Va Pfuneni Leswaku Va Vuya Handle Ko Dya Nkarhi!
Va Pfuneni Leswaku Va Vuya Handle Ko Dya Nkarhi!
“Xana hi ta ya eka mani? Hi wena u nga ni marito ya vutomi lebyi nga heriki.”—YOH. 6:68.
1. I yini leswi Petro a swi vuleke loko vadyondzisiwa vo tala va fularhela Yesu?
YESU KRESTE u tshame a fularheriwa hi vadyondzisiwa va yena vo tala lava a va nga yi amukeli yin’wana ya tidyondzo ta yena. U vutise vaapostola vakwe a ku: “N’wina a mi swi lavi ku famba, a hi swona ke?” Petro u te: “Hosi, xana hi ta ya eka mani? Hi wena u nga ni marito ya vutomi lebyi nga heriki.” (Yoh. 6:51-69) A ku nga ri na kun’wana laha a va ta ya kona. Tidyondzo ta Xiyuda a ti nga ri na wona “marito ya vutomi lebyi nga heriki” naswona marito wolawo a ma kona eka Babilona Lonkulu, mfumo wa misava wa vukhongeri bya mavunwa. Hikwalaho, mani na mani loyi a hambukeke entlhambini wa Xikwembu kambe a lavaka ku tsakisa Yehovha, ‘i nkarhi wa leswaku a xalamuka evurhongweni’ a tlhelela entlhambini.—Rhom. 13:11.
2. I yini leswi faneleke swi tsundzukiwa malunghana ni timhaka ta xihundla kumbe timhaka leti khumbaka komiti ya vuavanyisi?
2 Yehovha a a karhateka hi tinyimpfu leti lahlekeke ta Israyele. (Hlaya Ezekiyele 34:15, 16.) Hilaha ku fanaka, vakulu lava nga Vakreste va navela ku pfuna lava fanaka ni tinyimpfu lava hambukeke entlhambini naswona va fanele va wu endla ntirho wolowo. Loko va avela muhuweleri leswaku a ya dyondza ni munhu la tshikeke ku hlanganyela, loyi entiyisweni a lavaka mpfuno, xana muhuweleri yoloye u fanele a endla yini loko a kuma leswaku munhu yoloye u endle xidyoho lexikulu? Ematshan’weni ya leswaku muhuweleri a n’wi nyika xitsundzuxo hi mhaka yihi ni yihi leyi katsaka komiti ya vuavanyisi kumbe timhaka tin’wana ta xihundla, u fanele a n’wi byela leswaku a ya tivisa vakulu. Loko a nga endli tano, muhuweleri u fanele a va tivisa hi yexe.—Lev. 5:1; Gal. 6:1.
3. Wanuna loyi a a ri ni tinyimpfu ta 100 u titwe njhani loko a kuma yin’we leyi a yi lahlekile?
3 Exihlokweni lexi hundzeke ku vulavuriwe hi xifaniso xa Yesu xa wanuna loyi a a ri ni tinyimpfu ta 100. Loko a kuma leswaku yin’we yi lahlekile u siye leta 99 a ya lava leyi lahlekeke. Wa nga anakanya ndlela leyi a a tsake ha yona loko a yi kuma! (Luka 15:4-7) Na hina hi tsaka hi ndlela leyi fanaka loko nyimpfu yin’we ya Xikwembu leyi a yi lahlekile yi tlhelela entlhambini. Swi nga ha endleka leswaku vakulu ni swirho swin’wana swa vandlha va endzele munhu yoloye la tshikeke ku hlanganyela hikwalaho ka leswi va n’wi rhandzaka. Na vona va lava ku vona munhu yoloye a tlhelela entlhambini leswaku a ta kuma nseketelo, nsirhelelo ni mikateko ya Xikwembu. (Det. 33:27; Ps. 91:14; Swiv. 10:22) I yini lexi va nga xi endlaka loko va ri ni lunghelo ro pfuna munhu leswaku a tlhelela entlhambini?
