Lava Nkongomiso Wa Xikwembu Eka Swilo Hinkwaswo Leswi U Swi Endlaka
Lava Nkongomiso Wa Xikwembu Eka Swilo Hinkwaswo Leswi U Swi Endlaka
“Xikwembu lexi i Xikwembu xa hina hilaha ku nga riki na makumu, hi masiku. Xona xi ta hi kongomisa kukondza hi fa.”—PS. 48:14.
1, 2. Ha yini hi fanele hi landzela nkongomiso wa Yehovha ematshan’weni ya ku tshemba vutlhari bya hina, naswona ku tlakuka swivutiso swihi?
LOKO hi kambisisa swilo leswi nga pfuniki nchumu kumbe leswi nga ni khombo, swa olova leswaku hi tixisa. (Swiv. 12:11) Loko se hi swi lava hi mbilu hinkwayo ku endla nchumu lowu Mukreste a nga fanelangiki a wu endla, mbilu ya hina hakanyingi yi nga hi byela swivangelo swa ku va hi fanele hi wu endla. (Yer. 17:5, 9) Hikwalaho, mupisalema u kombise leswaku u tlharihile loko a khongela eka Yehovha a ku: “Rhumela ku vonakala ka wena ni ntiyiso wa wena. Onge leswi swi nga ndzi rhangela.” (Ps. 43:3) Mupisalema a a tshemba Yehovha ku nga ri vutlhari bya yena n’wini lebyi pimiweke, naswona Yehovha hi yena a a n’wi kongomisa. Ku fana ni mupisalema, hi fanele hi lava nkongomiso eka Xikwembu.
2 Kambe, ha yini hi fanele hi tshemba nkongomiso wa Yehovha tanihi lowu tlakukeke swinene? Hi fanele hi wu lava rini? Hi rihi langutelo leri hi faneleke hi va na rona leswaku hi ta vuyeriwa eka wona, naswona Yehovha u hi kongomisa njhani namuntlha? Swivutiso leswi swa nkoka swi ta tlhuvutsiwa exihlokweni lexi.
Ha Yini Hi Tshemba Nkongomiso Wa Yehovha?
3-5. Ha yini hi nga wu tshembaka hi ku helela nkongomiso wa Yehovha?
3 Yehovha i Tata wa hina wa le tilweni. (1 Kor. 8:6) U hi tiva hi ku hetiseka hinkwerhu ka hina naswona wa swi kota ku vona timbilu ta hina. (1 Sam. 16:7; Swiv. 21:2) Hosi Davhida u byele Xikwembu a ku: “Wena u tiva ku tshama ka mina ni ku yima ka mina. U ehleketisise hi miehleketo ya mina u ri ekule. Hikuva a ri kona rito eririmini ra mina, kambe waswivo, Wena Yehovha, ana se u swi tiva hinkwaswo.” (Ps. 139:2, 4) Leswi Yehovha a hi tivaka kahle, a hi fanelanga hi kanakana leswaku wa swi tiva leswi hi lulameleke. Handle ka sweswo, Yehovha u tlharihe hi ku helela. U vona swilo hinkwaswo, u vona ni leswi vanhu va nga kotiki ku swi vona, naswona u tiva vuyelo bya swilo to ho suka. (Esa. 46:9-11; Rhom. 11:33) I “Xikwembu lexi ku nga xona ntsena xi tlhariheke.”—Rhom. 16:27.
4 Ku engetela kwalaho, Yehovha wa hi rhandza naswona minkarhi hinkwayo u lava leswi nga ta hi vuyerisa. (Yoh. 3:16; 1 Yoh. 4:8) Leswi a nga Xikwembu xa rirhandzu, u hi kombisa malwandla. Mudyondzisiwa Yakobo u tsarile a ku: “Nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni.” (Yak. 1:17) Lava pfumelaka ku kongomisiwa hi Xikwembu va vuyeriwa swinene eka malwandla ya xona.
