Tsakela Ntirho Wo Endla Vadyondzisiwa

“Hikokwalaho fambani mi ya endla . . . vadyondzisiwa.”—MAT. 28:19.

1-3. (a) Vanhu vo tala va titwa njhani hi ku fambisa tidyondzo ta Bibele? (b) Hi swihi swivutiso leswi hi nga ta swi kambisisa?

MAKWERHU un’wana wa xisati loyi a tirhaka ni ntlawa lowu vulavulaka Xihindi eUnited States, u tsarile a ku: “Se a ndzi ri ni mavhiki ya 11 ndzi ri karhi ndzi dyondza Bibele ni ndyangu lowu humaka ePakistan.” U ya emahlweni a ku: “Se a hi ri vanghana. Loko ndzi ehleketa leswaku ndyangu wolowo a wu ta tlhelela ePakistan ku nga ri khale, a ndzi tenga-tenga mihloti. A ndzi nga ririsiwi hikwalaho ka leswi ndzi nga ta lahlekeriwa hi vanghana, kambe hikwalaho ka ntsako lowu ndzi veke na wona loko ndzi ri karhi ndzi va dyondzisa hi Yehovha.”

² Xana na wena u tshame u kuma ntsako hikwalaho ko dyondza Bibele ni munhu, ku fana ni makwerhu loyi wa xisati? Yesu ni vadyondzisiwa vakwe va lembe-xidzana ro sungula va kume ntsako lowukulu entirhweni wo endla vadyondzisiwa. Loko vadyondzisiwa va 70 lava Yesu a va leteleke va vuya ni xiviko lexi tsakisaka, Yesu na yena u ‘tsakisisile hi moya lowo kwetsima.’ (Luka 10:17-21) Hilaha ku fanaka, vanhu vo tala namuntlha va kuma ntsako lowukulu entirhweni wo endla vadyondzisiwa. Hi 2007 leswi swi ve erivaleni loko vahuweleri lava tsakeke naswona va tikarhataka hi matimba va fambise tidyondzo ta Bibele ta kwalomu ka timiliyoni ta tsevu ni hafu hi xiringaniso n’hweti ni n’hweti!

 ³ Hambiswiritano, vahuweleri van’wana a va si tshama va fambisa dyondzo ya Bibele. Van’wana swi nga ha endleka leswaku se va ni malembe yo hlayanyana va nga si yi fambisa. Hi swihi swiphiqo leswi hi nga ha langutanaka na swona loko hi ri karhi hi tikarhatela ku fambisa dyondzo ya Bibele? Hi nga swi hlula njhani swiphiqo sweswo? Naswona hi nga vuyeriwa njhani loko hi endla hinkwaswo leswi hi nga swi kotaka leswaku hi yingisa xileriso xa Yesu lexi nge: “Hikokwalaho fambani mi ya endla . . . vadyondzisiwa”?—Mat. 28:19.

Swiphiqo Leswi Nga Ha Hi Endlaka Hi Nga Tsaki

4, 5. (a) Vanhu vo tala va angula njhani ematikweni man’wana? (b) Hi swihi swiphiqo leswi vahuweleri va langutanaka na swona etindhawini tin’wana?

⁴ Ematikweni man’wana, vanhu va ti amukela hi mandla mambirhi tibuku ta hina naswona va swi tsakela ku dyondza Bibele na hina. Mpatswa wun’wana wa le Australia lowu a wu chumayela eZambia swa xinkarhana wu tsale wu ku: “Leswi swi vuriwaka malunghana ni nsimu leyi i ntiyiso. Nsimu ya le tikweni ra Zambia yi veka mihandzu swinene. Swa hlamarisa leswi hi swi vonaka loko hi fambisa timagazini exitarateni! Vanhu va ta eka hina van’wana va kombela timagazini ta n’hweti yo karhi hi ku kongoma.” Elembeni rin’we ra sweswinyana, vamakwerhu va le Zambia va fambise tidyondzo ta Bibele to tlula 200 000, hileswaku hi xiringaniso muhuweleri un’we a a ri ni dyondzo ya Bibele.

