Swikhongelo Swa Wena Swi Paluxa Yini Hi Wena?
Swikhongelo Swa Wena Swi Paluxa Yini Hi Wena?
“Oho Mutwi wa xikhongelo, vanhu hinkwavo va ta ta eka wena.”—PS. 65:2.
1, 2. Ha yini malandza ya Yehovha ma tiyiseka leswaku loko ma khongela eka yena u ta ma yingisa?
YEHOVHA minkarhi hinkwayo u yingisa swikhongelo swa malandza ya yena lama tshembekaka. Hi nga tiyiseka leswaku wa hi yingisa. Hambiloko timiliyoni ta Timbhoni ta Yehovha a to khongela hi nkarhi wun’we, Yehovha a a ta yingisa swikhongelo swa tona hinkwaswo.
2 Leswi mupisalema Davhida a a tiyiseka leswaku Xikwembu xi swi twile swikhongelo swa yena, u yimbelerile a ku: “Oho Mutwi wa xikhongelo, vanhu hinkwavo va ta ta eka wena.” (Ps. 65:2) Swikhongelo swa Davhida swi hlamuriwile hikuva a a gandzela Yehovha hi ku tshembeka. Hi fanele hi tivutisa hi ku: ‘Xana swikhongelo swa mina swi kombisa leswaku ndzi tshemba Yehovha nileswaku ndzi teka vugandzeri lebyi tengeke byi ri bya nkoka? Swikhongelo swa mina swi paluxa yini hi mina?’
Khongela Eka Yehovha Hi Ku Titsongahata
3, 4. (a) Hi fanele hi khongela hi ndlela yihi eka Xikwembu? (b) Hi fanele hi endla yini loko hi karhatiwa hi ‘miehleketo leyi karhataka’ hikwalaho ka xidyoho lexikulu lexi hi xi endleke?
3 Leswaku swikhongelo swa hina swi hlamuriwa, hi fanele hi khongela eka Xikwembu hi ku titsongahata. (Ps. 138:6) Hi fanele hi kombela Yehovha leswaku a hi kambela hilaha Davhida a vuleke hakona loko a ku: “Ndzi lavisise, Wena Xikwembu, u tiva mbilu ya mina. Ndzi kambele, u tiva miehleketo ya mina leyi karhataka, u vona loko ku ri ni ndlela leyi nga riki yinene eka mina, u ndzi kongomisa endleleni hilaha ku nga riki na makumu.” (Ps. 139:23, 24) Loko hi khongela eka Xikwembu hi fanele hi tlhela hi pfumela ku kamberiwa hi xona ni ku yingisa ndzayo leyi nga eRitweni ra xona. Yehovha a nga hi kongomisa “endleleni hilaha ku nga riki na makumu,” a hi pfuna leswaku hi hambeta hi famba endleleni leyi yisaka evuton’wini lebyi nga heriki.
4 Ku vuriwa yini loko hi karhatiwa hi ‘miehleketo leyi karhataka’ hikwalaho ka leswi hi endleke xidyoho lexikulu? (Hlaya Pisalema 32:1-5.) Loko hi honisa ripfalo leri kingindzaka hi nga ha tsana ku fana ni murhi lowu heleriwaka hi ndzhongo hikwalaho ka ku hisa lokukulu. Davhida u heleriwe hi ntsako naswona swi nga ha endleka a tlhele a vabya hikwalaho ka xidyoho lexi a xi endleke. Kambe Davhida u te hefu, endzhaku ka loko a phofule xidyoho xa yena eka Xikwembu! Anakanya ntsako lowu Davhida a veke na wona loko a swi xiya leswaku Yehovha u n’wi ‘rivalele swiendlo swakwe swo pfukela.’ Ku phofula swidyoho eka Xikwembu swi nga pfuna, naswona mpfuno lowu humaka eka vakulu lava nga Vakreste wu nga pfuna munhu la dyoheke leswaku a tlhela a va ni vuxaka lebyinene na Yehovha.—Swiv. 28:13; Yak. 5:13-16.
