Yehovha I “Muponisi” Wa Hina

“Yehovha u ta va pfuna a va ponisa.”—PS. 37:40.

1, 2. Hi wihi ntiyiso lowu nga hundzukiki hi Yehovha lowu hi chavelelaka ni ku hi tiyisa?

MINDZHUTI leyi vaka kona loko ku ri ni dyambu a yi yimi ndhawu yin’we. Loko misava yi ri karhi yi rhendzeleka, mindzhuti leyi na yona a yi yimi ndhawu yin’we. Nilokoswiritano, Muvumbi wa misava ni dyambu a nga hundzuki. (Mal. 3:6) Bibele yi ri: “Yena a nga cinca-cinci ku fana ni ku hundzuluka ka ndzhuti.” (Yak. 1:17) Ntiyiso lowu, lowu nga hundzukiki hi Yehovha wa hi chavelela ni ku hi tiyisa, ngopfu-ngopfu loko hi langutane ni miringo ni swiphiqo leswi tikaka ku swi tiyiselela. Ha yini?

² Hilaha hi swi voneke hakona exihlokweni lexi hundzeke, Yehovha u tikombise a ri “Muponisi” eminkarhini ya ku tsariwa ka Bibele. (Ps. 70:5) A nga cinca-cinci naswona leswi a swi vuleke wa swi hetisisa; hikwalaho vagandzeri vakwe namuntlha va nga tiyiseka leswaku “u ta va pfuna a va ponisa.” (Ps. 37:40) Yehovha u ma ponise njhani malandza yakwe manguva lawa? Xana a nga hi ponisa njhani ha un’we wa hina?

Ku Kutsuriwa Eka Vakaneti

3. Ha yini hi nga tiyisekaka leswaku vakaneti a va nge va siveli vanhu va Yehovha leswaku va chumayela mahungu lamanene?

³ A ku na nkaneto ni wun’we wa Sathana lowu nga sivelaka Timbhoni ta Yehovha leswaku ti gandzela Yehovha ntsena. Rito ra Xikwembu ra hi tiyisekisa ri ku: “Tlhari rihi ni rihi leri nga ta endleriwa ku ku hlasela a ri nge humeleli, ni ririmi rihi ni  rihi leri nga ta kanetana na wena ehubyeni u ta ri gweva.” (Esa. 54:17) Vakaneti va ringetile ku sivela vanhu va Xikwembu leswaku va chumayela, kambe va tsandzekile. Xiya swikombiso leswimbirhi.

4, 5. Vanhu va Yehovha va langutane ni nkaneto wihi hi 1918, naswona ku ve ni vuyelo byihi?

⁴ Hi 1918, vanhu va Yehovha va xanisiwe swinene hikwalaho ka nhlohlotelo wa vafundhisi lava a va ringeta ku va tshikisa ntirho wa vona wo chumayela. Hi May 7, hulumendhe ya le United States yi humese maphepha lawa a ma lerisa leswaku J. F. Rutherford, loyi hi nkarhi wolowo a a rhangela ntirho wo chumayela emisaveni hinkwayo, swin’we ni swirho swin’wana swa yindlu-nkulu va fanele va khomiwa. Ku nga si hela ni tin’hweti timbirhi, Makwerhu Rutherford swin’we ni swirho leswin’wana va hehliwe hi swihehlo swa mavunwa swa leswaku va endle xikhiri kutani va gweviwa ku tshama ekhotsweni malembe yo tala. Xana vakaneti va swi kotile ku tirhisa tihuvo leswaku va yimisa ntirho wo chumayela hi ku helela? Nikatsongo!

