Xana U Languta Van’wana Hilaha Yehovha A Va Langutaka Hakona?

“Ku nga vi na ku avana emirini . . . Swirho swa wona swi [fanele swi] khathalelana hi ndlela leyi fanaka.”—1 KOR. 12:25.

1. Xana u titwe njhani loko u nghena ro sungula eparadeyisini ya moya?

LOKO ha ha ku tihambanisa ni misava yo homboloka kutani hi sungula ku tihlanganisa ni vanhu va Yehovha, a swi kanakanisi leswaku a hi tsakile loko hi vona ndlela leyi va rhandzanaka ni ku khathalelana ha yona. Kunene va hambane ngopfu ni vanhu lava lawuriwaka hi Sathana lava nga ni tihanyi, rivengo ni timholovo! Hi nghene eparadeyisini ya moya leyi ku rhula ni vun’we ku ngo va tshamelo maxelo.—Esa. 48:17, 18; 60:18; 65:25.

2. (a) I yini lexi nga hi susumetelaka ku languta swihoxo swa van’wana? (b) Xana ku nga ha laveka leswaku hi endla yini?

² Hambiswiritano, loko nkarhi wu ri karhi wu famba, hi nga ha sungula ku languta swihoxo swa vamakwerhu hikwalaho ka leswi hi nga hetisekangiki. Ku nga hetiseki ka hina ku nga hi endla leswaku hi vona swihoxo swa vamakwerhu hi ndlela leyi hundzeletiweke ematshan’weni yo languta timfanelo ta vona ta moya. Kahle-kahle, hi rivala ku va languta hilaha Yehovha a va langutaka hakona. Loko sweswo swi humelela eka hina, ku ta laveka leswaku hi sungula ku kambisisa ndlela leyi hi langutaka van’wana ha yona kutani hi yi endla yi pfumelelana ni langutelo lerinene ra Yehovha.—Eks. 33:13.

Leswi Yehovha A Va Vonisaka Xiswona Vamakwerhu

3. Xana Bibele yi ri fanisa na yini vandlha ra Vakreste?

³ Hilaha swi tsariweke hakona eka 1 Vakorinto 12:2-26, muapostola Pawulo u fanise vandlha  ra Vakreste lava totiweke ni “swirho swo tala” swa miri. Tanihi leswi swirho swa miri swi hambaneke, ni swirho swa vandlha swi ni vumunhu ni vuswikoti lebyi hambaneke. Kambe, Yehovha u swi amukela swi ri tano. Xirho xin’wana ni xin’wana xa vandlha u xi teka xi ri xa nkoka naswona wa xi rhandza. Hilaha ku fanaka Pawulo na yena u hi tsundzuxa leswaku swirho swa vandlha swi fanele “swi khathalelana hi ndlela leyi fanaka.” Leswi swi nga ha tika hikuva vumunhu bya van’wana byi nga ha va byi hambanile ni bya hina.

4. Ha yini hi fanele hi antswisa ndlela leyi hi langutaka vamakwerhu ha yona?

⁴ Hi nga ha va hi ri ni mboyamelo wo languta ku tsana ka vamakwerhu. Loko hi endla tano, sweswo swi fana ni loko hi languta nchumu wo karhi ntsena exifanisweni. Kambe Yehovha yena u languta xifaniso hinkwaxo. Hi nga ha languta xo karhi lexi hi nga xi tsakeliki eka makwerhu kasi Yehovha u languta hinkwaswo ku katsa ni timfanelo letinene ta makwerhu yoloye. Loko hi tikarhatela ku tekelela Yehovha, hi ta ya hi kondletela rirhandzu ni vun’we evandlheni.—Efe. 4:1-3; 5:1, 2.

