Yehovha U Ma Khathalela Hi Rirhandzu Malandza Yakwe Lama Dyuhaleke

“Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.”—HEV. 6:10.

1, 2. (a) Loko u vona munhu la nga ni misisi yo basa sweswo swi nga ha ku tsundzuxa yini? (b) Yehovha u va languta njhani Vakreste lava dyuhaleke?

LOKO u vona vadyuhari evandlheni lava nga ni misisi yo basa, xana va ku tsundzuxa rungula leri nga ebukwini ya Bibele ya Daniyele? Eka xivono lexi Yehovha Xikwembu a xi kombeke Daniyele, U tikombise a ri ni misisi yo basa. Daniyele u tsale a ku: “Ndzi ya emahlweni ndzi languta kukondza ku vekiwa swiluvelo kutani Nkulukumba wa Masiku a tshama ehansi. Swiambalo swakwe a swi base ku fana ni gamboko, misisi ya nhloko yakwe a yi fana ni voya lebyi baseke.”—Dan. 7:9.

² Loko wulu yi nga si endliwa nchumu yi va yi ri yo basa. Xisweswo, misisi yo basa ni xithopo lexi nge “Nkulukumba wa Masiku” swi kombisa malembe yo tala lawa Xikwembu xi nga na wona xi ri karhi xi hanya ni vutlhari lebyikulu lebyi xi nga na byona, ku nga swilo leswi endlaka leswaku xi faneriwa hi ku va hi xi xixima swinene. Kutani, xana Yehovha, Nkulukumba wa Masiku u va languta njhani vavanuna ni vavasati vo tshembeka lava dyuhaleke? Rito ra Xikwembu ri vula leswaku “misisi ya mpunga i harhi ya ku saseka loko yi kumeka endleleni ya ku lulama.” (Swiv. 16:31) Kutani loko Mukreste la tshembekaka a va ni misisi yo basa hikwalaho ko dyuhala, ku kula koloko ku sasekile emahlweni ka Xikwembu. Xana u languta vadyuhari hi ndlela leyi Yehovha a va langutaka ha yona?

Ha Yini Va Ri Va Risima?

3. Ha yini Vakreste-kulorhi lava dyuhaleke va ri va risima eka hina?

³ Malandza man’wana ya Xikwembu lama dyuhaleke lama rhandzekaka i swirho swa Huvo leyi Fumaka ya Timbhoni ta Yehovha, valanguteri va miganga ni va swifundzha va sweswi ni va khale, maphayona lama hisekaka ni vahuweleri va Mfumo lava kuleke lava tirhaka hi ku tshembeka emavandlheni ya hina. Ku nga va ku ri ni van’wana lava u va tivaka lava chumayeleke mahungu lamanene hi ku hiseka malembe yo tala, lava swikombiso swa vona leswinene swi khutazeke vantshwa vo tala ni ku cinca vutomi bya vona. Vapfumeri-kulorhi van’wana lava dyuhaleke va tshame va va ni vutihlamuleri byo tala naswona va tiyisele nxaniso hikwalaho ka mahungu lamanene. Yehovha ni “hlonga ro tshembeka ni ro tlhariha” va ma tlangela swinene matshalatshala lawa va ma endleke ni lawa va nga le ku ma endleni entirhweni wa Mfumo.—Mat. 24:45.

4. Ha yini hi fanele hi xixima Vakreste lava dyuhaleke hi tlhela hi va khongelela?

⁴ Malandza wolawo yo tshembeka lama dyuhaleke ma fanele ma nkhensiwa ni ku xiximiwa hi malandza laman’wana hinkwawo ya Yehovha Xikwembu. Entiyisweni Nawu lowu Xikwembu xi wu nyikeke Muxe wu kombisa leswaku ku anakanyela ni ku xixima vadyuhari swi fambisana ni ku chava Yehovha. (Lev. 19:32) Minkarhi hinkwayo hi fanele hi khongelela vanhu lava vo tshembeka naswona hi nkhensa Xikwembu hikwalaho ka mintirho ya vona ya rirhandzu. Muapostola Pawulo u khongelele vatirhi-kulobye lava rhandzekaka, lavakulu ni lavatsongo.—Hlaya 1 Vatesalonika 1:2, 3.

