Ndlela Leyi Dyondzo Ya Xikwembu Yi Nga Ya Risima Ha Yona

“Hakunene ndzi tlhela ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu.”—FILP. 3:8.

1, 2. Vakreste van’wana va hlawule ku endla yini, naswona ha yini?

KU SUKELA loko Robert a sungule ku nghena xikolo a a ri xichudeni lexi tlhariheke ngopfu. Loko a ri ni malembe ya nhungu, un’wana wa vadyondzisi va yena u n’wi endzerile ekaya ka vona kutani a n’wi byela leswaku a nga kota ku endla xin’wana ni xin’wana. A a ri ni ntshembo wa leswaku siku rin’wana a nga va dokodela. Leswi a a pasele ehenhla loko a heta xikolo a a ta swi kota ku ya eka yunivhesiti yihi na yihi ya xiyimo xa le henhla ya le tikweni ra ka vona. Kambe Robert u ri tshikile lunghelo leri vanhu vo tala a va ri teka ri ri ro hlawuleka leri ri kumiwaka kan’we evuton’wini, hileswi a a lava ku fikelela pakani ya yena ya ku va phayona ra nkarhi hinkwawo.

² Ku fana na Robert, Vakreste vo tala—lavatsongo ni lavakulu—va pfulekeriwa hi nkarhi wo antswisa vutomi bya vona emafambiselweni lawa ya swilo. Van’wana va hlawula ku nga wu tirhisi ngopfu nkarhi wolowo leswaku va ta fikelela tipakani leti fambisanaka ni vukhongeri bya vona. (1 Kor. 7:29-31) I yini lexi susumetelaka Vakreste vo fana na Robert leswaku va tiyimisela ku tirha hi matimba entirhweni wo chumayela? Va tirha hi matimba entirhweni wo chumayela ngopfu-ngopfu hikwalaho ka leswi va rhandzaka Yehovha ni hileswi va twisisaka ntikelo lowu tlurisaka wa ku dyondzisiwa hi yena. Xana sweswinyana u tshame u anakanya hi ndlela leyi vutomi bya wena a byi ta va byi ri ha yona loko a wu nga dyondzanga ntiyiso? Ku anakanya hi mikateko yin’wana leyikulu leyi hi yi kumeke hikwalaho ko dyondzisiwa hi Yehovha swi ta hi pfuna leswaku hi tshama hi ri karhi hi teka mahungu lamanene ma ri ya nkoka hi tlhela hi hisekela ku ma chumayela van’wana.

I Lunghelo Lerikulu Ku Dyondzisiwa Hi Xikwembu

3. Ha yini hi nga tiyisekaka leswaku Yehovha u tiyimiserile ku dyondzisa vanhu lava nga hetisekangiki?

³ Yehovha u tiyimiserile ku dyondzisa vanhu lava nga hetisekangiki hikwalaho ka vunene bya yena. Esaya 54:13 loko yi vulavula hi ndlela ya vuprofeta hi Vakreste lava totiweke yi ri: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala.” Marito wolawo ma tirha ni le ka “tinyimpfu tin’wana” ta Kreste. (Yoh. 10:16) Leswi swi vonaka eka vuprofeta lebyi hetisekaka namuntlha. Exivonweni Esaya u vone vanhu lava humaka eka matiko hinkwawo va khitikanela evugandzerini bya ntiyiso. U vule leswaku a va byelana va ku: “A hi tlhandlukeleni entshaveni ya Yehovha, endlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.” (Esa. 2:1-3) Mawaku lunghelo ra ku dyondzisiwa hi Xikwembu!

4. I yini leswi Yehovha a swi languteleke eka lava a va dyondzisaka?

⁴ Hi fanele hi endla yini leswaku hi ta dyondzisiwa hi Xikwembu? Xilaveko lexikulu i ku va munhu a titsongahata a tlhela a dyondziseka. Mupisalema Davhida u tsarile a ku: “Yehovha hi lonene naswona u lulamile. . . . Lavo rhula u ta va dyondzisa ndlela yakwe.” (Ps. 25:8, 9) Naswona Yesu u te: “Ndza ku dzunisa erivaleni, Tatana, Hosi ya tilo ni misava, hikuva swilo leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.” (Luka 10:21) Ku tiva leswaku Xikwembu xi ‘nyika lava titsongahataka musa lowu nga faneriwiki,’ swi hi endla hi xi rhandza.—1 Pet. 5:5.