⁵ Tsundzuka xitshembiso xa Yehovha: “Tlhari rihi ni rihi leri nga ta endleriwa ku ku hlasela a ri nge humeleli.” Hi March 26, 1919, swilo swi hundzuke hi ndlela leyi nga languteriwangiki, endzhaku ka tin’hweti ta kaye Makwerhu Rutherford swin’we ni swirho leswin’wana leswi a a pfaleriwe na swona ekhotsweni va humesiwe hi beyili. Lembe leri landzeleke hi May 5, 1920, milandzu leyi a va khomeriwe yona yi suriwile. Vamakwerhu va tirhise ntshunxeko wa vona leswaku va ya emahlweni ni ntirho wa Mfumo. Hi byihi vuyelo lebyi veke kona? Ku sukela kwalaho ku ve ni ku andza lokukulu! Eka leswi swi nga endleka hinkwaswo ku dzuneka ku ya eka “Muponisi.”—1 Kor. 3:7.

6, 7. (a) Xana Timbhoni ta Yehovha ti khomiwe njhani etikweni ra Jarimani leri a ri fumiwa hi Manazi naswona ku ve ni vuyelo byihi? (b) Xana matimu ya manguva lawa ya vanhu va Yehovha ma tiyisekisa yini?

⁶ Sweswi xiya xikombiso xa vumbirhi. Hi 1934, Hitler u hlambanye leswaku u ta herisa Timbhoni ta Yehovha eJarimani. A a tiyimiserile ku hetisisa marito ya yena. Endzhaku ka loko Hitler a vule marito wolawo, vanhu vo tala va khomiwile va pfaleriwa. Timbhoni leti endlaka magidi ti khomiwe hi ndlela ya tihanyi; tin’wana ta madzana ti dlayiwile etikampeni ta nxaniso. Xana Hitler u swi kotile ku herisa Timbhoni etsimeni rakwe? Xana u swi kotile ku yimisa ntirho wo chumayela eJarimani? Nikatsongo! Hi nkarhi wa nxaniso, vamakwerhu va ye emahlweni va chumayela exihundleni. Endzhaku ka loko ku we hulumendhe ya Manazi, va hambete va chumayela. Namuntlha eJarimani ku ni vahuweleri va Mfumo vo tlula 165 000. Nakambe “Muponisi” u endle leswi a swi tshembiseke, loko a ku: “Tlhari rihi ni rihi leri nga ta endleriwa ku ku hlasela a ri nge humeleli.”

⁷ Matimu ya manguva lawa ya Timbhoni ta Yehovha ma tiyisekisa leswaku Yehovha a nge pfumeli leswaku vanhu va yena va herisiwa hilaha ku heleleke. (Ps. 116:15) Kambe, xana Yehovha u ta hi sirhelela ha un’we wa hina? Xana Yehovha u hi ponisa njhani ha un’we wa hina?

Xana Hi Nga Sirheleriwa Leswaku Hi Nga Xanisiwi?

8, 9. (a) Hi swi tivisa ku yini leswaku Xikwembu a xi nge hi ponisi hi singita? (b) Hi wihi ntiyiso lowu hi nga fanelangiki hi wu ba hi makatla?

⁸ Ha swi tiva leswaku Yehovha a nga hi tshembisanga leswaku u ta hi sirhelela nkarhi hinkwawo leswaku hi nga hlaseriwi. Hi yima hi tiyile ku fana ni Vaheveru vo tshembeka vanharhu lava nga ala ku gandzela xifaniso xa nsuku xa Hosi Nebukadnetsara. Majaha wolawo lama chavaka Xikwembu a ma nga tibyelanga leswaku Yehovha u ta ma ponisa hi singita. (Hlaya Daniyele 3:17, 18.) Kambe Yehovha u ma kutsurile emalangavini ya le kheleni ra ndzilo lowu pfurhaka. (Dan. 3:21-27) Hambiswiritano, ni le minkarhini ya ku tsariwa ka Bibele a va talanga vanhu lava ponisiweke hi singita. Malandza ya Yehovha yo tala ma dlayiwe hi vakaneti.—Hev. 11:35-37.