5. Hi nga vuyeriwa njhani loko hi tolovelana ni vagandzeri va Yehovha lava dyuhaleke?

⁵ Ku tlula kwalaho, vandlha hinkwaro ri nga vuyeriwa loko ri tolovelana ni Vakreste lava dyuhaleke. Vagandzeri va Yehovha vo tshembeka lava  dyuhaleke va kume vutivi byo tala hikwalaho ko dyondza, ku va ni vuxiya-xiya ni ntokoto. Va dyondze ku lehisa mbilu ni ku va ni ntwela-vusiwana, naswona ku dyondzisa van’wana leswi va nga swi dyondza swi va tisela ntsako ni ku eneriseka. (Ps. 71:18) Vantshwa, tlharihani kutani mi kelela vutivi onge hiloko mi kelela mati exihlobyeni lexi enteke.—Swiv. 20:5.

6. U nga va kombisa njhani vadyuhari leswaku u va teka va ri va risima?

⁶ Xana wa va byela vadyuhari leswaku u va tlangela hilaha Yehovha a va tlangelaka hakona? Sweswo u nga swi endla hi ku va byela ndlela leyi u va rhandzaka ha yona hikwalaho ka ku tshembeka ka vona ni ndlela leyi u swi tlangelaka ha yona leswi va swi vulaka. Tlhandlakambirhi, loko u tirhisa leswi u swi dyondzaka eka vona, u kombisa leswaku u va xixima hi mbilu hinkwayo. Vakreste vo tala lava dyuhaleke va xi tsundzuka xitsundzuxo xa vutlhari lexi va xi kumeke eka Vakreste vo tshembeka lava dyuhaleke ni ndlela leyi xi va pfuneke ha yona evuton’wini loko va xi tirhisa. *

Kombisa Ntwela-vusiwana Hi Swiendlo

7. Yehovha u byi byarhise vamani vutihlamuleri lebyikulu bya ku khathalela vadyuhari?

⁷ Xikwembu xi byarhise mindyangu leyi nga ni vadyuhari vutihlamuleri lebyikulu bya leswaku yi va khathalela. (Hlaya 1 Timotiya 5:4, 8.) Yehovha wa tsaka loko mindyangu yi khathalela maxaka ya yona lama dyuhaleke xisweswo yi kombisa leswaku ya khathala hi vadyuhari tanihi leswi na yena a khathalaka ha vona. Xikwembu xa yi seketela mindyangu yoleyo naswona xa yi katekisa hikwalaho ka matshalatshala ni ku titsona ka yona swo karhi leswaku yi khathalela vadyuhari. *

8. Ha yini mavandlha ma fanele ma khathalela Vakreste lava dyuhaleke?

⁸ Hilaha ku fanaka, Yehovha wa tsaka loko mavandlha ma pfuna vadyuhari vo tshembeka lava lavaka mpfuno kambe ku nga ri na xirho xa ndyangu lexi nga Mukreste kumbe xaka leri swi lavaka ku va pfuna. (1 Tim. 5:3, 5, 9, 10) Hi ndlela yoleyo mavandlha ma kombisa leswaku ma ni ‘ntlhaveko wa xinakulobye, xinakulobye xa vumakwerhu ni ntsetselelo’ eka vadyuhari. (1 Pet. 3:8) Leswi ma swi endlelaka vadyuhari lava nga kona evandlheni swi kombisiwe kahle hi Pawulo loko a vula leswaku loko xirho xin’we xa miri xi xaniseka, “swirho leswin’wana hinkwaswo swi xaniseka na xona.” (1 Kor. 12:26) Ku va ni ntwela-vusiwana eka vadyuhari swi kombisa nsinya wa nawu wa xitsundzuxo xa Pawulo lexi nge: “Hambetani  mi rhwalelana mindzhwalo, xisweswo mi hetisisa nawu wa Kreste.”—Gal. 6:2.