⁵ Kambe etindhawini tin’wana vahuweleri swi nga ha va tikela ku fambisa tibuku ni ku fambisa tidyondzo ta Bibele nkarhi na nkarhi. Ha yini? Hakanyingi vanhu va va va nga ri kona emakaya ya vona loko vahuweleri va va endzela, kasi lava va vaka va ri kona emakaya a va lavi ku twa nchumu hi vukhongeri. Va nga ha va va kulele emindyangwini leyi a yi nga ngheni kereke, kumbe va nga ha va va karharisiwe hi vukanganyisi lebyi va byi vonaka eka vukhongeri bya mavunwa. Vanhu vo tala va hambukisiwile hi vafundhisi va vukhongeri bya mavunwa. (Mat. 9:36) Kutani swa twisiseka loko vanhu volavo va nga lavi ku twa nchumu hi timhaka ta le Bibeleni.

6. Hi swihi swiphiqo swin’wana leswi vahuweleri va nga ha vaka va lwisana na swona?

⁶ Vahuweleri van’wana vo tshembeka va langutana ni xiphiqo xin’wana lexi nga ha va tekelaka ntsako. Hambileswi va nga tshama va wu hisekela swinene ntirho wo endla vadyondzisiwa, sweswi se va karhatiwa hi rihanyo kumbe vudyuhari. Nakambe ehleketa hi swiphiqo swin’wana leswi hi nga ha tivangelaka swona hina vini. Hi xikombiso, xana u titwa u nga faneleki ku fambisa dyondzo ya Bibele? U nga ha titwa ku fana na Muxe loko Yehovha a n’wi rhuma leswaku a ya vulavula na Faro. Muxe u te: “Ndzi khomele Yehovha, kambe mina a ndzi swi koti ku vulavula kahle, hambi ku ri tolo kumbe emahlweni ka sweswo.” (Eks. 4:10) Kasi xin’wana lexi nga ha endlaka hi titwa hi nga faneleki i ku chava ku handzela endzhaku. Hi nga ha karhateka hi mhaka ya leswaku a hi nge swi koti ku pfuna munhu leswaku a va mudyondzisiwa hikuva a hi na vuswikoti byo dyondzisa. Kutani leswaku hi nga titwisi ku vava, hi nga ha vona swi antswa leswaku hi nga tikarhati hi ku fambisa dyondzo ya Bibele. Hi nga swi hlula njhani swiphiqo leswi swa ha ku boxiwaka?

Lunghiselela Mbilu Ya Wena

7. I yini lexi nga endla leswaku Yesu a hiseka swinene evutirhelini byakwe?

⁷ Goza ro sungula i ku lunghiselela timbilu ta hina. Yesu u te: “Nomu . . . wu vulavula hi ku tala ka mbilu.” (Luka 6:45) Lexi nga endla leswaku Yesu a hiseka swinene evutirhelini byakwe, hileswi a a khathala swinene hi vuhlayiseki bya van’wana. Hi xikombiso, loko a vona leswaku Vayuda va rikwavo va le kule swinene ni Xikwembu, ‘u va twele vusiwana.’ U byele vadyondzisiwa vakwe a ku: “Ntshovelo i wukulu . . . Kombelani N’wini wa ntshovelo leswaku a rhumela vatirhi entshovelweni wakwe.”—Mat. 9:36-38.

8. (a) I yini leswi hi faneleke hi anakanyisisa ha swona? (b) Hi nga dyondza yini eka leswi xichudeni xin’wana xa Bibele xi nga swi vula?

