‘Tana U Va Mulandzeri Wa Mina’

“Loko munhu a lava ku ndzi landzela, a a titshike kutani a rhwala mhandzi yakwe ya nxaniso siku ni siku a ndzi landzela”—LUKA 9:23.

1, 2. (a) Xana Yesu a a rhamba vanhu leswaku va endla yini? (b) Xana wena u xi amukele njhani xirhambo xa Yesu?

LOKO Yesu a ri kusuhi ni ku heta vutirheli byakwe, a a chumayela ePeriya, laha ku nga xifundzha lexi nga entsungeni wa nambu wa Yordani, en’walungu-vuxa bya Yudiya. Loko a ri kwalaho jaha rin’wana ri n’wi vutise leswaku ri fanele ri endla yini leswaku ri kuma vutomi lebyi nga heriki. Endzhaku ka loko Yesu a swi xiyile leswaku jaha rolero a ri landzela Nawu wa Muxe hi ku tshembeka, u ri rhambe hi ndlela yo hlawuleka, a ku: “Famba, u ya xavisa swilo leswi u nga na swona u nyika swisiwana, kutani u ta va ni xuma etilweni, u ta, u va mulandzeri wa mina.” (Mar. 10:21) Hakunene leri a ku ri lunghelo ro hlawuleka, ku kuma xirhambo xa ku landzela Yesu, N’wana la nga swakwe wa Xikwembu Lexi nge Henhla-henhla!

² Jaha rolero a ri xi amukelanga xirhambo xolexo, kambe van’wana va xi amukerile. Loko Yesu a nga si hlangana ni jaha rolero, u byele Filipi a ku: “Vana mulandzeri wa mina.” (Yoh. 1:43) Filipi u xi amukerile xirhambo xexo kutani a va muapostola. Yesu u tlhele a rhamba Matewu ivi na yena a xi amukela. (Mat. 9:9; 10:2-4) Kahle-kahle Yesu a a rhamba vanhu hinkwavo lava rhandzaka ku lulama loko a ku: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso siku ni siku a ndzi landzela nkarhi hinkwawo.” (Luka 9:23) Hikwalaho, munhu un’wana ni un’wana a nga va mulandzeri wa Yesu loko a swi lava hakunene. Xana wa swi navela ku n’wi landzela? Vo tala va hina se hi xi amukerile xirhambo xa Yesu xa tintswalo, naswona loko hi ri ensin’wini hi rhamba ni vanhu van’wana.

3. I yini leswi hi nga swi endlaka leswaku hi nga khukhuleki kutani hi tshika ku landzela Yesu?

³ Lexi twisaka ku vava hileswaku van’wana lava a va tsakela ntiyiso wa le Bibeleni va tshike ku dyondza. Sweswo swi endle leswaku va tsana kutani eku heteleleni va “khukhuleka” va nga ha n’wi landzeli Yesu. (Hev. 2:1) I yini leswi hi nga swi endlaka leswaku hi nga weli entlhan’wini wolowo? Ku tivutisa swivutiso leswi landzelaka swi nga hi pfuna: ‘I yini leswi eku sunguleni swi nga ndzi endla ndzi hlawula ku landzela Yesu? Xana swi vula yini ku n’wi landzela?’ Ku tshama hi ri karhi hi anakanya hi tinhlamulo ta swivutiso leswi swi ta hi pfuna leswaku hi tiyisa xiboho xa hina xa ku tshama endleleni leyi hi tihlawuleleke yona. Swi ta tlhela swi hi pfuna leswaku hi khutaza van’wana leswaku va landzela Yesu.

Ha Yini Hi Landzela Yesu?

4, 5. Ha yini Yesu a swi fanelekela ku rhangela?

⁴ Muprofeta Yeremiya u te: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yer. 10:23) Matimu ma swi veke erivaleni leswaku marito ya Yeremiya i ntiyiso. Swi ye swi va erivaleni leswaku vanhu lava nga hetisekangiki a va nge swi koti ku tifuma. Hi amukele xirhambo xa ku landzela Yesu hikuva hi dyondzile leswaku wa faneleka ku va Murhangeri wa hina loyi ku nga riki na munhu loyi a nga fumaka ku fana na yena. Xiya timfanelo tin’wana ta Yesu.

