Tivekele Tipakani Leti U Nga Ta Ti Fikelela U Tlhela U Tsaka

“NDZI tlhele ndzi tsandzeka!” Xana i kangani u vula marito yo fana ni lawa hikwalaho ka leswi u tsandzekeke ku hetisisa leswi u hleleke ku swi endla? Mukreste un’wana la nga manana loyi a ha riki muntshwa a nga ha vula marito wolawo hileswi a titwaka a tshikilelekile hikwalaho ko khathalela ricece ra yena naswona a hele matimba hileswi a nga swi kotiki ku hlanganyela hi xitalo eka mintirho ya Vukreste. Mukreste un’wana a nga ha titwa a tsandzeka hikwalaho ka ndlela leyi a kurisiweke ha yona kutani a anakanya leswaku a nga si tshama a seketela vandlha hi ndlela leyi faneleke. Mbhoni leyi dyuhaleke yi nga ha titwa yi ri ni gome hileswi yi nga swi kotiki ku chumayela hi xitalo hilaha a yi tiphina hakona loko ya ha ri na matimba naswona yi kota ku tifambela. Christiane loyi xiyimo xa ndyangu xi n’wi sivelaka ku tirhela Yehovha hi xitalo hilaha a lavaka hakona u ri: “Nkulumo leyi khutazaka vanhu ku phayona minkarhi yin’wana ya ndzi ririsa.”

Xana hi nga endla yini loko hi titwa hi ndlela yoleyo? Xana Vakreste van’wana va swi kote njhani ku tikarhatela ku swi languta hi ndlela leyinene swiyimo swa vona? Xana hi byihi vuyelo byo tivekela tipakani leti faneleke?

Tivekele Tipakani Leti Fikelelekaka

Muapostola Pawulo u hi byela ndlela leyi hi nga tshamaka ha yona hi tsakile loko a ku: “Nkarhi hinkwawo tsakani eHosini. Nakambe ndzi ri, Tsakani! Ku anakanyela ka n’wina a ku tiviwe hi vanhu hinkwavo.” (Filp. 4:4, 5) Leswaku hi tsaka hi tlhela hi eneriseka loko hi tirhela Xikwembu, hi fanele hi hlakulela ku tivekela tipakani leti fikelelekaka hi ku ya hi vuswikoti ni swiyimo swa hina. Loko hi lwela ku fikelela tipakani letikulu ku nga khathariseki leswaku hi ta swi kota ku ti fikelela, hi tivangela ntshikilelo. Hi hala tlhelo, hi fanele hi tivonela leswaku hi nga debyisi mavoko swi nga fanelanga entirhweni wo chumayela hikwalaho ka ku tsana ko karhi ka hina.

Ku nga khathariseki leswaku swiyimo swa hina swi njhani, Yehovha u lava leswaku hi n’wi nyika leswi nga ematimbeni ya hina hinkwawo—hi n’wi tirhela hi moya-xiviri wa hina hinkwawo ni hi mbilu hinkwayo. (Kol. 3:23, 24) Loko hi nga nyiki Yehovha leswi nga ematimbeni ya hina hinkwawo, hi ta va hi nga ku hetisisi ku tinyiketela ka hina eka yena. (Rhom. 12:1) Ku engetela kwalaho, hi ta titsona ku eneriseka lokukulu, ntsako wa xiviri ni mikateko yin’wana leyi fuweke leyi tisiwaka hi ku tirha hi moya-xiviri hinkwawo.—Swiv. 10:22.

Rito leri hundzuluxeriweke ri va “ringanisela” eBibeleni ri vula ku anakanyela. Hi ku kongoma ri vula ‘ku titwela vusiwana.’ (Yak. 3:17) Nakambe sweswo swi vula ku papalata ku tirhisa voko ra nsimbi. Kutani, loko hi anakanyela, hi ta kota ku ringanisela eka swiyimo swa hina. Xana swa tika ku endla tano? Van’wana swa va tikela, hambiloko va nga swi kota ku twela van’wana. Hi xikombiso, loko munghana wa hina lonkulu a vonaka a karhele hikwalaho ka leswi a a endla swilo swo tala, xana a hi nge ringeti ku n’wi pfuna leswaku a vona leswaku i vutlhari ku endla  mindzulamiso yin’wana evuton’wini bya yena? Hilaha ku fanaka, hi fanele hi kota ku swi xiya loko se hi endla swilo leswi hi nga tsandzekaka ku swi fikelela.—Swiv. 11:17.

