Hlayisa Vutshembeki Hi Mbilu Hinkwayo

“Ndzi ta famba entiyisweni wa wena. Endla mbilu ya mina yi va ni vun’we leswaku yi chava vito ra wena.”—PS. 86:11.

1, 2. (a) Hi ku ya hi Pisalema 86:2, 11, i yini lexi nga ta hi pfuna leswaku hi tshama hi tshembekile eka Yehovha hi nkarhi wa miringo? (b) Hi fanele hi sungula rini ku hlakulela ku tshembeka hi mbilu hinkwayo?

HA YINI Vakreste van’wana lava nga heta malembe yo tala va tshembekile hambiloko va pfaleriwa emakhotsweni kumbe va xanisiwa, hi ku famba ka nkarhi va tsandzeka ku lwisana ni moya wo hlongorisa rifuwo? Nhlamulo yi titshege hi mbilu ya hina yo fanekisela, ku nga leswi hi anakanyaka swona. Pisalema 86 yi vula leswaku ku tshembeka ku fambisana ni mbilu leyi nga ni vun’we; hileswaku mbilu leyi hetisekeke, leyi nga avanangiki. Mupisalema Davhida u khongerile a ku: “Rindza moya-xiviri wa mina, hikuva ndzi tshembekile. Ponisa nandza wa wena—u Xikwembu xanga—la ku tshembaka.” U tlhele a ku: “Oho Yehovha, ndzi letele hi ndlela ya wena. Ndzi ta famba entiyisweni wa wena. Endla mbilu ya mina yi va ni vun’we leswaku yi chava vito ra wena.”—Ps. 86:2, 11.

² Loko hi nga n’wi tshembi hi mbilu hinkwayo Yehovha, Xikwembu xa ntiyiso, swilo swin’wana swi nga hi endla hi nga ha tshembeki ngopfu eka yena. Ku navela ko biha ku fana ni tibomo leti fuhlekiweke endleleni leyi hi fambaka eka yona. Hambiloko hi tshame hi tshembekile eka Yehovha loko hi langutane ni swiyimo leswi tshikilelaka, hi nga ha wela emintlhan’wini ya Sathana kumbe eswirimbanini swa yena. Kutani sweswi i swa nkoka swinene leswaku hi hlakulela ku tshembeka eka Yehovha hi mbilu hinkwayo, hi nga si weriwa hi miringo! Bibele yi ri: “Hlayisa mbilu ya wena ku tlula hinkwaswo leswi swi faneleke swi hlayisiwa.” (Swiv. 4:23) Hi nga dyondza swilo swa nkoka swinene emhakeni leyi loko hi kambisisa rungula ra muprofeta wa le Yuda, loyi a a rhumiwe hi Yehovha eka Hosi Yerobuwamu wa le Israyele.

“Mina Ndzi Ta Ku Nyika Nyiko”

3. Yerobuwamu u angule njhani loko muprofeta wa Xikwembu a n’wi byela rungula ra vuavanyisi?

³ Vona xivono lexi hi mahlo ya mianakanyo.  Munhu wa Xikwembu a a ha ku vula rungula leri nga tsakisiki eka Hosi Yerobuwamu, loyi a a simeke vugandzeri bya rhole emfun’weni wa le n’walungwini wa Israyele wa tinyimba ta khume. Hosi yi hlundzuke swinene hikwalaho ka rungula rero. Yi lerise malandza ya yona leswaku ma khoma murhumiwa loyi. Kambe Yehovha a a n’wi sirhelela nandza wakwe. Hi ku tsopeta ka tihlo, voko leri hosi yi ri tshambuluteke hikwalaho ko kariha ri omile hi singita, naswona alitari ya vugandzeri bya mavunwa yi pandzeke hi le xikarhi. Kutani hi xitshuketa Yerobuwamu u cince mianakanyo yakwe. U kombele munhu wa Xikwembu a ku: “Ndzi kombela leswaku u kombela Yehovha Xikwembu hi matimba, wena u ndzi khongelela leswaku voko ra mina ri vuyiseriwa eka mina.” Hiloko muprofeta a khongela kutani voko ra hosi ri hola.—1 Tih. 13:1-6.

4. (a) Ha yini nyiko ya hosi a yi ta ringa ku tshembeka ka muprofeta? (b) Xana muprofeta u angule njhani?