5. Ha yini hi nga fanelanga hi avanyisa van’wana?

⁵ Yesu a a swi tiva kahle leswaku vanhu lava nga hetisekangiki hakanyingi va ni mboyamelo wo xopaxopa swihoxo. U tsundzuxile a ku: “Tshikani ku avanyisa leswaku mi nga avanyisiwi.” (Mat. 7:1) Xiya leswaku Yesu a nga vulanga a ku: “Mi nga avanyisi”; kambe u te: “Tshikani ku avanyisa.” A a swi tiva leswaku vo tala va vayingiseri vakwe ana se a va ri ni mukhuva wo xopaxopa swihoxo swa van’wana. Xana hi nga va hi ri ni mukhuva wolowo? Loko hi ri ni mukhuva wo tano, hi fanele hi tikarhatela ku wu tshika leswaku hi nga avanyisiwi hi ndlela yo vava. Ho va vamani hina lerova hi nga sola-sola munhu un’wana loyi Yehovha a n’wi vekeke ku va mulanguteri kumbe hi vula leswaku a nga fanelanga a va xirho xa vandlha? Swi nga endleka makwerhu a ri ni ku tsana ko karhi, kambe loko Yehovha a hambeta a n’wi amukela, xana swi ta va swi fanerile leswaku hi n’wi sola-sola? (Yoh. 6:44) Xana hakunene ha pfumela leswaku Yehovha u rhangela nhlengeletano ya yena nileswaku loko ku fanele ku endliwa mindzulamiso yo karhi, u ta teka goza hi nkarhi wa yena lowu faneleke?—Hlaya Varhoma 14:1-4.

6. Xana Yehovha u ma languta njhani malandza yakwe?

⁶ Nchumu lowu hlamarisaka hileswi Yehovha a nga vonaka leswi Mukreste un’wana ni un’wana a nga kotaka ku swi endla loko se a hetisekile emisaveni leyintshwa. Nakambe u tiva ni nhluvuko lowu se a wu endleke hi tlhelo ra moya. Hikokwalaho, a nga na xivangelo xo languta ku tsana ka munhu ha un’we. Ha hlaya eka Pisalema 103:12: “Kukota leswi vuhuma-dyambu byi nga ekule ni vupela-dyambu, hi ndlela leyi fanaka, ku tlula ka hina milawu u ku veke ekule na hina.” Hakunene hi fanele hi swi tlangela sweswo!—Ps. 130:3.

7. Xana hi dyondza yini eka ndlela leyi Yehovha a languteke Davhida ha yona?

⁷ EMatsalweni hi vona vumbhoni bya leswaku Yehovha u ni vuswikoti lebyi hlamarisaka byo vona timfanelo letinene eka munhu. Xikwembu xi vule leswaku Davhida i “nandza wa mina Davhida, loyi a hlayiseke swileriso swa mina ni loyi a fambeke endzhaku ka mina hi mbilu yakwe hinkwayo hi ku endla ntsena leswi a swi lulamile ematihlweni ya mina.” (1 Tih. 14:8) Entiyisweni  ha swi tiva leswaku Davhida u tshame a dyoha. Hambiswiritano, Yehovha u hlawule ku languta timfanelo ta yena letinene hikuva a a swi tiva leswaku mbilu ya Davhida a yi lulamile.—1 Tikr. 29:17.

Languta Vamakwenu Hilaha Yehovha A Va Langutaka Hakona

8, 9. (a) Xana hi nga fana na Yehovha hi ndlela yihi? (b) Xana sweswo swi nga fanisiwa na yini naswona hi nga dyondza yini?

⁸ Yehovha u kota ku tiva leswi nga embilwini, kambe hina a hi swi koti. Lexi hi xona xivangelo lexi twalaka xa leswaku hi nga avanyisi van’wana. A hi swi tivi hinkwaswo leswi van’wana va swi anakanyaka. Hi fanele hi ringeta ku tekelela Yehovha hi ku ka hi nga anakanyi ngopfu hi ku nga hetiseki ka vanhu, loku nga ta hetelela ku nyamalarile. Xana a hi swinene ku tivekela pakani yo lava ku fana na yena emhakeni leyi? Loko hi endla tano, hi ta hoxa xandla swinene eku kondleteleni ka ku rhula ni vamakwerhu.—Efe. 4:23, 24.

⁹ Hi xikombiso, anakanya hi yindlu leyi hlakaleke—magadasi ma le ku weni, mafasitere ma fayekile naswona silingi yi onhiwe hi timpfula. Vanhu vo tala va nga ha ehleketa leswaku swa antswa yi vhela yi hirimuxiwa hikuva a yi languteki. Kambe munhu un’wana a nga ha ehleketa swin’wana hi yindlu yoleyo. A nga ha ehleketa hi makhumbi ya yona lama ha tiyeke nileswaku swi nga koteka ku pfuxa yindlu yoleyo. U xava yindlu yoleyo kutani a yi pfuxa a yi endla leswaku yi languteka kahle. Endzhaku ka sweswo vahundzi va ndlela va ta yi vona yi ri kaya leri tsakisaka. Xana hi nga fana ni munhu loyi a endleke matshalatshala yo pfuxa yindlu leyi? Ematshan’weni yo languta swihoxo swa vamakwerhu, xana hi nga languta timfanelo ta vona letinene ni leswi va nga kotaka ku swi endla leswaku va ya emahlweni va kula hi tlhelo ra moya? Loko hi endla tano, hi ta rhandza vamakwerhu hikwalaho ka timfanelo ta vona letinene hilaha Yehovha a endlaka hakona.—Hlaya Vaheveru 6:10.

