Xana U Tivekele Nkarhi Wa Dyondzo Ya Bibele?

N’WEXEMU, Huvo leyi Fumaka yi tivise hi ta ku cinca ka xiyimiso xa minhlangano ya vandlha lexi nga ta endla leswaku vanhu va va ni nkarhi lowu engetelekeke wa dyondzo ni mabulo ya Bibele tanihi ndyangu. Loko u ri nhloko ya ndyangu, tiyiseka leswaku u dyondza Bibele nkarhi ni nkarhi ni nkataku ni vana va wena hi ndlela leyi un’wana ni un’wana wa vona a nga ta pfuneka. Mimpatswa leyi nga riki na vana yi nga tirhisa nkarhi lowu leswaku yi dyondza Bibele yi ri swin’we. Vamakwerhu lava nga si nghenelaka vukati va ta kota ku tirhisa nkarhi lowu leswaku va va ni dyondzo ya vona vini ya Bibele.

Vo tala va ri tlangele swinene lunghiselelo leri ra ku va ni Dyondzo ya Ndyangu ya nimadyambu. Hi xikombiso, Kevin loyi a nga nkulu, u tsale a ku: “Marito lama nge ‘ndza nkhensa’ a ma enelanga ku kombisa ndlela leyi hi titwaka ha yona tanihi vandlha hi lunghiselelo leri. Hina vakulu hi bule hi ndlela leyi hi nga hlelaka ha yona leswaku eka vusiku byin’we hi endla leswi Huvo leyi Fumaka yi hi kombeleke ku swi endla, ku nga ku dyondza ni mindyangu ya hina.”

Jodi, loyi nuna wa yena a nga nkulu, u tsale a ku: “Hi ni vana vanharhu va vanhwanyana, wo sungula u ni malembe ya 15, wa vumbirhi ya 11 kasi lontsongo u ni malembe mambirhi. Ha ha ku rhurhela evandlheni leri tirhisaka ririmi ra mavoko. Swi lava nkarhi wo tala ni matshalatshala ku lunghiselela minhlangano hinkwayo. Kambe leswi ku nga ni ku cinca loku, hi ni madyambu lawa hi nga ma tirhiselaka dyondzo ya ndyangu!”

John na JoAnn, mpatswa lowu tekaneke lowu nga maphayona ya nkarhi hinkwawo, wu tsale wu ku: “Minkarhi yin’wana a hi nga yi khomi dyondzo ya hina ya Bibele ya ndyangu tanihi leswi a hi pfa hi khomeka hi mintirho yo hambana-hambana ya vandlha. Lunghiselelo leri lerintshwa i nyiko leyi humaka eka Yehovha leyi hi phyuphyisaka hi tlhelo ra moya—loko hi tirhisa nkarhi wolowo hi ndlela leyi hi faneleke hi wu tirhisa ha yona.”

Tony, makwerhu wa xinuna loyi a nga tekangiki loyi a nga emalembeni ya kwalomu ka 20, u hlawule ku va ni dyondzo ya yena n’wini hi Ravumbirhi nimadyambu. U tirhisa masiku man’wana evhikini leswaku a lunghiselela minhlangano ya vandlha. Hambiswiritano, Tony u ri: “Ndzi tshama ndzi ri langutele hi mahlo-ngati siku ra Ravumbirhi.” Hikwalaho ka yini? “Madyambu wolawo i nkarhi wa mina wo hlawuleka wo dyondza ha Yehovha.” Tony wa hlamusela a ku: “Ndzi heta tiawara timbirhi ndzi ri karhi ndzi hlaya swihloko leswi tiyisaka vuxaka bya mina na Yehovha. Ku heta nkarhi wo tala ndzi ri eku hlayeni swi ndzi pfuna leswaku ndzi anakanyisisa hi tindzimana ta Bibele leti ndzi ti hlayaka.” Vuyelo byi ve byihi? “Ndzayo ya Yehovha yi ye yi dzika swinene embilwini ya mina ku tlula eku sunguleni.” Xana a nga hi nyika xikombiso? “Eka buku leyi nge Insight, ndzi hlaye hi vunghana lebyi a byi ri kona exikarhi ka Davhida na Yonathani. Ndzi dyondze swo tala eka Yonathani hi ku pfumala ka yena moya wa vutianakanyi. Xikombiso xa yena xi ndzi pfune swinene leswaku ndzi kota ku vona leswaku swi vula yini ku va munghana wa ntiyiso. Ndzi tshama ndzi swi langutele hi mahlo-ngati ku twisisa tidyondzo to tala ta nkoka eka madyambu man’wana ni man’wana hi Ravumbirhi!”

Handle ko kanakana, malandza ya Yehovha hinkwawo ma ta vuyeriwa swinene loko ma wu tirhisa hi ndlela leyinene nkarhi lowu engetelekeke lowu sweswi ma nga na wona wo va ni dyondzo ya Bibele leyi vuyerisaka ni ku dyondza swin’we tanihi ndyangu.