Ku Chumayela Mahungu Lamanene eTintshaveni Ta Andes

AHI etlele hi ri 18 exiyindlwanini lexi nga semendheriwangiki. A hi yingisele pongo ra mpfula leyi a yi na hi matimba hi ri karhi hi rhurhumela endzeni ka minkumba ya hina. Loko hi xiya xiyimo lexi nga tsakisiki xa xiyindlwana lexi a hi etlele eka xona, hi tivutisile loko hi ri vanhu vo sungula ku etlela eka xona.

Hikwalaho ka yini vanhu va 18 va endzele ndhawu leyi? Nhlamulo yi titshege hi ku navela ka hina ku yingisa xileriso xa Yesu xo chumayela mahungu lamanene “endhawini ya le kule swinene ya misava.” (Mint. 1:8; Mat. 24:14) A hi te eku chumayeleni ensin’wini leyi nga yoxe ya tintshava ta Andes le Bolivia.

Ntlhontlho Wo Ya Fika Le Andes

Ntlhontlho wo sungula a ku ri ku ya fika kwalaho. Hi twe leswaku swo famba swa mani na mani swo ya etindhawini leti ta le kule a swi nga fambi nkarhi ni nkarhi. Loko bazi ra hina ri fika, hi kume leswaku i ritsongo swinene kutani van’wana va hina a va fanele va yima kunene. Kambe hinkwerhu ka hina hi hetelele hi fikile laha a hi ya kona.

Xikongomelo xa hina a ku ri ku chumayela vanhu va le swimitanini swa le tintshaveni ta Andes le Bolivia. Loko hi xika ebazini, lava a va rhwale nhundzu entlaweni wa hina va fambe hi vukheta va salane endzhaku eswindledyanini va khandziya ntshava.

 Hambileswi swimitana swa kona a swi vonaka swi ri switsongo, makaya ya kona a ma ri ekule ni le kule lerova hi hete tiawara to tala ku fika eximutanini ha xin’we. Ku nga khathariseki leswaku hi famba mpfhuka wo tanihi kwihi, loko hi languta le kule a hi vona yindlu yo karhi. Hakanyingi a hi lahleka eswindledyanini swo gombonyoka leswi hundzaka exikarhi ka masimu.

“Ha Yini Mi Nga Tanga Khale?”

Wansati un’wana loko a twa leswaku hi fambe mpfhuka wo leha swinene u kale a hi pfumelela ku tirhisa xitanga xa yena ni tihunyi ta yena leswaku hi tiswekela swakudya swa nhlikanhi. Loko wanuna un’wana a twa leswi Bibele yi swi dyondzisaka malunghana ni xiyimo xa lava feke, u vutisile a ku, “Ha yini mi nga tanga khale?” A a tsakela swinene lerova loko hi suka eximutanini xa ka vona, u hi heleketile leswaku a ta vutisa swivutiso leswi engetelekeke loko hi ri karhi hi famba. Kasi wanuna un’wana yena a a nga si tshama a twa hi ta Timbhoni ta Yehovha kutani u ti tsakele swinene tibuku ta hina. U hi nkhense swinene hileswi hi teke ivi a hi nyika xilotlelo xa dlhadlha rakwe leswaku hi etlela eka rona.

Hi vusiku byin’wana, a ku ri ni munyama lowukulu lerova hi vambe matende ya hina exikarhi ka nkele wa vusokoti lebyikulu bya ntima hi nga swi tivi. Byi hatle byi hi komba leswaku a byi hi lavi ivi byi hi luma. A hi karhele ngopfu lerova a hi nga ta swi kota ku suka kwalaho, naswona lexi tsakisaka vusokoti a bya ha vanga na mhaka na hina.

Eku sunguleni timbambu ta hina a ti pandza hikwalaho ko etlela ehansi kambe nivusiku a hi nga ha twi nchumu. Kutani nimixo se a hi rivale switlhavi leswi hi veke na swona loko hi hlalela switsunga leswi ematlhelo ka swona a  ku ri ni mapapa ni tintshava leti a ti funengetiwe hi gamboko le kule. Ku miyela koloko a ku kavanyetiwa ntsena hi pongo ra ku khuluka ka mati ya xinambyana ni ku yimbelela ka swinyenyana.

Loko hi hlambile exinambyanini, hi kambisise ndzimana ya Bibele swin’we, hi fihlula kutani hi teka riendzo hi khandziya ntshava hi ya eximutanini xin’wana xa le kule hi nga jahanga. Ku khandziya ka hina ntshava ku ve ni vuyelo lebyinene. Hi hlangane ni mukhegula un’wana loyi a rileke loko a twa leswaku vito ra Xikwembu leri nge Yehovha ri kona eBibeleni. U hlamale ngopfu. Sweswi u kota ku vitana Xikwembu hi vito loko a khongela!