⁸ Loko hi ri entirhweni wo endla vadyondzisiwa hi ta va hi endla kahle loko hi anakanyisisa hi ndlela leyi na hina hi nga vuyeriwa ha yona hikwalaho ka leswi munhu un’wana a nga tinyika nkarhi wo dyondza na hina Bibele. Nakambe, ehleketa hi vanhu lava hi nga ta hlangana na vona ensin’wini ni ndlela leyi va nga ta vuyeriwa ha yona loko va twa rungula leri hi ri chumayelaka. Wansati un’wana u tsalele rhavi ra le tikweni ra rikwavo a ku: “Ndzi lava ku mi byela ndlela leyi ndzi ti nkhensaka ha yona Timbhoni leti taka ekaya ka mina leswaku ti ta ndzi dyondzisa Bibele. Ndza swi tiva leswaku minkarhi  yin’wana ti fanele ti hela matimba hikwalaho ka mina hikuva ndzi ni swivutiso swo tala swinene naswona ti boheka ku tshama nkarhi wo leha loko ti ndzi endzerile. Kambe ti ndzi lehisela mbilu naswona ti tiyimisele swinene ku ndzi dyondzisa leswi ti swi dyondzeke. Ndzi nkhensa Yehovha na Yesu hikwalaho ka leswi vanhu lava va ndzi pfunaka.”

9. I yini leswi Yesu a a anakanya ha swona naswona hi nga n’wi tekelela njhani?

⁹ A hi vanhu hinkwavo lava veke valandzeri va Yesu. (Mat. 23:37) Van’wana va n’wi landzele nkarhinyana, kambe hi ku famba ka nkarhi va kanete tidyondzo takwe kutani “va nga ha fambi na yena.” (Yoh. 6:66) Kambe Yesu a nga swi pfumelelanga sweswo leswaku swi n’wi endla a vona onge rungula rakwe a ri pfuni nchumu. Hambileswi mbewu yo tala leyi a nga yi haxa yi nga tswalangiki mihandzu, Yesu a a veke mianakanyo yakwe eka ntirho lowunene lowu a wu endla. A a swi vona leswaku masimu a a ma basile leswaku ma tshoveriwa naswona u kume ntsako lowukulu hi ku pfuneta entshovelweni wolowo. (Hlaya Yohane 4:35, 36.) Xana na hina hi nga ringeta ku veka mianakanyo ya hina eka ntshovelo lowu nga kona ensin’wini leyi hi averiweke yona ematshan’weni yo ehleketa hi misava leyi nga tswaliki mihandzu? A hi kambisiseni leswi nga hi pfunaka leswaku hi tshama hi ri ni langutelo rolero lerinene.

Chumayela Hi Xikongomelo Xo Sungula Dyondzo Ya Bibele

10, 11. I yini leswi u nga swi endlaka leswaku u tshama u tsakile?

¹⁰ Loko murimi a byala mbewu u va a langutele ku kuma ntshovelo. Kutani na hina hi fanele hi chumayela hi xikongomelo xo sungula tidyondzo ta Bibele. Kambe ku vuriwa yini loko ku ri leswaku u heta nkarhi wo tala u ri ensin’wini kambe u kuma leswaku vanhu vo tala a va kona emakaya kumbe swi ku tikela ku endla maendzo yo vuyela eka lava u nga va kuma? Leswi swi nga ha ku heta matimba. Xana u fanele u tshika ntirho wo chumayela hi yindlu ni yindlu? A swi tano! Vanhu vo  tala va kumiwe loko ku tirhisiwa lunghiselelo leri se ri nga ni malembe ri ri karhi ri tirhisiwa.

¹¹ Kambe, leswaku u tshama u tsakile, xana u nga swi kota ku chumayela ni hi tindlela tin’wana, kumbexana u tirhisa ni tindlela tin’wana leswaku u fikelela vanhu? Hi xikombiso, xana u tshame u ringeta ku chumayela vanhu exitarateni kumbe laha va tirhaka kona? Xana u nga vulavurisana ni vanhu hi riqingho kumbe u kombela tinomboro ta tinqingho ta lava se u buleke na vona hi rungula ra Mfumo leswaku mi ta yisa bulo ra n’wina emahlweni? Loko u phikelela naswona u pfumelelana ni swiyimo swa nsimu ya n’wina, u ta tiphina hi ntsako wo kuma vanhu lava amukelaka rungula ra Mfumo.

