Xitshembiso Xa Nkoka Swinene

NDZI endle xitshembiso xa nkoka swinene. I nge ndzi hlamusela leswi ndzi susumeteleke ku endla xitshembiso lexi, mina manana la ha riki muntshwa wa le Spaniya.

Endyangwini wa ka hina a ku ri hava ku rhula na ntwanano. Ndyangu wa ka hina wu ve ni gome lerikulu loko ndzisana ya mina yi fa eka khombo leri chavisaka yi ri na mune wa malembe hi vukhale. Ku tlula kwalaho, Manana a a nga tsakanga evukatini hikwalaho ka mahanyelo ya tatana lama nga tsakisiki. Hambiswiritano, xiyimo xexo xo tika a xi n’wi sivelanga leswaku a dyondzisa mina na buti wa mina mahanyelo lamanene.

Hi ku famba ka nkarhi, buti wa mina u tekile kutani na mina ndzi tekiwile. Endzhakunyana ka sweswo, Manana u kumeke a ri ni vuvabyi bya khensa, lebyi heteleleke byi n’wi dlayile. Kambe loko a nga si fa, u hi nyike xuma xo karhi.

Wansati un’wana loyi a n’wi toloveleke u vulavule na yena hi ta ntshembo wa le Matsalweni wa ku pfuxiwa ka vafi, kutani Manana u pfumele ku dyondzeriwa Bibele. Loko se a ri kusuhi ni ku fa, rungula leri nyikaka ntshembo ra le Bibeleni ri endle leswaku a hanya vutomi lebyi nga ni xikongomelo ni ku n’wi pfuna leswaku a kuma ntsako.

Loko hi vona ku cinca loku a ku endleke hikwalaho ka rungula ra le Bibeleni, mina na buti wa mina hi sungule ku dyondza Rito ra Xikwembu. Ndzi khuvuriwile ndzi va Mbhoni ya Yehovha ka ha sele n’hweti leswaku ndzi tswala n’wana wa mina wa vumbirhi, xinhwanyetana xo saseka lexi hi xi thyeke Lucía.

Siku leri ndzi khuvuriweke ha rona a ri ri ra nkoka swinene eka mina. Xivangelo xin’wana hileswi se a ndzi ri munhu wa Yehovha, hikuva a ndzi tinyiketele eka yena leswaku ndzi n’wi tirhela hilaha ku nga heriki. Xivangelo xin’wana hileswaku a ndzi ta kota ku byela vana va mina lava rhandzekaka hi ta ripfumelo ra mina.

Kambe swi nga si ya kwihi xivangelo xa vumbirhi xa ntsako wa mina xi kavanyetiwile. Loko Lucía a ri na mune wa malembe hi vukhale, khwiri ra yena ri sungule ku vava swinene. Endzhaku ko n’wi kambela minkarhi yo hlayanyana, dokodela la endlaka X-rheyi u vule leswaku exivindzini xa yena ku ni tshumba leri ringanaka ni lamula. Dokodela u hlamusele leswaku Lucía u ni vuvabyi lebyi vitaniwaka neuroblastoma, ku nga tshumba leri kulaka hi ku hatlisa ra khensa. Kutani maxangu ya Lucía yo lwisana ni vuvabyi bya khensa lama tekeke malembe ya nkombo ma sungule kwalaho, leswi endleke leswaku a tshama nkarhi wo leha exibedlhele.

Ku Va Ni Moya Wo Tinyikela

Eka malembe wolawo yo tika, hakanyingi Lucía a a ndzi khutaza hi ku ndzi vukarha ni ku ndzi tswontswa. Ndlela leyi a byi tiyiseleke ha yona vuvabyi byakwe yi tlhele yi tsakisa vatirhi va le xibedlhele. Minkarhi hinkwayo a a tiyimisele ku tirhisana ni vaongori, a va pfuna ku yisela vana lava nga exibedlhele yogati, juzi ni swilo swin’wana eka makamara lama nga ekusuhi. Vaongori va pfange no nyika Lucía baji ro basa leri nga ni beji leyi tsariweke leswaku i “mupfuneti wa vaongori.”

Mutirhi un’wana wa le xibedlhele u te: “Lucía u khumbe mbilu ya mina swinene. A a ri n’wana la gingiritekaka a tlhela a va ni vutshila, naswona a a rhandza ku penda. A a tivulavulela naswona a a wupfile.”

Lucía u kume matimba ni xivindzi eka Rito ra Xikwembu. (Hev. 4:12) A a kholwa leswaku emisaveni leyintshwa, “rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona,” hilaha Rito ra Xikwembu ri tshembisaka hakona. (Nhlav. 21:4) A a tshama a lunghekele ku byela van’wana rungula ra le Bibeleni hikwalaho ka leswi a a khathala hi vanhu van’wana. Ntshembo wa Lucía lowu tiyeke hi ta ku pfuxiwa ka vafi wu n’wi pfunile leswaku a kota ku tikhoma naswona a tshama a tsakile hambileswi a swi ri erivaleni leswaku vuvabyi bya yena a byi nga tshunguleki. (Esa. 25:8) U tshame a ri na langutelo lerinene ku fikela siku leri khensa yi n’wi dlayeke ha rona.