⁴ Endzhaku ka sweswo Yerobuwamu u byele munhu wa Xikwembu xa ntiyiso a ku: “A hi ye endlwini u ya dya swakudya, mina ndzi ta ku nyika nyiko.” (1 Tih. 13:7) I yini leswi muprofeta a a fanele a swi endla? Xana a a fanele a ya endlwini ya hosi leyi endzhaku ka loko a yi byele rungula ra vuavanyisi? (Ps. 119:113) Kumbe xana a a fanele a ala xirhambo xa hosi, hambileswi yi tikombaka yi tisola? Yerobuwamu a a fuwile naswona a a ta swi kota ku nyika vanghana vakwe tinyiko ta risima. Loko ku ri leswaku muprofeta wa Xikwembu a a ri ni moya wa ku navela swilo leswi vonakaka, nyiko ya hosi a yi ta va ndzingo lowukulu eka yena. Hambiswiritano, Yehovha a a lerise muprofeta loyi a ku: “U nga tshuki u dya xinkwa kumbe u nwa mati, naswona u nga tshuki u tlhela hi ndlela leyi u yeke ha yona.” Kutani muprofeta u hlamule a nga kanakani a ku: “Hambiloko a wu ndzi nyike hafu ya yindlu ya wena, a ndzi nga ta ya na wena ndzi ya dya xinkwa kumbe ndzi ya nwa mati endhawini leyi.” Kutani muprofeta a suka eBethele a famba hi ndlela yin’wana. (1 Tih. 13:8-10) Xiboho xa muprofeta loyi xi hi dyondzisa yini mayelana ni ku tshembeka hi mbilu hinkwayo?—Rhom. 15:4.

“Eneriseka”

5. Rifuwo ri ku kavanyeta njhani ku tshembeka ka hina?

⁵ Ku hlongorisa rifuwo swi nga tikomba swi nga ku khumbi ku tshembeka ka munhu, kambe ka khumbeka. Xana ha xi tshemba xitshembiso xa Yehovha xa leswaku u ta hi nyika leswi hi swi lavaka hakunene? (Mat. 6:33; Hev. 13:5) Ematshan’weni yo tikarhatela ku kuma swilo swin’wana swa vulovolovo leswi hi tsandzekaka ku swi kuma sweswi, xana hi nga swi kota ku hanya hi nga ri na swona? (Hlaya Vafilipiya 4:11-13.) Xana hi titwa hi navela ku tshika lunghelo ro endla swo tala evandlheni kumbe entirhweni lowu hi wu endlelaka Xikwembu hikwalaho ko lava ku kuma leswi hi swi lavaka sweswi? Xana hi rhangisa ku tirhela Yehovha hi ku tshembeka evuton’wini bya hina? Tinhlamulo ta hina ti ta titshega hileswaku hi tirhela Xikwembu hi mbilu hinkwayo kumbe e-e. Muapostola Pawulo u tsale a ku: “Ku tinyiketela loku ku nga ni vukwembu swin’we ni ku eneriseka i ndlela leyi pindzurisaka swinene. Hikuva a hi tanga na nchumu emisaveni, naswona a hi nge fambi na nchumu. Kutani, loko hi ri ni swakudya ni swifunengeto, hi ta eneriseka hi swilo leswi.”—1 Tim. 6:6-8.

6. Hi swihi swilo leswi nga ha vonakaka swi ri nkateko eka hina naswona i yini lexi nga ta hi pfuna leswaku hi swi amukela kumbe hi nga swi amukeli?

⁶ Hi xikombiso, muthori wa hina a nga ha hi nyika xikhundlha leswaku hi ta hola mali yo tala hi tlhela hi kuma ni swilo swin’wana. Kumbexana ha swi vona leswaku mali hi to yi nusa kunene hi masaka, loko ho rhurhela etikweni kumbe exifundzheni xin’wana leswaku hi ya tirha kona. Eku sunguleni, sweswo swi nga ha vonaka ku ri nkateko lowu humaka eka Yehovha. Kambe hi nga si teka goza, xana a hi fanelanga hi kambisisa leswaku i yini lexi hi susumetelaka ku endla sweswo? Hi fanele hi tivutisa leswi, “Xana xiboho xa mina xi ta byi khumba njhani vuxaka bya mina na Yehovha?”