Ku Ya Emahlweni Hambiloko Vanhu Va Nga Tsakeli

12. I yini leswi hi nga swi endlaka loko vanhu vo tala ensin’wini ya hina va vonaka va nga lavi ku twa nchumu hi vukhongeri?

¹² I yini leswi u nga swi endlaka loko vanhu vo tala va le nsin’wini ya n’wina va nga byi tsakeli vukhongeri? Xana u nga sungula mabulo hi ku vula swo karhi leswi nga kokaka nyingiso wa vona? Muapostola Pawulo u tsalele vapfumeri-kulobye va le Korinto a ku: “Eka Vayuda ndzi tiendle Muyuda . . . Eka lava va nga riki na nawu ndzi tiendle la nga riki na nawu, hambileswi mina ndzi nga riki ehandle ka nawu wa Xikwembu.” A ku ri xihi xikongomelo xa Pawulo? U te: “Ndzi ve swilo hinkwaswo eka vanhu va mixaka hinkwayo, leswaku ndzi ponisa van’wana hi tindlela hinkwato.” (1 Kor. 9:20-22) Xana na hina hi nga bula ni vanhu va le nsin’wini ya hina hi timhaka leti nga ta va tsakisa? Vanhu vo tala lava ngheniki kereke va navela ku antswisa vuxaka lebyi va nga na byona emindyangwini ya vona. Swi nga ha endleka leswaku va lava ku tiva xikongomelo xa vutomi. Xana hi nga hundzisela rungula ra Mfumo eka vanhu volavo hi ndlela leyi nga ta va khumba?

13, 14. Hi nga swi kotisa ku yini ku engetela ntsako lowu hi wu kumaka entirhweni wo endla vadyondzisiwa?

¹³ Vahuweleri vo tala va ye va kuma ntsako lowukulu entirhweni wo endla vadyondzisiwa, hambi ku ri etindhawini leti vanhu vo tala va vonakaka va nga byi tsakeli vukhongeri. Va endle yini? Va dyondze ririmi rin’wana. Mpatswa wun’wana lowu nga ni malembe ya va-60 wu xiye leswaku ku ni swichudeni swa magidi swa Machayina naswona mindyangu ya swona a yi tshama ensin’wini ya wona. Nuna wa kona u ri: “Hikwalaho ka sweswo hi khutaziwe ku dyondza Xichayina.” U ya emahlweni a ku: “Hambileswi leswi a swi lava leswaku siku ni siku hi heta nkarhi hi ri eku dyondzeni ka ririmi leri, hi dyondze ni Machayina yo tala Bibele lama nga le ndhawini leyi hi tshamaka eka yona.”

¹⁴ Hambiloko u nga swi koti ku dyondza ririmi rin’wana, u nga tirhisa xibukwana lexi nge Good News for People of All Nations loko u hlangana ni vanhu lava vulavulaka ririmi rin’wana. U nga ha tlhela u khoma minkandziyiso hi ririmi ra vanhu lava u hlanganaka na vona. I ntiyiso leswaku swi lava nkarhi ni matshalatshala lamakulu leswaku hi kota ku vulavula ni vanhu va ririmi rimbe ni va ndhavuko wun’wana. Kambe tsundzuka nawu lowu kongomisaka lowu nga eRitweni ra Xikwembu lowu nge: “Loyi a byalaka hi xitalo, u ta tlhela a tshovela hi xitalo.”—2 Kor. 9:6.

Vandlha Hinkwaro Ri Hoxa Xandla

15, 16. (a) Ha yini vandlha hinkwaro ri hoxa xandla entirhweni wa ku endla vadyondzisiwa? (b) Vadyuhari va hoxa xandla hi ndlela yihi entirhweni wolowo?

