi. Xana na wena u nga endla tano—u hanya vutomi byo olova leswaku u kota ku heta nkarhi wo tala u endla swilo leswi tsakisaka Yehovha?—Mat. 6:19-24, 33.

“Hi Titwa Hi Ri Ekusuhi Na Yehovha Ku Tlula Eku Sunguleni”

Marc, loyi a boxiweke eku sunguleni u yingise ndzayo ya Bibele ya leswaku a nga yi tirhisi hi xitalo misava leyi. U ale ku tlakusiwa entirhweni. Endzhaku ka masiku ma nga ri mangani, mulanguteri wa Marc u n’wi yenge hi ku n’wi tshembisa leswaku mali ya kona u to nusa kunene loko o teka ntirho lowu. Marc u ri: “Lowu a ku ri ndzingo, kambe na wona ndzi wu hlurile.” Loko a hlamusela xivangelo xa kona u ri: “Mina ni nkatanga Paula a hi lava ku nyiketela vutomi bya hina hi tirhela Yehovha hilaha hi nga kotaka hakona. Hikwalaho, hi tiyimisele ku hanya vutomi byo olova. Hi khongelele vutlhari eka Yehovha leswaku hi fikelela pakani ya hina, hi tlhela hi tivekela ni siku leri hi nga ta sungula ku tirhela Yehovha hi xitalo ha rona.”

Paula u ri: “A ndzi tirha tanihi matsalana masiku manharhu hi vhiki exibedlhele naswona a ndzi hola mali yo nyawula. Nakambe a ndzi ri phayona ra nkarhi hinkwawo. Hambiswiritano, a ndzi lava ku tirhela Yehovha kwihi na kwihi laha ku lavekaka vahuweleri va Mfumo, ku fana na Marc. Kambe loko ndzi yisa papila ra ku tshika ntirho, mulanguteri wa mina u vule leswaku ndza faneleka ku kuma xikhundlha lexi nga kona xa ku va matsalana-nkulu. A ku ri xikhundlha lexi holelaka swi nyawula exibedlhele hinkwaxo, kambe a ndzi xi cincanga xiboho xa mina. Loko ndzi byele mulanguteri wa mina xivangelo xo ala xikhundlha xexo, u ndzi bumabumerile hikwalaho ka ripfumelo ra mina.”

Endzhakunyana ka sweswo, Marc na Paula va averiwe ku ya va maphayona yo hlawuleka evandlheni leritsongo leri nga ekule ni mavandlha laman’wana ya le Canada. Xana ku ve ni vuyelo byihi? Marc u ri: “Loko se ndzi tshike ntirho lowu holelaka mali yo tala lowu ndzi heteke malembe yo tala eka wona, a ndzi tivutisa leswaku mundzuku ndzi ta hanya hi yini, kambe Yehovha u katekise ntirho wa hina wo chumayela. Hi tsake ngopfu hileswi hi pfunaka van’wana ku tirhela Xikwembu. Vuphayona byo hlawuleka byi tiyise vukati bya hina. Hi tshama hi ri karhi hi bula hi swilo swa nkoka leswi fambisanaka ni timhaka ta moya. Hi titwa hi ri ekusuhi na Yehovha ku tlula eku sunguleni.” (Mint. 20:35) Paula u engetela a ku: “Loko u tshika ntirho wa wena ni ku sukela kaya ra wena leri u ri toloveleke, u fanele u tshemba Yehovha hi mbilu ya wena hinkwayo.  Hi leswi hi nga swi endla, naswona Yehovha u hi katekisile. Vamakwerhu lava rhandzekaka va le vandlheni lerintshwa va hi endla hi titwa hi rhandzeka naswona hi ri va nkoka. Matimba ya mina lawa a ma helela entirhweni wa ku tihanyisa se ndzi ma tirhisela ku pfuna vanhu leswaku va tiva Xikwembu. Ndzi xi rhandza swinene xiavelo lexi.”