Loko hi kurisiwe hi vatswari lava languteleke swo tala eka hina hi nga ha karhateka hikwalaho ka ku tsana ka hina. Van’wana loko va ha ri vatsongo a va titwa onge minkarhi hinkwayo va fanele va endla swo tala kumbe va va vo antswa leswaku va ta rhandziwa hi vatswari va vona. Loko na hina hi kurisiwe hi ndlela yoleyo, hi nga ha va hi ri ni langutelo leri hoxeke hi ndlela leyi Yehovha a hi langutaka ha yona. Yehovha wa hi rhandza hikwalaho ka leswi hi endlaka ntirho wakwe hi mbilu hinkwayo. Rito ra Xikwembu ra hi tiyisekisa leswaku Yehovha u ku “tiva kahle ku vumbeka ka hina, wa tsundzuka leswaku hi ntshuri.” (Ps. 103:14) U tiva ku tsana ka hina naswona wa hi rhandza loko hi n’wi tirhela hi ku hiseka ku nga khathariseki ku tsana koloko. Loko hi tsundzuka leswaku Xikwembu xa hina a hi n’wini loyi a sindzisaka, sweswo swi ta hi pfuna leswaku hi ringanisela eka tipakani leti hi ti vekeleke tona, hi ri karhi hi xiya ku tsana ka hina.—Mik. 6:8.

Hambiswiritano, van’wana swi nga ha va tikela ku hlakulela langutelo ro tano ro ringanisela. Loko na wena u titwa hi ndlela yoleyo, ha yini u nga lavi mpfuno eka Mukreste la nga ni ntokoto loyi a ku tivaka kahle? (Swiv. 27:9) Hi xikombiso, xana wa swi lava ku va phayona ra nkarhi hinkwawo? Yoleyo i pakani ya kahle swinene! Xana swa ku tikela ku fikelela pakani yoleyo? Kumbexana u lava ku pfuniwa leswaku u olovisa vutomi bya wena. Kumbe munghana wa wena la nga Mukreste loyi u n’wi tshembaka a nga burisana na wena mayelana ni loko u ta swi kota ku va phayona ra nkarhi hinkwawo kumbe loko u ta tsandzeka hikwalaho ka vutihlamuleri bya wena byo tala endyangwini. A nga ha ku pfuna leswaku u vona loko u nga swi kota hakunene ku endla ntirho lowu engetelekeke wa ku phayona kumbe a ku pfuna u vona mindzulamiso leyi u nga yi endlaka leswaku u ta kota ku phayona. Wanuna hi yena a faneleke a pfuna nsati wakwe leswaku a endla swilo leswi a nga swi kotaka. Hi xikombiso, a nga ringanyeta leswaku nsati wa yena u fanele a rhanga a wisa a nga si sungula ku phayona. Sweswo swi nga endla leswaku a kuma matimba ni ku n’wi pfuna leswaku a byi tsakela vutirheli lebyi.

Languta Swilo Leswi U Nga Kotaka Ku Swi Endla

Ku dyuhala kumbe mavabyi swi nga ha hi kavanyeta entirhweni wa Yehovha. Loko u ri mutswari, u nga ha va u titwa onge a wu vuyeriwi eka dyondzo ya munhu hi yexe kumbe eminhlanganweni ya Vukreste hileswi u faneleke u tirhisa nkarhi ni matimba ya wena yo tala eka vana va wena. Hambiswiritano, xana ku anakanya ngopfu hi ku tsana ka wena minkarhi yin’wana swi nga ku sivela ku vona swilo leswi nga ha ku tsandzaka ku swi endla?

