Ndlela Leyi Huvo Leyi Fumaka Yi Tirhaka Ha Yona

HUVO LEYI FUMAKA ya Timbhoni ta Yehovha yi vumbiwa hi vavanuna lava tinyiketeleke lava nga malandza ya Xikwembu lama totiweke. Va yimela ntlawa wa hlonga ro tshembeka ni ro tlhariha, leri nga ni vutihlamuleri byo phamela swakudya swa moya ni ku nyikela nkongomiso eka ntirho wa ku chumayela hi Mfumo emisaveni hinkwayo, ri tlhela ri tiyiseka leswaku ntirho lowu hi wona wu rhangisiwaka emahlweni.—Mat. 24:14, 45-47.

Minhlangano ya Huvo leyi Fumaka yi va kona vhiki na vhiki, hi ntolovelo yi khomiwa hi Ravunharhu. Yi endla leswaku vamakwerhu lava va tirha hi vun’we. (Ps. 133:1) Vamakwerhu lava vumbaka Huvo leyi Fumaka va tlhela va tirha eka tikomiti to hambana-hambana. Komiti yin’wana ni yin’wana yi langutela mintirho ni swiyimo swo karhi leswi fambisanaka ni timhaka ta Mfumo, hilaha swi hlamuseriweke hakona hi ku komisa laha hansi.

▪ KOMITI YA MUUNGAMERI: Komiti leyi yi vumbiwa hi vaungameri va tikomiti letin’wana ta Huvo leyi Fumaka swin’we ni matsalana loyi na yena a nga xirho xa Huvo leyi Fumaka. Komiti leyi yi tiyisekisa leswaku tikomiti letin’wana hinkwato ti tirha kahle handle ka xiphiqo. Nakambe yi byarha vutihlamuleri lebyikulu bya timhaka leti khumbaka Timbhoni ta Yehovha emisaveni hinkwayo, byo tanihi mpfuno wa xihatla, minxaniso, timhangu ni timhaka tin’wana ta xihatla.

▪ KOMITI YO KHATHALELA VATIRHI: Vamakwerhu lava nga eka komiti leyi va byarhisiwe vutihlamuleri byo khathalela swirho swa mindyangu ya Bethele emisaveni hinkwayo hi tlhelo ra moya ni ra nyama. Komiti leyi hi yona yi langutelaka ku hlawuriwa ni ku vitaniwa ka swirho leswintshwa swa mindyangu ya Bethele ni ku hlamula swivutiso leswi fambisanaka ni ntirho wa swona wa le Bethele.

▪ KOMITI YA VUKANDZIYISI: Komiti leyi yi langutela ku kandziyisiwa ni ku rhumeriwa ka tibuku leti sekeriweke eBibeleni emisaveni hinkwayo. Yi langutela tindhawu leti ku gandliseriwaka eka tona tibuku leti tirhisiwaka hi Timbhoni ta Yehovha ematikweni yo hambana-hambana. Komiti leyi yi hlela leswaku minyikelo leyi nyikeleriweke ntirho wa Mfumo emisaveni hinkwayo yi tirhisiwa kahle.

▪ KOMITI YA NTIRHO: Swirho swa komiti leyi swi langutela ntirho wo chumayela ni timhaka leti khumbaka mavandlha, maphayona, vakulu ni valanguteri lava famba-fambaka. Yi langutela ku tsariwa ka Vutirheli Bya Hina Bya Mfumo yi tlhela yi rhamba swichudeni eXikolweni xa Giliyadi ni le ka Xikolo xa Ndzetelo wa Vutirheli ivi endzhaku ka sweswo yi swi avela lomu swi faneleke swi ya tirha kona.

▪ KOMITI YO DYONDZISA: Komiti leyi yi hlela rungula leri dyondziwaka etinhlengeletanweni, emintsombanweni ni le minhlanganweni ya vandlha. Yi hlela minongonoko ya swa moya ya swirho swa mindyangu ya Bethele yi tlhela yi langutela swikolo swo hambana-hambana, swo tanihi Xikolo xa Giliyadi ni Xikolo xa Ntirho wa Vuphayona kun’we ni ku hlela minongonoko leyi yingiseriwaka kunene ni leyi hlaleriwaka kunene.

▪ KOMITI YA VATSARI: Komiti leyi hi yona yi nga ni vutihlamuleri byo langutela ku tsariwa ka swakudya swa moya ni ku swi rhumela vamakwerhu ni vanhu van’wana. Komiti leyi yi hlamula swivutiso swa Bibele yi tlhela yi vona loko tidrama ni tinkulumo ti hleriwe kahle. Nakambe yi langutela ntirho wo hundzuluxela lowu endliwaka emisaveni hinkwayo.

Muapostola Pawulo u fanise vandlha ra vatotiwa ni miri wa munhu a tlhela a kandziyisa leswaku swirho hinkwaswo i swa nkoka nileswaku swa seketelana, swa rhandzana ni ku tirhisana entirhweni lowu Xikwembu xi ri nyikeke wona. (Rhom. 12:4, 5; 1 Kor. 12:12-31) Nhloko ya rona, ku nga Yesu Kreste u phamela swirho swa miri lowu swilo leswi lavekaka leswaku swi kota ku tirhisana, swi langutela ni ku nyikela ndzetelo hi tlhelo ra moya. (Efe. 4:15, 16; Kol. 2:19) Hi ndlela leyi, Huvo leyi Fumaka yi hleriwe leswaku yi rhangela hilaha Yehovha a yi kongomisaka hakona hi moya lowo kwetsima.