5. I yini lexi endleke leswaku hi kota ku tiva Xikwembu?

 ⁵ Xana hi nga vula leswaku hi ve malandza ya Yehovha hikwalaho ka vuswikoti bya hina kumbe vutlhari bya hina? Doo! Entiyisweni, a hi ta va hi nga xi tivanga Xikwembu loko a xi nga hi pfunanga. Yesu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” (Yoh. 6:44) Yehovha u koka vanhu lava fanaka ni tinyimpfu, ku nga “swilo leswi navelekaka swa matiko hinkwawo” hi ku tirhisa ntirho wo chumayela ni hi moya wa yena lowo kwetsima. (Hag. 2:7) Hi fanele hi swi tlangela swinene ku va van’wana va vanhu lava Yehovha a va kokeke hi ku tirhisa N’wana wa yena.—Hlaya Yeremiya 9:23, 24.

Switsundzuxo Leswi Humaka Eka Xikwembu Swi Antswisa Vutomi

6. Loko vanhu va ‘dyondza hi Yehovha,’ ku nga va ni vuyelo byihi lebyikulu?

⁶ Vuprofeta bya Esaya byi tirhisa swiga-ririmi swo tsakisa byi hlamusela ku hundzuriwa ka vumunhu bya vanhu loku endlekaka sweswi. Vanhu lava khale a va rhandza madzolonga se i vanhu lava rhuleke. (Hlaya Esaya 11:6-9.) Vanhu lava a va venga vanhu va rixaka rin’wana, tiko rin’wana kumbe va ndhavuko wun’wana va dyondze ku hanyisana hi vun’we. Va “[fule] mabanga ya vona ma va swikomu” hi ndlela yo fanekisela. (Esa. 2:4) I yini lexi endleke leswaku va hundzuka hi ndlela leyi? Vanhu lava va ‘dyondze hi Yehovha’ naswona va tirhise leswi va swi dyondzeke evuton’wini bya vona. Hambileswi malandza ya Xikwembu ma nga hetisekangiki, i vamakwavo va xiviri va le misaveni hinkwayo. Ku tsakeriwa ka mahungu lamanene emisaveni hinkwayo ni mihandzu leyinene leyi vaka kona i vumbhoni bya leswaku dyondzo ya Xikwembu yi ni ntikelo lowu tlurisaka.—Mat. 11:19.

7, 8. (a) Hi swihi swin’wana swa “swilo leswi simekiweke swi tiya” leswi dyondzo ya Xikwembu yi ntshunxaka vanhu eka swona? (b) I yini lexi kombisaka leswaku dyondzo ya Yehovha yi yisa ku dzuneka eka yena?

⁷ Muapostola Pawulo u fanise ntirho wo chumayela lowu endliwaka hi malandza ya Xikwembu ni nyimpi ya moya. U tsarile: “Matlhari ya nyimpi ya hina a hi ya nyama, kambe Xikwembu hi xona xi ma nyikaka matimba leswaku ma wisetela swilo leswi simekiweke swi tiya. Hikuva hi wisa makungu ni swilo hinkwaswo leswi tlakukeke leswi lwisanaka ni vutivi bya Xikwembu.” (2 Kor. 10:4, 5) I yini swin’wana swa “swilo leswi simekiweke swi tiya” leswi dyondzo ya Xikwembu yi ntshunxaka vanhu eka swona? I ndzhwalo wa tidyondzo ta mavunwa, vukholwa-hava ni tifilosofi ta vanhu, loko hi boxa swi nga ri swingani. (Kol. 2:8) Dyondzo ya Xikwembu yi pfuna vanhu leswaku va tshika mikhuva yo biha naswona va hlakulela timfanelo leti tsakisaka Xikwembu. (1 Kor. 6:9-11) Yi antswisa vutomi bya ndyangu. Naswona yi endla leswaku vanhu lava nga riki na ntshembo va va ni xikongomelo xa xiviri evuton’wini. Wolowo i muxaka wa dyondzo leyi lavekaka namuntlha.

