Tekelela Murhumiwa Lonkulu

“Mi va vatekeleri va mina, tanihi leswi mina ndzi nga mutekeleri wa Kreste.”—1 KOR. 11:1.

1. Ha yini hi fanele hi tekelela Yesu Kreste?

MUAPOSTOLA PAWULO u tekelele Yesu Kreste, Murhumiwa lonkulu, a tlhela a khutaza Vakreste-kulobye a ku: “Mi va vatekeleri va mina, tanihi leswi mina ndzi nga mutekeleri wa Kreste.” (1 Kor. 11:1) Endzhaku ka loko Yesu a vekele vaapostola va yena xikombiso xa ku titsongahata, hi ku va hlambisa milenge, u va byele leswi: “Ndzi mi vekele ntila, leswaku, hilaha ndzi endleke hakona eka n’wina, na n’wina mi endla hakona.” (Yoh. 13:12-15) Na hina namuntlha, hi ni vutihlamuleri byo tekelela Yesu Kreste hi marito ni hi swiendlo swa hina ni hi timfanelo leti hi ti kombisaka.—1 Pet. 2:21.

2. Hi rihi langutelo leri u nga vaka na rona hambiloko Huvo leyi Fumaka yi nga ku nyikanga lunghelo ra ku va murhumiwa?

² Exihlokweni lexi hundzeke, hi dyondze leswaku murhumiwa i munhu loyi a rhumiweke ku vula evhangeli—loyi a chumayelaka van’wana mahungu lamanene. Malunghana ni mhaka leyi, Pawulo u tlakuse swivutiso leswi tlhontlhaka mianakanyo. (Hlaya Varhoma 10:11-15.) Xiya leswaku muapostola loyi u vutisile a ku: “Va ta swi twisa ku yini loko ku nga ri na loyi a chumayelaka?” Kutani u tshahe marito ya muprofeta Esaya lama nge: “Ya languteka hakunene milenge ya lava va vulaka mahungu lamanene ya swilo leswinene!” (Esa. 52:7) Hambiloko u nga si tshama u va murhumiwa etikweni rimbe, u nga hlakulela ku va ni moya wa ku vula evhangeli, u tekelela Yesu hi ku hisekela ku chumayela mahungu lamanene. N’wexemu, vahuweleri va Mfumo va 6 957 852 ‘va endle ntirho wa ku vula evhangeli’ ematikweni ya 236.—2 Tim. 4:5.

“Hi Siye Swilo Hinkwaswo Hi Ku Landzela”

3, 4. Yesu u siye yini etilweni, naswona i yini leswi hi faneleke hi swi endla leswaku hi va valandzeri va yena?

³ Leswaku Yesu a ta hetisisa ntirho lowu a rhumiweke wona emisaveni, u siye vutomi bya yena bya le tilweni ni ku vangama ka yena kutani ‘a tichulula a teka xivumbeko xa hlonga.’ (Filp. 2:7) Xin’wana ni xin’wana lexi hi xi endlaka hi ri karhi  hi tekelela Kreste a xi nge ringani ni leswi A swi endleke loko a ha ri laha misaveni. Kambe hi nga hambeta hi ri valandzeri va yena va xiviri, hi nga naveli leswi a hi ri na swona emisaveni ya Sathana.—1 Yoh. 5:19.

⁴ Siku rin’wana muapostola Petro u byele Yesu a ku: “Waswivo! Hi siye swilo hinkwaswo hi ku landzela.” (Mat. 19:27) Petro, Andriya, Yakobo na Yohane va nambe va siya tinkoka ta vona loko Yesu a va vitana leswaku va n’wi landzela. Va tshike bindzu ra vona ro phasa tinhlampfi kutani va teka ntirho wo chumayela wu ri wa nkoka. Hi ku ya hi Evhangeli ya Luka, Petro u te: “Waswivo! Hi siye swilo swa hina hi ku landzela.” (Luka 18:28) Vo tala va hina a hi bohekanga ku siya “swilo swa hina” hinkwaswo leswaku hi landzela Yesu. Hambiswiritano, hi boheke ku ‘titshika’ leswaku hi va valandzeri va Kreste hi tlhela hi tiyimisela ku va malandza ya Yehovha. (Mat. 16:24) Sweswo swi hi vuyerise swinene. (Hlaya Matewu 19:29.) Loko hi tekelela Kreste hi ku hisekela ku vula evhangeli hi ta va ni ntsako, ngopfu-ngopfu loko hi pfune munhu leswaku a tshinela eka Xikwembu ni le ka N’wana wa xona la rhandzekaka.