7. Ha yini swi ri swa nkoka ku tsuvula mianakanyo yo hlongorisa rifuwo etimbilwini ta hina?

⁷ Mafambiselo ya Sathana ma tshama ma ri karhi ma kucetela vanhu leswaku va hlongorisa rifuwo. (Hlaya 1 Yohane 2:15, 16.) Xikongomelo xa Diyavulosi i ku onha timbilu ta hina. Hikokwalaho, hi fanele hi xalamukela ku vona ni ku tsuvula mianakanyo ya ku hlongorisa rifuwo etimbilwini ta hina. (Nhlav. 3:15-17) Yesu a swi n’wi tikelanga ku ala loko Sathana a n’wi tshembisa mimfumo hinkwayo ya misava. (Mat. 4:8-10) U lemukisile a ku: “Tshamani mi pfule mahlo ya n’wina naswona mi tivonela eka muxaka wun’wana ni wun’wana wa  ku navela, hikuva hambiloko munhu a ri ni swo tala, vutomi byakwe a byi humi eka swilo leswi a nga na swona.” (Luka 12:15) Ku tshembeka swi ta hi pfuna leswaku hi nga titshembi kambe hi tshemba Yehovha.

‘U Xisiwe’ Hi Muprofeta La Dyuhaleke

8. Xana vutshembeki bya muprofeta wa Xikwembu byi ringiwe njhani?

⁸ Swilo a swi ta va swi n’wi fambele kahle muprofeta wa Xikwembu loko a a lo tikhomela riendzo ra yena a tlhelela ekaya. Hambiswiritano, hi nkarhi wolowo a a langutane ni ndzingo wun’wana. Bibele yi ri: “Muprofeta un’wana la dyuhaleke a a tshama eBethele, vana vakwe va fika va n’wi rungulela,” hinkwaswo leswi endlekeke esikwini rolero. Endzhaku ko twa xiviko, mukhalabye loyi a kombela vana vakwe leswaku va n’wi bohela mbhongolo leswaku a landza muprofeta wa Xikwembu. A nga si famba ku ya kwihi, u kume muprofeta wa Xikwembu a tshame ehansi ka murhi lowukulu kutani a ku: “A hi ye endlwini, u ya dya xinkwa.” Loko munhu wa Xikwembu xa ntiyiso a ala xirhambo lexi, wanuna la dyuhaleke u n’wi hlamule a ku: “Na mina ndzi muprofeta ku fana na wena, ntsumi yi vulavule na mina hi rito ra Yehovha, yi ku, ‘Vuya na yena endlwini ya wena leswaku a dya xinkwa ni ku nwa mati.’” Kambe Matsalwa ma ri: “A a n’wi xisa.”—1 Tih. 13:11-18.

9. Matsalwa ma ri yini hi vakanganyisi, naswona va onhisela vamani?

⁹ Ku nga khathariseki leswaku a ku ri xihi xikongomelo xa muprofeta la dyuhaleke, u hembe mavunwa. Kumbexana mukhalabye loyi u tshame a va muprofeta wo tshembeka wa Yehovha. Hambiswiritano, sweswi a a ri eku n’wi kanganyiseni. Matsalwa a ma wu amukeli mukhuva wolowo. (Hlaya Swivuriso 3:32.) Vakanganyisi va onha vuxaka bya vona na Yehovha naswona hakanyingi va onhisela ni van’wana.

“A Tlhela” Ni Mukhalabye

10. Muprofeta wa Xikwembu u angule njhani loko mukhalabye un’wana a n’wi rhamba, naswona ku ve ni vuyelo byihi?

¹⁰ Muprofeta loyi wa le Yuda a a fanele a byi vonile vukanganyisi bya muprofeta la dyuhaleke. A fanele a tivutise leswaku, ‘Ha yini Yehovha a rhumele ntsumi eka munhu un’wana leswaku yi tisa swileriso leswintshwa malunghana na mina?’ Muprofeta loyi a a fanele a kombele Yehovha leswaku a n’wi hlamusela hi ta swileriso leswi leswintshwa, kambe Matsalwa ma kombisa leswaku a nga swi endlanga sweswo. Ematshan’weni ya sweswo, ‘u tlhele ni mukhalabye luya leswaku a ya dya xinkwa endlwini yakwe ni ku nwa mati.’ Sweswo a swi n’wi tsakisanga Yehovha. Loko muprofeta loyi a kanganyisiweke a hetelele a khome ndlela yo tlhelela eYuda, u dlayiwe hi nghala. Wa nga vona ndlela leyi ntirho wa yena wo profeta wu heleke ku vava ha yona!—1 Tih. 13:19-25. *

11. Hi xihi xikombiso lexinene lexi vekiweke hi Ahiya?

 ¹¹ Hi hala tlhelo, muprofeta Ahiya loyi a a rhumiwe ku ya tota Yerobuwamu leswaku a va hosi, u tshame a tshembekile kukondza a dyuhala. Loko Ahiya se a dyuharile naswona a nga ha voni, Yerobuwamu u rhumele nsati wakwe leswaku a ya n’wi vutisa hi ta vumundzuku bya n’wana wa vona wa jaha loyi a a vabya. Ahiya u profete hi xivindzi leswaku n’wana wa Yerobuwamu u ta fa. (1 Tih. 14:1-18) Yin’wana ya mikateko leyi Ahiya a yi kumeke ku ve lunghelo ra ku hoxa xandla eka Rito ra Xikwembu leri huhuteriweke. Njhani? Hi ku famba ka nkarhi rungula rakwe ri tirhisiwe hi muprista Ezra.—2 Tikr. 9:29.