⁵ Yo sungula, Yesu u hlawuriwe hi Yehovha hi byakwe leswaku a va Murhangeri la nga Mesiya. A ku na munhu la nga hi hlawulelaka Murhangeri lonene handle ka Muvumbi wa hina. Ya vumbirhi, Yesu u ni timfanelo leti hi nga ti tsakelaka ni ku ti tekelela. (Hlaya Esaya 11:2, 3.) I xikombiso lexi hetisekeke. (1 Pet. 2:21) Ya vunharhu, Yesu wa va khathalela swinene vanhu lava n’wi landzelaka, hilaha a swi kombiseke hakona loko a nyiketa vutomi byakwe hikwalaho ka vona. (Hlaya Yohane 10:14, 15.) Naswona u tikombise a ri murisi la khathalaka loko  a hi kongomisa evuton’wini lebyi nga ta hi tisela ntsako sweswi ni ku hi kongomisa eka vumundzuku lebyi vangamaka lebyi nga heriki. (Yoh. 10:10, 11; Nhlav. 7:16, 17) Hikwalaho ka swivangelo leswi ni swin’wana, hi endle xiboho lexinene loko hi hlawula ku n’wi landzela. Kambe i yini leswi katsekaka eku n’wi landzeleni?

6. I yini leswi katsekaka eka ku landzela Yesu?

⁶ Ku va valandzeri va Kreste a swi vuli ku va hi tivitana Vakreste ntsena. Vanhu va kwalomu ka tibiliyoni timbirhi va tivula Vakreste namuntlha, kambe mintirho ya vona yi va kombisa va ri “vaendli va leswo kala nawu.” (Hlaya Matewu 7:21-23.) Loko vanhu va amukela xirhambo xa Yesu xa ku n’wi landzela, ha va hlamusela leswaku Vakreste va ntiyiso va hanya hi ku landza tidyondzo swin’we ni xikombiso lexi a va vekeleke xona, naswona va endla tano siku ni siku evuton’wini bya vona. Leswaku hi kombisa leswi sweswo swi vulaka swona, a hi kambisiseni timfanelo tin’wana leti hi ti tivaka ta Yesu.

Tekelela Xikombiso Xa Yesu Xa Vutlhari

7, 8. (a) I yini vutlhari, naswona ha yini Yesu a tikarhatele ku byi kuma hi xitalo? (b) Yesu u byi kombise njhani vutlhari, naswona hi nga n’wi tekelela njhani?

⁷ Yesu u kombise timfanelo to tala leti hlamarisaka, kambe hi ta kambisisa mune wa tona: vutlhari byakwe, ku titsongahata kakwe, ku hiseka kakwe ni rirhandzu rakwe. Xo sungula xiya vutlhari byakwe, ku nga vuswikoti byakwe byo tirhisa vutivi ni ku twisisa. Muapostola Pawulo u tsarile: “Leswi tumbetiweke hi vukheta eka [Yesu] i xuma hinkwaxo xa vutlhari ni xa vutivi.” (Kol. 2:3) Xana Yesu a a byi kuma kwihi vutlhari byebyo? Yena hi byakwe u te: “Ndzi vulavula swilo leswi hilaha Tatana a ndzi dyondziseke hakona.” (Yoh. 8:28) Leswi Yehovha ku nga yena a nga nyika Yesu vutlhari byebyo, a swi hi hlamarisi leswi a avanyisaka hi ndlela yo lulama.