‘A A Hanya eMafurheni Kambe A Nga Tsakanga’

Amy, loyi a boxiweke eku sunguleni, u endle xiboho lexi nga faniki ni xa Marc. U wu tekile ntirho lowu holelaka mali yo nyawula lowu a tshembisiweke wona. Amy u ri: “Eka lembe ro sungula ndzi hambete ndzi chumayela kambe hakatsongo-ntsongo ndzi sungule ku rhangisa ntirho wa mina ematshan’weni ya ntirho wa Yehovha. Ndzi tshembisiwe swikhundlha swa kahle ngopfu, hiloko ndzi tirha hi matimba leswaku ndzi kuma xikhundlha lexi tlakukeke. Loko ndzi ya ndzi va ni ntirho wo tala, a ndzi nga ha wu kumi kahle nkarhi wo chumayela. Ndzi hetelele ndzi tshike ku chumayela.”

Loko Amy a tsundzuka swa nkarhi wolowo u ri: “A ndzi fume ni swikunwana. A ndzi endza ngopfu naswona a ndzi tiphina hi swo tala leswi fambisanaka ni ntirho wa mina. Kambe, a ndzi nga tsakanga. Hambileswi a ndzi ri ni mali yo tala, swiphiqo na swona a swi lo vuya. A ndzi tivutisa leswaku se ndzi dyohe yini. Eku heteleleni ndzi xiye leswaku hi ku hlongorisana ni mintirho ya misava leyi a ku sale katsongo ndzi ‘hambukisiwa eripfumelweni.’ Hikwalaho, hilaha Rito ra Xikwembu ri vulaka hakona, a ndzi ri ni ‘switlhavi swo tala.’”—1 Tim. 6:10.

Xana Amy u yi hume njhani? U ri: “Ndzi kombele vakulu leswaku va ndzi pfuna leswaku ndzi tlhela ndzi va ni vuxaka na Xikwembu kutani ndzi sungula ku ya eminhlanganweni. Loko ku ri karhi ku yimbeleriwa, ndzi te xibuku, ndzi rila! Ndzi tsundzuke ntsako lowu a ndzi ri na wona eka malembe ya ntlhanu lama hundzeke loko ndza ha ri phayona, hambileswi a ndzi ri xisiwana. A ndzi swi tiva leswaku ndzi fanele ndzi tshika ku tlanga hi nkarhi hi ku hlongorisana ni timali kutani ndzi rhangisa timhaka ta Mfumo. Ndzi kombele ku nyikiwa ntirho lowu nga nyawuliki, laha a ndzi ta hola hafu ya muholo lowu a ndzi hola wona, kutani ndzi tlhela ndzi sungula ku chumayela hi xitalo.” Amy u vule hi ntsako a ku: “Se ndzi ni malembe yo hlayanyana ndzi ri karhi ndzi tiphina hi vuphayona. Sweswi ndza titwa leswaku ndzi hanyela xo xi tiva ku tlula nkarhi lowuya a ndza ha heta nkarhi wa mina hinkwawo entirhweni wo tihanyisa.”

Xana u nga olovisa vutomi bya wena? Loko u tirhisa nkarhi lowu u nga ta va se u ri na wona leswaku u rhangisa timhaka ta Mfumo, na wena u ta hanyela xo xi tiva.—Swiv. 10:22.

[Nkomiso eka tluka 19]

Xana u nga olovisa vutomi bya wena?

[Bokisi/Xifaniso eka tluka 19]

“Se Ndza Byi Rhandza Vuphayona!”

David, nkulu evandlheni rin’wana le United States, a a navela ku phayona ni nkatakwe ni vana va vona. U kombele ku ka a nga ha tirhi masiku hinkwawo eka khampani leyi a a tirha eka yona, kutani a va phayona ra nkarhi hinkwawo. Xana sweswo swi endle vutomi byakwe byi va ni xikongomelo? Endzhaku ka tinh’weti to hlayanyana David u tsalele munghana wakwe a ku: “A ku na nchumu lowu tsakisaka ku fana ni ku tirhela Yehovha u ri ni ndyangu wa wena. A ndzi ehleketa leswaku swi ta ndzi tekela nkarhi wo leha leswaku ndzi tolovela vuphayona, kambe se ndza byi rhandza! Bya phyuphyisa swinene.”

[Xifaniso eka tluka 18]

Marc na Paula va ri ensin’wini