5 Xo hetelela, Yehovha u ni matimba hinkwawo. Mupisalema u vule leswi malunghana ni mhaka leyi: “Mani na mani la tshamaka endhawini ya le xihundleni ya La nge Henhla-henhla u ta kuma vutshamo endzhutini wa Lowa Matimba Hinkwawo. Ndzi ta vula eka Yehovha ndzi ku: ‘U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.’” (Ps. 91:1, 2) Loko hi landzela nkongomiso wa Yehovha, hi va hi lava nkongomiso lowunene ngopfu hikuva Xikwembu a xi tsandzi hi nchumu. Yehovha wa hi seketela hambiloko hi kanetiwa. A nge hi khomisi tingana. (Ps. 71:4, 5; Hlaya Swivuriso 3:19-26.) Ina, Yehovha wa swi tiva leswi nga swinene eka hina, u hi navelela leswinene naswona u ni matimba yo hi nyika swilo leswinene. Hi ta va hi ri swiphukuphuku loko hi honisa nkongomiso wa yena! Kambe, hi wu lava rini nkongomiso wolowo?
Xana Hi Fanele Ku Kongomisiwa Loko Swi Te Yini?
6, 7. Hi rini laha hi faneleke hi kongomisiwa hi Yehovha?
6 Hakunene, hi fanele hi kongomisiwa hi Xikwembu evuton’wini bya hina hinkwabyo, ku sukela loko ha ha ri vatsongo ku fikela loko hi dyuharile. Mupisalema u te: “Xikwembu lexi i Xikwembu xa hina hilaha ku nga riki na makumu, hi masiku. Xona xi ta hi kongomisa kukondza hi fa.” (Ps. 48:14) Vakreste vo tlhariha va tshama va ri karhi va lava nkongomiso eka Xikwembu ku fana ni mupisalema.
7 Ina, ku na minkarhi leyi hi swi twaka leswaku hi lava mpfuno hi xihatla. Minkarhi yin’wana hi tikuma hi ri “mahlomulweni lamakulu,” kumbexana hi xanisiwa, hi vabya swinene kumbe hi heleriwe hi ntirho hi xitshuketa. (Ps. 69:16, 17) Eminkarhini yo tano, swa chavelela ku ya eka Yehovha, hi tiyiseka leswaku u ta hi nyika matimba yo tiyisela a tlhela a hi kongomisa leswaku hi endla swiboho swa vutlhari. (Hlaya Pisalema 102:17.) Hambiswiritano, ha wu lava mpfuno wa yena ni hi minkarhi yin’wana. Hi xikombiso, loko hi chumayela vaakelani va hina mahungu lamanene ya Mfumo, hi fanele hi kongomisiwa hi Yehovha leswaku ntirho wa hina wo chumayela wu famba kahle. Naswona rini na rini loko hi lava ku endla xiboho—ku nga ha va xa ku hlawula vuhungasi, maambalelo ni ku tisasekisa, vanghana, ntirho, dyondzo kumbe nchumu wun’wana—hi ta va hi tlharihile loko hi landzela nkongomiso wa Yehovha ntsena. Entiyisweni, hi lava nkongomiso eka xin’wana ni xin’wana lexi hi xi endlaka evuton’wini.