Kombela Eka Xikwembu U Tlhela U Xi Nkhensa
5. Hi fanele hi endla yini loko hi vilela ngopfu?
5 Loko hi vilela ngopfu hikwalaho ka swivangelo swin’wana ni swin’wana, hi fanele hi tirhisa ndzayo ya Pawulo leyi nge: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina.” (Filp. 4:6) Hi fanele hi kombela mpfuno ni nkongomiso wa Yehovha, ngopfu-ngopfu loko hi ri ekhombyeni kumbe hi xanisiwa.
6, 7. Hi swihi swilo leswi hi nga swi nkhensaka loko hi khongela?
6 Loko hi khongela ntsena loko hi lava nchumu wo karhi, sweswo swi ta paluxa yini hi vuxaka bya hina na Yehovha? Pawulo u vule leswaku hi fanele hi endla swikombelo swa hina eka Xikwembu “swin’we ni ku nkhensa.” Hakunene hi ni xivangelo xo nkhensa ku fana na Davhida loko a ku: “Wena Yehovha, vukulu, matimba, ku saseka, vunene ni xindzhuti i swa wena; hikuva hinkwaswo leswi nga ematilweni ni leswi swi nga emisaveni i swa wena. Mfumo i wa wena, Wena Yehovha, Wena la tlakukeke la nga murhangeri wa hinkwavo. . . . Sweswi, Wena Xikwembu xa hina, ha ku nkhensa ni ku dzunisa vito ra wena ro saseka.”—1 Tikr. 29:11-13.
7 Yesu u nkhense Xikwembu hikwalaho ka swakudya ni xinkwa ni vhinyo leyi a yi tirhiseke eka Xilalelo xa Hosi. (Mat. 15:36; Mar. 14:22, 23) Handle ko nkhensa swakudya ntsena, hi fanele hi ‘nkhensa Yehovha hikwalaho ka mintirho yakwe yo hlamarisa eka vana va vanhu,’ ‘swiboho swa yena swo lulama swa vuavanyisi’ ni rito ra yena kumbe rungula ra yena leri sweswi ri kumekaka eBibeleni.—Ps. 107:15; 119:62, 105.
Khongelela Van’wana
8, 9. Ha yini hi fanele hi khongelela Vakreste-kulorhi?
8 A swi kanakanisi leswaku ha tikhongelela, kambe hi fanele hi khongelela ni van’wana hambi ku ri Vakreste lava hi nga va tiviki hi mavito. Hambileswi swi nga ha endlekaka leswaku muapostola Pawulo a a nga va tivi hinkwavo Vakreste va le Kolosa, u tsale a ku: “Hi nkhensa Xikwembu Tata wa Hosi ya hina Yesu Kreste minkarhi hinkwayo loko hi mi khongelela, tanihi leswi hi tweke hi ta ripfumelo ra n’wina mayelana na Kreste Yesu ni rirhandzu leri mi rhandzaka vakwetsimi hinkwavo ha rona.” (Kol. 1:3, 4) Pawulo u tlhele a khongelela Vakreste va le Tesalonika. (2 Tes. 1:11, 12) Swikhongelo swo tano swi vula swo tala hi hina naswona swi tlhela swi paluxa ndlela leyi hi va tekaka ha yona vamakwerhu va Vakreste.
9 Loko hi khongelela Vakreste lava totiweke ni vanghana va vona va “tinyimpfu tin’wana” swi kombisa ndlela leyi hi yi rhandzaka ha yona nhlengeletano ya Xikwembu. (Yoh. 10:16) Pawulo u kombele vagandzeri-kulobye leswaku va n’wi khongelela leswaku ‘a nyikiwa vuswikoti byo vulavula, leswaku a tivisa xihundla xo kwetsima xa mahungu lamanene.’ (Efe. 6:17-20) Xana ha va khongelela Vakreste van’wana hi ndlela yoleyo?