⁸ Hi xikombiso, Yesu u yi hlawule hi vutlhari ndlela leyi a a ta hanya ha yona. U vone swi antswa leswaku a hanya vutomi byo olova leswaku a ta veka mianakanyo yakwe eka nchumu wun’we ntsena: ku nga ku endla ku rhandza ka Xikwembu. U tirhise nkarhi ni matimba yakwe leswaku a rhangisa Mfumo. Hi tekelela xikombiso xa Yesu hi ku tikarhatela ku va ni ‘tihlo ro olova’ kutani hi papalata ku tirhwexa mpingu hi swilo leswi nga pfuniki nchumu, leswi swi hi hetelaka ntamu wa hina ni ku hambukisa mianakanyo ya hina. (Mat. 6:22) Vakreste vo tala va teke magoza yo olovisa vutomi bya vona leswaku va ta kuma nkarhi wo tala wo chumayela. Van’wana va kote ni ku nghenela ntirho wa vuphayona. Loko u ri un’wana wa vona, leswi u swi endlaka swa tlangeriwa swinene. ‘Ku lava mfumo ku sungula’ swi endla leswaku hi tsaka swinene naswona hi eneriseka.—Mat. 6:33.

Titsongahate Ku Fana Na Yesu

9, 10. Yesu u wu kombise njhani moya wa ku titsongahata?

⁹ Mfanelo ya vumbirhi leyi hi nga ta yi kambisisa leyi Yesu a a ri na yona i ku titsongahata kakwe. Hakanyingi loko vanhu lava nga hetisekangiki va nyikiwa vulawuri, va tala ku titwa va tlakukile ku tlula vanhu van’wana. Kambe Yesu a a nga ri tano! Hambileswi a a ri ni xikhundlha lexi tlakukeke xa ku hetisisa xikongomelo xa Yehovha, Yesu a nga wu kombisanga nikatsongo moya wo titlakusa. Kutani hi khutaziwa ku va hi n’wi tekelela emhakeni yoleyo. Muapostola Pawulo u tsarile a ku: “Hlayisani langutelo leri ra mianakanyo eka n’wina leri a ri ri kona ni le ka Kreste Yesu, loyi, hambileswi a a ri ni xivumbeko xa Xikwembu, a nga ehleketangiki hi ku lwa, ku nga ku lwela ku ringana ni Xikwembu. E-e, kambe u tichulurile kutani a teka xivumbeko xa hlonga, a fana ni vanhu.” (Filp. 2:5-7) Xana sweswo a swi katsa yini?

¹⁰ Yesu a a ri tlangela swinene lunghelo ra ku va ni Tata wakwe etilweni, kambe “u tichulurile” hi ku tirhandzela. Vutomi byakwe byi hundziseriwe ekhwirini ra wanhwana wa Muyuda, kutani  endzhaku ka tin’hweti ta kaye a velekiwa a ri ricece endyangwini wa muvatli la nga xisiwana. Yesu u kulele ekaya ka Yosefa, naswona hakatsongo-tsongo a va ndzumulo, xifanyetana kutani a va muntshwa. A a nga ri na xidyoho. Kambe evuton’wini bya yena hinkwabyo u titsongahatile eka vatswari vakwe va nyama lava nga tswariwa va ri ni xidyoho. (Luka 2:51, 52) Hakunene loku a ku ri ku titsongahata ka xiviri!

11. Hi nga ku tekelela hi ndlela yihi ku titsongahata ka Yesu?

¹¹ Hi tekelela ku titsongahata ka Yesu loko hi amukela swiavelo leswi tikombaka swi ri swa xiyimo xa le hansi swinene. Hi xikombiso, anakanya hi ntirho wa hina wo chumayela mahungu lamanene. Ntirho lowu wu nga ha vonaka wu ri wa xiyimo xa le hansi, ngopfu-ngopfu loko vanhu va nga hi tsakeli, va hi hlekula kumbe va hi venga. Hambiswiritano, loko hi tiyisela entirhweni wo chumayela, hi pfuna van’wana leswaku va amukela xirhambo xa Yesu xa ku n’wi landzela. Hi ndlela yoleyo hi ponisa vutomi bya vona. (Hlaya 2 Timotiya 4:1-5.) Xikombiso xin’wana i xa ku endla leswaku Holo ya hina ya Mfumo yi tshama yi ri exiyin’weni lexinene. Sweswo swi nga ha katsa mintirho leyi languteriwaka ehansi, yo tanihi ku lahla thyaka, ku koropa ni ku basisa swihambukelo. Kambe ha swi xiya leswaku ku basisa Holo ya hina ya Mfumo leyi nga ndhawu ya vugandzeri bya ntiyiso leyi hi hlengeletanaka eka yona, i xiyenge xa ku endla ntirho wa hina wo kwetsima. Loko hi tinyiketela ku endla mintirho leyi tikombaka yi ri ya xiyimo xa le hansi, hi kombisa leswaku ha titsongahata naswona hi landzela mikondzo ya Kreste.