⁹ Ku vuriwa yini hi namuntlha? Yehovha tanihi “Muponisi” wa swi kota ku kutsula vanhu lava nga eswiyin’weni swa khombo. Xana hi nga vula leswaku Yehovha wa hi pfuna etimhakeni tin’wana kambe eka tin’wana a nga hi pfuni? Nikatsongo. Nilokoswiritano, munhu loyi a poneke khombo ro karhi a nga vula leswaku Yehovha u n’wi sirhelerile. Swi ta va swi nga ri swinene loko van’wana va n’wi kaneta leswaku Yehovha u n’wi sirhelerile. Hi nkarhi lowu fanaka ntiyiso lowu hi nga fanelangiki hi wu ba hi makatla hileswaku Vakreste vo tala vo tshembeka va dlayiwile hi nkarhi wa nxaniso hilaha a swi ri hakona emfun’weni wa Manazi. Van’wana va file hi ndlela yo vava. (Ekl. 9:11) Hi nga ha vutisa, ‘Xana Yehovha a nga vanga “Muponisi” eka malandza yo tshembeka lama dlayiweke?’ A swi tano nikatsongo.

10, 11. Ha yini munhu a nga swi koti ku tisirhelela leswaku a nga fi, kambe xana Yehovha u ta endla yini hi rifu?

¹⁰ Xiya mhaka leyi: Munhu a nge swi koti ku tisirhelela leswaku a nga fi, hikuva a ku na munhu la nga ‘ponisaka moya-xiviri wakwe evokweni ra Sheol’ kumbe Hayidesi, ku nga sirha ra vanhu leri tolovelekeke. (Ps. 89:48) Kambe, ku vuriwa yini hi Yehovha? Makwerhu un’wana wa xisati loyi a poneke hi nkarhi wa nxaniso wa Manazi u tsundzuka marito lama vuriweke hi mana wakwe loyi na yena a nga Mbhoni, loko a n’wi chavelela hikwalaho ka leswi a feriweke hi vanhu lava a va rhandzaka etikampeni ta nxaniso, u te: “Loko rifu a ri ta tshama ri ri kona a swi ta vula leswaku ri ni matimba ku tlula Xikwembu, a hi swona ke?” Entiyisweni, rifu a ri na matimba ku tlula Xihlovo xa vutomi lexi nga ni matimba hinkwawo! (Ps. 36:9) Hinkwavo lava nga eSheol kumbe eHayidesi, va le mianakanyweni ya Yehovha, naswona u ta va ponisa.—Luka 20:37, 38; Nhlav. 20:11-14.

¹¹ Ninamuntlha, Yehovha u nghenelela hi ku kongoma evuton’wini bya vagandzeri vakwe lava tshembekaka. A hi kambisiseni tindlela tinharhu leti ha tona a tikombiseke a ri “Muponisi” wa hina.

Yehovha Wa Byi Sirhelela Vuxaka Bya Hina Na Yena

12, 13. Ha yini swi ri swa nkoka swinene leswaku vuxaka bya hina na Yehovha byi sirheleriwa, naswona u hi pfuna njhani leswaku byi sirheleleka?

¹² Yehovha wa byi sirhelela vuxaka bya hina na yena tanihi leswi byi nga bya nkoka swinene. Leswi hi nga Vakreste va ntiyiso ha swi twisisa leswaku ku ni swin’wana swa nkoka swinene ku tlula vutomi bya hina bya sweswi. Nchumu wa risima swinene evuton’wini bya hina i vuxaka bya hina na Yehovha. (Ps. 25:14; 63:3) Loko a hi nga ri na vuxaka ni Xikwembu, vutomi bya hina bya sweswi a byi nga ta va na xikongomelo, naswona a hi nga ta va na ntshembo hi vumundzuku.

