Ndzi Kume Nchumu Wa Nkoka Lowu Ndzi Nga Wu Hanyelaka

Hi ku vula ka Gaspar Martínez

Ndzi kulele ematiko-xikaya endyangwini lowu nga swisiwana ivi ndzi rhurhela edorobeni laha ndzi fikeke ndzi kuma rifuwo. Kambe u ta swi xiya leswaku rifuwo leri ndzi ri kumeke a hi rona leri a ndzi ri languterile.

NDZI kulele endhawini ya le matiko-xikaya leyi nga kwandzasi hi va-1930 exifundzheni xa Rioja lexi nga en’walungwini wa tiko ra Spain. Loko ndzi ri na malembe ya khume, ndzi boheke ku tshika xikolo, kambe hi nkarhi wolowo se a ndzi swi kota ku hlaya ni ku tsala. Mina ni vamakwerhu va tsevu a hi heta nkarhi wo tala hi ri enhoveni hi risa tinyimpfu kumbe hi rima swinsin’wana swa hina.

Vusiwana byi hi endle hi anakanya leswaku mali ni swilo leswi vonakaka a swi ri swa nkoka swinene. Hi sungule ku vondzoka vanhu lava a va ri ni swilo swo tala ku tlula swa hina. Hambiswiritano, bixopo wa laha hi tshamaka kona u tshame a vula leswaku “ximutana [xa ka hina] xi ni tikereke to tala leti nga ehansi ka yena.” Kambe, a a nga swi xiyi leswaku hi ku famba ka nkarhi vanhu vo tala va ta tshika kereke ya Khatoliki.

Ku Lavisisa Nchumu Wo Antswa Swinene

Ndzi tekane na Mercedes, nhwanyana loyi a a tshama eximutanini lexi a ndzi tshama eka xona. Swi nga si ya kwihi, hi ve ni n’wana wa jaha. Hi 1957 hi rhurhele edorobeni ra le kusuhi leri vuriwaka Logroño, naswona hi ku famba ka nkarhi ndyangu wa ka hina hinkwawo wu rhurhele kwalaho. Ndzi sungule ku xiya leswaku leswi a ndzi nga ri na vutshila bya ntirho wo karhi, a ndzi ta hola mali yitsongo. Ndzi tivutisile leswaku ndzi nga wu kuma kwihi nkongomiso. Ndzi sungule ku endla ndzavisiso eka layiburari ya laha a ndzi tshama kona, hambileswi entiyisweni a ndzi nga swi tivi leswi ndzi faneleke ku swi lavisisa.

Endzhakunyana, ndzi twe hi ta nongonoko wun’wana wa le ka xiya-ni-moya lowu dyondzisaka vanhu Bibele hi ku va tsalela mapapila. Endzhakunyana ka loko ndzi yi hetile dyondzo yoleyo, swirho swin’wana swa Protestente swi vulavurisane na mina. Endzhaku ka loko ndzi ye ekerekeni ya vona ko hlayanyana, ndzi vone ku kwetlembetana loku a ku ri kona exikarhi ka swirho leswi rhangelaka ekerekeni yoleyo. A ndza ha tlhelelanga, a ndzi tibyele leswaku vukhongeri hinkwabyo bya fana.

Mahakatimba Ma Wa eMatihlweni Ya Mina

Hi 1964 jaha rin’wana leri vuriwaka Eugenio ri hi endzerile. A ri ri Mbhoni ya Yehovha, ku nga vukhongeri lebyi a ndzi nga si tshama ndzi twa hi byona. Kambe a ndzi swi navela swinene ku bula hi Bibele. A ndzi anakanya leswaku ndzi ma tiva kahle Matsalwa. Ndzi ri hlamule hi ku tirhisa tindzimana ti nga ri tingani ta le Bibeleni leti ndzi ti dyondzeke eka khoso leyi ndzi yi endleke ndzi ri ekaya. Hambileswi ndzi ringeteke ku yimelela tidyondzo tin’wana ta Protestente, entiyisweni a a ndzi nga pfumeli eka tona hi mbilu hinkwayo.

Endzhaku ka mabulo mambirhi yo leha, ndzi boheke ku pfumela leswaku Eugenio u ri tiva kahle Rito ra Xikwembu. Swi ndzi hlamarisile ku vona  ndlela leyi a a ma tiva kahle matsalwa ha yona ni ku ma hlamusela kahle, hambileswi a ndzi dyondze ku n’wi tlula. Eugenio u ndzi pfulele Bibele a ndzi komba leswaku hi hanya emasikwini yo hetelela naswona ku nga ri khale Mfumo wa Xikwembu wu ta endla misava leyi yi va paradeyisi. A ndzi tsake swinene.—Ps. 37:11, 29; Esa. 9:6, 7; Mat. 6:9, 10.