Ndzi endle xitshembiso xa nkoka swinene hi  rona siku rero. Lucía a a nga ha swi koti ku pfula matihlo yakwe. Tata wakwe a a khome voko lerin’wana rakwe kasi mina a ndzi khome lerin’wanyana. Ndzi hleveterile ndzi ku: “U nga vileli, a ndzi nge ku tshiki. Etlela hi ku rhula. Loko u pfuka eku feni u ta va u hanye kahle. A wu nge he twi xitlhavi naswona ndzi ta va ndzi ri na wena.”

Ndzi fanele ku hlayisa xitshembiso xexo. Ndza swi tiva leswaku loko ndza ha rindzele ku pfuxiwa ka yena, swilo swi ta pfa swi ndzi tikela. Kambe ndza swi tiva leswaku loko ndzo lehisa mbilu ndzi tshemba Yehovha kutani ndzi tshama ndzi tshembekile eka yena, ndzi ta va ndzi ri kona loko Lucía a pfuxiwa eku feni.

Ndzhaka Leyi Lucía A Hi Siyeleke Yona

Xikombiso xa Lucía xa ku va ni xivindzi, swin’we ni nseketelo lowunene wa le vandlheni, swi n’wi tsakise ngopfu nuna wa mina loyi a a nga ri Mbhoni. Siku leri Lucía a feke ha rona, nuna wa mina u ndzi byele leswaku u fanele a tianakanyisisa. Endzhakunyana ka mavhiki ma nga ri mangani, u kombele nkulu un’wana wa le vandlheni leswaku a dyondza na yena Bibele. Hi ku hatlisa nuna wa mina u sungule ku ya eminhlanganweni hinkwayo. Hi ku pfuniwa hi Yehovha u tshike ku dzaha fole, ku nga nchumu lowu a tsandzekeke ku wu endla eku sunguleni.

Gome leri ndzi nga na rona hikwalaho ko feriwa hi Lucía a ri si hela, kambe ndzi nkhensa Yehovha ndzi vuyelela hikwalaho ka ndzhaka leyi Lucía a yi siyeke. Mina na nkatanga ha chavelelana hi ntshembo lowu hlamarisaka wa ku pfuxiwa ka lava feke, hambi ku ri ku anakanya hi nkarhi lowu hi nga ta tlhela hi vona Lucía—switihlwana swa yena swo xonga ni marhama yakwe lawa a ma poveka loko a n’wayitela.

Khombo leri weleke xinhwanyetana xa hina ri tlhele ri khumba ni muakelani un’wana wa hina. Hi Mugqivela wun’wana nimixo loko ku ri karhi ku na mpfula, wansati un’wana loyi n’wana wakwe wa mufana a a nghena na Lucía xikolo u te ekaya ra hina. A a feriwe hi n’wana wa mufana loyi a a ri ni malembe ya 11 hi vukhale loyi a dlayiweke hi vuvabyi lebyi fanaka. Loko a twa leswi humeleleke eka Lucía, wansati yoloye u fambe a lava lomu a hi tshama kona kutani a hi endzela. A a lava ku tiva leswaku xana ndza swi kota ku langutana ni rifu ra Lucía ivi a ringanyeta leswaku hi vumba ntlawa lowu a wu ta chavelela vamanana van’wana lava na vona va feriweke hi vana.

Ndzi n’wi hlamusele leswaku mina se ndzi kume nchavelelo wa xiviri eka xitshembiso xin’wana lexi humaka eBibeleni, nchavelelo lowu tlakukeke swinene eka lowu vanhu va nga wu nyikelaka. U sungule ku tsaka loko ndzi n’wi hlayela marito ya Yesu lama tsariweke eka Yohane 5:28, 29. U pfumele ku dyondzeriwa Bibele kutani hi ku hatlisa u sungule ku va ni “ku rhula ka Xikwembu loku tlulaka miehleketo hinkwayo.” (Filp. 4:7) Hakanyingi loko hi dyondza Bibele swin’we, ha yimanyana ivi hi tianakanya hi ri emisaveni leyintshwa hi ri karhi hi amukela varhandziwa va hina lava pfuxiweke eku feni.

Ina, vutomi byo koma bya Lucía byi hi siyele ndzhaka leyi nga heriki. Ripfumelo rakwe ri pfune ndyangu wa hina leswaku wu gandzela Xikwembu hi vun’we naswona ri endle leswaku ndzi tiyimisela swinene leswaku ndzi tshama ndzi tiyile eripfumelweni. A swi kanakanisi leswaku hinkwerhu ka hina lava feriweke hi varhandziwa va hina lava nga ha pfuxiwaka eku feni hi ni xitshembiso xa nkoka swinene.

[Xifaniso eka tluka 20]

Paradeyisi leyi mpfampfarhutiweke hi Lucía