¹³ Lexi tsakisaka, Yehovha u hi pfuna hi tindlela hinkwato leswaku hi tiyisa vuxaka bya hina na yena. U hi nyike Rito rakwe, moya wakwe wo kwetsima ni mavandlha lama nga kona emisaveni hinkwayo leswaku swi hi pfuna. Xana hi nga swi tirhisa njhani hi ndlela leyinene swilo leswi Yehovha a hi nyikaka swona? Loko hi hisekela ku dyondza Rito ra yena nkarhi hinkwawo, hi ta tiyisa ripfumelo ra hina ni ntshembo wa hina. (Rhom. 15:4) Loko hi khongelela moya wakwe hi mbilu hinkwayo, u ta hi pfuna leswaku hi hlula ndzingo wo endla swilo leswi nga onhaka vuxaka bya hina na yena. (Luka 11:13) Hi ku landzela nkongomiso lowu ntlawa wa hlonga wu hi nyikaka wona hi ku tirhisa minkandziyiso leyi sekeriweke eBibeleni, minhlangano ya vandlha, tinhlengeletano ni mintsombano hi ta xurha hi ‘swakudya swa moya leswi hi swi kumaka hi nkarhi lowu faneleke.’ (Mat. 24:45) Malunghiselelo lawa hinkwawo ma sirhelela vuxaka bya hina ni Xikwembu naswona ma hi  pfuna leswaku hi tiyisa vuxaka bya hina na xona.—Yak. 4:8.

14. Hlamusela ntokoto lowu kombisaka ndlela leyi Yehovha a byi sirhelelaka ha yona vuxaka bya hina na yena.

¹⁴ Leswaku u vona ndlela leyi Yehovha a byi sirhelelaka ha yona vuxaka bya hina na yena, tsundzuka vatswari lava ku vulavuriweke ha vona eku sunguleni ka xihloko lexi hundzeke. Endzhaku ka masiku ma nga ri mangani va kume xiviko xa leswaku n’wana wa vona Theresa u nyamalarile, va byeriwe mahungu lama tsemaka nhlana ya leswaku se u dlayiwile. * Tata wakwe u ri: “A ndzi khongelele leswaku Yehovha a n’wi sirhelela. Kutani loko a kumiwe a file, ndzi tivutisile leswaku ha yini swikhongelo swa mina swi nga hlamuriwanga. Ndza swi tiva leswaku Yehovha a nga tshembisi ku sirhelela vanhu va yena hi singita. Ndzi hambete ndzi khongela ndzi kombela leswaku ndzi va ni ku twisisa. Ndzi chavelelekile loko ndzi twisisa leswaku Yehovha u sirhelela vanhu va yena hi tlhelo ra moya—hileswaku u hi nyika leswi hi swi lavaka leswaku hi sirhelela vuxaka bya hina na yena. Ku sirheleriwa hi ndlela leyi a swi ringanisiwi na nchumu, hikuva swi khumba vumundzuku bya hina lebyi nga heriki. Hi ndlela yoleyo, Yehovha u n’wi sirhelerile Theresa; hikuva loko a fa a a n’wi tirhela hi ku tshembeka. Ndzi kume ku rhula hi ku tiva leswaku vutomi bya yena bya nkarhi lowu taka byi le mavokweni ya yena ya rirhandzu.”

Ku Tiyisiwa Loko U Vabya

15. Yehovha a nga hi pfuna njhani loko hi hlaseriwe hi vuvabyi?

¹⁵ Yehovha a nga hi hlayisa “ehenhla ka mubedo wa vuvabyi” hilaha a endleke hakona eka Davhida. (Ps. 41:3) Hambileswi eminkarhini ya hina Yehovha a nga hi hanyisiki hi singita, kambe wa hi pfuna. Njhani? Misinya ya milawu leyi kumekaka eRitweni rakwe yi nga hi pfuna leswaku hi endla swiboho swa vutlharhi malunghana ni vutshunguri lebyi hi nga ta byi hlawula ni timhaka tin’wana. (Swiv. 2:6) Hi nga ha kuma rungula leri nga hi pfunaka ni swiringanyeto swin’wana leswi kumekaka eswihlokweni leswi nga eka Xihondzo xo Rindza ni Xalamuka! leswi vulavulaka hi xiphiqo xo karhi xa rihanyo ra hina. Yehovha a nga hi nyika “matimba lama tlulaka lama tolovelekeke” hi ku tirhisa moya wakwe leswaku hi kota ku langutana ni swiyimo swa hina, naswona hi tshama hi tshembekile ku nga khathariseki leswi nga ha humelelaka. (2 Kor. 4:7) Hi mpfuno wolowo a hi nge karhateki ngopfu hi vuvabyi bya hina kutani hi nga ha vi na mhaka ni vuxaka bya hina na Yehovha.