Hiseka Ku Fana Na Yesu

12, 13. (a) Yesu u swi kombise njhani leswaku wa hiseka naswona a a susumetiwa hi yini? (b) I yini leswi nga ta hi susumetela ku hisekela ku chumayela?

¹² Xiya ndlela leyi Yesu a a hiseka ha yona entirhweni wo chumayela. Yesu u endle swilo swo tala swinene loko a ri laha misaveni. Loko a ha kula, a swi kanakanisi leswaku a a tirha na Yosefa, tata wakwe wa muwundli loyi a a ri muvatli. Loko a ri entirhweni wakwe wo chumayela Yesu u endle masingita, ku katsa ni ku hanyisa lava vabyaka ni ku pfuxa vafi. Kambe ntirho wa yena wa nkoka a ku ri ku chumayela mahungu lamanene ni ku dyondzisa vanhu lava n’wi yingisaka. (Mat. 4:23) Na hina tanihi valandzeri va yena, hi fanele hi endla ntirho lowu fanaka. Hi nga xi tekelela njhani xikombiso xa yena? Na hina hi fanele hi susumetiwa hi swivangelo leswi susumeteke Yesu.

¹³ Xa nkoka swinene, ndlela leyi Yesu a xi rhandzaka ha yona Xikwembu hi yona yi nga n’wi susumeta leswaku a chumayela ni ku dyondzisa. Kambe Yesu a a ti rhandza tidyondzo leti a a ti dyondzisa. Eka yena, tidyondzo toleto a ti ri xuma xa risima swinene naswona a a hisekela ku ti dyondzisa van’wana. Leswi na hina hi nga vadyondzisi, kumbe “valeteri va le rivaleni” hi titwa hi ndlela leyi fanaka. Anakanya hi tidyondzo tin’wana ta risima  leti hi nga ti dyondza eRitweni ra Xikwembu. Ha swi tiva leswaku ku ni mphikamakaneta ya loyi a nga ni mfanelo yo lawula vuako hinkwabyo ni ndlela leyi yi nga ta tlhantlhiwa ha yona. Hi swi twisisa kahle leswi Matsalwa ma swi dyondzisaka malunghana ni xiyimo xa vafi ni mikateko leyi nga ta va kona emisaveni leyintshwa ya Xikwembu. Tidyondzo leti a ti hundzeriwi hi nkarhi, ku nga khathariseki leswaku hi ti dyondze khale kumbe ha ha ku ti dyondza naswona i ta risima swinene. (Hlaya Matewu 13:52.) Loko hi hisekela ku chumayela hi mbilu hinkwayo hi kombisa van’wana leswaku hi rhandza leswi Yehovha a hi dyondziseke swona.

14. Hi nga yi tekelela njhani ndlela leyi Yesu a a dyondzisa ha yona?

¹⁴ Nakambe xiya ndlela leyi Yesu a a dyondzisa ha yona. Minkarhi hinkwayo a a tirhisa Matsalwa loko a vulavula ni vanhu. Minkarhi yo tala loko a nga si vula yinhla ya nkoka a a rhanga hi ku vula a ku: “Ku tsariwile.” (Mat. 4:4; 21:13) Eka marito ya yena lama tsariweke, a a tshaha hi ku kongoma eka hafu ya tibuku leti nga eMatsalweni ya Xiheveru kumbe a ma hlamusela kunene. Ku fana na Yesu, minkarhi hinkwayo loko hi ri ensin’wini hi dyondzisa swilo leswi humaka eBibeleni naswona hi tikarhatela ku tirhisa Matsalwa loko hi pfulekeriwa hi nkarhi. Hi ndlela yoleyo, hi pfuna vanhu va timbilu letinene leswaku va tivonela hi ya vona leswaku leswi hi swi dyondzisaka swi huma eka Xikwembu, a swi humi eka hina. Hi tsaka swinene loko munhu a pfumela ku hlaya Bibele kutani hi bula na yena hi nkoka wa Rito ra Xikwembu ni leswi ri swi vulaka. Naswona loko vanhu volavo va amukela xirhambo xo landzela Yesu, hi tsaka swinene.