⁸ Yin’wana ya timfanelo leti Yehovha a pfunaka vanhu va yena leswaku va va na tona i ku tshembeka, hilaha ntokoto lowu landzelaka wu swi kombisaka hakona. (Hev. 13:18) Wansati un’wana wa le Indiya u pfumele ku dyondzeriwa Bibele naswona hi ku famba ka nkarhi u faneleke ku va muhuweleri la nga khuvuriwangiki. Siku rin’wana loko a muka a huma eka tsima ro aka Holo ya Mfumo, u thumbe sindza ra nsuku ra le nhan’wini ekusuhi ni xitichi xa bazi, leri a ri durha 8 000 wa tirhandi. Hambileswi a a ri xisiwana, u teke sindza rolero a ri yisa exitichini xa maphorisa leswaku ku ta kumiwa n’wini wa rona. Phorisa leri a ri kumeke kwalaho ri hlamale swinene! Endzhakunyana, phorisa rin’wana ri n’wi vutisile ri ku: “Ha yini u nga titekelanga sindza leri?” U te: “Ku dyondza Bibele swi ndzi pfune ngopfu, sweswi se ndza tshembeka.” Leswi phorisa leri a ri tsakisiwe hi mhaka leyi, ri byele nkulu la nga Mukreste loyi a a helekete wansati loyi exitichini xa maphorisa, ri ku: “Ku ni vanhu vo tlula 38 wa timiliyoni exifundzheni lexi. Loko mo pfuna vanhu va khume leswaku va hundzuka va fana ni wansati loyi, mi nga va mi tirhe ngopfu.” Loko hi xiya vutomi bya vanhu va timiliyoni lebyi hundzuriweke hi dyondzo ya Xikwembu, hi ni swivangelo swo tala swo dzunisa Yehovha.

9. Swi kotekisa ku yini leswaku vanhu va hundzula ndlela leyi va hanyaka ha yona?

⁹ Matimba ya Rito ra Xikwembu lama kotaka ku hundzula munhu, swin’we ni mpfuno lowu Yehovha  a wu nyikelaka hi ku tirhisa moya wa yena lowo kwetsima swi endla leswaku vanhu va kota ku hundzula vutomi bya vona. (Rhom. 12:2; Gal. 5:22, 23) Vakolosa 3:10 yi ri: “Mi tiambexa vumunhu lebyintshwa, lebyi hi vutivi lebyi kongomeke byi endliwaka byi va byintshwa hi ku ya hi xifaniso xa Loyi a byi tumbuluxeke.” Rungula leri kumekaka eRitweni ra Xikwembu, ku nga Bibele ri ni matimba yo paluxa leswi munhu a nga swona hakunene naswona ri nga hundzula ndlela leyi a anakanyaka ha yona swin’we ni ndlela leyi a titwaka ha yona hi swilo swo karhi. (Hlaya Vaheveru 4:12.) Loko munhu a twisisa Matsalwa hi ndlela leyi kongomeke a tlhela a hanya hi ku pfumelelana ni milawu leyinene ya Yehovha, a nga va munghana wa Xikwembu a tlhela a va ni ntshembo wo hanya hilaha ku nga heriki.

Yehovha U Hi Endla Hi Lunghekela Swilo Swa Le Nkarhini Lowu Taka

10. (a) Ha yini ku ri Yehovha ntsena loyi a nga hi pfunaka leswaku hi lunghekela leswi nga ta humelela enkarhini lowu taka? (b) I ku cinca kwihi lokukulu loku nga ta khumba misava hinkwayo ku nga ri khale?

¹⁰ Yehovha hi yena ntsena la nga hi pfunaka leswaku hi lunghekela swilo leswi nga ta humelela enkarhini lowu taka hikuva wa swi tiva leswaku ku ta humelela yini ku nga ri khale. Wa swi tiva leswaku vumundzuku bya vanhu byi ta va byi ri njhani. (Esa. 46:9, 10) Vuprofeta bya le Bibeleni byi paluxa leswaku “siku lerikulu ra Yehovha ri le kusuhi.” (Sof. 1:14) Marito lama nga le ka Swivuriso 11:4 ma ta hetiseka malunghana ni siku rero, lama nge: “Swilo swa nkoka a swi nge pfuni nchumu hi siku ra ku hlundzuka, kambe ku lulama hi kona ku nga ta kutsula eku feni.” Loko nkarhi wa leswaku Yehovha a avanyisa misava ya Sathana wu fika, lexi nga ta va xi ri xa nkoka swinene ku ta va ku ri leswaku hi va lava amukelekaka eka Xikwembu. Mali a yi nge pfuni nchumu. Entiyisweni, Ezekiyele 7:19 yi ri: “Silivhere ya vona va ta yi lahlela eswitarateni, naswona nsuku wa vona wu ta va nchumu lowu nyenyetsaka.” Ku tiva mhaka yoleyo ka ha ri emahlweni swi ta hi pfuna leswaku hi endla swiboho swa vutlhari sweswi.