Makhombo Lama Nga Vaka Kona Loko Hi Nga Wu Lavi Nkongomiso Wa Xikwembu
8. Evha a a kombisa yini loko a dya mbhandzu lowu yirisiweke?
8 Kambe, tsundzuka leswaku hi fanele hi va hi tiyimiserile ku landzela nkongomiso wa Yehovha. Xikwembu a xi nge hi sindzisi leswaku hi landzela nkongomiso wa xona loko hi nga swi lavi. Munhu wo sungula ku hlawula ku nga landzeli nkongomiso wa Yehovha a ku ri Evha, naswona xikombiso xa yena xi kombisa khombo leri nga vangiwaka hi xiboho xolexo. Nakambe, anakanya hi leswi swiendlo swa yena a swi kombisa swona. Evha u dye mbhandzu lowu yirisiweke hikuva a a lava ‘ku fana ni Xikwembu, a tiva leswinene ni leswo biha.’ (Gen. 3:5) Hi ku endla tano, u kombise leswaku a a lava ku endla ntirho lowu a wu ri wa Xikwembu, a tiendlela swiboho swa yena malunghana ni swilo leswinene ni leswo biha ematshan’weni ya ku landzela nkongomiso wa Yehovha. Hikwalaho, u fularhele vuhosi bya Yehovha. A a lava ku tilawula. Nuna wa yena Adamu na yena u xandzuke na yena.—Rhom. 5:12.
9. Loko hi ala nkongomiso wa Yehovha entiyisweni hi va hi endla yini, naswona ha yini sweswo ku nga ri vutlhari?
9 Namuntlha, loko hi nga landzeli nkongomiso wa Yehovha na hina hi ta va hi nga pfumelelani na swona leswaku u ni mfanelo ya ku endla swiboho malunghana ni leswinene ni leswo biha. Hi xikombiso, anakanya hi munhu loyi a swi endlaka mukhuva ku hlalela swifaniso swo navetisa rimbewu. Loko a hlanganyela evandlheni ra Vukreste wa wu tiva nkongomiso wa Yehovha emhakeni leyi. Swilo leswi thyakeke a swi fanelanga swi boxiwa, hi nga ha vuli ku swi hlalela hi ku swi navela. (Efe. 5:3) Munhu yoloye loko a fularhela nkongomiso wa Yehovha u ala vuhosi bya Yehovha, a fularhela vuhosi bya yena. (1 Kor. 11:3) Sweswo swi ni khombo swinene hikuva Yeremiya u te, “munhu loyi a fambaka a nga ka a nga wu kongomisi nkondzo wa yena.”—Yer. 10:23.
10. Ha yini hi fanele hi tirhisa ntshunxeko wa hina wo tihlawulela hi ndlela leyi kombisaka leswaku hi ni vutihlamuleri?
10 Van’wana va nga ha kanetana ni marito ya Yeremiya, va vula leswaku leswi Yehovha a hi nyikeke ntshunxeko wo tihlawulela, a nga fanelanga a hi sola loko hi wu tirhisa. Nilokoswiritano, u nga rivali leswaku ntshunxeko wo tihlawulela i vutihlamuleri naswona i nyiko. Hi ta tihlamulela hikwalaho ka swilo leswi hi hlawulaka ku swi vula ni ku swi endla. (Rhom. 14:10) Yesu u te: “Nomu wu vulavula leswi mbilu yi taleke swona.” U tlhele a ku: “Embilwini ku huma ku anakanya ko homboloka, ku dlaya hi vomu, vuoswi, vumbhisa, vukhamba, vumbhoni bya mavunwa ni swisandzu.” (Mat. 12:34; 15:19) Hikwalaho, leswi hi swi vulaka ni swiendlo swa hina swi paluxa xiyimo xa mbilu ya hina. Swi kombisa leswi hi nga swona hakunene. Hi yona mhaka Mukreste la tlhariheke a lavaka nkongomiso wa Yehovha eka xin’wana ni xin’wana lexi a xi endlaka. Hi ndlela yoleyo, Yehovha u n’wi teka a ri la ‘lulameke embilwini ya yena’ naswona u ta “endla leswinene” eka yena.—Ps. 125:4.