4. I yini leswi hi nga swi dyondzaka eka Vagalatiya 6:2, 5?
4 Kumbexana va nga ha khutaza munhu la tshikeke ku hlanganyela leswaku a tlhelela evandlheni hi ku n’wi byela leswaku Yehovha wa ti rhandza tinyimpfu Takwe, naswona a nga langutelanga swo tala eka hina. Leswi Yehovha a lavaka leswaku hi swi endla swi katsa ku dyondza Matsalwa, ku ya eminhlanganweni ya Vukreste ni ku chumayela mahungu lamanene ya Mfumo. Swi nga va swinene ku n’wi hlayela Vagalatiya 6:2, 5 kutani u vula leswaku Vakreste va nga pfunana ku rhwalelana mindzhwalo, kambe “un’wana ni un’wana u ta rhwala ndzhwalo wakwe” wa ku va ni vutihlamuleri emahlweni ka Yehovha. Hina vini hi fanele hi tshembeka eka Xikwembu.
Xana Va Khukhuriwe Hi “Ku Vilela Hi Vutomi”?
5, 6. (a) Ha yini swi ri swa nkoka ku rhiya ndleve loko vapfumeri-kulorhi lava tshikeke ku hlanganyela va tiphofula? (b) U nga va pfuna njhani vanhu lava tshikeke ku hlanganyela leswaku va swi vona leswaku ku tshika ka vona ku ta eminhlanganweni ya vandlha swi nyanyise swiphiqo swa vona?
5 Vakulu ni vahuweleri van’wana lava wupfeke va fanele va rhiya ndleve loko vapfumeri-kulobye lava tshikeke ku hlanganyela va ri karhi va tiphofula leswaku va ta kota ku va pfuna. A hi nge u nkulu naswona u endzele mpatswa lowu nga ha tiki eminhlanganweni hikwalaho ka “ku vilela hi vutomi.” (Luka 21:34) Swiphiqo swa timali kumbe vutihlamuleri bya ndyangu lebyi engetelekeke byi nga ha va byi va endle va tsana. Va nga ha vula leswaku a va lava ku hunguta vutihlamuleri lebyi va nga na byona, kambe u nga ha va byela leswaku ku tshika ku ta eminhlanganweni a swi tlhantlhi xiphiqo. (Hlaya Swivuriso 18:1.) U nga ha va vutisa hi vutlhari u ku: “Xana leswi mi nga tshika ku ta eminhlanganweni se mi tsakile? Xana vutomi bya ndyangu wa n’wina bya antswa? Xana ntsako wa Yehovha wa ha ri khokholo ra n’wina?”—Neh. 8:10.
6 Loko vanhu lava tshikeke ku hlanganyela va anakanyisisa hi swivutiso swo tano va nga ha swi vona leswaku ku sukela loko va nga ha ti eminhlanganweni a va ha languti xiyimo xa vona hi ndlela leyi Yehovha a xi langutaka ha yona, naswona sweswi a va ha tsakanga hi ndlela leyi a va tsake ha yona eku sunguleni. (Mat. 5:3; Hev. 10:24, 25) U nga va pfuna va swi vona leswaku ku tshika ka vona ku chumayela mahungu lamanene swi endle leswaku va lahlekeriwa hi ntsako. (Mat. 28:19, 20) Kutani i yini lexi va nga xi endlaka?
7. Lava va hambukeke entlhambini hi nga va khutaza leswaku va endla yini?
7 Yesu u te: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi . . . Kutani, hitekani nkarhi hinkwawo mi endla xikombelo leswaku mi ta humelela loko mi balekela swilo leswi hinkwaswo leswi nga ta humelela.” (Luka 21:34-36) Lava va hambukeke entlhambini kambe sweswi va lavaka ku tlhela va kuma ntsako lowu a va ri na wona va nga khutaziwa ku khongelela moya lowo kwetsima ni mpfuno wa Xikwembu naswona va hanya hi ku pfumelelana ni leswi va swi khongelelaka.—Luka 11:13.
Xana Ku Na Lexi Nga Va Khunguvanyisa?
8, 9. Nkulu a nga n’wi pfunisa ku yini munhu loyi a tshikeke ku hlanganyela hikwalaho ko khunguvanyisiwa hi swo karhi?