Eka malembe ya magidi-gidi lama hundzeke, Mulevhi un’wana u phofule ku navela ka yena loku a nga ta swi kota ku ku enerisa. Lembe ni lembe a a ri ni lunghelo ro tirha mavhiki mambirhi etempeleni. Hambiswiritano, u phofule ku  navela loku bumabumeriwaka ko tshama hilaha ku nga heriki ekusuhi ni alitari. (Ps. 84:1-3) I yini lexi pfuneke wanuna loyi wo tshembeka leswaku a eneriseka? U swi xiyile leswaku hambi ku tshama siku rin’we exivaveni xa tempele a ku ri lunghelo ro hlawuleka. (Ps. 84:4, 5, 10) Hilaha ku fanaka, ematshan’weni yo anakanya hi ku tsana ka hina, hi fanele hi ringeta ku twisisa ni ku tlangela swilo leswi hi nga kotaka ku swi endla.

Vona xikombiso xa Nerlande makwerhu wa xisati wa le Canada. U famba hi xitulu xa lava lamaleke naswona a a titwa onge a nge swi koti ku chumayela hi xitalo. Hambiswiritano, u cince langutelo ra yena hi ku endla ndhawu ya mabindzu ya le kusuhi yi va nsimu yakwe. U ri: “Ndzi tshama exitulwini xa lava lamaleke ekusuhi ni bence leri nga endhawini leyi ya mabindzu. Ndzi kuma ntsako hi ku chumayela vanhu lava taka va ta wisa swa xinkarhana laha ndzi tshameke kona.” Ku hlanganyela entirhweni lowu wo chumayela swa n’wi enerisa Nerlande.

Endla Mindzulamiso Loko Swi Laveka

Xikepe xi nga ha famba hi rivilo lerikulu loko moya wu ri karhi wu ba maseyila ya xona. Kambe, loko mutluti a hlangana ni xidzedze, u boheka ku lulamisa maseyila ya xikepe. A nga swi koti ku lawula xidzedze, kambe hi ku endla mindzulamiso, a nga swi kota ku lawula xikepe. Hi ndlela leyi fanaka, hakanyingi a hi swi koti ku lawula swiyimo leswi fanaka ni xidzedze lexikulu leswi hi hlanganaka na swona evuton’wini. Kambe hi nga hambeta hi lawula vutomi bya hina hi ndlela leyi humelelaka hi ku lulamisa ndlela leyi hi tirhisaka miri wa hina, mianakanyo ni mintlhaveko ya hina ha yona. Loko hi swi tekela enhlokweni swiyimo swa hina leswintshwa, hi ta pfuneka leswaku hi eneriseka ni ku kuma ntsako entirhweni wa Xikwembu.—Swiv. 11:2.

Xiya swikombiso swin’wana. Loko hi titwa hi nga ri na wona matimba, hi nga papalata mintirho leyi karharisaka ninhlikanhi leswaku hi ta kuma matimba yo ya eminhlanganweni ya Vukreste nimadyambu. Leswi swi ta endla leswaku hi vuyeriwa eka vunakulobye bya hina ni Vakreste-kulorhi. Kumbe, loko manana a nga swi koti ku chumayela hi yindlu ni yindlu hileswi n’wana wakwe a vabyaka, a nga vona swi pfuna ku rhamba makwerhu un’wana wa xisati ekaya ra yena leswaku a ta chumayela na yena hi riqingho loko n’wana a ha etlele.

Xana ku vuriwa yini loko swiyimo swa wena swi nga ku pfumeleli leswaku u lunghiselela ka ha ri ni nkarhi leswi ku nga ta buriwa ha swona eminhlanganweni ya vandlha? U nga ha kambisisa leswaku u nga lunghiselela rungula ro tanihi kwihi kutani u ri lunghiselela hilaha u nga  kotaka hakona. Hi ku lulamisa tipakani ta hina hi xihatla, hi nga tshama hi hiseka ni ku va ni ntsako.