10. Ku khongelela van’wana swi nga pfuna hi ndlela yihi?
10 Ku khongelela van’wana swi nga ha cinca ndlela leyi hi va tekaka ha yona. Loko hi khongelela munhu loyi hi nga n’wi tsakeliki, swi nga ha cinca ndlela leyi hi n’wi tekaka ha yona. (1 Yoh. 4:20, 21) Swikhongelo swa muxaka lowu swa khutaza naswona swi endla leswaku hi va ni vun’we ni vamakwerhu. Ku tlula kwalaho, swikhongelo swo tano swi kombisa leswaku hi ni rirhandzu leri fanaka ni ra Kreste. (Yoh. 13:34, 35) Mfanelo yoleyo i yin’wana ya timfanelo ta moya wa Xikwembu. Xana un’wana ni un’wana wa hina wa wu khongelela moya lowo kwetsima, a kombela Yehovha leswaku a n’wi pfuna a kombisa mfanelo ya rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova ni ku tikhoma? (Luka 11:13; Gal. 5:22, 23) Loko hi wu khongelela, marito ni swiendlo swa hina swi ta kombisa leswaku hi famba ni ku hanya hi moya.—Hlaya Vagalatiya 5:16, 25.
11. Ha yini hi nga vulaka leswaku swi fanerile ku kombela van’wana leswaku va hi khongelela?
11 Loko hi xiya leswaku vana va hina va ringeka leswaku va kopela loko va tsala swikambelo exikolweni, hi fanele hi va khongelela hi tlhela hi va hlayela Matsalwa lawa ma nga ta va pfuna leswaku va tshembeka naswona va nga ha endli swilo leswi hoxeke. Pawulo u byele Vakreste va le Korinto a ku: “Hi khongela eka Xikwembu leswaku mi nga endli nchumu lexi hoxeke.” (2 Kor. 13:7) Swikhongelo swo tano swa ku titsongahata swi tsakisa Yehovha naswona swi hi endla hi amukeleka eka yena. (Hlaya Swivuriso 15:8.) Hi nga kombela van’wana leswaku va hi khongelela hilaha muapostola Pawulo a endleke hakona. U tsale a ku: “Hambetani mi hi khongelela, hikuva ha tshemba leswaku hi ni ripfalo ro tshembeka, hileswi hi navelaka ku tikhoma hi ku tshembeka eka swilo hinkwaswo.”—Hev. 13:18.
Swin’wana Leswi Swikhongelo Swa Hina Swi Swi Paluxaka Hi Hina
12. Hi tihi timhaka leti swikhongelo swa hina swi faneleke swi dzika eka tona?
12 Xana swikhongelo swa hina swi kombisa leswaku hi Timbhoni ta Yehovha leti tsakeke ni leti hisekaka? Xana swikombelo swa hina swi fambisana swinene ni ku endla ku rhandza ka Xikwembu, ku chumayela rungula ra Mfumo, ku lweriwa ka vuhosi bya Yehovha ni ku kwetsimisiwa ka vito rakwe? Swikhongelo swa hina swi fanele swi dzika etimhakeni to tano hilaha swi kombisiweke hakona exikhongelweni xa xikombiso xa Yesu, lexi sungulaka hi marito lama nge: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Mat. 6:9, 10.
13, 14. Swikhongelo swa hina swi paluxa yini hi hina?
13 Swikhongelo swa hina eka Xikwembu swi paluxa swikongomelo swa hina, leswi hi swi tsakelaka ni leswi hi swi navelaka. Yehovha wa swi tiva leswaku hi vanhu va muxaka muni. Swivuriso 17:3 yi ri: “Mbita ya ku tengisa i ya silivhere ni khele ra ndzilo i ra nsuku, kambe Yehovha i mukambisisi wa timbilu.” Xikwembu xa swi vona leswi nga etimbilwini ta hina. (1 Sam. 16:7) Xa yi tiva ndlela leyi hi titwaka ha yona hi minhlangano ya hina, hi ntirho wa hina wa nsimu ni hi vamakwerhu va hina. Yehovha wa swi tiva leswi hi swi ehleketaka hi ‘vamakwavo’ va Kreste. (Mat. 25:40) Wa swi tiva loko hakunene hi navela leswi hi swi khongelelaka kumbe loko hi phindha-phindha marito ntsena. Yesu u te: “Loko u khongela, u nga vuli swilo leswi fanaka hi ku phindha-phindha, hilaha vanhu va matiko va endlaka hakona, hikuva [hi xihoxo] va anakanya leswaku va ta twiwa hi ku tirhisa marito yo tala.”—Mat. 6:7.