8 Leswi vanhu va nga hetisekangiki, minkarhi yin’wana va pfa va tlulana milenge naswona sweswo swi nga khunguvanyisa munhu. Van’wana va khunguvanyisiwe hi ku va makwerhu un’wana la xiximiwaka evandlheni a endle swilo leswi nga fambisaniki ni milawu ya Yehovha. Loko makwerhu loyi a tshikeke ku hlanganyela a khunguvanyisiwe hi sweswo, nkulu la n’wi endzeleke a nga ha swi veka erivaleni leswaku Yehovha a nga khunguvanyisi munhu. Kutani ha yini munhu a fanele a herisa vuxaka bya yena ni Xikwembu swin’we ni vanhu va xona? Ematshan’weni ya sweswo munhu u fanele a ya emahlweni a tirhela Xikwembu, a ri karhi a tiyiseka leswaku “Muavanyisi wa misava hinkwayo” wa swi tiva leswi swi nga endleka naswona u ta swi lulamisa hi nkarhi lowu faneleke. (Gen. 18:25; Kol. 3:23-25) Loko munhu o khudlunyiwa hi ribye kutani a wa, u ta ringeta ku pfuka.
9 Loko a ri karhi a ringeta ku pfuna lava tshikeke ku hlanganyela, nkulu a nga ha tlhela a vula leswaku van’wana va kume leswaku swilo leswi va khunguvanyiseke hi ku famba ka nkarhi va swi vone swi nga ha vuli nchumu. Kahle-kahle loko va languta nchumu lowu a wu va khunguvanyisile a va ha wu voni. Loko munhu loyi a tshikeke ku hlanganyela a khunguvanyisiwe hi leswi a nyikiweke ndzayo, ku anakanyisisa hi yona hi xikhongelo swi nga n’wi pfuna a swi vona leswaku a swi fanerile leswaku a layiwa, naswona a nga fanelanga a pfumelela ndzayo yoleyo yi n’wi khunguvanyisa.—Ps. 119:165; Hev. 12:5-13.
Xana Va Khunguvanyisiwe Hi Ku Nga Ti Twisisi Kahle Tidyondzo To Karhi Ta Le Matsalweni?
10, 11. U nga n’wi pfunisa ku yini munhu loyi a nga ti twisisiki kahle tidyondzo tin’wana ta le Bibeleni?
10 Van’wana swi nga endleka leswaku va hambukile entlhambini wa Xikwembu hikwalaho ka leswi a va nga pfumelelani na tona tidyondzo to karhi ta Matsalwa. Vaisrayele lava ntshunxiweke evuhlongeni bya le Egipta va ‘rivale mintirho leyi Xikwembu’ xi va endleleke yona naswona a “va xi rindzanga xitsundzuxo [xa xona].” (Ps. 106:13) Swi nga va swinene ku tsundzuxa munhu la tshikeke ku hlanganyela leswaku “hlonga ro tshembeka ni ro tlhariha” ri hi nyika swakudya swa xiyimo xa le henhla leswi nga tiyisaka vuxaka bya hina na Yehovha. (Mat. 24:45) Yoleyo hi yona ndlela leyi a nga wu dyondza ha yona ntiyiso. Kutani ha yini a nga tlheli a tiyimisela ku famba entiyisweni?—2 Yoh. 4.
11 Loko nkulu a ri karhi a ringeta ku pfuna lava hambukeke entlhambini wa Xikwembu a nga ha va hlamusela hi vadyondzisiwa lava nga fularhela Yesu hikwalaho ka leswi va nga yi twisisangiki kahle yin’wana ya tidyondzo ta yena. (Yoh. 6:53, 66) Loko va tsema vuxaka lebyi a va ri na byona na Kreste ni valandzeri vakwe vo tshembeka va lahle ku tlangela ka vona swilo leswi a swi va pfuna ku tiyisa vuxaka bya vona na Yehovha naswona a va nga ha ri na ntsako. Xana lava va tshikeke ku hlanganyela ni vandlha ra Vukreste va kume ndhawu yin’wana laha va phameriwaka swakudya leswi fuweke leswi nga tiyisaka vuxaka bya vona na Yehovha? Doo, hikuva a ku na ndhawu yin’wana!