11. Hi dyondza yini eka matimu ya Vaisrayele?
11 Tsundzuka matimu ya Vaisrayele. Loko va endla minhlawulo leyinene, va yingisa swileriso swa Yehovha, Yehovha a a va sirhelela. (Yox. 24:15, 21, 31) Kambe, hakanyingi a va wu tirhisa hi ndlela yo biha ntshunxeko wa vona wo tihlawulela. Enkarhini wa Yeremiya, Yehovha u vule leswi malunghana na vona: “A va yingisanga, naswona a va yi rhiyanga ndleve, kambe va fambe hi ku landza switsundzuxo swa vona ni ku sihalala ka mbilu ya vona yo biha, lerova va ye endzhaku ku nga ri emahlweni.” (Yer. 7:24-26) Swi khomisa gome hakunene! Hi nga tshuki hi fularhela nkongomiso wa Yehovha hikwalaho ka ku tiomisa tinhloko kumbe hikwalaho ko lava ku enerisa ku navela ka hina, kutani hi landzela switsundzuxo swa hina xisweswo hi ya “endzhaku ku nga ri emahlweni”!
Ku Laveka Yini Leswaku Munhu A Landzela Nkongomiso Wa Xikwembu?
12, 13. (a) Hi yihi mfanelo leyi hi endlaka hi lava ku landzela nkongomiso wa Yehovha? (b) Ha yini ripfumelo ri ri ra nkoka?
12 Loko hi rhandza Yehovha swi ta hi susumetela leswaku hi lava ku landzela nkongomiso wa yena. (1 Yoh. 5:3) Hambiswiritano, Pawulo u vulavule hi nchumu wun’wana lowu hi faneleke hi va na wona, a ku: “Hi famba hi ripfumelo, ku nga ri hi ku vona.” (2 Kor. 5:6, 7) Ha yini ripfumelo ri ri ra nkoka? Yehovha u hi kongomisa “emintileni ya ku lulama,” kambe mintila yoleyo a yi endli leswaku munhu a va ni rifuwo kumbe xikhundlha emisaveni leyi. (Ps. 23:3) Hikwalaho, hi fanele hi va ni ripfumelo leri tiyeke eka mikateko ya moya leyi kumiwaka hi lava tirhelaka Yehovha. (Hlaya 2 Vakorinto 4:17, 18.) Naswona ripfumelo ri hi pfuna leswaku hi eneriseka hi swilo switsongo leswi vonakaka leswi hi nga na swona.—1 Tim. 6:8.
13 Yesu u kombise leswaku evugandzerini bya ntiyiso ku laveka ku tinyikela, naswona u fanele u va ni ripfumelo leswaku u tinyikela. (Luka 9:23, 24) Vagandzeri van’wana vo tshembeka va titsone swilo swo tala, va tiyisela vusweti, ku tshikileriwa, xihlawuhlawu hambi ku ri ku xanisiwa hi ndlela yo vava. (2 Kor. 11:23-27; Nhlav. 3:8-10) Ripfumelo leri tiyeke hi rona leri va pfuneke leswaku va endla sweswo va tsakile. (Yak. 1:2, 3) Ripfumelo leri tiyeke ri hi endla hi tiyiseka swinene leswaku minkarhi hinkwayo ku landzela nkongomiso wa Yehovha swa vuyerisa. Minkarhi hinkwayo swi ta hi vuyerisa hilaha ku nga heriki. Ha tiyiseka hakunene leswaku vuyelo bya lava tiyiselaka hi ku tshembeka byi tlula ku xaniseka kwihi na kwihi ka xinkarhana.—Hev. 11:6.