16. Makwerhu un’wana u swi kotise ku yini ku tiyiselela vuvabyi lebyi a nga na byona?

¹⁶ Anakanya hi makwerhu wa xinuna loyi a ha riki jaha loyi ku vulavuriweke ha yena eka xihloko lexi hundzeke. Hi 1998, loko a kamberiwa u kumeke a ri ni vuvabyi bya ku fa ka misiha (amyotrophic lateral sclerosis, kumbe ALS), lebyi nga n’wi siya a lamarile. * Xana u langutane njhani ni vuvabyi lebyi? U ri: “Minkarhi yin’wana loko ndzi twa switlhavi ni ku hela matimba a ndzi twa onge ndzi nga fa ndzi wisa maxangu lawa. Nkarhi wun’wana ni  wun’wana loko ndzi titwa ndzi heleriwa hi matimba ndzi khongela eka Yehovha ndzi kombela leswaku a ndzi nyika swilo swinharhu: ku va ni mbilu yo rhula, ku lehisa mbilu ni ku tiyisela. Ndza swi vona leswaku Yehovha u swi hlamurile swikhongelo swa mina. Ku va ni mbilu yo rhula swi ndzi endla leswaku ndzi anakanya hi timhaka leti chavelelaka to tanihi leswi vutomi byi nga ta va xiswona emisaveni leyintshwa loko se ndzi kota ku tifambela, ndzi tiphina hi swakudya swo nandziha ni ku tlhela ndzi vulavula ni vandyangu wa mina. Ku lehisa mbilu swi ndzi pfuna leswaku ndzi kota ku ya emahlweni ni vutomi hambileswi ndzi lamaleke. Ku tiyisela swi ndzi endla ndzi kota ku tshama ndzi tshembekile, naswona ndzi nga pfumeleli swilo swin’wana swi onha vuxaka bya mina na Yehovha. Ndzi yi twisisa kahle ndlela leyi mupisalema Davhida a a titwa ha yona, hikuva ndza swi xiya leswaku Yehovha u ndzi seketela emavabyini.”—Esa. 35:5, 6.

Ku Nyikiwa Swakudya

17. I yini leswi Yehovha a tshembiseke leswaku u ta hi endlela swona, naswona xitshembiso xexo xi vula yini?

¹⁷ Yehovha u tshembisa leswaku u ta swi khathalela swilaveko swa hina. (Hlaya Matewu 6:33, 34 na Vaheveru 13:5, 6.) Leswi a swi vuli swona leswaku hi ta tshika ku tirha hi tibyela leswaku hi ta kuma swakudya hi singita. (2 Tes 3:10) Leswi xitshembiso xexo xi vulaka swona hi leswi: Loko hi rhangisa Mfumo wa Xikwembu evuton’wini bya hina naswona hi lava ntirho wo tihanyisa, hi nga tshembela eka Yehovha leswaku a khathalela swilaveko swa hina leswaku hi kota ku hanya. (1 Tes. 4:11, 12; 1 Tim. 5:8) A nga hi nyika leswi hi swi lavaka hi tindlela leti hi nga ti langutelangiki, kumbexana hi ku tirhisa mugandzeri-kulorhi loyi a nga hi pfunaka hi swilo swa nyama kumbe a hi nyika ntirho.

