Tekelela Yesu Hi Ku Gandzela Xikwembu Hi Ndlela Leyi Xi Yi Amukelaka

Xikwembu hi rirhandzu xi rhamba vanhu vo “huma eka matiko hinkwawo ni tinyimba hinkwato ni vanhu hinkwavo ni tindzimi hinkwato” leswaku va xi gandzela. (Nhlav. 7:9, 10; 15:3, 4) Lava va amukelaka xirhambo lexi va nga “vona ku tsakisa ka Yehovha.” (Ps. 27:4; 90:17) Ku fana na mupisalema, va dzunisa Xikwembu hi marito lama tlakukeke, va ku: “A hi gandzeleni, hi nkhinsama; a hi nkhinsameni emahlweni ka Yehovha Muendli wa hina.”—Ps. 95:6.

Vugandzeri Lebyi Yehovha A A Byi Teka Byi Ri Bya Risima

Tanihi N’wana wa Xikwembu la tswariweke a ri swakwe, Yesu u ve ni nkarhi wo tala wo dyondza mianakanyo ya Tata wa yena, misinya ya milawu ni milawu ya yena. Hikwalaho, Yesu hi xivindzi u kombe van’wana ndlela leyi amukelekaka yo gandzela. U te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.”—Yoh. 1:14; 14:6.

Yesu u veke xikombiso lexi hetisekeke xa ku titsongahata eka Tata wa yena. U te: “A ndzi endli nchumu hi ku tisungulela; kambe ndzi vulavula swilo leswi hilaha Tatana a ndzi dyondziseke hakona.” U tlhele a ku: “Nkarhi hinkwawo ndzi endla swilo leswi n’wi tsakisaka.” (Yoh. 8:28, 29) Yesu u tsakise Tata wa yena hi tindlela tihi?

Xa nkoka, Yesu a a tinyiketele hi ku helela eka Tata wa yena, naswona leswi kahle-kahle swi vula  ku gandzela Xikwembu. Yesu u kombise ndlela leyi a a n’wi rhandza ha yona Tata wa yena hi ku N’wi yingisa, a endla ku rhandza ka Yena, hambiloko a ri emaxangwini lamakulu. (Filp. 2:7, 8) Mhaka leyi a yi ri ya nkoka eka vugandzeri bya Yesu a ku ri ku endla ntirho wo endla vadyondzisiwa lowu a a wu endla nkarhi na nkarhi lerova vapfumeri ni lava nga riki vapfumeri a va n’wi vitana Mudyondzisi. (Mat. 22:23, 24; Yoh. 3:2) Ku tlula kwalaho, Yesu u tirhise nkarhi wa yena wo tala a pfuna van’wana. Moya wa yena wa ku tinyiketela wu endle leswaku a va ni nkarhi wutsongo wa yena n’wini, kambe a a swi tsakela ku pfuna van’wana. (Mat. 14:13, 14; 20:28) Hambileswi Yesu a a tshama a khomekile, nkarhi hinkwawo a a tinyika nkarhi wa ku vulavula ni Tata wa yena wa le tilweni hi xikhongelo. (Luka 6:12) Vugandzeri bya Yesu a byi ri bya risima swinene eka Xikwembu!

Ku Tikarhatela Ku Tsakisa Xikwembu Kahle

Yehovha u yi xiyile ndlela leyi N’wana wa yena a a tikhoma ha yona kutani A vula leswaku wa n’wi amukela. (Mat. 17:5) Hambiswiritano, Sathana Diyavulosi na yena u byi xiyile vutshembeki bya Yesu, kutani u ringete ku n’wi hlasela hi tindlela to tala. Ha yini? Hikuva a ku nga si tshama ku va ni munhu wa nyama la yingiseke Xikwembu hi ku hetiseka, xisweswo a xi gandzela hi ndlela leyi xi yi lavaka ni leyi xi fanelaka. Diyavulosi a a lava ku sivela Yesu leswaku a nga gandzeli Yehovha hi ndlela leyi n’wi fanelaka.—Nhlav. 4:11.

Loko Sathana a ringeta ku kanganyisa Yesu, u n’wi ringe hi ku n’wi tshembisa nchumu wo karhi. U yise Yesu “entshaveni leyi tlakukeke ngopfu, a n’wi komba mimfumo hinkwayo ya misava ni ku vangama ka yona.” Kutani a ku: “Swilo leswi hinkwaswo ndzi ta ku nyika swona loko wo nkhinsama u ndzi gandzela.” Xana Yesu u te yini? U te: “Suka, Sathana! Hikuva ku tsariwile, ‘U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.’” (Mat. 4:8-10) Ina, Yesu u swi lemukile leswaku ku gandzela Sathana a ku ta va ku gandzela swifaniso, ku nga khathariseki leswaku vuyelo bya kona a byi tikomba byi ta va byinene. A a nga swi lavi nikatsongo ku gandzela munhu hambi a ri wihi handle ka Yehovha.

Loko Sathana a lava hi n’wi gandzela a nge hi tshembisi mimfumo hinkwayo ya misava ni ku vangama ka yona. Kambe wa ha ringeta ku onha vugandzeri lebyi Vakreste va ntiyiso va byi endlelaka Xikwembu. Diyavulosi u lava leswaku hi gandzela munhu kumbe swilo swin’wana.—2 Kor. 4:4.