¹⁵ Hambiswiritano, ku endla vadyondzisiwa a swi titsheganga hi matshalatshala ya munhu un’we ntsena. Kambe vandlha hinkwaro ri hoxa xandla. Hi ndlela yihi? Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yoh. 13:35) Loko swichudeni swa Bibele swi ta eminhlanganweni, minkarhi yo tala swi khumbiwa hi rirhandzu leri swi ri vonaka exikarhi ka hina. Xichudeni xin’wana xa Bibele xi tsarile: “Ndzi yi rhandza swinene minhlangano. Vanhu va kona va ni xinghana!” Yesu u vule leswaku lava vaka valandzeri vakwe va nga ha kanetiwa hi swirho swa mindyangu ya vona. (Hlaya Matewu 10:35-37.) Kambe u tshembise leswaku evandlheni va ta kuma “vamakwavo va xinuna ni vamakwavo va xisati ni vamanana ni vana.”—Mar. 10:30.

¹⁶ Vamakwerhu lava dyuhaleke va endla ntirho wa nkoka swinene eku pfuneni ka swichudeni swa Bibele leswaku swi endla nhluvuko. Hi ndlela yihi? Hambiloko vadyuhari van’wana va nga swi koti ku fambisa dyondzo ya Bibele hi voxe, tinhlamulo ta vona leti akaka leti va ti nyikelaka eminhlanganweni ya vandlha ti tiyisa ripfumelo ra hinkwavo lava ti twaka. Leswi se va nga ni malembe va ri karhi va famba “endleleni ya ku lulama,” va ri tiyisa swinene  vandlha naswona va endla leswaku vanhu va timbilu letinene va nghena enhlengeletanweni ya Xikwembu.—Swiv. 16:31.

Ku Hlula Ku Kanakana Ka Hina

17. I yini leswi hi nga swi endlaka loko hi titwa hi nga faneleki ku fambisa dyondzo ya Bibele?

¹⁷ I yini leswi u nga swi endlaka loko u titwa u nga faneleki ku fambisa dyondzo ya Bibele? Tsundzuka leswaku Yehovha u pfune Muxe hi ku n’wi nyika moya lowo kwetsima ni mupfuni ku nga makwavo wakwe, Aroni. (Eks. 4:10-17) Yesu u tshembise leswaku moya wa Xikwembu a wu ta hi pfuna entirhweni wo chumayela. (Mint. 1:8) Ku engetela kwalaho, Yesu u rhume vatirhi leswaku va ya chumayela va ri vambirhi-mbirhi. (Luka 10:1) Hikwalaho, loko u vona swi ku tikela ku fambisa dyondzo ya Bibele khongelela moya wa Xikwembu leswaku wu ku nyika vutlhari ivi u tirha ni muhuweleri la nga ni ntokoto naswona a nga ta ku pfuna ni ku ku tiyisa. Swi tiyisa ripfumelo ku tsundzuka leswaku Yehovha u hlawule ku tirhisa vanhu lava tolovelekeke, ku nga “swilo leswi tsaneke emisaveni,” leswaku va endla ntirho lowu wo hlawuleka.—1 Kor. 1:26-29.

18. Hi nga wu hlula njhani moya wa ku chava ku handzela endzhaku?

¹⁸ Hi nga wu hlula njhani moya wa ku chava ku handzela endzhaku? I swinene ku tsundzuka leswaku ku endla vadyondzisiwa a swi titsheganga hi matimba ya hina ntsena. Yehovha hi yena loyi a endlaka ntirho wa nkoka, hikuva u kokela munhu wa kona eka yena. (Yoh. 6:44) Hina swin’we ni lavan’wana hi endla leswi hi nga swi kotaka leswaku hi tirhisa vuswikoti bya hina byo dyondzisa leswaku hi pfuna xichudeni leswaku xi endla nhluvuko. (Hlaya 2 Timotiya 2:15.) Kutani xichudeni xi fanele xi tirhisa leswi xi swi dyondzaka. (Mat. 7:24-27) Loko munhu a tshika ku dyondza Bibele, hi nga ha hela matimba. Hi tshemba leswaku swichudeni swa Bibele swi ta endla xiboho lexinene, kambe munhu un’wana ni un’wana u fanele a “tihlamulela eka Xikwembu.”—Rhom. 14:12.