Xana Va Endle Xidyoho Lexikulu?
12, 13. Loko munhu loyi a hambukeke entlhambini a pfumela leswaku u endle xidyoho lexikulu, xana a nga pfuniwa njhani?
12 Vanhu van’wana va tshike ku chumayela kumbe ku ya eminhlanganweni ya vandlha hikwalaho ka leswi va endleke xidyoho lexikulu. Va nga ha anakanya leswaku loko vo byela vakulu xidyoho xa vona va ta susiwa eku hlanganyeleni. Kambe a va nge hlongoriwi evandlheni loko va tshikile mukhuva lowu nga fambisaniki na Matsalwa naswona va hundzuka hi ku helela. (2 Kor. 7:10, 11) Ku ri na sweswo va ta amukeriwa hi mandla mambirhi naswona vakulu va ta va pfuna leswaku va hlakulela vuxaka lebyi a va ri na byona na Yehovha eku sunguleni.
13 Loko u ri muhuweleri la nga ni ntokoto loyi a komberiweke ku pfuna munhu loyi a tshikeke ku hlanganyela, xana u fanele u endla yini loko a ku byela leswaku u endle xidyoho lexikulu? Hilaha swi hlamuseriweke hakona eku sunguleni, ematshan’weni ya leswaku u vulavula na yena hi timhaka leti faneleke ti tameriwa hi komiti ya vuavanyisi, u fanele u n’wi kombela leswaku a tivisa vakulu hi mhaka yoleyo. Loko a nga swi lavi ku endla tano, wena u ta kombisa leswaku wa khathala hi vito ra Yehovha ni vuhlayiseki bya vandlha hi ku landzela nkongomiso wa Xikwembu malunghana ni timhaka to tano. (Hlaya Levhitika 5:1.) Vakulu va swi tiva leswaku va nga n’wi pfuna njhani mani na mani loyi a lavaka ku tlhelela evandlheni naswona a tiyimiseleke ku tlhela a hanya hi ku pfumelelana ni ku rhandza ka Xikwembu. Kumbexana swi nga ha lava leswaku va n’wi nyika ndzayo leyi kombisaka leswaku va n’wi rhandza munhu yoloye. (Hev. 12:7-11) Loko munhu yoloye a pfumela leswaku u dyohele Xikwembu, u tshikile ku endla swilo swo biha leswi a a swi endla naswona u hundzukile hi mbilu hinkwayo, vakulu va ta n’wi pfuna naswona Yehovha a nga n’wi rivalela.—Esa. 1:18; 55:7; Yak. 5:13-16.
Ku Vuya Ka N’wana Swi Tisa Ntsako
14. Hi marito ya wena, hlamusela xifaniso xa Yesu xa n’wana wa vusopfa.
14 Muhuweleri loyi a komberiweke ku pfuna nyimpfu leyi tshikeke ku hlanganyela, a nga ha vulavula na yona hi xifaniso xa Yesu lexi nga eka Luka 15:11-24. Exifanisweni xexo ku vulavuriwa hi jaha leri tlangeke hi ndzhaka leyi ri nyikiweke yona. Loko nkarhi wu famba, jaha leri ri sungule ku venga ndlela yo biha leyi a ri hanya ha yona. A ri twa ndlala, a ri tsundzuke ekaya naswona endzhaku ka ku tianakanya kahle ri vone swi antswa leswaku ri tlhelela ekaya. Loko ra ha ri ekulenyana, tata wa rona u ri vonile, hiloko a tsutsuma a wela enhan’wini ya rona a nga tikoti hi ku tsaka kutani a ri ntswontswa hi rirhandzu. Loko munhu la tshikeke ku hlanganyela a anakanyisisa hi xifaniso lexi xi nga ha n’wi khutaza ku tlhelela entlhambini. Leswi mafambiselo lawa ya swilo ma nga ta lovisiwa ku nga ri khale, u fanele a tlhelela evandlheni handle ko dya nkarhi.