11. Hi yihi ndlela yin’wana leyi dyondzo ya Xikwembu yi hi pfunaka ha yona leswaku hi lunghekela leswi nga ta humelela enkarhini lowu taka?

¹¹ Ndlela yin’wana leyikulu leyi dyondzo ya Xikwembu yi hi endlaka hi lunghekela ku ta ka siku ra Yehovha i ku hi pfuna leswaku hi rhangisa swilo leswi faneleke. Muapostola Pawulo u tsalele Timotiya a ku: “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu.” Hambiloko hi nga ri na mali yo tala, hi nga vuyeriwa eka ndzayo leyi humaka eka Yehovha. Xana yi katsa yini? Ematshan’weni yo tikarhatela ku kuma swilo leswi vonakaka, hi fanele hi tikarhatela ku “endla leswinene” ni ku “fuwa hi mintirho leyinene.” Loko hi rhangisa ku tirhela Yehovha, hi ‘tivekela masungulo lamanene ya nkarhi lowu taka.’ (1 Tim. 6:17-19) Ku endla sweswo swi kombisa vutlhari lebyi tirhaka, hikuva Yesu u te, “swi ta n’wi pfuna yini munhu loko a pindzula misava hinkwayo kambe a lahlekeriwa hi moya-xiviri wakwe?” (Mat. 16:26, 27) Leswi siku ra Yehovha ri tshineleke, un’wana ni un’wana wa hina u fanele a tivutisa a ku: ‘Xana xuma xa mina ndzi xi veka kwihi? Xana  ndzi hlonga ra Xikwembu kumbe ra Rifuwo?’—Mat. 6:19, 20, 24.

12. Ha yini hi nga fanelanga hi hela matimba loko vanhu van’wana va wu langutela ehansi ntirho wa hina?

¹² Nchumu lowu nga wa nkoka swinene exikarhi ka “mintirho leyinene” leyi hlamuseriweke eRitweni ra Xikwembu leyi Vakreste va faneleke va yi endla, i ntirho lowu ponisaka vutomi wa ku chumayela hi Mfumo ni ku endla vadyondzisiwa. (Mat. 24:14; 28:19, 20) Van’wana va nga ha wu langutela ehansi ntirho wa hina, hilaha va endleke hakona hi lembe-xidzana ro sungula. (Hlaya 1 Vakorinto 1:18-21.) Sweswo a swi endli leswaku rungula ra hina ri nga ha vi ra nkoka, naswona a swi endli leswaku swi nga ha vi swa nkoka ku nyika vanhu hinkwavo nkarhi wa ku pfumela eka rona loko nkarhi wa ha ri kona. (Rhom. 10:13, 14) Loko hi pfuna van’wana leswaku va vuyeriwa eka dyondzo ya Xikwembu, hi ta kuma mikateko yo tala.

Yehovha U Katekisa Malandza Ya Yena Loko Ma Titsona Swo Karhi

13. I yini leswi muapostola Pawulo a titsoneke swona hikwalaho ka mahungu lamanene?

¹³ Loko a nga si va Mukreste, muapostola Pawulo a a leteriwa leswaku swilo swi ta n’wi fambela kahle eka fambiselo ra swilo ra Vayuda. Loko a ri ni malembe ya kwalomu ka 13, u suke emutini lowu a tswaleriweke eka wona wa Tarso a ya tshama eYerusalema leswaku a ya dyondzisiwa hi Gamaliyele mudyondzisi wa Nawu loyi a a xiximiwa swinene. (Mint. 22:3) Hi ku famba ka nkarhi, Pawulo u sungule ku duma exikarhi ka vanhu va le nkarhini wa yena, naswona loko a a lo ya mahlweni ni dyondzo yoleyo a a ta va a dumile eka vukhongeri bya Xiyuda. (Gal. 1:13, 14) Loko a amukele mahungu lamanene naswona a sungula ntirho wo chumayela, u tshike swilo hinkwaswo leswi a a swi endla. Xana Pawulo u tisorile hikwalaho ka xiboho lexi a xi endleke? Doo! Entiyisweni u tsarile a ku: “Hakunene ndzi tlhela ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu Hosi ya mina. Hikwalaho ka yena ndzi pfumele ku lahlekeriwa hi swilo hinkwaswo naswona ndzi swi teka ku ri nhulu ya thyaka.”—Filp. 3:8.