5. Hlamusela ntokoto lowu kombisaka xiboho lexi muhlapfa a nga ha xi endlaka loko a dyondze ntiyiso wa Bibele.

⁵ Valmir, wanuna wa le Brazil loyi a a tshama exivindzini xa Suriname, a a ri ni bindzu ra mugodi wa nsuku. A a ri xindzendzele lexi nga ni mahanyelo yo biha. Loko se a tshama edorobeni, Timbhoni ta Yehovha ti sungule ku dyondza na yena Bibele. A a dyondza masiku hinkwawo, kutani u cince vutomi byakwe ivi a hatla a khuvuriwa. Loko a vona leswaku ntirho wakwe a wu endla leswaku swi n’wi tikela ku hanya hi ku pfumelelana ni leswi a ha ku swi dyondzaka eBibeleni, u xavise bindzu ra yena ra mugodi wa nsuku leri a ri n’wi nghenisela mali yo tala kutani a tlhelela eBrazil a ya pfuna va ka vona leswaku va kuma ntiyiso. Vahlapfa vo tala loko va dyondze ntiyiso va tshike mintirho ya vona yo tihanyisa ematikweni lama fuweke kutani va tlhelela eka rikwavo hi xikongomelo xo ya dyondzisa maxaka ya vona ni vanhu van’wana ntiyiso. Vahuweleri volavo va Mfumo va kombisa moya wa ku hisekela ku vula evhangeli.

6. Hi nga endla yini loko hi nga swi koti ku rhurhela laha ku lavekaka vahuweleri vo tala va Mfumo?

⁶ Timbhoni to tala ti rhurhele laha ku lavekaka vahuweleri vo tala va Mfumo. Van’wana va pfanga no rhurhela etikweni rimbe. Swi nga ha endleka hi nga swi koti ku rhurhela kun’wana, kambe hi nga tekelela Yesu hi ku hisekela ku chumayela.

 Yehovha U Letela Hi Ndlela Leyi Faneleke

7. Hi swihi swikolo leswi nga kona swo letela lava lavaka ku antswisa vuswikoti bya vona byo va vahuweleri va Mfumo?

⁷ Hi nga vuyeriwa eka dyondzo leyi Yehovha a hi nyikaka yona hilaha Yesu a vuyeriweke hakona eka ndzetelo lowu a wu kumeke eka Tatana wakwe. Yesu u te: “Ku tsariwe leswi eka Vaprofeta, ‘Kutani hinkwavo va ta dyondzisiwa hi Yehovha.’” (Yoh. 6:45; Esa. 54:13) Namuntlha ku ni swikolo leswi endleriweke ku letela vahuweleri va Mfumo ntsena. Entiyisweni, hinkwerhu ha vuyeriwa eka Xikolo xa Vutirheli bya le Tilweni lexi nga kona emavandlheni ya hina. Maphayona ma ni lunghelo ro ya eXikolweni xa Ntirho wa Vuphayona. Maphayona yo tala lama nga ni ntokoto ma tiphine hi ku ya exikolweni lexi ra vumbirhi. Vakulu ni malandza ya vutirheli va ya eXikolweni xa Vutirheli bya Mfumo leswaku va ta antswisa vutshila bya vona byo dyondzisa ni ku antswisa ntirho lowu va wu endlelaka vapfumeri-kulobye. Vamakwerhu vo tala lava nga vakulu ni malandza ya vutirheli lava nga tekangiki va ye eXikolweni xa Ndzetelo wa Vutirheli, lexi va leteleke ku pfuna van’wana entirhweni wo chumayela. Kasi vamakwerhu vo tala va xinuna ni va xisati lava nga varhumiwa ematikweni man’wana va leteriwile eXikolweni xa Bibele xa Giliyadi xa Watchtower.

8. Vamakwerhu van’wana va tshike yini leswaku va kuma ndzetelo wa Yehovha?

⁸ Timbhoni ta Yehovha to tala ti tshike swin’wana evuton’wini leswaku ti ta kota ku ya eswikolweni leswi. Leswaku Yugu wa le Canada a kota ku ya eXikolweni xa Ndzetelo wa Vutirheli, u tshike ntirho wa yena loko muthori wakwe a ale ku n’wi nyika masiku yo wisa. Yugu u te: “A ndzi tisoli. Kahle-kahle, loko a va ndzi nyike masiku wolawo a va ta langutela leswaku ndzi va nkhensa hi ku va ndzi hambeta ndzi tirha ekhampanini yoleyo. Kambe sweswi ndzi lunghekele ku endla xiavelo xihi na xihi lexi Yehovha a nga ta ndzi nyika xona.” Vo tala va tshike swo tala leswi a va swi rhandza evuton’wini leswaku va ta kuma ndzetelo lowu lunghiseleriweke hi Xikwembu.—Luka 5:28.