14. Ha yini Agara a a fanele a titsongahata?
14 Nakambe, xiya ndlela leyi ku titsongahata ku lavekaka ha yona eku landzeleni ka nkongomiso wa Yehovha. Xikombiso xa Agara, nandza wa xisati wa Sara xi yi kombisa kahle mhaka leyi. Loko Sara a xiya leswaku a a nga ta va kuma vana, u teke Agara a n’wi nyika Abrahama, kutani Agara a tika n’wana wa Abrahama. Hiloko Agara a sungula ku titlakusa eka n’wini wa yena wa xisati loyi a a ri mhika. Hikwalaho, Sara “a sungula ku n’wi nyumisa,” kutani Agara a baleka. Ntsumi ya Yehovha yi hlangane na Agara kutani yi ku eka yena: “Tlhelela eka n’wini wa wena wa xisati u titsongahata evokweni rakwe.” (Gen. 16:2, 6, 8, 9) Kumbexana Agara a a ta va a tsakele nkongomiso wun’wana. A a fanele a tshika ku titlakusa leswaku a ta endla swilo hi ku pfumelelana ni nkongomiso wa ntsumi. Nilokoswiritano, Agara hi ku titsongahata u endle hilaha ntsumi yi n’wi leriseke hakona, naswona Iximayele, n’wana wa yena wa jaha u tswaleriwe emintsongeni ya tata wa yena leyi sirhelelekeke.
15. Hlamusela swiyimo swin’wana leswi nga ha lavaka hi titsongahata namuntlha loko hi landzela nkongomiso wa Yehovha.
15 Leswaku hi landzela nkongomiso wa Yehovha swi nga ha lava leswaku na hina hi titsongahata. Van’wana va nga ha boheka ku pfumela mhaka ya leswaku vuhungasi byo karhi lebyi va byi tsakelaka a byi n’wi tsakisi Yehovha. Mukreste un’wana a nga ha va a khunguvanyise un’wana kutani a boheka ku kombela ku rivaleriwa. Kumbe a nga ha va a endle xihoxo kutani a boheka ku xi pfumela. Ku vuriwa yini loko un’wana a endla xidyoho lexikulu? U fanele a titsongahata kutani a ya byela vakulu xidyoho xa yena. Munhu a nga ha kala a susiwa ni le ku hlanganyeleni. Leswaku a vuyela evandlheni u fanele a hundzuka hi ku titsongahata kutani a hundzuluka. Eswiyin’weni leswi ni le ka swin’wana swo fana na swona, marito ya Swivuriso 29:23 ma chavelela: “Ku titlakusa ka munhu wa la misaveni ku ta n’wi tsongahata, kambe loyi a titsongahataka emoyeni wakwe u ta vangama.”
Yehovha U Hi Kongomisa Njhani?
16, 17. Xana hi nga vuyeriwa njhani swinene eBibeleni tanihi leswi yi nga ni nkongomiso lowu humaka eka Xikwembu?
16 Nkongomiso lowukulu swinene wa Xikwembu i Bibele, Rito ra xona leri huhuteriweke. (Hlaya 2 Timotiya 3:16, 17.) Leswaku hi vuyeriwa swinene eRitweni rolero, hi ta va hi tlharihile loko hi nga yimeli leswaku ku va ni swiyimo swo tika ku ri kona hi nga ta lava marito lama pfunaka eMatsalweni. Ku ri na sweswo, hi ta hlaya Bibele siku ni siku. (Ps. 1:1-3) Hikwalaho, hi ta tolovelana ni marito lama huhuteriweke. Hi ta anakanya ku fana ni Xikwembu naswona hi ta va hi lunghekele ku langutana ni swiphiqo leswi hi nga swi langutelangiki.
17 Ku engetela kwalaho, i swa nkoka ku anakanyisisa hi leswi hi swi hlayeke eMatsalweni kutani hi khongela hi ku pfumelelana na swona. Loko hi anakanyisisa hi tindzimana ta le Bibeleni, hi va hi anakanya hi ndlela leyi ti nga tirhaka ha yona eswiyin’weni swo karhi. (1 Tim. 4:15) Loko hi langutane ni swiphiqo leswikulu, hi khongela eka Yehovha hi kombela leswaku a hi pfuna hi kuma nkongomiso lowu hi wu lavaka. Moya wa Yehovha wu ta hi pfuna leswaku hi tsundzuka misinya ya milawu leyi pfunaka ya le Matsalweni leyi hi yi hlayeke eBibeleni kumbe etibukwini leti sekeriweke eBibeleni.—Hlaya Pisalema 25:4, 5.