Ndzi nambe ndzi pfumela ku dyondzeriwa Bibele. Swilo swo tala leswi ndzi swi dyondzeke a swi ri swintshwa, naswona swi ndzi khumbe mbilu. Ndzi sungule ku va ni ntshembo lowu a ndzi vona swi fanerile leswaku ndzi hanyela wona. Ku lavisisa ka mina ku fike emakumu. Sweswi matshalatshala ya mina yo antswisa vutomi bya mina a ma vonaka ma nga ha ri ya nkoka, naswona ku karhateka hi ku kuma ntirho lowu holelaka a swi nga ha ndzi tovi helo. Leswi vuvabyi ni rifu a swi ta herisiwa, swi ndzi tiyise nhlana leswaku ni swiphiqo leswin’wana hinkwaswo a swi ta kuma ndzhuti swi yima.—Esa. 33:24; 35:5, 6; Nhlav. 21:4.

Xikan’we-kan’we ndzi sungule ku byela maxaka ya mina leswi a ndzi swi dyondza, ndzi va hlamusela hi ku hiseka leswaku Xikwembu xi tshembisa ku hundzula misava yi va paradeyisi laha vanhu vo tshembeka va nga ta hanya kona hilaha ku nga heriki.

Ndyangu Wa Ka Hina Wu Sungula Ku Hlanganyela Ni Timbhoni

Hi ku hatlisa, mina ni vanhu va kwalomu ka 11 hi endle xiboho xo hlangana Sonto yin’wana ni yin’wana nindzhenga ekaya ka ndzisana ya xinuna ya tatana leswaku hi ta bula hi switshembiso swa le Bibeleni. A hi heta tiawara timbirhi kumbe tinharhu hi bula hi Bibele vhiki na vhiki. Loko Eugenio a vona leswaku maxaka ya mina yo tala a ma tsakela ku dyondza Bibele, u hlele ku endzela ndyangu ha wun’we leswaku a ya dyondza na wona Bibele.

A ndzi ri na maxaka man’wana edorobeni leritsongo leri vuriwaka Durango laha swi endlaka 120 wa tikhilomitara ku ya kona, laha a ku nga ri na Mbhoni ni yin’we. Kutani endzhaku ka tin’hweti tinharhu, ndzi teke masiku yo hlayanyana yo wisa ndzi va endzela hi xikongomelo xo va hlamusela hi vukhongeri bya mina lebyi ndza ha ku byi kumaka. Hi nkarhi wolowo, a hi hlangana madyambu man’wana ni man’wana hi ri vanhu va kwalomu ka khume ivi ndzi vulavula na vona hi Bibele kukondza ku va matakuxa. Hinkwavo ka vona a va ri tsakela rungula leri. Loko se ndzi fanele ndzi famba, ndzi va siyele Tibibele ni tibuku leti sekeriweke eBibeleni. Ku sukela hi nkarhi wolowo a hi tshamela ku endzelana.

Loko Timbhoni ti fika eDurango—laha a ti nga si tshama ti ya chumayela kona—ti kume vanhu va 18 lava a va swi rindzele hi mahlo-ngati ku dyondza Bibele. Timbhoni ti hlele leswaku ndyangu wun’wana ni wun’wana wu dyondzeriwa Bibele.

Mercedes a a nga si swi lava ku dyondza Bibele, ku nga ri hileswi a a nga pfumeli eka tidyondzo ta le Bibeleni kambe hikwalaho ka leswi a a chava vanhu. Enkarhini wolowo ntirho wa Timbhoni ta Yehovha a wu yirisiwile eSpain, hikwalaho a a anakanya leswaku hulumendhe yi nga hlongola vana va hina vambirhi exikolweni nileswaku vanhu a va nge he hi tsakeli hinkwerhu. Kambe loko a vona leswaku ndyangu hinkwawo wu sungule ku hlanganyela ni Timbhoni, na yena u lave ku dyondzeriwa.

Ku nga si hela malembe mambirhi, swirho swa ndyangu wa ka hina swa 40 swi ve Timbhoni naswona swi khuvuriwile swi kombisa ku tinyiketela ka swona ko lava ku tirhela Xikwembu. Ina, ndyangu wa ka hina a wu ri ni pakani yo fana ni ya mina naswona a wu lava ku hanya vutomi lebyi nga ni xikongomelo. Entiyisweni ndzi titwe ndzi kume nchumu wa nkoka swinene. Hi kume mikateko yo tala leyi humaka eka Xikwembu.

Vutomi Byi Ye Byi Ndzi Enerisa Swinene Loko Ndzi Ri Karhi Ndzi Kula

Eka malembe ya 20 lama landzeleke ndzi we ndzi pfuka leswaku ndzi kurisa vana va hina vambirhi va vafana ni ku pfuna vandlha leri a ndzi hlanganyela eka rona. Loko mina na Mercedes hi rhurhela eLogroño, a ku ri na Timbhoni ta kwalomu ka 20 ntsena edorobeni rero leri a ri ri ni vaaki va kwalomu ka 100 000. Swi nga si ya kwihi ndzi ve na vutihlamuleri byo tala evandlheni.