9. Nyika xikombiso lexi kombisaka vuyelo bya leswi Matsalwa ma swi dyondzisaka ni ku endla matshalatshala yo dyondzisa van’wana.

⁹ Leswi Matsalwa ma swi dyondzisaka swin’we ni ku endla matshalatshala yo dyondzisa van’wana swi pfuna ngopfu. (2 Tim. 3:16, 17) Xiya leswi humeleleke eka Saulo wa le Guatemala. U velekiwe a nga tlharihanga kahle, kutani un’wana wa vadyondzisi va yena u byele mana wa yena leswaku a nga fanelanga a n’wi sindzisa ku dyondza ku hlaya, hikuva sweswo a swi ta n’wi heta matimba. Saulo u tshike xikolo a nga si swi kota ni ku hlaya. Hambiswiritano, Mbhoni yin’wana yi dyondzise Saulo ku hlaya, yi tirhisa broxara leyi nge Titolovete Ku Hlaya Ni Ku Tsala. Hi ku famba ka nkarhi, Saulo u endle nhluvuko ku kondza a kota ku nyikela tinkulumo eXikolweni xa Vutirheli bya le Tilweni. Siku rin’wana loko mana wa Saulo a ri ensin’wini u hlangane ni mudyondzisi luya. Loko mudyondzisi yoloye a twa leswaku Saulo se wa swi kota ku hlaya, u kombele leswaku mana wa yena a ta na yena vhiki leri landzelaka. Hi vhiki leri landzelaka, mudyondzisi yoloye u vutise Saulo a ku: “Xana u ta ndzi dyondzisa yini?” Saulo u sungule ku n’wi hlayela ndzimana yo karhi ebukwini leyi nge Xana Bibele Yi Dyondzisa Yini Hakunene? Mudyondzisi loyi u te: “Swilo swa cinca hakunene, se hi wena u dyondzisaka mina!” Mudyondzisi u xiririke mihloti ya ntsako, kutani a vukarha Saulo.

Dyondzo Leyi Khumbaka Mbilu

10. Hi xihi xitirho lexi hi nga xi tirhisaka loko hi dyondzisa ntiyiso wa le Bibeleni?

¹⁰ Yesu a a dyondzisa leswi Yehovha a n’wi dyondziseke swona hi ku kongoma swin’we ni swileriso leswi kumekaka eRitweni leri tsariweke ra Xikwembu. (Luka 4:16-21; Yoh. 8:28) Hi tekelela Yesu hi ku tirhisa ndzayo yakwe ni ku namarhela Matsalwa. Hikwalaho, hinkwerhu ka hina hi vulavula hi tlhela hi anakanya hi ku twanana, naswona sweswo swi kondletela vun’we bya hina. (1 Kor. 1:10) Ha tsaka swinene leswi “hlonga ro tshembeka ni ro tlhariha” ri hi humeselaka minkandziyiso leyi sekeriweke eBibeleni leswaku yi hi pfuna ku dyondzisa swilo leswi fanaka ni ku hetisisa ntirho wa hina wa ku vula evhangeli. (Mat. 24:45; 28:19, 20) Yin’wana ya minkandziyiso yoleyo i buku leyi nge Leswi Bibele Yi Swi Dyondzisaka, leyi sweswi yi kumekaka hi tindzimi ta 179.

11. Makwerhu un’wana wa le Ethiopia u wu hlule njhani nkaneto hi ku tirhisa buku leyi nge Leswi Bibele Yi Swi Dyondzisaka?

¹¹ Ku dyondza Matsalwa hi ku tirhisa buku leyi  nge Leswi Bibele Yi Swi Dyondzisaka swi nga verhamisa ni timbilu ta vanhu lava hi kanetaka. Siku rin’wana, Lula, phayona ra xisati ra le Ethiopia, a a ri karhi a fambisa dyondzo ya Bibele, hiloko xaka ra xichudeni xakwe ri nghena va nga swi rindzelanga kutani ri va byela leswaku a va fanelanga va dyondza. Lula u vulavule ni xaka rero hi moya wo rhula, a tirhisa xifaniso lexi vulavulaka hi mali leyi nga riki ya xiviri lexi kumekaka eka ndzima 15 ebukwini leyi nge Leswi Bibele Yi Swi Dyondzisaka. Xaka leri ri vohlise mbilu kutani ri va pfumelela leswaku va ya mahlweni ni dyondzo. Entiyisweni, ri tile eka dyondzo leyi landzelaka naswona ri kombele ku dyondzeriwa Bibele, ri kala ri tshembisa leswaku ri ta hakelela dyondzo leyi. Swi nga si ya kwihi se a a ri dyondza kanharhu hi vhiki naswona ri endle nhluvuko hi tlhelo ra moya.