9. Hi swihi swiphiqo leswi munhu a nga vaka na swona loko a dyuhala?

⁹ Hi swihi swiphiqo leswi vadyuhari va langutanaka na swona? Vo tala va hatla va karhala. Swi nga ha va tikela hambi ku ri ku endla swilo leswi tolovelekeke swo tanihi ku ya eka dokodela, ku tata tifomo, ku basisa yindlu ni ku sweka. Tanihi leswi ku dyuhala ku endlaka leswaku vadyuhari va nga ha swi naveli ngopfu swakudya naswona va nga ha viki na torha ngopfu, va nga ha tibyela leswaku a va fanelanga va dya kumbe ku nwa hilaha va faneleke va endla hakona. Ku nga ha endleka leswi fanaka ni hi swakudya swa moya. Matihlo ni tindleve leswi dyuhaleke swi nga endla leswaku ku hlaya ni ku yingisela eminhlanganweni swi tika, naswona ku tilunghiselela ku ya eminhlanganweni ya Vukreste swi nga ha karharisa. Kutani i yini leswi van’wana va nga va endlelaka swona vadyuhari volavo?

Ndlela Leyi U Nga Va Pfunaka Ha Yona

10. I yini leswi vakulu va nga swi endlaka ku tiyiseka leswaku vadyuhari va kuma mpfuno lowu va wu lavaka?

¹⁰ Emavandlheni yo tala vadyuhari va khathaleriwa hi ndlela leyinene ngopfu. Vamakwerhu lava nga ni rirhandzu va va pfuna hi ku ya va xavela leswi va swi lavaka, va va swekela ni ku va basisela tiyindlu. Va va pfuna leswaku va dyondza, va lunghekela ku ya eminhlanganweni ni ku va kona nkarhi na nkarhi ensin’wini. Vantshwa lava nga Timbhoni va famba na vona ni ku va lunghiselela swo famba. Loko va nga swi koti ku huma ekaya, va yingisela minhlangano hi riqingho kumbe va va rhekhodela yona. Loko swi koteka, vakulu va tiyiseka leswaku leswi faneleke swi endleriwa vadyuhari swa endliwa evandlheni. *

11. Hlamusela ndlela leyi ndyangu wun’wana wu n’wi pfuneke ha yona makwerhu la dyuhaleke.

¹¹ Mukreste un’wana ni un’wana a nga wu kombisa moya wa ku hanana ni malwandla. Endzhaku ka loko nsati wa makwerhu un’wana la dyuhaleke a lovile, makwerhu loyi a a nga ha ta swi kota ku hakelela ndhawu leyi a va tshama eka yona handle ka penceni ya nsati wa yena. Yena ni nsati wakwe a a va dyondze Bibele ni ndyangu wun’wana lowu a ku ri tatana, manana ni vana vambirhi va vanhwanyana lava a va ri emalembeni ya kondlo-a-ndzi-dyi, naswona a wu ri ni yindlu leyikulu. Ndyangu wolowo wu nyike makwerhu yoloye makamara mambirhi endlwini ya wona. Va hete malembe ya 15 va tshama na yena, va dya na yena, va tiphina na yena naswona a va n’wi rhandza. Vana va kona va vuyeriwe ngopfu hi ripfumelo ra yena ni ntokoto wakwe, na yena u vuyeriwile hi ku tshama ni vanhu lava tsakeke. Makwerhu loyi u tshame na vona ku fikela loko a fa a ri ni malembe ya 89. Ndyangu wolowo wa ha nkhensa Xikwembu ni sweswi hi mikateko yo tala leyi wu yi kumeke loko wu tshama na yena. A wu ‘lahlekeriwanga hi hakelo ya wona’ hi ku va wu pfune mudyondzisiwa wa Yesu Kreste.—Mat. 10:42. *

12. I yini leswi u nga swi endlaka ku kombisa leswaku wa va anakanyela hi ndlela ya rirhandzu vamakwerhu lava dyuhaleke?

¹² Swi nga ha endleka wena u nga swi koti ku pfuna vamakwerhu lava dyuhaleke hilaha ndyangu lowu wu endleke hakona, kambe u nga swi kota ku pfuna vadyuhari leswaku va ya eminhlanganweni ni le nsin’wini. U nga ha va rhamba ekaya ka wena kumbe u famba na vona loko mi ti humesa. U nga va endzela, ngopfu-ngopfu loko va vabya kumbe va nga swi koti ku huma ekaya. Ku tlula kwalaho, minkarhi hinkwayo u fanele u va khoma tanihi vanhu lava kuleke. Loko va ha hanye kahle emianakanyweni, Vakreste lava dyuhaleke va fanele va byeriwa loko ku endliwa swiboho leswi va khumbaka. Hambi ku ri lava va pfaka va lahlekeriwanyana hi miehleketo va swi vona loko va ha xiximiwa.