12-14. (a) Hi dyondza yini eka khombo leri humeleleke muprofeta loyi a ha ri ntsongo? (b) Kombisa xilaveko xo anakanyisisa hi vukheta hi xikhongelo hi ndzayo leyi sekeriweke eBibeleni leyi vakulu va hi nyikaka yona.

¹² Bibele a yi hi byeli leswaku ha yini muprofeta loyi a ha ri ntsongo a nga vutisanga Yehovha loko a nga si tlhela a ya dya ni ku nwa ni mukhalabye luya. Xana swi nga endleka leswaku mukhalabye luya u n’wi byele leswi n’wi tsakisaka? Hi dyondza yini emhakeni leyi? Hi fanele hi khorwiseka hi ku helela leswaku swileriso swa Yehovha i swinene. Naswona hi fanele hi tiyimisela ku swi namarhela ku nga khathariseki leswi nga ta humelela.

¹³ Loko vanhu van’wana va nyikiwa ndzayo va twa leswi va lavaka swona ntsena. Hi xikombiso, muhuweleri a nga ha tshembisiwa ntirho wo tihanyisa lowu nga ta endla leswaku a nga ha heti nkarhi wo tala ni ndyangu wakwe ni vandlha. A nga ha kombela mpfuno eka nkulu. Nkulu a nga ha vula leswaku a nga na mfanelo yo byela makwerhu loyi ndlela leyi a faneleke a hlayisa ndyangu wa yena ha yona. Kutani nkulu a nga ha bula ni makwerhu yoloye hi ndlela leyi vumoya byakwe byi nga ha vaka ekhombyeni ha yona loko a amukela ntirho lowu a tshembisiwaka wona. Xana makwerhu yoloye u to tsundzuka ntsena leswi nkulu a nga bula na yena ha swona eku sunguleni, kumbe u ta anakanyisisa hi leswi nga ta endleka hikwalaho ka xiboho lexi a nga ta xi teka? Swi le rivaleni leswaku makwerhu loyi u fanele a kambisisa mhaka leyi ku vona leswi nga ta ka swi nga veki vuxaka bya yena na Xikwembu ekhombyeni.

¹⁴ Anakanya hi xiyimo xin’wana lexi nga ha humelelaka. Makwerhu wa xisati a nga ha vutisa nkulu loko swi fanerile leswaku a hambana ni nuna wakwe la nga riki Mukreste. Handle ko kanakana, nkulu u ta n’wi hlamusela leswaku hi yena n’wini a faneleke a tiendlela xiboho loko a ta hambana na yena kumbe a hambeta a tshama na yena. Nkulu a nga ha n’wi hlamusela ndzayo ya Bibele emhakeni yoleyo. (1 Kor. 7:10-16) Xana makwerhu yoloye wa xisati u ta swi tekela enhlokweni leswi nkulu loyi a  swi vulaka? Kumbexana se u tibyele khale leswaku u lava ku hambana na yena? Loko a endla xiboho xa yena, u ta va a tlharihile loko a anakanyisisa hi xikhongelo hi ndzayo leyi sekeriweke eBibeleni.

Titsongahate

15. I yini leswi hi swi dyondzaka eka xihoxo xa muprofeta wa Xikwembu?

¹⁵ I yini swin’wana leswi hi nga swi dyondzaka eka xihoxo lexi endliweke hi muprofeta wa le Yuda? Swivuriso 3:5 yi ri: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini.” Ematshan’weni ya leswaku a ya emahlweni a tshemba Yehovha hilaha a endleke hakona eku sunguleni, eka xiendlakalo lexi muprofeta wa le Yuda u lo tiendlela xiboho xo tiva hi yena. Xihoxo xakwe xi endle leswaku a lahlekeriwa hi vutomi bya yena xi tlhela xi n’wi onhela vito ra yena lerinene eka Xikwembu. Leswi n’wi humeleleke swi kandziyisa nkoka wa ku titsongahata ni ku tirhela Yehovha hi ku tshembeka!