18. Vula ntokoto lowu kombisaka leswaku swilaveko swa hina swi nga enerisiwa loko hi ri eku pfumaleni.

¹⁸ Tsundzuka manana la nga riki na nuna loyi ku vulavuriweke ha yena eku sunguleni ka xihloko lexi hundzeke. Loko yena swin’we ni xinhwanyetana xakwe va rhurhele endhawini yin’wana, swi n’wi tikerile ku kuma ntirho. U ri: “Nimixo a ndzi pfuka ndzi ya ensin’wini, kutani ndzhenga wun’wana ni wun’wana a ndzi famba ndzi lavana ni ntirho. Ndzi tsundzuka siku rin’wana loko ndzi ya exitolo ndzi ya xava ntswamba, ndzi fike ndzi yima ndzi honolela matsavu, kambe a ndzi nga ri na mali yo ma xava. A ndzi nga si tshama ndzi titwa ndzi tshikilelekile hi ndlela yoleyo evuton’wini bya mina. Loko ndzi tlhelela ekaya siku rero, ndzi kume leswaku evhurandini ra mina ku vekiwe minkwama leyi teleke hi matsavu ya mixaka hinkwayo. A yi tele lerova hi yi dye tin’hweti to hlayanyana. Hiloko ndzi rila ndzi tlhela ndzi nkhensa Yehovha.” Endzhakunyana makwerhu loyi wa xisati u twe leswaku minkwama yoleyo yi tise hi makwerhu wa xinuna wa le vandlheni ra vona loyi a byaleke matsavu entangeni wakwe. Endzhakunyana u n’wi tsalerile a ku: “Hambileswi siku leriya ndzi ku nkhenseke swinene, ndzi tlhele ndzi nkhensa na Yehovha leswi a tirhiseke musa wa wena ku ndzi tsundzuxa hi rirhandzu rakwe.”—Swiv. 19:17.

19. I yini lexi malandza ya Yehovha ma nga taka ma nga kanakani ha xona loko ku fika nhlomulo lowukulu, naswona hi fanele hi tiyimisela ku endla yini sweswi?

¹⁹ Swi le rivaleni leswaku leswi Yehovha a swi endleke eminkarhini ya ku tsariwa ka Bibele ni leswi a swi endlaka enkarhini wa hina swi hi nyika xivangelo xo tshembela eka yena tanihi Mupfuni wa hina. Ku nga ri khale, loko nhlomulo lowukulu wu ta fika emisaveni ya Sathana hi ta wu lava swinene mpfuno wa Yehovha. Kambe malandza ya Yehovha ma ta lava mpfuno eka yena hi ku tiyiseka lokukulu. Ma ta swi kota ku tlakusa tinhloko ta wona naswona ma tsaka hi ku tiva leswaku ku kutsuriwa ka wona ku tshinele. (Luka 21:28) Ku nga khathariseki miringo yihi na yihi leyi hi nga ha langutanaka na yona sweswi, onge hi nga tiyimisela ku tshemba Yehovha, hi tiyiseka hi ku helela leswaku hi yena Xikwembu xa hina lexi nga hundzukiki, hakunene i “Muponisi” wa hina.

[Tinhlamuselo ta le hansi]

Wa Tsundzuka Xana?

• Yehovha u ta va ponisa njhani vanhu lava dlayiweke?

• Ha yini ku sirhelela vuxaka bya hina na Yehovha swi ri swa nkoka?

• Xana xitshembiso xa Yehovha xa ku hi khathalela hi tlhelo ra nyama xi vula yini?

[Swivutiso Swa Dyondzo]

[Xifaniso lexi nga eka tluka 8]

Makwerhu Rutherford ni swirho leswin’wana leswi a a pfaleriwe na swona hi 1918, va ntshunxiwile naswona swihehlo leswi a va hehliwa hi swona swi suriwile

[Xifaniso lexi nga eka tluka 10]

Yehovha a nga hi seketela ehenhla ka “mubedo wa vuvabyi”