Ku Landzela Yesu Swi Vula Ku Rhandza Vanhu Van’wana

15. Hi yihi mfanelo leyikulu ya Yesu, naswona ku anakanyisisa ha yona swi nga hi khumba njhani?

¹⁵ Mfanelo yo hetelela ya Yesu leyi hi nga ta bula ha yona yi tsakisa ngopfu, ku nga ndlela leyi a va rhandzaka ha yona vanhu. Muapostola Pawulo u tsale a ku: “Rirhandzu leri Kreste a nga na rona ra hi susumeta.” (2 Kor. 5:14) Loko hi anakanyisisa hi ndlela leyi Yesu a va rhandzaka ha yona vanhu ni ndlela leyi a hi rhandzaka ha yona ha un’we wa hina, timbilu ta hina ta khumbeka swinene naswona hi titwa hi boheka ku landzela xikombiso xa yena.

16, 17. Yesu u swi kombise njhani leswaku wa va rhandza vanhu?

¹⁶ Yesu u swi kombise njhani leswaku wa va rhandza vanhu? U kombise rirhandzu lerikulu hi ku nyiketa moya-xiviri wakwe hikwalaho ka vanhu. (Yoh. 15:13) Kambe loko a ri karhi a chumayela laha misaveni, Yesu u tlhele a kombisa rirhandzu rakwe hi tindlela tin’wana. Hi xikombiso, a a va twela vusiwana vanhu lava xanisekaka. Loko a vona Mariya ni lava a va ri na yena va ri karhi va rila hikwalaho ka leswi Lazaro a feke, a a ri twisisa kahle gome leri a va ri na rona. Hambileswi a a ri kusuhi ni ku pfuxa Lazaro, Yesu a a karhatekile swinene lerova u kale a “humesa mihloti.”—Yoh. 11:32-35.

¹⁷ Wanuna un’wana la nga ni nhlokonho u tshame a ya eka Yesu kutani a n’wi kombela a ku: “Loko  u swi lava, u nga ndzi basisa.” Xana Yesu u angurise ku yini? Rungula ra kona ri ri: “A n’wi twela vusiwana.” Hiloko a endla nchumu wun’wana wo hlamarisa swinene. “Kutani a tshambuluta voko rakwe a n’wi khumba, a ku eka yena: ‘Ndza swi lava. Basisiwa.’ Hi ku hatlisa nhlokonho yi nyamalala eka yena, ivi a basa.” Ehansi ka Nawu wa Muxe, vanhu lava nga ni nhlokonho a va nga basanga naswona Yesu a a ta va a tshungule wanuna yoloye a nga kalanga a n’wi khumba. Kambe loko Yesu a hanyisa wanuna yoloye a a ri ni nhlokonho u n’wi khumbile, naswona kumbexana se a ku hele malembe yo tala a nga si tshama a khumbiwa hi munhu un’wana. Hakunene Yesu a a ri ni ntwela-vusiwana!—Mar. 1:40-42.