14, 15. Hi kuma mikateko yihi hi ku va “vatirhi-kulobye ni Xikwembu”?

¹⁴ Ku fana na Pawulo, Vakreste namuntlha va titsona swo karhi leswaku va ta chumayela mahungu lamanene. (Mar. 10:29, 30) Xana hi pfumala swo karhi hikwalaho ka leswi hi endleke sweswo? Robert, la boxiweke eku sunguleni, u titwa hilaha Vakreste vo tala va titwaka hakona loko a ku: “A ndzi tisoli nikatsongo. Vutirheli bya nkarhi hinkwawo byi endla leswaku ndzi tsaka naswona ndzi eneriseka, naswona byi endle leswaku ndzi ‘nantswa ndzi vona leswaku Yehovha hi lonene.’ Nkarhi wun’wana ni wun’wana loko ndzi titsona swo karhi leswaku ndzi ta fikelela tipakani to karhi entirhweni wa Yehovha, minkarhi hinkwayo u ndzi katekise hi swilo swo tala ku tlula leswi ndzi  titsoneke swona. Swi va onge a ndzi titsonanga nchumu. Ndzi kume swilo swo tala.”—Ps. 34:8; Swiv. 10:22.

¹⁵ Loko se u ri ni nkarhi wo leha u endla ntirho wo chumayela ni wo dyondzisa, a swi kanakanisi leswaku na wena u nantswile u swi vona leswaku Yehovha hi lonene. Xana ku ni minkarhi leyi u swi voneke leswaku moya wa yena wa ku pfuna loko u ri karhi u chumayela mahungu lamanene? Xana u tshame u vona van’wana va tsaka loko Yehovha a pfula timbilu ta vona leswaku yingisa rungula leri? (Mint. 16:14) Xana Yehovha u ku pfunile leswaku u hlula swihinga, kumbexana a ku pfulela ndlela leswaku u tirha hilaha ku engetelekeke entirhweni wa wena wa nsimu? Xana u ku pfunile loko swi tika, a ku endla leswaku u ya emahlweni u n’wi tirhela loko u twa onge matimba ya wena ma hela? (Filp. 4:13) Loko hi swi vona leswaku Yehovha u hi pfunile loko hi ri ensin’wini, u va wa xiviri swinene eka hina naswona hi titwa hi n’wi rhandza swinene. (Esa. 41:10) I nkateko ku va un’wana wa “vatirhi-kulobye ni Xikwembu” entirhweni lowukulu wa ku dyondzisiwa hi xona.—1 Kor. 3:9.

16. Xana u titwa njhani hi matshalatshala lawa u ma endlaka ni leswi u titsonaka swona malunghana ni dyondzo ya Xikwembu?

¹⁶ Vanhu vo tala va ni ntshembo wa leswaku va ta endla nchumu wo karhi wa nkoka loko va ha hanya. Hi swi vonile leswaku hambi ku ri swilo leswi hlamarisaka leswi endliwaka namuntlha hakanyingi swi hatla swi rivariwa. Hambiswiritano, mintirho leyi vanhu va Yehovha va yi endlaka namuntlha leswaku va kwetsimisa vito ra yena yi ta va matimu lama nga rivalekiki ya vanhu va Yehovha. Yi ta tsundzukiwa hilaha ku nga heriki. (Swiv. 10:7; Hev. 6:10) Onge hi nga tlangela lunghelo ra hina ra ku dyondzisa van’wana malunghana na Yehovha, ku nga ntirho lowu nga taka wu nga rivariwi.

U Nga Hlamula Njhani?

• I yini leswi Yehovha a swi languteleke eka vanhu lava a va dyondzisaka?

• Xana dyondzo ya Xikwembu yi byi antswisa njhani vutomi bya vanhu?

• Hi katekisiwa njhani loko hi pfuna van’wana leswaku va vuyeriwa eka dyondzo ya Xikwembu?

[Swivutiso Swa Dyondzo]

[Xifaniso lexi nga eka tluka 23]

Lava va dyondzisiwaka hi Yehovha i vamakwavo va xiviri va le misaveni hinkwayo

[Xifaniso lexi nga eka tluka 24]

Xana a hi lunghelo ku va un’wana wa “vatirhi-kulobye ni Xikwembu”?