Dyondzo Ya Ndyangu I Ya Nkoka Swinene Leswaku Ndyangu Wu Pona!

ANAKANYA ndlela leyi “nyimpi ya siku lerikulu ra Xikwembu xa Matimba Hinkwawo” yi nga ta va yi chavisa ha yona! (Nhlav. 16:14) Hi ku tirhisa ndlela leyinene yo fanekisela, muprofeta Mikiya u tsale a ku: “Tintshava ti fanele ti n’oka . . . ni timbala ta le hansi ti ta avana, ku fana ni mhula lowu n’okisiwaka hi ndzilo, ku fana ni mati lama chuluriwaka endhawini leyi rhelelaka.” (Mik. 1:4) Xana byi ta va byihi vuyelo byo vava lebyi vanhu lava nga n’wi gandzeriki Yehovha va nga ta langutana na byona? Rito ra Xikwembu ri ri: “Lava dlayiweke hi Yehovha esikwini rero va ta suka emakun’wini ya misava ku ya fika emakun’wini man’wana ya misava.”—Yer. 25:33.

Hikwalaho ka swilemukiso sweswo, tinhloko ta mindyangu leti to tala ta tona ti ngo va mutswari la nga yexe, ti fanele ti tivutisa xivutiso lexi landzelaka malunghana ni vana va tona lava se va kotaka ku hambanisa leswinene ni leswo biha: ‘Xana vana va mina va ta pona nyimpi ya Armagedoni?’ Bibele ya tiyisekisa leswaku va ta pona, ntsena loko va ri ni vuxaka lebyi tiyeke na Yehovha hi ku ya hi malembe ya vona.—Mat. 24:21.

Ha Yini Ku Va Ni Nkarhi Wa Dyondzo Ya Ndyangu Swi Ri Swa Nkoka?

Tanihi mutswari, tiyiseka leswaku u endla hinkwaswo leswi u nga swi kotaka leswaku u kurisa vana va wena “hi ku tshinya ni nkongomiso wa mianakanyo wa Yehovha.” (Efe. 6:4) Ku dyondza Bibele ni vana va wena i swa nkoka swinene. Hi lava leswaku vantshwa va hina va fana ni Vakreste va le Filipiya, lava Pawulo a va bumabumeleke hikwalaho ka leswi a va tiyimisele ku yingisa Yehovha. U tsale a ku: “Varhandziwa, hi ndlela leyi mi yingiseke ha yona nkarhi hinkwawo, ku nga ri hi nkarhi wa vukona bya mina ntsena, kambe ngopfu-ngopfu mi tiyimisele ku yingisa loko ndzi nga ri kona, hambetani mi tirhela ku ponisiwa ka n’wina hi ku chava ni ku rhurhumela.”—Filp. 2:12.

Xana vana va wena va hanya hi milawu ya Yehovha niloko u nga ri na vona? Ku vuriwa yini loko va ri exikolweni? U nga va pfuna njhani va tiyiseka leswaku milawu ya Yehovha ya pfuna, leswi nga ta endla leswaku va hanya hi yona niloko va ri swavo?

Dyondzo ya ndyangu yi nga va pfuna swinene vana va wena leswaku va yingisa Yehovha. Hikwalaho, a hi buleni hi tinhla tinharhu ta nkoka leti nga endlaka leswaku dyondzo ya n’wina ya Bibele ya ndyangu yi tshama yi ri kona.

Yi Khomeni Nkarhi Ni Nkarhi

Bibele yi kombisa leswaku ku ni nkarhi lowu vana va Xikwembu lava nga tintsumi va vitaniwaka ha wona leswaku va ta exiluvelweni xa xona. (Yobo 1:6) Endla leswi fanaka eka vana va wena. Veka siku ni nkarhi lowu faneleke lowu Dyondzo ya Ndyangu ya nimadyambu yi nga ta khomiwa ha wona naswona mi wu namarhela. Ku engetela kwalaho, endla malunghiselelo ya leswaku mi ta yi khoma rini loko mo tshuka mi tsandzeka ku yi khoma hi siku ni nkarhi lowu mi wu vekeke, hi leswi mi kavanyetiweke hi swiyimo leswi mi nga swi rindzelangiki.

Loko nkarhi wu ri karhi wu famba, u nga pfumeli leswaku mi pfa mi tlurisa mavhiki man’wana mi nga yi khomi dyondzo leyi. Tsundzuka, vana va wena hi vona swichudeni swa wena swa Bibele swa nkoka swinene. Kambe, Sathana u lava ku hlasela vona. (1 Pet. 5:8) Loko mo tsandzeka ku tirhisa nkarhi lowu wa risima wa Dyondzo ya Ndyangu ya nimadyambu ivi mi hlalela thelevhixini kumbe mi endla swilo swin’wana leswi nga riki swa nkoka, Sathana u ta va a mi hlurile.—Efe. 5:15, 16; 6:12; Filp. 1:10.