10. Xana ndzayo leyi nga eka Vafilipiya 2:3, 4 yi nga hi pfuna njhani?

¹⁰ Muapostola Pawulo u nyikele ndzayo yin’wana leyi nga hi pfunaka ku va ni vuxaka lebyinene ni hinkwavo evandlheni. U khutaze Vakreste a ku: “Mi nga endli nchumu hi ku kanetana kumbe hi ku tikurisa, kambe hi mianakanyo yo titsongahata mi teka van’wana va ri lava tlakukeke eka n’wina, mi nga veki tihlo etimhakeni ta n’wina ntsena, kambe ni le timhakeni ta van’wana.” (Filp. 2:3, 4) Loko hi titsongahata swi ta hi pfuna leswaku hi va ni langutelo lerinene hi van’wana. Loko hi khathala hi swilaveko swa van’wana kutani hi languta timfanelo letinene eka vona swi ta tlhela swi hi pfuna leswaku hi va languta hilaha Yehovha a va langutaka hakona.

11. Hi kwihi ku cinca loku veke kona emavandlheni man’wana?

¹¹ Emalembeni ya sweswinyana, ku cinca loku nga kona emisaveni namuntlha ku endla vanhu va rhurha-rhurha. Emadorobeni man’wana ku tshama vanhu lava humaka ematikweni yo tala yo hambana-hambana. Vanhu van’wana lava ha ku rhurhelaka laha hi tshamaka kona va sungula ku tsakela ntiyiso wa Bibele, naswona se hi gandzela Yehovha swin’we na vona. Vanhu volavo va “huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlav. 7:9) Hikwalaho ka sweswo, yo tala ya mavandlha ya hina ma vumbiwa hi vanhu lava humaka emisaveni hinkwayo.

12. Hi rihi langutelo leri hi faneleke hi tshama hi ri na rona hi van’wana, naswona ha yini sweswo swi tika minkarhi yin’wana?

¹² Loko hi ri evandlheni hi fanele hi tikarhatela ngopfu ku va ni langutelo lerinene hi vanhu van’wana. Sweswo swi lava leswaku hi tsundzuka ndzayo ya muapostola Petro ya ku kombisa “xinakulobye xa vumakwerhu lexi nga riki na vukanganyisi,” ni ku ‘rhandzana swinene swi suka embilwini.’ (1 Pet. 1:22) Swi nga ha tika ku hlakulela ku va ni rirhandzu ra xiviri laha ku nga ni vanhu lava humaka ematikweni yo hambana-hambana. Ndhavuko wa vapfumeri-kulorhi wu nga ha va wu hambanile swinene ni wa hina, naswona ku hambana koloko ku nga ha va ku katsa dyondzo ya vona, timali ni rixaka leri va humaka eka rona. Xana swa ku tikela ku twisisa ndlela leyi va anakanyaka kumbe va endlaka swilo ha yona? Swi nga ha endleka na vona va titwa hi ndlela leyi fanaka ha wena. Nilokoswiritano, hinkwerhu ha tsundzuxiwa: “Rhandzani nhlengeletano ya vamakwenu hinkwayo.”—1 Pet. 2:17.

13. I mindzulamiso yihi leyi hi nga ha bohekaka ku yi endla eka ndlela leyi hi anakanyaka ha yona?

 ¹³ Swi nga ha lava hi lulamisa ndlela leyi hi anakanyaka ha yona leswaku hi rhandza vamakwerhu hinkwavo. (Hlaya 2 Vakorinto 6:12, 13.) Xana hi tshama hi tikuma hi vula marito yo tanihi lama nge, “A ndzi na xihlawuhlawu, kambe . . . ” ivi hi vula swilo swin’wana swo biha leswi hi swi tekaka swi tolovelekile eka rixaka ro karhi? Sweswo swi nga ha kombisa leswaku hi fanele hi tsuvula xihlawuhlawu lexi nga ha vaka xi dzime timitsu etimbilwini ta hina. Hi nga ha tivutisa hi ku, ‘Xana nkarhi ni nkarhi ndzi tikarhatela ku tolovela vanhu va ndhavuko wun’wana?’ Loko hi tikambisisa tano swi ta hi pfuna leswaku hi antswisa ndlela leyi hi kombisaka vamakwerhu rirhandzu ha yona emisaveni hinkwayo.