18. Hi nga swi kombisa njhani leswaku hi ni “ntlhaveko wa xinakulobye”?

¹⁸ Leswi hi nga valandzeri va Kreste hi lerisiwa leswaku hi kombisa rirhandzu ra hina hi ku kombisa van’wana “ntlhaveko wa xinakulobye.” (1 Pet. 3:8) Swi nga ha tika ku twisisa ndlela leyi mupfumeri-kulorhi la nga ni vuvabyi lebyi nga tshungulekiki kumbe ntshikilelo, a titwaka ha yona—ngopfu-ngopfu loko hi nga si tshama hi khomiwa hi mavabyi wolawo. Hambiswiritano, Yesu a a twelana ni lava vabyaka hambileswi yena a a nga si tshama a vabya. Hi nga wu tekelela njhani ntwela-vusiwana wo tano? Hi ku rhiya ndleve handle ko hela mbilu loko lava vabyaka va hi phofulela ta le mbilwini. Hi nga ha tivutisa hi ku: ‘Loko a ku ri mina ndzi vabyaka, xana a ndzi ta titwa njhani?’ Loko hi titoloveta ku twela vanhu van’wana, hi ta swi kota ku ‘vulavula hi ndlela leyi chavelelaka eka mimoya-xiviri leyi karhatekeke.’ (1 Tes. 5:14) Hi ndlela yoleyo hi ta va hi landzela Yesu.

19. Xikombiso xa Yesu xi hi khumba hi tindlela tihi?

¹⁹ Vona tidyondzo leti tsakisaka swinene leti hi ti kumaka eka marito ni swiendlo swa Yesu Kreste! Loko hi ya hi dyondza ha yena, hi ya hi lava ku fana na yena, naswona hi ya hi susumeteleka ku pfuna van’wana leswaku na vona va fana na yena. Onge hi nga kuma ntsako loko hi ri karhi hi landzela Hosi leyi nga Mesiya sweswi ni hilaha ku nga heriki!

Xana U Nga Hlamusela?

• Hi nga byi kombisa njhani vutlhari hilaha Yesu a byi kombiseke hakona?

• Hi nga wu kombisa hi tindlela tihi moya wo titsongahata?

• Hi nga ku hlakulela njhani ku hisekela ntirho wo chumayela?

• Hi tihi tindlela tin’wana leti hi nga n’wi tekelelaka ha tona Yesu loko hi kombisa van’wana rirhandzu?

[Swivutiso Swa Dyondzo]

[Bokisi/Xifaniso lexi nga eka tluka 5]

BUKU LEYI YI HI PFUNAKA KU TEKELELA KRESTE

Emintsombanweni ya muganga ya 2007 ku humesiwe buku leyi nga ni matluka ya 192 leyi nge, ‘Tana U Va Mulandzeri Wa Mina.’ Buku leyi yi endleriwe ku pfuna Vakreste leswaku va tekelela Yesu, ngopfu-ngopfu timfanelo takwe ni swiendlo swakwe. Endzhaku ka tindzima timbirhi ta xingheniso, xiyenge xo sungula xi hlamusela timfanelo leti hlamarisaka ta Yesu—ku titsongahata kakwe, xivindzi lexi a a ri na xona, vutlhari byakwe, ku yingisa kakwe ni ku tiyisela kakwe.

Endzhaku ka sweswo ku landzela swiyenge leswi vulavulaka hi mintirho leyi Yesu a yi endleke tanihi mudyondzisi ni muchumayeri wa mahungu lamanene swin’we ni tindlela tin’wana leti a ri kombiseke ha tona rirhandzu rakwe lerikulu. Rungula hinkwaro leri nga ebukwini leyi ri tsaleriwe ku pfuna Mukreste ha un’we leswaku a tekelela Yesu.

Ha tiyiseka leswaku buku leyi yi ta hi susumeta hinkwerhu leswaku hi tikambisisa kutani hi tivutisa swivutiso leswi nge: ‘Xana ndza n’wi landzela Yesu hakunene? I yini leswi ndzi nga swi endlaka leswaku ndzi n’wi landzelerisisa?’ Yi ta tlhela yi pfuna “hinkwavo lava [va nga] ni mboyamelo lowunene eka vutomi lebyi nga heriki” leswaku va va valandzeri va Kreste.—Mint. 13:48.

[Xifaniso lexi nga eka tluka 4]

Yesu u amukele xiavelo xo ta emisaveni kutani a tswariwa tanihi n’wana wa munhu wa nyama. Xana sweswo a swi lava leswaku a va ni mfanelo yihi?

[Xifaniso lexi nga eka tluka 6]

I yini leswi nga ta hi susumetela ku hisekela ntirho wo chumayela?