I Yini Leswi Hi Nga Ta Vuyeriwa Ha Swona?

19-21. (a) Hi vuyeriwa hi ndlela yihi loko hi fambisa tidyondzo ta Bibele? (b) Yehovha u va languta njhani hinkwavo lava hoxaka xandla entirhweni wo chumayela?

¹⁹ Ku fambisa tidyondzo ta Bibele swi hi pfuna ku hambeta hi lava Mfumo ku sungula. Swi tlhela swi hi pfuna leswaku hi dzikisa ntiyiso wa Rito ra Xikwembu emianakanyweni ni le timbilwini ta hina. Ha yini hi vula tano? Barak la nga phayona u ri: “Ku fambisa tidyondzo ta Bibele swi ku pfuna leswaku u va xichudeni xo antswa xa Rito ra Xikwembu. Ndzi xiye leswaku ndzi fanele ndzi rhanga hi ku tiyisa ripfumelo ra mina ndzi nga si dyondzisa munhu un’wana.”

²⁰ Loko u nga ri na yona dyondzo ya Bibele, xana swi vula leswaku ntirho wa wena i wa hava eka Xikwembu? Doo! Yehovha u ma tlangela swinene matshalatshala ya hina yo n’wi dzunisa. Hinkwavo lava hoxaka xandla entirhweni wo chumayela i “vatirhi-kulobye ni Xikwembu.” Hambiswiritano, ku fambisa dyondzo ya Bibele swi endla leswaku hi kuma ntsako lowu engetelekeke loko hi vona ndlela leyi Xikwembu xi yi kurisaka ha yona mbewu leyi hi nga yi byala. (1 Kor. 3:6, 9) Amy la nga phayona u ri: “Loko u vona xichudeni xa Bibele xi ri karhi xi endla nhluvuko u titwa u tsaka swinene hikwalaho ka leswi u pfumeleke ku tirhisiwa hi Yehovha leswaku u nyika munhu yoloye nyiko ya risima, ku nga ku n’wi pfuna leswaku a tiva Yehovha ni ku kuma vutomi lebyi nga heriki.”

²¹ Ku endla hinkwaswo leswi hi nga swi kotaka leswaku hi sungula tidyondzo ta Bibele swi ta hi pfuna leswaku hi dzikisa mianakanyo ya hina eku gandzeleni ka Xikwembu sweswi naswona swi ta tiyisa ntshembo lowu hi nga na wona wa ku ya hanya emisaveni leyintshwa. Hikwalaho ka mpfuno wa Yehovha, hi nga tlhela hi kota ku ponisa lava hi yingisaka. (Hlaya 1 Timotiya 4:16.) Anakanya hi ntsako lowu hi nga ta wu kuma hikwalaho ka sweswo!

Wa Tsundzuka Xana?

• Hi swihi swiphiqo swin’wana leswi nga ha sivelaka van’wana leswaku va fambisa tidyondzo ta Bibele?

• I yini leswi hi nga swi endlaka loko vanhu vo tala ensin’wini ya hina va tikomba va nga lavi ku twa nchumu hi vukhongeri?

• Hi vuyeriwa hi ndlela yihi loko hi fambisa tidyondzo ta Bibele?

[Swivutiso Swa Dyondzo]

[Xifaniso lexi nga eka tluka 9]

Xana wa yi antswisa ndlela leyi u chumayelaka ha yona leswaku u fikelela vanhu va timbilu letinene?