Mukhalabye un’wana u vule leswaku Xikwembu xi fanele xi n’wi tsundzukile, hiloko a sungula ku yimbelela risimu leri nge hi rhumeriwe hi tintsumi. Kasi wanuna un’wana loyi a a vabya swinene lerova a a tsandzeka ni ku huma endlwini, u hi byele leswaku a nga kona munhu la tshamaka eximutanini xa ka vona loyi a tshameke a tikarhata a n’wi endzela. U hlamale ngopfu loko a twa leswaku a hi huma le La Paz. Wanuna un’wana yena u tsakisiwe swinene hileswi Timbhoni ta Yehovha ti endzelaka emakaya ya vanhu, kasi vukhongeri byin’wana byi va vitana hi ku ba tinsimbhi ta le kerekeni.

Endhawini yoleyo a ku na gezi, kutani loko ri phumela, vanhu va ya eku etleleni ivi va pfuka loko dyambu ri tlhava. Hikwalaho, leswaku hi kuma vanhu emakaya, a hi fanele hi sungula ku chumayela hi awara ya tsevu nimixo. Loko hi nga endli tano, a hi ta kuma vanhu se va ye emasin’wini. Hi ku famba ka nkarhi lava se a va ri eku tirheni a va tshika ku tirha va yingisela rungula ra hina leri humaka eRitweni ra Xikwembu, kumbexana va pfumelela ni tihomu leswaku ti wisanyana ku koka puluhu. Vanhu vo tala lava a hi va kuma emakaya a va hi andlalela madzovo ya tinyimpfu hi tshama eka wona kutani va vitana ndyangu hinkwavo wu ta yingisela. Varimi van’wana va nyikele hi masaka lamakulu ya mavele va tlangela minkandziyiso leyi sekeriweke eBibeleni leyi hi va siyeleke yona.

“A Mi Ndzi Rivalanga”

Entiyisweni, leswaku vanhu va endla nhluvuko eka vutivi bya Bibele, va fanele va endzeriwa ko tala. Vo tala va hi kombele leswaku hi tlhela hi vuya hi ta va dyondzisa swo tala. Hikwalaho ka leswi va hi kombeleke, hi tlhelele ko tala endhawini leyi ya le Bolivia.

Eka riendzo rin’wana, mukhegula un’wana a a tsake ngopfu hileswi hi tlheleke hi vuya, lerova a ku: “Ndzi mi teka mi ri vana va mina. A mi ndzi rivalanga.” Wanuna un’wana u hi nkhensile hikwalaho ka ntirho wa hina kutani a hi rhamba leswaku loko hi tlhela hi vuya hi ya tshama ekaya ka yena. Kumbexana hakelo leyikulu ya matshalatshala ya hina a ku ri ku twa leswaku wansati un’wana loyi hi n’wi chumayeleke u rhurhele edorobeni naswona se a a chumayela mahungu lamanene.

Hi siku ro hetelela ra riendzo ra hina, hi heleriwe hi pharafini ro sweka ha rona naswona a hi saleriwe hi swakudya switsongo. Hi rhotele tihunyi ivi hi sweka swakudya leswi a hi sele na swona kutani hi sungula ku ba hi nenge hi muka. A hi ri ekule swinene ni doroba laha a hi ta khandziyela kona bazi. Loko hi fika kona se a ri perile.

Ku Tlhelela eKaya

Riendzo ro tlhelela ekaya na rona ri ve ni swiphiqo swa rona hikuva hi onhakeriwe hi bazi. Hi ku famba ka nkarhi hi kume lifiti eka lori yin’wana leyi a yi tele hi vanhu. Hi pfulekeriwe hi nkarhi wo chumayela vakhandziyi-kulorhi lava a va lava ku tiva leswaku ha yini hi ri kwalaho. Hambileswi hi ntumbuluko vanhu va kona va nga ni tingana, va ni malwandla ni xinghana.

Endzhaku ko famba tiawara ta kaye hi lori, hi fike ekaya hi tsakamile naswona hi rhurhumela hi xirhami. Kambe riendzo ra hina ri ve ni vuyelo lebyinene. Loko hi ri endleleni, hi kote ku hlela dyondzo ya Bibele ni wansati un’wana loyi a tshamaka edorobeni.

Hakunene a ku ri lunghelo ku twarisa mahungu lamanene eka vanhu va le tindhawini leti ta le kule. Hi chumayele eka swimitana swa mune ni le swimitanini leswitsongo swa ntsandza-vahlayi. Hi anakanye hi marito lawa: “Milenge ya loyi a tisaka mahungu lamanene ya languteka hakunene ehenhla ka tintshava, loyi a twarisaka ku rhula, loyi a tisaka mahungu lamanene ya leswo antswa, loyi a twarisaka ku ponisiwa.”—Esa. 52:7; Rhom. 10:15.

[Xifaniso eka tluka 17]

Hi lunghekele ku ya chumayela mahungu lamanene