Kreste Yesu u tshembeke ku fikela eku feni. Hi ku tshembeka eka Xikwembu, Yesu u vangamise Yehovha hi ndlela leyi ku nga riki na munhu un’wana loyi a n’wi vangamiseke ha yona. Hina Vakreste va ntiyiso namuntlha, hi tikarhatela ku tekelela vutshembeki bya Yesu hi ku gandzela Muvumbi ntsena. Hakunene, lunghelo ra hina ra risima swinene i ku va ni vuxaka lebyinene na Xikwembu.

Mikateko Leyi Tisiwaka Hi Ku Gandzela Hi Ndlela Leyi Amukelekaka

Ku ‘gandzela hi ndlela leyi baseke ni leyi nga nyamangiki’ hi ku ya hi langutelo ra Xikwembu  swi tisa mikateko yo tala. (Yak. 1:27) Hi xikombiso, hi hanya enkarhini lowu vanhu vo tala va nga “lava tirhandzaka, varhandzi va mali, lava titivaka,” ni “lava nga rhandziki vunene.” (2 Tim. 3:1-5) Hambiswiritano, endyangwini wa Xikwembu hi ni lunghelo ro tolovelana ni vanhu lava baseke, lavanene lava tikarhatelaka ku hlayisa mimpimanyeto ya Xikwembu ya ku xi gandzela. Xana sweswo a swi phyuphyisi?

Loko hi nga tinyamisi hi misava leyi, hi ta tlhela hi va ni ripfalo leri baseke. Hi lava ku hlayisa ripfalo leri baseke hi ku yingisa misinya ya milawu ya Xikwembu yo lulama ni ku yingisa milawu ya Khezari leyi nga lwisaniki na milawu ya Xikwembu.—Mar. 12:17; Mint. 5:27-29.

Vugandzeri bya mbilu hinkwayo byi tisa mikateko yin’wana. Loko hi tinyiketela ku endla ku rhandza ka Xikwembu ematshan’weni ya ku endla ku rhandza ka hina, vutomi bya hina byi ta va na xikongomelo naswona hi ta eneriseka. Ematshan’weni yo vula leswaku: “A hi dyeni hi nwa, hikuva mundzuku hi ta fa,” hi na ntshembo wa xiviri wa vutomi lebyi nga heriki emisaveni leyi nga paradeyisi.—1 Kor. 15:32.

Buku ya Nhlavutelo yi kombisa leswaku lava tshamaka va basile emahlweni ka Yehovha va ta “[huma] enhlomulweni lowukulu.” Rungula leri ri vula leswaku “Loyi a tshameke exiluvelweni u ta vamba ntsonga wa yena ehenhla ka vona.” (Nhlav. 7:13-15) Loyi a tshameke ehenhla ka xiluvelo i Yehovha Xikwembu, Munhu la vangamaka swinene evuakweni hinkwabyo. Anakanya ndlela leyi a wu ta tsaka ha yona loko a ku amukela tanihi muendzi entsongeni wa yena, a ku sirhelela leswaku ku nga vi na nchumu lexi nga ta ku vavisa. Hambi ku ri sweswi wa hi sirhelela a tlhela a hi khathalela hi mpimo wo karhi.

Ku tlula kwalaho, hinkwavo lava gandzelaka Xikwembu hi ndlela leyi xi yi amukelaka va hlamuseriwa tanihi lava va kongomisiwaka “eminseledyaneni ya mati ya vutomi.” Minseledyana leyi yi yimela malunghiselelo hinkwawo lawa Yehovha a hi endlelaka wona leswaku hi kuma vutomi lebyi nga heriki. Hikwalaho, hi ku tirhisa gandzelo ra nkutsulo ra Kreste, “Xikwembu xi ta sula mihloti hinkwayo ematihlweni ya vona.” (Nhlav. 7:17) Vanhu va ta endliwa lava hetisekeke, ku nga nchumu lowu nga ta va tsakisa swinene lava nga ni ntshembo wo hanya hi masiku emisaveni. Hambi ku ri sweswi vagandzeri va Xikwembu lava tsakeke va huwelela hi ntsako, va kombisa ku tlangela ka vona eka Yehovha ni ku n’wi gandzela swin’we ni lava va nga etilweni lava yimbelelaka va ku: “Yikulu naswona ya hlamarisa mintirho ya wena, Yehovha Xikwembu, xa Matimba Hinkwawo. Tindlela ta wena ti lulamile naswona i ta ntiyiso, wena Hosi leyi nga riki na makumu. Kunene, i mani la nga ta ka a nga ku chavi, Yehovha, a vangamisa vito ra wena, hikuva hi wena ntsena u tshembekeke? Hikuva matiko hinkwawo ma ta ta ma ta gandzela emahlweni ka wena, hikuva swileriso swa wena swo lulama swi kombisiwile.”—Nhlav. 15:3, 4.

[Xifaniso lexi nga eka tluka 27]

Sathana u vula leswaku u ta hi nyika yini loko ho n’wi gandzela?