14, 15. (a) Nyikela swikombiso swa vanhu lava lulamiseke ndlela leyi a va va languta ha yona vanhu van’wana. (b) Xana hi nga va tekelela njhani?

¹⁴ Bibele yi hi nyika swikombiso leswinene swa vanhu lava lulamiseke langutelo ra vona, un’wana wa vona ku nga muapostola Petro. Leswi a ri Muyuda, Petro u fanele a papalate ku nghena ekaya ra munhu wa Matiko. Anakanya ndlela leyi a faneleke a titwe ha yona loko a komberiwa leswaku a endzela kaya ra Korneliyo loyi a ri munhu wa Matiko loyi a nga yimbangiki! Petro u lulamise langutelo ra yena, a swi xiya leswaku a ku ri ku rhandza ka Xikwembu leswaku vanhu va matiko hinkwawo va nghena evandlheni ra Vukreste. (Mint. 10:9-35) Sawulo, loyi hi ku famba ka nkarhi a veke muapostola Pawulo, na yena u boheke ku lulamisa langutelo ra yena kutani a tsuvula xihlawuhlawu lexi a ri na xona embilwini. U pfumerile leswaku a a va venga swinene Vakreste lerova ‘a a tshamela ku xanisa vandlha ra Xikwembu ni ku ri hlakata hilaha ku tlurisaka.’ Hambiswiritano, loko Hosi Yesu a tshinye Pawulo, u lulamise langutelo rakwe, a pfanga no sungula ku pfumela ku kongomisiwa hi lava a nga tshama a va xanisa.—Gal. 1:13-20.

¹⁵ A swi kanakanisi leswaku na hina moya wa Yehovha wu nga hi pfuna leswaku hi lulamisa langutelo ra hina. Loko hi xiya leswaku ha ha ri ni moyanyana wa xihlawuhlawu, a hi tikarhateleni ku wu tsuvula ni ku “hlayisa vun’we bya moya exibohweni lexi hlanganisaka xa ku rhula.” (Efe. 4:3-6) Bibele yi hi khutaza ku ‘ambala rirhandzu, hikuva i xiboho lexi hetisekeke xa vun’we.’—Kol. 3:14.

Ku Tekelela Yehovha Loko Hi Ri eNsin’wini

16. Hi xihi xikongomelo xa Xikwembu malunghana ni vanhu?

¹⁶ Muapostola Pawulo u tsarile a ku: “Xikwembu a xi yi hi nghohe.” (Rhom. 2:11) Xikongomelo xa Yehovha hileswaku vanhu va matiko hinkwawo va n’wi gandzela hi vun’we. (Hlaya 1 Timotiya 2:3, 4.) Leswaku a hetisisa xikongomelo xolexo u endle leswaku “mahungu lamanene lama nga heriki” ma chumayeriwa eka “matiko hinkwawo ni tinyimba hinkwato ni tindzimi hinkwato  ni vanhu hinkwavo.” (Nhlav. 14:6) Yesu u te: “Nsimu i misava.” (Mat. 13:38) Xana mhaka leyi yi ku khumba njhani swin’we ni ndyangu wa ka n’wina?

17. Xana hi nga va pfuna njhani vanhu va mixaka hinkwayo?

¹⁷ A hi vanhu hinkwavo lava swi kotaka ku ya ematikweni man’wana va ya chumayela rungula ra Mfumo. Nilokoswiritano, hi nga ha swi kota ku chumayela vanhu lava humaka ematikweni man’wana lava tshamaka ensin’wini ya hina. Xana hi tshama hi lunghekele ku chumayela vanhu va mixaka hinkwayo, ku nga ri lava se ku nga malembe hi ri karhi hi va chumayela? Ha yini u nga tiyimiseli ku teka goza ro chumayela vanhu lava nga si tshamaka va dyondzisiwa ntiyiso?—Rhom. 15:20, 21.

18. Xana Yesu u kombise njhani leswaku u lava ku pfuna vanhu?

¹⁸ Yesu a a swi lava hi mbilu hinkwayo ku pfuna vanhu hinkwavo. A nga chumayelanga ndhawu yin’we ntsena. Rungula rin’wana ra le Bibeleni ri hi byela leswaku u “[teke] pfhumba ra ku famba hi miti ni swimitana hinkwaswo.” Kutani “loko a vona mintshungu a yi twela vusiwana,” ivi a vula leswaku yi fanele yi pfuniwa.—Mat. 9:35-37.