Yehovha A Nge Wu Rivali Ntirho Wa Wena

13. Ha yini ku anakanyela vadyuhari lava nga Vakreste swi ri swa nkoka?

¹³ Ku anakanyela vadyuhari i swa nkoka. Swi tolovelekile leswaku vadyuhari va titwa va tshikilelekile hileswi va nga ha swi kotiki ku endla leswi a va kota ku swi endla loko va ha tiyile naswona va ha hanye kahle. Hi xikombiso, makwerhu un’wana wa xisati loyi a tirheleke Yehovha malembe  ya 50 naswona a ri phayona ra nkarhi hinkwawo u khomiwe hi vuvabyi lebyi a byi n’wi heta matimba hakatsongo-tsongo naswona a byi endla leswaku swi n’wi tikela swinene ku ya eminhlanganweni. Loko a pimanisa ndlela leyi a a yi tirha ha yona nsimu khale ni leswi a yi tirhisaka xiswona sweswi, a a rila. U vule marito lawa a ri karhi a rila naswona a langute ehansi, “Phela sweswi leswi ndzi swi endlaka a swa ha pfuni nchumu.”

14. Hi xihi xikhutazo lexi malandza yo tshembeka ya Yehovha ma nga xi kumaka eka tipisalema?

¹⁴ Loko se u dyuharile, xana u tshame u titwa hi ndlela yoleyo yo vava? Kumbe, xana minkarhi yin’wana u pfa u titwa onge Yehovha u ku fularherile? Swi nga ha endleka mupisalema na yena a titwe hi ndlela yoleyo emalembeni yakwe ya vudyuhari, hikuva u kombele Yehovha a ku: “U nga ndzi cukumeti emalembeni ya vudyuhari; loko matimba ya mina ma hela, u nga ndzi siyi. Oho Xikwembu, u nga ndzi tshiki ku fikela emalembeni ya ku dyuhala ni ya ku va mpunga.” (Ps. 71:9, 18) Yehovha a a nga ta n’wi fularhela mutsari wa pisalema yoleyo, kutani na wena A nge ku fularheli. Eka pisalema yin’wana, Davhida u vulavule hi ndlela leyi a wu tshembaka ha yona nseketelo wa Xikwembu. (Hlaya Pisalema 68:19.) Loko u ri Mukreste wo tshembeka la dyuhaleke, u nga tiyiseka leswaku Yehovha u na wena naswona u ta hambeta a ku hlayisa siku rin’wana ni rin’wana.

15. I yini lexi nga pfunaka vadyuhari leswaku va languta swilo hi ndlela leyinene?

¹⁵ Hinkwaswo leswi n’wina Timbhoni ta Yehovha leti dyuhaleke mi swi endleke ni leswi mi nga le ku swi endleni leswaku mi vangamisa Xikwembu, a xi nge swi rivali. Bibele yi ri: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Hev. 6:10) Hikokwalaho, u nga vi ni mianakanyo ya leswaku Yehovha a nga ha ri na mhaka na wena hileswi se u dyuhaleke. Tiyimisele ku siva mianakanyo leyi tshikilelaka hi mianakanyo leyinene. Tsaka hi mikateko leyi ana se u yi kumeke ni hi ntshembo lowu u nga na wona wa nkarhi lowu taka! “Vumundzuku ni ntshembo” lowu hi nga na wona a swi ringanisiwi na nchumu, naswona leswi swi tiyisekisiwe hi Muvumbi wa hina. (Yer. 29:11, 12; Mint. 17:31; 1 Tim. 6:19) Anakanyisisa hi ntshembo lowu u nga na wona, tikarhatele ku tshama u ri muntshwa embilwini ni le miehleketweni, naswona u nga swi tekeli ehansi ku va kona ka wena evandlheni! *

16. I yini lexi endleke leswaku nkulu un’wana la dyuhaleke a vona swi antswa leswaku a tshika ku va nkulu, naswona huvo ya vakulu yi n’wi khutaze njhani?