12. Nyika xikombiso lexi kombisaka ndlela leyi vantshwa va nga humelelaka ha yona loko va dyondzisa ntiyiso wa le Bibeleni.

¹² Vantshwa va nga pfuna van’wana hi ku tirhisa buku leyi nge Leswi Bibele Yi Swi Dyondzisaka. Loko Keanu wa le Hawaii wa malembe ya 11 hi vukhale a ri karhi a hlaya buku leyi exikolweni, xichudeni-kulobye xi n’wi vutisile xi ku: “Ha yini u nga ti tlangeli tiholideyi?” Keanu u xi hlayele nhlamulo hi ku kongoma eka nhloko-mhaka leyi nge, “Xana Hi Fanele Hi Tlangela Tiholideyi?” leyi nga eka xiengetelo xa buku leyi. Hiloko a pfula tluka ra leswi nga endzeni ra buku leyi kutani a vutisa mufana loyi loko ku ri ni nhloko-mhaka leyi a yi tsakelaka. Ku sunguriwe dyondzo ya Bibele. Eka lembe ra ntirho ra n’wexemu, Timbhoni ta Yehovha ti fambise tidyondzo ta Bibele ta 6 561 426, naswona to tala ta tona a ti tirhisa buku leyi nge Leswi Bibele Yi Swi Dyondzisaka. Xana na wena wa yi tirhisa buku leyi loko u fambisa tidyondzo ta Bibele?

13. Ku dyondza Bibele swi nga ri koka njhani rinoko ra vanhu van’wana?

¹³ Ku dyondza Matsalwa hi ku tirhisa buku leyi nge Leswi Bibele Yi Swi Dyondzisaka swi nga koka rinoko ra lava tsakelaka ku endla ku rhandza ka Xikwembu. Mpatswa wun’wana lowu nga maphayona yo hlawuleka wa le Norway wu sungule ku dyondza Bibele ni ndyangu wun’wana wa le Zambia. Mpatswa lowu wa le Zambia a wu ri ni vana vanharhu va vanhwanyana naswona a wu nga ha lavi n’wana un’wana. Loko nsati wa kona a tlhele a tika, va endle xiboho xo susa khwiri. Masiku ma nga ri mangani va nga si ya eka dokodela, va dyondze ndzima leyi nge “Langutelo Ra Xikwembu Hi Vutomi.” Xifaniso xa n’wana la nga si tswariwaka lexi nga eka ndzima yoleyo xi khumbe mpatswa wolowo swinene lerova wu cince mianakanyo ya wona malunghana ni ku susa khwiri rolero. Wu ye emahlweni wu endla nhluvuko lowunene hi tlhelo ra moya naswona wu thye ricece ra wona ra mufana vito ra makwerhu loyi a a dyondza na wona.

14. Kombisa ndlela leyi ku hanya hi ku pfumelelana ni leswi hi swi dyondzisaka swi nga tswalaka mihandzu leyinene ha yona.

¹⁴ Nchumu lowu a wu endla leswaku madyondziselo ya Yesu ma va ya nkoka hileswi a a hanya hi ku pfumelelana ni leswi a a swi dyondzisa. Vanhu  vo tala va tsakisiwa ngopfu hi mahanyelo ya Timbhoni ta Yehovha, hileswi ti tekelelaka mahanyelo ya Yesu. N’wamabindzu un’wana wa le New Zealand u fayeriwe movha kutani a yiveriwa bege. U pote mhaka leyi eka phorisa rin’wana leri nga te: “Bege ya wena u nga yi kuma ntsena loko yo thumbiwa hi Mbhoni ya Yehovha.” Mbhoni yin’wana leyi yiselaka vanhu maphepha-hungu yi thumbe bege ya kona. Loko n’wini wa bege a twa leswaku Mbhoni yi thumbe bege yoleyo, u ye ekaya ra yona. U te hefu, loko a kuma leswaku phepha ra yena ra nkoka ra ha ri kona. Makwerhu u te: “Ndzi vone swi ri swinene leswaku ndzi ku nyika bege ya wena, ngopfu-ngopfu hileswi ndzi nga Mbhoni ya Yehovha.” N’wamabindzu u hlamale ngopfu, hiloko a tsundzuka marito ya phorisa leri vulavuleke na yena mixo wolowo. Swi le rivaleni leswaku Vakreste va ntiyiso va hanya hi ku pfumelelana ni leswi dyondzisiwaka hi Bibele naswona va tekelela Yesu.—Hev. 13:18.