19, 20. Hi tihi tindlela tin’wana leti hi nga kombisaka ha tona leswaku Yehovha na Yesu va khathala hi vanhu va mixaka hinkwayo?

¹⁹ Hi tihi tindlela tin’wana leti u nga kombisaka langutelo leri fanaka ha tona? Van’wana va endle matshalatshala yo ya chumayela ensin’wini ya ka vona leyi nga tirhiwiki minkarhi hinkwayo. Yi nga ha katsa tindhawu ta mabindzu, tiphaka, switichi, kumbe emahlweni ka tifulete leti swi nga oloviki ku nghena eka tona. Van’wana va endle matshalatshala yo dyondza ririmi rin’wana leswaku va kota ku chumayela vanhu va rixaka ro karhi lava se va tshamaka endhawini ya ka vona kumbe ku ya chumayela ensin’wini leyi a yi nga tirhiwi nkarhi na nkarhi. Ku dyondza ku xeweta vanhu volavo hi ririmi ra vona swi nga kombisa leswaku wa khathala swinene ha vona. Loko hi nga ri ku dyondzeni ka ririmi ro karhi, xana hi nga khutaza lava nga eku dyondzeni ka ririmi rin’wana? Entiyisweni, a hi lavi ku heta van’wana matimba kumbe hi va vutisa leswaku ha yini va tikarhatela ku chumayela vanhu lava humaka ematikweni man’wana. Vanhu hinkwavo i va risima emahlweni ka Xikwembu naswona hi lava ku languta swilo hilaha xi swi langutaka hakona.—Kol. 3:10, 11.

²⁰ Nakambe ku languta vanhu hi ndlela leyi Xikwembu xi va langutaka ha yona swi vula ku chumayela vanhu hinkwavo, ku nga khathariseki swiyimo swa vona. Van’wana va nga ha va va pfumala makaya, va thyakile kumbe va tikhome hi ndlela yo biha. Loko vanhu vo karhi va nga hi khomi kahle, a hi fanelanga hi vhela hi anakanya leswaku rixaka rero hinkwaro ri bihile. Vanhu van’wana a va nga n’wi khomi kahle Pawulo kambe sweswo a nga swi pfumelelanga swi n’wi tshikisa ku chumayela vanhu va rixaka ra kona. (Mint. 14:5-7, 19-22) A a tshemba leswaku vanhu van’wana va ta amukela ntiyiso.

21. Xana loko u languta vanhu van’wana hilaha Yehovha a va langutaka hakona sweswo swi ta ku pfuna njhani?

²¹ Swi le rivaleni leswaku hi fanele hi va ni langutelo leri faneleke, ku nga langutelo ra Yehovha loko hi tirhisana ni vamakwerhu va le tikweni ra rikwerhu ni lava humaka ematikweni man’wana ni vanhu va le nsin’wini. Loko hi ya hi kombisa langutelo ra Yehovha swinene hi ta ya hi kondletela vun’we ni ku rhula. Nakambe hi ta faneleka ku pfuna van’wana leswaku va rhandza Yehovha, Xikwembu lexi nga “kombisangiki xihlawuhlawu” kambe lexi kombisaka rirhandzu eka vanhu hinkwavo, “hikuva hinkwavo ka vona i ntirho wa mavoko [ya xona].”—Yobo 34:19.

Xana U Nga Hlamula?

• Hi rihi langutelo leri hi faneleke hi ri papalata malunghana ni ndlela leyi hi langutaka vamakwerhu ha yona?

• Hi nga n’wi tekelela njhani Yehovha malunghana ni ndlela leyi hi langutaka vamakwerhu ha yona?

• Xana u dyondze yini malunghana ni ndlela leyi hi faneleke hi va languta ha yona vamakwerhu emisaveni hinkwayo?

• Xana hi nga yi tekelela njhani ndlela leyi Yehovha a va langutaka ha yona vanhu loko hi ri ensin’wini?

[Swivutiso Swa Dyondzo]

[Xifaniso eka tluka 26]

Xana u nga xi endla njhani xinghana ni vanhu va mindhavuko yin’wana?

[Xifaniso eka tluka 28]

Hi tihi tindlela tin’wana leti u nga kotaka ku chumayela vanhu vo tala mahungu lamanene ha tona?