Hlawula Swihloko Leswi Nga Va Pfunaka

Dyondzo ya Ndyangu ya nimadyambu a yi fanelanga yi va dyondzo ya ku engetela vutivi ntsena. Kambe u fanele u endla leswaku yi va pfuna. Njhani? Minkarhi yin’wana, hlawula swihloko leswi vulavulaka hi swiyimo leswi vana va wena va nga ha langutanaka na swona emasikwini kumbe emavhikini lama taka. Hi xikombiso, ha yini mi nga praktisi leswi mi nga ta swi vula ensin’wini? Vantshwa va tsakela ku endla swilo leswi va swi kotaka kahle. Ku praktisa ndlela leyi va nga ta chumayela ha yona ni ku  anakanyisisa hi ndlela leyi va nga ta angula ha yona loko van’wana va bakanya rungula ra hina swi ta va pfuna leswaku va titshemba loko va ri entirhweni wo chumayela rungula ra Mfumo.—2 Tim. 2:15.

U nga ha tlhela u praktisa ni vana va wena ndlela leyi va nga angulaka ha yona loko va langutane ni ntshikilelo wa tintangha. Mi nga ha bula hi tinhla leti kumekaka eka ndzima 15 ya buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2. Xihloko lexi nge “Ku Tilunghiselela Ku Langutana Ni Ntshikilelo Wa Tintangha” lexi kumekaka eka tluka 132 na 133 xi ni swiringanyeto leswinene naswona xi tlhela xi nyika na vana va wena nkarhi wo tsala tinhlamulo hi ndlela leyi va titwisaka xiswona. Marito lama nga eku heteleleni ka tluka 133 ma khutaza vantshwa, ma ku: “Praktisa ndlela leyi u nga ta hlamula ha yona hi ku bula ni mutswari wa wena kumbe munghana loyi u n’wi tshembaka.” Nkarhi ni nkarhi, ha yini mi nga praktisi timhaka to tano eDyondzweni ya n’wina ya Ndyangu ya nimadyambu?

Dyondzo ya ndyangu yi pfuna vatswari leswaku va va ni nkarhi wo pfuna vana va vona leswaku va va ni vuxaka na Yehovha. Malunghana ni mhaka leyi, buku leyi nge Vantshwa Va Vutisa, Vholumo 2, yi ni rungula lerinene eka ndzima 38, exihlokweni lexi nge, “Xana Ndzi Ta Endla Yini Hi Vutomi Bya Mina?” Loko mi ri karhi mi bula hi ndzima yoleyo, pfuna n’wana wa wena a xiya leswaku pakani ya nkoka swinene evuton’wini byakwe i ku tirhela Yehovha. Endla leswaku n’wana wa wena a swi navela hi mbilu yakwe hinkwayo ku phayona, ku ya tirha eBethele, ku ya eXikolweni xa Ndzetelo wa Vutirheli kumbe ku nghenela vutirheli byin’wana bya nkarhi hinkwawo.

Xitsundzuxo eka vatswari: Vatswari van’wana lava nga ni xikongomelo lexinene va endla xihoxo hi ku sola-sola vana va vona hi leswi va tsandzekaka ku endla swo karhi kambe va nga va bumabumeli eka swilo leswinene leswi va kotaka ku swi endla. Entiyisweni, i swinene ku khutaza vana va wena leswaku va tivekela tipakani letinene to tanihi ku ya tirha eBethele ni ku va varhumiwa. Hambiswiritano, loko u ri karhi u endla tano, tivonele leswaku u nga dyisi vana va wena mbitsi hikwalaho ko lava leswaku va endla swilo leswi wena u languteleke leswaku va swi endla. (Kol. 3:21) Minkarhi hinkwayo tsundzuka leswaku n’wana wa wena u fanele a rhandza Yehovha swi huma embilwini yakwe, ku nga ri hi ku rhandza ka wena. (Mat. 22:37) Lava tindlela to bumabumela n’wana wa wena hi leswi a endlaka swilo leswinene, naswona u papalata ku n’wi sola-sola loko a nga ti fikeleli tipakani tin’wana. Endla leswaku n’wana wa wena a tlangela swilo hinkwaswo leswi Yehovha a swi endleke. Kutani pfuna n’wana wa wena leswaku a swi tlangela swi huma embilwini swilo leswinene leswi Yehovha a swi endleke.

Yi Endle Yi Va Leyi Tsakisaka

Yinhla ya vunharhu ya nkoka leyi nga endlaka leswaku Dyondzo ya Ndyangu ya nimadyambu yi famba kahle i ku yi endla yi tsakisa. Xana u nga swi endla njhani leswi? Kumbexana minkarhi yin’wana mi nga ha yingisela kumbe mi hlalela yin’wana ya tivhidiyo leti humesiweke hi Timbhoni ta Yehovha ivi endzhaku mi bula ha yona. Kumbe mi nga hlaya xiphemu xo karhi xa le Bibeleni swin’we, u avela xirho ha xin’we xa ndyangu tindzimana leti xi faneleke xi ti hlaya.