15. Ha yini van’wana va tshika ku hlanganyela?
15 Vanhu vo tala lava tshikaka ku hlanganyela a va fani ni n’wana wa vusopfa. Van’wana va khukhuleka hakatsongo-ntsongo ku fana ni xikepe loko xi khukhuleka eribuweni. Van’wana va karhateka ngopfu hi mivilelo lerova va kala va rivala hi vuxaka bya vona na Yehovha. Kasi van’wana va tshika ku hlanganyela hikwalaho ko khunguvanyisiwa hi xirho xa vandlha kumbe hikwalaho ka leswi va nga pfumelelaniki ni tidyondzo to karhi ta le Matsalweni. Van’wana va va va endle swilo leswi nga fambisaniki na Matsalwa. Tinhla leti nga hlamuseriwa laha ti nga ku pfuna leswaku u pfuna lava nga tshika ku hlanganyela hikwalaho ka swivangelo sweswo kumbe swin’wana leswaku va tlhela va vuya va nga si weriwa hi khombo.
“U Amukelekile N’wananga!”
16-18. (a) Nkulu un’wana u n’wi pfune njhani makwerhu wa xinuna loyi se a ku hundze malembe a tshike ku hlanganyela? (b) I yini leswi endleke makwerhu loyi a tshika ku hlanganyela, xana u pfuniwe njhani naswona vandlha ri n’wi amukele njhani?
16 Nkulu un’wana u ri: “Huvo ya hina ya vakulu yi tirha hi matimba leswaku yi endzela vanhu lava tshikeke ku hlanganyela. Ndzi anakanye hi makwerhu un’wana loyi ndzi dyondzeke na yena kutani ndzi n’wi pfuna leswaku a tiva ntiyiso. Se a a ri ni malembe ya 25 a nga ha hlanganyeli naswona swilo a swi n’wi fambela ximatsi, kutani ndzi n’wi hlamusele ndlela leyi ku tirhisa milawu ya Bibele leyi kongomisaka a swi ta n’wi pfuna ha yona. Endzhaku ka nkarhinyana u sungule ku ta eHolweni ya Mfumo naswona u tlhele a pfumela ku fambiseriwa dyondzo ya Bibele leswaku yi ta n’wi tiyisa leswaku a tlhelela entlhambini.”
17 I yini leswi nga endla leswaku makwerhu loyi a tshika ku hlanganyela? U ri: “Ndzi sungule ku karhateka ngopfu hi swilo swa misava ematshan’weni ya ku karhateka hi swilo leswi nga ta ndzi pfuna leswaku ndzi tiyisa vuxaka bya mina na Yehovha. Kutani ndzi tshike ku dyondza, ku ya ensin’wini ni ku ya eminhlanganweni. Handle ko swi xiya, ndzi kume leswaku a ndzi nga ha ri xirho xa vandlha ra Vukreste. Rirhandzu leri nkulu loyi a ndzi kombeke rona hi rona ri ndzi pfuneke leswaku ndzi tlhela ndzi hlanganyela.” Swiphiqo swa makwerhu loyi swi sungule ku hunguteka endzhaku ka loko a pfumele ku fambiseriwa dyondzo ya Bibele. U ri: “Ndzi swi xiyile leswaku leswi a ndzi kayivela swona evuton’wini bya mina a ku ri rirhandzu ni nkongomiso wa Yehovha ni nhlengeletano yakwe.”
18 Xana vandlha ri n’wi amukele njhani makwerhu loyi? U ri: “Ndzi titwa ndzi fana ni n’wana wa vusopfa loyi Yesu Kreste a vulavuleke ha yena. Entiyisweni, makwerhu un’wana wa xisati la dyuhaleke loyi se a a ri ni malembe ya 30 a ri karhi a hlanganyela naswona a ha tirhelaka Yehovha hi ku tshembeka, u te, ‘U amukelekile N’wananga!’ Marito wolawo ma ndzi khumbe mbilu. Ndzi titwe ndzi ri ekaya hakunene. Ndza ri tlangela swinene rirhandzu, musa, ku lehiseriwa mbilu ni ndlela leyi nkulu yoloye swin’we ni vandlha hinkwaro va ndzi amukeleke ha yona. Ku rhandza ka vona Yehovha ni muakelani swi ndzi pfunile hakunene leswaku ndzi tlhelela entlhambini.”