Ku lulamisa tipakani ta hina swi nga lava ku tiyimisela ni matshalatshala. Serge na Agnès, mpatswa wa le Furwa, va boheke ku endla ku cinca lokukulu eka leswi va swi hleleke. Serge u ri: “Loko hi twa leswaku Agnès u tikile, hi nambe hi swi tiva leswaku a hi nge he swi koti ku va varhumiwa hilaha a hi hlele hakona.” Leswi se a nga tatana wa vanhwanyana vambirhi lava tsakeke tlhelo lava hisekaka, Serge u hlamusela ndlela leyi va tivekeleke ha yona tipakani ta vona letintshwa tanihi mpatswa. U ri: “Leswi a hi nga ha ta swi kota ku ya chumayela etikweni rimbe, hi endle xiboho xo va ‘varhumiwa’ etikweni ra rikwerhu. Hi sungule ku hlanganyela ni ntlawa wa vanhu va ririmi rimbe.” Xana va vuyeriwile hi ku tivekela pakani leyi leyintshwa? Serge u ri: “Hi titwa hi ri mpfuno evandlheni.”

Odile, makwerhu wa xisati wa le Furwa loyi se a nga emalembeni ya va-70 naswona a nga ni vuvabyi bya osteoarthritis ematsolweni, a nga swi koti ku yima nkarhi wo leha. A a hele matimba hikuva vuvabyi byakwe byi n’wi sivela ku chumayela hi yindlu ni yindlu. Hambiswiritano, a nga lan’wanga. U sungule ku chumayela hi riqingho. U ri: “Swa olova naswona swa tsakisa ku tlula ndlela leyi a ndzi anakanya ha yona!” Endlelo leri ro chumayela ri endle leswaku a tlhela a tsakela ku chumayela.

Ku Tivekela Tipakani Leti Swi Kotekaka Ku Ti Fikelela Swi Tisa Mikateko

Ku tikarhatela ku va ni langutelo ro ringanisela eka leswi hi nga kotaka ku swi endla swi ta endla leswaku hi papalata mivilelo yo tala. Loko hi tivekela tipakani leti ringaniseriweke, ha swi tiva leswaku hi ta ti fikelela ku nga khathariseki ku tsana ka hina. Hikwalaho ha tsaka loko hi kota ku fikelela swo karhi, hambiloko hi kota ku endla switsongo.—Gal. 6:4.

Loko hi tikarhatela ku ringanisela eka leswi hi languteleke ku swi fikelela, hi ta khathala swinene hi Vakreste-kulorhi. Loko hi xiya ku tsana ka vona, minkarhi hinkwayo hi ta tlangela leswi va hi endlelaka swona. Loko hi tlangela mpfuno wun’wana ni wun’wana lowu hi wu kumaka, hi endla leswaku ku va ni moya wo tirhisana ni ku twisisana. (1 Pet. 3:8) Tsundzuka, leswi Yehovha a nga Tatana la nga ni rirhandzu, a nga kombeli swo tala eka hina. Kutani loko hi ri ni langutelo leri ringaniseriweke hi vuswikoti ni swiyimo swa hina kutani hi tivekela tipakani leti fikelelekaka, hi ta enerisaka ni ku kuma ntsako entirhweni wa Yehovha.

[Marito lama tshahiweke exihlokweni lama nga eka tluka 29]

Leswaku hi tsaka hi tlhela hi eneriseka loko hi tirhela Xikwembu, hi fanele hi hlakulela ku tivekela tipakani leti fikelelekaka hi ku ya hi vuswikoti ni swiyimo swa hina

[Xifaniso lexi nga eka tluka 30]

Nerlande u kuma ntsako hi ku endla leswi a nga swi kotaka evutirhelini

[Xifaniso lexi nga eka tluka 31]

Dyondza ku “lulamisa maseyila”

[Xihlovo Xa Kona]

© Wave Royalty Free/age fotostock

[Xifaniso lexi nga eka tluka 32]

Serge na Agnès va vuyeriwile hi ku tivekela tipakani letintshwa