Ku ni swihloko swo hlawuleka eka Xihondzo xo Rindza ni Xalamuka! leswi hi nga ha swi tirhisaka eka dyondzo ya ndyangu. Hi xikombiso, u nga ha tirhisa xihloko xo hlawuleka lexi kumekaka eka magazini wun’wana ni wun’wana wa Xalamuka! eka tluka 31, lexi nge “U Nga Hlamula Njhani?” Xihondzo xo Rindza xin’wana ni xin’wana xa nkandziyiso wa vanhu  hinkwavo xi ni xihloko lexi dyondzisaka, lexi nge “Ta Vantshwa Va Hina.” Minkarhi yin’wana ku va ni swihloko leswi tsaleriweke vana va vafana ni va vanhwanyana leswi nge “Dyondzisa Vana Va Wena.”

Swihloko leswi humelelaka eka Xalamuka! yin’wana ni yin’wana leswi nge “Vantshwa Va Vutisa” swi nga va pfuna swinene vatswari lava nga ni vana lava nga emalembeni ya kondlo-a-ndzi-dyi, ku fana ni buku leyi nge Vantshwa Va Vutisa, Vholumo 2. Loko mi ri karhi mi dyondza buku yoleyo, mi nga ri honisi bokisi leri nge “U Nga Ku Yini?” leri kumekaka emakumu ka ndzima yin’wana ni yin’wana. Bokisi rolero ra mpfuxeto ri nga tirhisiwa hi tindlela to hambana-hambana. Swivutiso leswi nga eka bokisi rolero swi nga tirhisiwa edyondzweni ya ndyangu.

Kambe xiya leswaku hi nkarhi wa dyondzo ya ndyangu a swi vuli swona leswaku u fanele u vutisa vana va wena swivutiso swo tala ngopfu. Hi xikombiso, u nga ringeti ku sindzisa n’wana wa wena leswaku a hlayela ehenhla leswi a swi tsaleke eka matluka lama nge “Leswi Ndzi Tiyimiseleke Ku Swi Endla” kumbe laha buku yi kombelaka n’wana ku tsala leswi a titwisaka xiswona. Eka xihloko lexi nge “Eka Vatswari,” buku leyi eka tluka 3 yi ri: “Leswaku vantshwa va nga titwi va chava ku tsala ndlela leyi va titwaka ha yona, u nga languti leswi va swi tsaleke. Hi ku famba ka nkarhi va ta bula na wena hi leswi va swi tsaleke.”

Loko mi khoma dyondzo ya n’wina ya ndyangu nkarhi ni nkarhi, naswona u kombisa ndlela leyi yi nga va pfunaka ha yona ivi va yi tsakela, Yehovha u ta ma katekisa swinene matshalatshala ya wena. Dyondzo leyi ya ndyangu yi ta pfuna ndyangu wa wena leswaku wu tshama wu ri ni vuxaka lebyi tiyeke ni Xikwembu.

[Bokisi leri nga eka tluka 31]

Lava Tindlela To Tsakisa To Fambisa Dyondzo

“Loko hi ri karhi hi dyondza ni vana va hina lava ha riki vatsongo, mina ni nuna wa mina a hi lunghiselela rungula leri nga ta dyondziwa evandlheni ivi hi kombela vana va hina leswaku va dirowa xifaniso lexi katsakanyaka leswi hi swi dyondzeke. Minkarhi yin’wana, a hi tlanga switori swa le Bibeleni kumbe hi praktisa swingheniso leswi hi nga ta swi tirhisa ensin’wini. A hi tiyiseka leswaku ndlela leyi hi fambisaka dyondzo ya hina ya ndyangu yi fambisana ni malembe ya vona, ya tsakisa, ya khutaza naswona va tiphina.”—J.M., wa le United States.

“Leswaku hi pfuna n’wana wa munhu loyi ndzi dyondzaka na yena Bibele a vona ndlela leyi buku-nsongwa a yi tirhisiwa ha yona eminkarhini ya Bibele, hi kandziyise buku ya Esaya endzhaku ko susa tinomboro ta tindzima ni tindzimana. Hi teke maphepha wolawo hinkwawo hi ma khomanisa kutani hi ma namarheta eximhandzanini leswaku hi endla buku-nsongwa. Hiloko endzhaku ka sweswo n’wana yoloye a ringeta ku endla leswi Yesu a swi endleke esinagogeni ya le Nazareta. Rungula leri kumekaka eka Luka 4:16-21 ri vula leswaku Yesu u ‘pfule buku-nsongwa ya Esaya a kuma’ ndhawu leyi a a yi lava. (Esa. 61:1, 2) Hambiswiritano, loko n’wana yoloye a ringete ku endla leswi fanaka, swi n’wi tikerile ku kuma Esaya 61 eka buku-nsongwa yoleyo leyi a yi nga ri na tindzima ni tindzimana. N’wana loyi u tsakisiwe hi ndlela leyi Yesu a yi tirhiseke ha yona buku-nsongwa, ivi a ku: ‘Yesu a a ri munhu wo hlamarisa!’”—Y.T., wa le Japani.

[Xifaniso lexi nga eka tluka 30]

Loko vana va praktisa ndlela leyi va nga angulaka ha yona ehansi ka ntshikilelo wa tintangha swi nga pfuna

[Xifaniso lexi nga eka tluka 31]

Lwela ku endla Dyondzo ya Ndyangu ya nimadyambu yi tsakisa