Kutani, loko ndzi ri ni malembe ya 56, khampani leyi a ndzi tirha eka yona yi pfariwile swi nga languteriwanga, hi xitshuketa ndzi tikume ndzi nga ha tirhi. Minkarhi hinkwayo nchumu lowu a ndzi wu navela swinene a ku ri ku nghenela vutirheli bya nkarhi hinkwawo, hikwalaho leswi a ndzi nga ha tirhi ndzi nambe ndzi tirhisa nkarhi wolowo ndzi nghenela vuphayona. Mali leyi ndzi nyikiweke yona loko ndzi heleriwa hi ntirho a yi ri yitsongo swinene, naswona ku hanya ha yona a swi nga olovi. Kambe, Mercedes a a pfa a endla swintirhwana swo basisa. A hi swi kota ku hlayisa ndyangu wa hina naswona a hi nga swi pfumali swilo swa nkoka  evuton’wini. Nisweswi ndza ha ri phayona naswona Mercedes minkarhi yo tala u teka vuphayona bya nkarhinyana naswona wa wu tsakela swinene ntirho wo chumayela.

Eka malembe ma nga ri mangani lama hundzeke, Mercedes a a yisela nhwanyana un’wana loyi a vuriwaka Merche timagazini ta hina, loyi loko a ha ri ntsongo a tshameke a dyondza Bibele. Merche a a swi tsakela swinene ku dyondza tibuku ta hina, naswona Mercedes u xiye leswaku Merche wa ha wu vona nkoka wo dyondza Bibele. Eku heteleleni, Merche u amukele dyondzo ya Bibele naswona u sungule ku tirhisa leswi a swi dyondzaka. Kambe nuna wa yena Vicente, a a ri xilovekelo naswona a a tshamela ku cinca-cinca mintirho. Hikwalaho, a a nga n’wi nyiki mali; vukati bya vona a byi ri ekhombyeni hileswi nuna wa yena a a ri xilovekelo.

Nsati wa mina u kombele Merche leswaku Vicente a vulavula na mina naswona eku heteleleni hi vulavurile. Endzhaku ka loko hi va endzele ko hlayanyana, Vicente u pfumerile ku dyondza Bibele. Vicente u sungule ku cinca mahanyelo yakwe, minkarhi yin’wana a a pfa a tshika ku nwa byala ku ringana masiku yo hlayanyana. Kutani a tshika ku nwa ku ringana vhiki kumbe ku tlula. Eku heteleleni, u tshike ku nwa byala hi ku helela. Xikandza xa yena xi sungule ku languteka, naswona ndyangu wa yena wu ve ni vun’we. Ndyangu wa yena hinkwawo, ku katsa ni nkatakwe ni n’wana wa vona wa nhwanyana va ri seketela swinene vandlha leritsongo ra le Swihlaleni swa Canary, laha va tshamaka kona sweswi.

Ku Anakanya Hi Vutomi Lebyinene Lebyi Ndzi Byi Hanyeke

Hambileswi maxaka ya mina man’wana lama dyondzeke tidyondzo ta le Bibeleni emalembeni lama hundzeke se ma feke, maxaka ya mina yo tala ma ya ma amukela ntiyiso naswona Xikwembu xi hi katekise swinene. (Swiv. 10:22) Kunene swa tsakisa ku vona leswaku vunyingi bya vanhu lava sunguleke ku dyondza Bibele emalembeni ya 40 lama hundzeke—swin’we ni vana ni vatukulu va vona—va ye emahlweni va tirhela Yehovha hi ku tshembeka!

Sweswi ndzi na maxaka yo tala lama nga Timbhoni, lawa yo tala ma nga vakulu, malandza ya vutirheli ni maphayona. N’wana wa mina wa mufana wa mativula ni nsati wa yena va tirha ehofisini ya rhavi ya Timbhoni ta Yehovha leyi nga eMadrid, le Spain. Loko ndzi va Mbhoni, a ku ri na 3 000 wa Timbhoni le Spain. Sweswi ku na Timbhoni to tlula 100 000. Ndzi swi tsakela swinene ku endla ntirho wa nkarhi hinkwawo, naswona ndzi xi nkhensa swinene Xikwembu hikwalaho ka leswi ndzi tiphinaka evuton’wini bya mina hi ku xi tirhela. Hambileswi ndzi nga dyondzekangiki, nkarhi na nkarhi ndza pfuneta hi ku va mulanguteri wa xifundzha la khomelaka.

Malembe ma nga ri mangani lama hundzeke, ndzi kume leswaku ximutana lexi ndzi kuleleke eka xona a xi ri kwandzasi. Vusweti byi endle leswaku vaaki va ndhawu yoleyo hinkwavo va boheka ku siya masimu ni makaya ya vona hi xikongomelo xo ya lava vutomi byo antswa. Lexi tsakisaka, vanhu vo hlaya lava rhurheleke emadorobeni, ku katsa na mina, va kume rifuwo ra ku tirhela Xikwembu. Hi dyondze leswaku vutomi byi ni xikongomelo naswona ku tirhela Yehovha hi swona swi tisaka ntsako lowukulu.

[Xifaniso lexi nga eka tluka 32]

Maxaka yo tala ya Makwerhu Martínez lama nga Timbhoni ta Yehovha