16, 17. I yini leswi nga ta hi pfuna leswaku hi tshama hi tshembekile eka Yehovha?

¹⁶ Mboyamelo wa hina wa vutianakanyi wu tala ku hi hambukisa. “Mbilu yi kanganyisa ngopfu ku tlula hinkwaswo naswona yi ni khombo.” (Yer. 17:9) Leswaku hi tshama hi tshembekile eka Yehovha, hi fanele hi tikarhatela ku hluvula vumunhu bya khale ni mukhuva wa byona wa ku tikukumuxa ni wa ku titshemba. Naswona hi fanele hi ambala vumunhu lebyintshwa, “lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Hlaya Vaefesa 4:22-24.

¹⁷ Swivuriso 11:2 yi ri: “Vutlhari byi ni lava va titsongahataka.” Ku tshembela eka Yehovha hi ku titsongahata swi ta hi sivela ku endla swihoxo leswikulu. Hi xikombiso, ku hela matimba swi nga soholota ndlela leyi hi endlaka swiboho ha yona. (Swiv. 24:10) Hi nga ha karharisiwa hi ku hlanganyela eka ntirho wo karhi wo kwetsima kutani hi sungula ku vona onge wa hina ntirho se hi wu endlile kutani hi nga phula byi hola, kumbexana hi tibyela leswaku se i nkarhi wa leswaku hi tshika van’wana va ya emahlweni na wona. Kumbe hi nga ha navela ku hanya hi ndlela leyi vanhu van’wana va hanyaka ha yona. Hambiswiritano, ‘ku tikarhata ka hina hi matimba’ ni ku tshama ‘nkarhi hinkwawo hi ri ni swo tala swo swi endla entirhweni wa Hosi’ swi ta sirhelela timbilu ta hina.—Luka 13:24; 1 Kor. 15:58.

18. Hi nga endla yini loko swi nga ri erivaleni leswaku hi yihi ndlela leyi hi nga yi tekaka?

¹⁸ Minkarhi yin’wana, hi nga ha boheka ku endla swiboho swo tika, naswona swi nga ha endleka swi nga ri erivaleni leswaku hi yihi ndlela leyi hi nga yi tekaka. Loko swi ri tano, xana hi nga ringeka leswaku hi tiendlela xiboho handle ka nkongomiso wa Xikwembu? Minkarhi hinkwayo loko hi tikuma hi ri eswiyin’weni swo tano, hi ta va hi tlharihile loko hi kombela Yehovha leswaku a hi pfuna. Yakobo 1:5 yi ri: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa.” Tata wa hina wa le tilweni u ta hi nyika moya lowo kwetsima lowu hi wu lavaka leswaku hi ta endla swiboho leswinene.—Hlaya Luka 11:9, 13.

Tiyimisele Ku Tshama U Tshembekile

19, 20. Hi fanele hi tiyimisela ku endla yini?

¹⁹ Emalembeni ya mpfilumpfilu ya le ndzhaku ka ku va Solomoni a xandzukile evugandzerini bya ntiyiso, malandza ya Xikwembu a ma fanele ma ku kombisa swinene ku tshembeka ka wona. I ntiyiso leswaku vo tala va landzule ripfumelo ra vona. Nilokoswiritano, van’wana va tshame va tshembekile eka Yehovha.

²⁰ Siku rin’wana ni rin’wana hi boheka ku endla swiboho leswi ringaka ku tshembeka ka hina eka Xikwembu. Na hina hi nga tshama hi ri lava tshembekaka. A hi tshameni hi tshembekile eka Yehovha hi mbilu hinkwayo, hi ri karhi hi tiyiseka swinene leswaku u ta hambeta a katekisa malandza yakwe lama tshembekaka.—2 Sam. 22:26.

[Nhlamuselo ya le hansi]

U Nga Hlamula Njhani?

• Ha yini hi fanele hi tikarhatela ku tsuvula mianakanyo ya ku hlongorisa rifuwo etimbilwini ta hina?

• I yini lexi nga ta hi pfuna leswaku hi tshama hi tshembekile eka Yehovha?

• Ku titsongahata ku nga hi pfuna njhani leswaku hi tshama hi tshembekile eka Xikwembu?

[Swivutiso Swa Dyondzo]

[Swifaniso leswi nga eka tluka 9]

Xana swa ku tikela ku lwisana ni miringo?

[Swifaniso leswi nga eka tluka 10]

Xana u ta anakanyisisa swinene hi ndzayo leyi sekeriweke eBibeleni?