¹⁶ Ehleketa hi Johan, loyi a nga ni malembe ya 80 naswona a khathalelaka nsati wakwe la tshembekaka Sannie, loyi sweswi a vabyaka. * Vamakwerhu va xisati va cincana ku sala na Sannie leswaku Johan a ta ya eminhlanganweni ni le nsin’wini. Kambe, sweswinyana Johan u titwe a tshikilelekile swinene naswona a a anakanya leswaku swa antswa a tshika ku va nkulu wa vandlha. U vutisile mihloti yi ri karhi yi tenga-tenga kunene, “Swa ha ndzi pfuna yini ku va nkulu? A ka ha ri na nchumu lexi ndzi xi endlaka evandlheni.” Vakulu-kulobye va n’wi tiyisekisile leswaku ntokoto ni swiboho leswi a swi endlaka a swi ri swa nkoka. Va n’wi khutaze ku ya emahlweni a ri nkulu, hambileswi a a nga ha endli swo tala. Leswi a khutaziweke swinene, Johan wa ha ri nkulu, ku nga nkateko evandlheni.

Yehovha Wa Khathala Hakunene

17. Bibele yi va tiyisekisa hi yini Vakreste lava dyuhaleke?

¹⁷ Matsalwa ma swi veka erivaleni leswaku vadyuhari va nga swi kota ku ya emahlweni va veka mihandzu loko va ri karhi va tirhela Yehovha, ku nga khathariseki swiphiqo leswi vaka kona loko munhu a dyuhala. Mupisalema u te: “Lava va byariweke endlwini ya Yehovha . . . va ta hambeta va humelela niloko va ri timpunga, va ta hambeta  va nyuhela va va vantshwa.” (Ps. 92:13, 14) Muapostola Pawulo, loyi swi nga ha endlekaka a a ri ni mavabyi yo karhi, ‘a nga tshikanga, hambiloko munhu loyi a nga yena ehandle a hlakala.’—Hlaya 2 Vakorinto 4:16-18.

18. Ha yini vapfumeri-kulorhi lava dyuhaleke ni lava va va khathalelaka va lava mpfuno wa van’wana?

¹⁸ Swikombiso swo tala swa manguva lawa swi swi veka erivaleni leswaku vadyuhari va nga “hambeta va humelela.” Kambe mavabyi ni ku dyuhala swi nga ha heta vadyuhari matimba, hambiloko va ri ni swirho swa ndyangu leswi va khathalelaka. Hambi ku ri vanhu lava khathalelaka vadyuhari va nga ha karhala. Vandlha ri ni lunghelo ni vutihlamuleri byo kombisa rirhandzu ra rona hi swiendlo eka vadyuhari ni le ka lava va va khathalelaka. (Gal. 6:10) Mpfuno wo tano wu kombisa leswaku kahle-kahle a hi byeli vadyuhari volavo leswaku va famba naswona va ‘kufumela va xurha,’ kambe hi nga va pfuni hi nchumu.—Yak. 2:15-17.

19. Ha yini vadyuhari lava nga Vakreste vo tshembeka va nga langutelaka vumundzuku va ri ni ntshembo?

¹⁹ Ku dyuhala swi nga cinca ndlela leyi Vakreste a va tirha ha yona eku sunguleni, kambe Yehovha u ta hambeta a ma rhandza swinene malandza yakwe lama dyuhaleke lama tshembekaka. Vakreste volavo hinkwavo vo tshembeka i va risima emahlweni ka yena, naswona a nge pfuki a va fularherile. (Ps. 37:28; Esa. 46:4) Yehovha u ta va hlayisa a tlhela a va kongomisa emalembeni ya vona ya vudyuhari.—Ps. 48:14.

[Tinhlamuselo ta le hansi]

U Nga Hlamula Njhani?

• Ha yini u va teka va ri va risima Vakreste vo tshembeka lava dyuhaleke?

• Hi nga swi kombisa njhani leswaku ha va anakanyela hi ndlela ya rirhandzu vagandzeri-kulorhi lava dyuhaleke?

• I yini leswi nga pfunaka malandza ya Yehovha lama dyuhaleke leswaku ma tshama ma tsakile?

[Swivutiso Swa Dyondzo]

[Swifaniso leswi nga eka tluka 18]

Vandlha ra khathala ngopfu hi vadyuhari