Ku Thwasa Ka Ntlawa Wa Vu-125 Wa Le Giliyadi

Varhumiwa Va Khutaziwe Leswaku Va Fana Na Yeremiya

MAKWERHU Geoffrey Jackson wa Huvo leyi Fumaka u te: “Ntlawa lowu wa le Giliyadi i wa nkoka ematin’wini.” A a vulavula ni vanhu va 6 156 lava a va ri kona loko ku thwasa ntlawa wa vu-125 wa Xikolo xa Bibele xa Giliyadi xa Watchtower hi September 13, 2008. Xikolo xa Giliyadi se xi rhumele varhumiwa vo tlula 8 000, ku katsa ni mathwasana lawa ya 56, “endhawini ya le kule swinene ya misava”!—Mint. 1:8.

Makwerhu Jackson, mutshama-xitulu wa nongonoko wa ku thwasa, u vutisile a ku, “Loko vanhu va swi xiya leswaku va nga mi tshemba, xana sweswo swi ta endla leswaku rungula ra n’wina ri va ni matimba?” Kutani u longoloxe swilo swa mune leswi endlaka leswaku munhu a tshembiwa: ku va ni langutelo lerinene, ku veka xikombiso lexinene, ku sekela leswi u swi dyondzisaka eRitweni ra Xikwembu ni ku tikarhatela ku twarisa vito ra Yehovha.

David Schafer, loyi a nga le ka Komiti yo Dyondzisa u vulavule hi nhloko-mhaka leyi nge, “Xana U Ta Twisisa Hinkwaswo?” U tiyisekise swichudeni swa le Giliyadi leswaku swi nga “twisisa hinkwaswo” leswi lavekaka leswaku swi va varhumiwa lavanene, loko ntsena swi hambeta swi lava Yehovha naswona hi ku titsongahata swi xixima “hlonga ro tshembeka ni ro tlhariha.”—Swiv. 28:5; Mat. 24:45.

Endzhaku ka sweswo, John E. Barr wa Huvo leyi Fumaka u vulavule hi nhloko-mhaka leyi nge, “Mi Nga Pfumeleli Nchumu Xi Mi Hambanisa Ni Rirhandzu Ra Xikwembu.” Makwerhu Barr u khutaze mathwasana ni vatswari va wona tanihi tatana la nga ni rirhandzu, naswona sweswo swi herise ku chava loku swi nga ha endlekaka a va ri na kona malunghana ni leswi varhumiwa lava lavantshwa va nga ha langutanaka na swona eswiavelweni swa vona. U te: “Ndhawu leyi sirhelelekeke ni leyi tsakisaka leyi munhu a nga vaka eka yona evuton’wini i ku va erirhandzwini ra Xikwembu.” A xi kona lexi nga hambanisaka varhumiwa ni rirhandzu ra Xikwembu handle ka loko vona hi voxe vo tihambanisa ni Xikwembu.

Sam Roberson wa le ka Ndzawulo ya Swikolo swa Vutirheli bya le Tilweni, u khutaze vayingiseri leswaku va ambala “nguvu ya xiyimo xa le henhla.” Varhumiwa va nga “ambal[a] Hosi Yesu Kreste” hi ku dyondza leswi Yesu a swi endleke va tlhela va swi tirhisa. (Rhom. 13:14) Endzhaku ka sweswo, William Samuelson, mulanguteri wa Ndzawulo ya Swikolo swa Vutirheli bya le Tilweni, u kandziyise leswi endlaka munhu a xiximeka. Ndlela leyi Xikwembu xi tekaka munhu ha yona hi yona yi endlaka a xiximeka, ku nga ri ndlela leyi vanhu va n’wi tekaka ha yona.

Michael Burnett, muleteri un’wana u vulavurisane ni swichudeni malunghana ni mintokoto leyi swi veke na yona loko swi chumayela hi nkarhi lowu a swi ri exikolweni xa Giliyadi. Hambileswi swichudeni swo tala a swi averiwe ensin’wini leyi tirhiwaka ngopfu loko swi ri eXikolweni xa Giliyadi lexi nga le Patterson, eNew York, swi kume vanhu lava tsakelaka. Gerald Grizzle wa Hofisi ya Ntsombano u vulavurisane ni vamakwerhu vanharhu lava teke eXikolweni xa Swirho swa Komiti ya Rhavi. Leswi va swi vuleke swi pfune mathwasana ya le Giliyadi leswaku ma lunghekela leswi ma nga ta ya langutana na swona eswiavelweni swa wona swa le matikweni mambe.

Nkulumo leyi nge “Mi Fana Na Yeremiya” yi nyikeriwe  hi David Splane wa Huvo leyi Fumaka, loyi a thwaseke eka ntlawa wa vu-42. Hambileswi Yeremiya a a xi chava xiavelo xa yena, Yehovha u n’wi tiyisile. (Yer. 1:7, 8) Xikwembu xi ta endla leswi fanaka eka varhumiwa. Makwerhu Splane u te: “Loko u ri ni xiphiqo ni munhu wo karhi, tshama ehansi u tsala timfanelo ta khume ta munhu yoloye leti u ti rhandzaka. Loko leti u ti tsaleke ti nga fiki eka khume swi vula leswaku a wu si n’wi tiva kahle munhu yoloye.”

Yeremiya a a rhangisa swilaveko swa van’wana. Loko a lava ku tshika, u khongerile naswona Yehovha a a ri na yena. (Yer. 20:11) Makwerhu Splane u te: “Loko mi titwa mi hele matimba, vulavulani na Yehovha. Yehovha u ta mi pfuna hi ndlela leyi hlamarisaka.”

Loko nongonoko wo thwasa wu fika emakumu, mutshama-xitulu u tsundzuxe vayingiseri leswaku mathwasana ma dyondze tindlela to hlayanyana to endla leswaku ma tshembiwa. Loko vanhu va swi xiya leswaku va nga va tshemba varhumiwa, rungula leri va ri chumayelaka ri ta va ni matimba swinene.—Esa. 43:8-12.

[Bokisi leri nga eka tluka 22]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lawa va averiweke eka wona: 21

Nhlayo ya swichudeni: 56

Avhareji ya malembe: 32,9

Avhareji ya malembe entiyisweni: 17,4

Avhareji ya malembe evutirhelini bya nkarhi hinkwawo: 13

[Xifaniso lexi nga eka tluka 23]

Ntlawa Wa Vu-125 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.