Va Khutaze Leswaku Va Teka Goza Hi Xihatla!
19, 20. U nga va pfuna njhani lava tshikeke ku hlanganyela leswaku va tlhelela entlhambini handle ko dya nkarhi, naswona u nga va kombisa njhani leswaku Xikwembu a xi langutelanga swo tala eka hina?
19 Hi hanya emasikwini ya makumu naswona makumu ya mafambiselo lawa ya swilo ma kwala nyongeni. Hikwalaho khutaza lava nga ha hlanganyeliki leswaku va ta eminhlanganweni ya Vukreste. Va khutaze leswaku va nga ha dyi nkarhi. Va tsundzuxe leswaku Sathana u le ku ringeteni ku herisa vuxaka bya vona ni Xikwembu hi ku va endla va anakanya leswaku swiphiqo swa vutomi bya vona swi ta hela loko va fularhela vugandzeri bya ntiyiso. U nga va tiyisekisa leswaku va nga phyuphya ntsena hi ku va valandzeri va Yesu lava tshembekaka.—Hlaya Matewu 11:28-30.
20 Tsundzuxa vamakwerhu lava tshikeke ku hlanganyela leswaku Xikwembu xi lava leswaku hi endla leswi hi nga swi kotaka. Loko Mariya makwavo wa Lazaro a soriwile hileswi a toteke nhloko ya Yesu hi mafurha yo durha, Yesu u te: “Tshikani wansati loyi. . . . U endle leswi a swi kotaka.” (Mar. 14:6-8) Yesu u bumabumele noni leyi pfumalaka leyi nyikeleke hi mali leyitsongo etempeleni. Na yona yi endle leswi yi swi koteke. (Luka 21:1-4) Vunyingi bya hina ha swi kota ku ya eminhlanganweni ya Vukreste ni ku ya entirhweni wo chumayela hi Mfumo. Hi mpfuno wa Yehovha, vo tala va lava a va tshike ku hlanganyela na vona va ta endla leswi fanaka.
21, 22. U nga va tiyisekisa hi yini lava tlhelelaka eka Yehovha?
21 Loko munhu la fanaka ni nyimpfu loyi a a tshike ku hlanganyela a chava ku ya hlangana ni vamakwavo u nga ha n’wi tsundzuxa hi ntsako lowu veke kona loko n’wana wa vusopfa a tlhelela ekaya. Ni lava tlhelelaka evandlheni va endla leswaku ku va ni ntsako lowu fanaka. Va khutaze leswaku va teka goza sweswi ro kaneta Diyavulosi kutani va tshinela eka Xikwembu.—Yak. 4:7, 8.
22 Lava va tlhelelaka eka Yehovha va ta amukeriwa hi mandla mambirhi. (Swir. 3:40) A swi kanakanisi leswaku loko va tirhela Xikwembu enkarhini lowu hundzeke a va ri ni ntsako lowukulu. Lava tlhelelaka entlhambini handle ko dya nkarhi va ta kuma mikateko yo tala enkarhini lowu taka!
U Nga Hlamula Njhani?
• U nga n’wi pfuna njhani Mukreste loyi a tshikeke ku hlanganyela hikwalaho ko khunguvanyeka?
• I yini leswi nga pfunaka munhu loyi a tshikeke ku hlanganyela ni ntlhambi wa Xikwembu hikwalaho ka leswi a nga ti twisisiki kahle tidyondzo to karhi?
• U nga n’wi pfuna njhani munhu loyi a chavaka ku tlhelela evandlheni?
[Swivutiso Swa Dyondzo]
[Xifaniso lexi nga eka tluka 13]
Rhiya ndleve loko Mbhoni leyi tshikeke ku hlanganyela yi tiphofula
[Xifaniso lexi nga eka tluka 15]
Ku anakanyisisa hi xifaniso xa Yesu xa n’wana wa vusopfa swi nga susumetela van’wana leswaku va tlhelela entlhambini