18. Yehovha u va tirhisa njhani vamakwerhu lava nga Vakreste leswaku va hi kongomisa?
18 Vamakwerhu va hina va Vakreste na vona va nga hi pfuna ku lava nkongomiso wa Yehovha. Ntlawa lowu nga wa nkoka swinene eka vamakwerhu volavo i “hlonga ro tshembeka ni ro tlhariha” swin’we ni Huvo leyi Fumaka leyi nga muyimeri wa rona, leyi hambetaka yi phamela swakudya swa moya, ku nga tibuku leti kandziyisiweke ni minongonoko ya minhlangano ni tinhlengeletano. (Mat. 24:45-47; ringanisa na Mintirho 15:6, 22-31.) Ku engetela kwalaho, eka vamakwerhu volavo lava nga Vakreste ku ni vanhu lava wupfeke, ngopfu-ngopfu vakulu, lava fanelekaka ku pfuna vanhu ni ku nyikela ndzayo leyi humaka eMatsalweni. (Esa. 32:1) Vantshwa lava nga le mindyangwini ya Vukreste va ni mpfuno wun’wana wa nkoka. Vatswari va vona lava nga Vakreste va vekiwe hi Xikwembu leswaku va va nyika nkongomiso.—Efe. 6:1-3.
19. Hi yihi mikateko leyi hi yi kumaka loko hi hambeta hi lava nkongomiso wa Yehovha?
19 Ina, Yehovha u hi kongomisa hi tindlela to hambana-hambana, naswona hi fanele hi wu lava swinene nkongomiso wolowo. Loko a vulavula hi nkarhi lowu Vaisrayele a va ha tshembekile, Hosi Davhida u te: “Vatata wa hina a va tshembe wena; a va ku tshemba, naswona a wu tshamela ku va ponisa. A va huwelela eka wena, kutani va hlayiseka; a va tshemba wena, naswona a va khomiwanga hi tingana.” (Ps. 22:3-5) Loko hi landzela nkongomiso wa Yehovha hi ku tshembeka, na hina a hi nge ‘khomiwi hi tingana.’ A hi nge khomisiwi tingana eka ntshembo wa hina. Loko hi ‘andlala ndlela ya hina eka Yehovha,’ ematshan’weni ya ku titshega hi vutlhari bya hina, vuyelo bya kona ku ta va mikateko leyikulu hambi ku ri sweswi. (Ps. 37:5) Naswona loko hi tiyisela hi ku tshembeka endleleni yoleyo, mikateko yoleyo yi ta va leyi nga heriki. Hosi Davhida u tsarile: “Yehovha u rhandza vululami, naswona a nge va siyi lava tshembekeke vakwe. Kunene va ta rindziwa hilaha ku nga riki na makumu . . . Lavo lulama va ta dya ndzhaka ya misava, va ta tshama eka yona hi masiku.”—Ps. 37:28, 29.
Xana U Nga Hlamusela?
• Ha yini hi tshemba nkongomiso wa Yehovha?
• Loko hi fularhela nkongomiso wa Yehovha hi va hi kombisa yini?
• Hi le swiyin’weni swihi laha Mukreste a faneleke a titsongahata?
• Yehovha u hi kongomisa njhani namuntlha?
[Swivutiso Swa Dyondzo]
[Swifaniso eka tluka 8]
Xana u lava nkongomiso wa Yehovha eka xin’wana ni xin’wana lexi u xi endlaka evuton’wini?
[Xifaniso eka tluka 9]
Evha u fularhele vuhosi bya Yehovha
[Xifaniso eka tluka 10]
Agara a a fanele a va ni mfanelo yihi loko a ta landzela nkongomiso wa ntsumi?