Ku Nyika U Tsakile Swi Huma eMbilwini

LOKO muapostola Pawulo a vulavula hi mhaka ya ku nyika u te: “Un’wana ni un’wana a a endle hilaha a boheke hakona embilwini yakwe,” naswona u tlhele a ku: “Ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Kor. 9:7) Yehovha a nga sindzisi munhu leswaku a seketela vugandzeri lebyi tengeke. U pfumelela malandza ya yena leswaku ma kombisa leswaku ma n’wi rhandza hi ku nyikela swi huma embilwini naswona ma tsakile. Ematin’wini hinkwawo, vanhu va yena va nyikele swi huma embilwini. Xiya swikombiso swinharhu.

Endzhaku ka loko Yehovha a humese Vaisrayele aEgipta, u va lerise leswaku va aka tabernakela. A ku laveka swilo swo aka ha swona, hikwalaho Vaisrayele va komberiwe ku nyikela. Hiloko “un’wana ni un’wana loyi mbilu yakwe yi n’wi susumeteke” a tisa nsuku ni silivhere, swin’wetsin’wetsi ni swilo swin’wana swo aka. Vanhu va nyikele hi swilo swo tala swinene lerova ku kala ku endliwa xitiviso xa leswaku va nga ha nyikeli.—Eks. 35:5, 21; 36:6, 7.

Endzhaku ka malembe-xidzana yo hlayanyana loko ku ta akiwa tempele, vanhu va Xikwembu va tlhele va kuma nkarhi wo kombisa leswaku va seketela  vugandzeri lebyi tengeke. Hosi Davhida u nyikele hi swilo swo tala swinene eka ntirho wolowo naswona u kombele van’wana leswaku na vona va nyikela. Va endle tano va tsakile. Phela, nsuku ni silivhere leswi ku nyikeriweke ha swona a swi ringana ni mali leyi tlulaka 840 wa tibiliyoni ta tirhandi loko swi ringanisiwa ni mali ya namuntlha! Vanhu a va tsakile hileswi va humeseke magandzelo ya ku tirhandzela eka Yehovha.—1 Tikr. 29:3-9; 2 Tikr. 5:1.

Valandzeri vo sungula va Yesu Kreste na vona a va ri ni moya lowu fanaka wo nyika va tsakile. Hi Pentekosta ya 33 C.E., ku khuvuriwe vanhu va kwalomu ka 3 000 naswona vo tala a va nga ri vaaka-tiko va le Yerusalema. Vakreste va kwalaho va hlengelete mali ya vona swa xinkarhana leswaku ku pfuniwa lava nga swisiwana ku tshama emutini wolowo leswaku va ta dyondza leswi engetelekeke hi ripfumelo ra vona lerintshwa. Vamakwerhu va xavise swilo swa vona ivi va yisa mali ya kona eka vaapostola leswaku ku ta pfuniwa lava nga evusiwaneni. Yehovha u fanele a tsake swinene loko a vona vanhu va yena va kombisa ripfumelo ni rirhandzu ro tano!—Mint. 2:41-47.

Manguva lawa, Vakreste va ha hambeta va seketela vugandzeri lebyi tengeke hi ku nyikela hi nkarhi wa vona, matimba ya vona ni timali ta vona naswona va endla tano va tsakile. Bokisi leri fambisanaka ni xihloko lexi ri kombisa tindlela tin’wana leti hi nga nyikelaka ha tona.

[Bokisi leri nga eka tluka 18, 19]

TINDLELA LETI VAN’WANA VA HLAWULAKA KU NYIKELA HA TONA

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya munyikelo lama nga ni mfungho lowu nge “Ntirho Wa Misava Hinkwayo.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa mavandlha ya kona ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. (Minyikelo ya ku tirhandzela leyi hlamuseriweke laha hansi yi nga rhumeriwa ehofisini ya rhavi ya Timbhoni ta Yehovha leyi langutelaka tiko ra ka n’wina.) Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower Society.” Ku nga ha nyikeriwa ni hi swin’wetsin’wetsi kumbe swilo swin’wana swa nkoka. Endzhaku ka sweswo u fanele u rhumela papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower Bible and Tract Society of South Africa yi nga tsariwa tanihi leyi nga ta sala yi tirhisa mali ya ndzindza-khombo wa vutomi kumbe ya mudende loko n’wini wa yona a file.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower Bible and Tract Society of South Africa, tanihi nyiko leyi heleleke kumbe Watch Tower Bible and Tract Society of South Africa yi nga tsarisiwa yi ri leyi nga ta amukela mali yoleyo loko n’wini wa yona a file.

Ndhawu: Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho: Nhundzu kumbe mali swi nga ha nyikeriwa eka Watch Tower Bible and Tract Society of South Africa hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: 011 761 1000