Tekelela Langutelo Leri Yesu A Nga Rona Hi Vanhu

15, 16. Xana hi nga endla njhani leswaku vanhu va rhandza rungula leri hi ri chumayelaka?

¹⁵ Langutelo leri Yesu a a ri na rona ri susumetele vanhu leswaku va yingisa rungula ra yena. Hi xikombiso, rirhandzu ni ku titsongahata ka yena swi endle leswaku swisiwana swi ta eka yena. Lava teke eka yena u va twele vusiwana ni ku va chavelela hi marito ya musa a tlhela a hanyisa vo tala. (Hlaya Marka 2:1-5.) Hina a hi nge endli masingita kambe hi nga va ni rirhandzu hi titsongahata hi tlhela hi va ni ntwela-vusiwana, ku nga timfanelo leti kokelaka vanhu entiyisweni.

¹⁶ Ntwela-vusiwana wu tirhile loko Tariua, phayona ro hlawuleka a nghene ekaya ra mukhalabye la vuriwaka Beere, la tshamaka eswihlaleni leswi nga swoxe swa Kiribati, ePacific Dzonga. Hambileswi mukhalabye loyi a a nga tsakeli, Tariua u xiye leswaku a a lamarile hiloko a n’wi twela-vusiwana. U n’wi vutisile a ku: “Xana u tshama u swi twa leswi Xikwembu xi swi tshembisaka vanhu lava vabyaka ni lava dyuhaleke?” Kutani a n’wi hlayela tindzimana to karhi eka vuprofeta bya Esaya. (Hlaya Esaya 35:5, 6.) Mukhalabye loyi u vule hi ntsako a ku: “Ndzi ni malembe ndzi ri karhi ndzi hlaya Bibele naswona ndzi endzeriwe hi murhumiwa wa vukhongeri bya mina malembe yo tala, kambe a ndzi nga si tshama ndzi ti hlaya tindzimana leti eBibeleni.” Beere u sungule ku dyondzeriwa Bibele naswona u endle nhluvuko lowunene hi tlhelo ra moya. A a lamale ngopfu, kambe sweswi se u khuvuriwile, naswona hi yena a khathalelaka ntlawa lowu nga woxe naswona u famba a chumayela mahungu lamanene exihlaleni xexo hinkwaxo.

Hambeta U Tekelela Kreste

17, 18. (a) U nga swi kotisa ku yini ku va muchumayeri loyi swi n’wi fambelaka kahle? (b) Hi yihi mikateko leyi nga ta kumiwa hi lava va wu tekaka wu ri wa nkoka ntirho wa vona wo chumayela?

¹⁷ Hi nga va vachumayeri lava swi va fambelaka kahle loko hi hlakulela timfanelo leti Yesu a a ri na tona hi tlhela hi ti kombisa, hilaha mintokoto leyi tsakisaka ya le nsin’wini yi kombisaka hakona. Hi fanele hi tekelela Kreste hi ku hisekela ku vula evhangeli.

¹⁸ Eka lembe-xidzana ro sungula, loko van’wana va hundzuka vadyondzisiwa va Yesu, Petro u vutisile a ku: “Kahle-kahle hi ta kuma yini?” Yesu u hlamule a ku: “Un’wana ni un’wana la siyeke tindlu kumbe vamakwavo va xinuna kumbe vamakwavo va xisati kumbe tatana kumbe manana kumbe vana kumbe masimu hikwalaho ka vito ra mina u ta nyikiwa swo tala swinene ku tlula sweswo, naswona u ta dya ndzhaka ya vutomi lebyi nga heriki.” (Mat. 19:27-29) Na hina hi ta kuma mikateko yoleyo loko hi hambeta hi tekelela Yesu Kreste, Murhumiwa lonkulu.

A Wu Ta Hlamula Njhani?

• Yehovha u hi letela njhani leswaku hi va vavuri va evhangeli?

• Ha yini buku leyi nge Leswi Bibele Yi Swi Dyondzisaka yi pfuna swinene ensin’wini?

• Hi nga ri tekelela njhani langutelo leri Yesu a nga na rona hi vanhu?

[Swivutiso Swa Dyondzo]

[Xifaniso eka tluka 17]

Loko Yesu a vitana Petro, Andriya, Yakobo na Yohane leswaku va n’wi landzela a va ha yima-yimanga

[Xifaniso eka tluka 19]

Tibuku to tanihi leyi nge “Leswi Bibele Yi Swi Dyondzisaka” ti hi pfuna ku dyondzisa swilo leswi fanaka