14 Leswi hi swi vulaka loko hi khongela swi tlhela swi paluxa leswaku hi titshege ku fikela kwihi hi Xikwembu. Davhida u te: “[Yehovha] u tikombise u ri vutumbelo bya mina, xihondzo lexi tiyeke emahlweni ka nala. Ndzi ta va muendzi entsongeni wa wena hilaha ku nga riki na makumu; ndzi ta tumbela evutumbelweni bya timpapa ta wena.” (Ps. 61:3, 4) Loko Xikwembu xi ‘vamba ntsonga wa xona ehenhla ka hina’ hi ndlela yo fanekisela, hi titwa hi sirhelelekile naswona hi hlayisekile. (Nhlav. 7:15) Hakunene swa chavelela ku tshinela eka Yehovha hi xikhongelo hi ri karhi hi tiyiseka leswaku ‘u le tlhelweni ra hina’ loko hi ringiwa ripfumelo!—Hlaya Pisalema 118:5-9.
15, 16. Xikhongelo xi nga hi pfuna leswaku hi xiya yini malunghana ni ku navela ka hina ko kuma vutihlamuleri lebyi engetelekeke evandlheni?
15 Ku khongela hi mbilu hinkwayo eka Yehovha malunghana ni swikongomelo swa hina swi ta hi pfuna leswaku hi xiya loko swikongomelo swa hina swi ri leswinene. Hi xikombiso, xana hi navela ku va valanguteri va vanhu va Xikwembu hileswi hi lavaka ku va pfuna hakunene ni ku endla leswi hi nga swi kotaka entirhweni wo chumayela swin’we ni le vandlheni? Kumbe hi lava ku “tiveka emahlweni” hambi ku ri ku navela ku va ni “vulawuri ehenhla” ka van’wana? A swi fanelanga swi va tano exikarhi ka vanhu va Yehovha. (Hlaya 3 Yohane 9, 10; Luka 22:24-27.) Loko hi ri ni ku navela ko biha ivi hi tiphofula eka Yehovha Xikwembu hi xikhongelo, swi ta hi pfuna leswaku hi hatla hi susa ku navela koloko ku nga si hi lawula.
16 Vavasati va Vakreste va nga ha swi navela swinene leswaku vanuna va vona va va malandza ya vutirheli kumbexana va hetelela va va valanguteri kumbe vakulu. Vamakwerhu lava va xisati va nga ha hanya hi ku pfumelelana ni leswi va swi khongelelaka, va tikarhatela ku va xikombiso lexinene. Leswi i swa nkoka hikuva mavulavulelo ni mahanyelo ya wanuna la nga ni ndyangu ma khumba ndlela leyi vandlha ri n’wi tekaka ha yona.
Loko U Averiwe Ku Khongela eVandlheni
17. Ha yini swi fanerile ku khongela endhawini leyi rhuleke loko hi ri hexe?
17 Minkarhi yo tala Yesu a a suka exikarhi ka ntshungu leswaku a ta khongela eka Tata wakwe a ri yexe. (Mat. 14:13; Luka 5:16; 6:12) Na hina hi fanele hi va ni nkarhi wo khongela hi ri hexe. Loko hi khongela endhawini leyi rhuleke, hi ta tala ku endla swiboho leswi tsakisaka Yehovha ni leswi nga ta hi pfuna leswaku hi tshama hi tiyile evugandzerini bya yena. Hambiswiritano, Yesu u khongerile ni le xikarhi ka vanhu, hikwalaho i swinene ku xiya leswaku sweswo swi nga endlisiwa ku yini hi ndlela leyi faneleke.
18. I yini leswi vamakwerhu va xinuna va faneleke va swi tsundzuka loko va averiwe ku khongela evandlheni?
18 Eminhlanganweni ya hina, vavanuna vo tshembeka va averiwa ku khongela. (1 Tim. 2:8) Vagandzeri-kulorhi va fanele va kota ku vula va ku “amen,” leswi vulaka leswaku “a swi ve tano” loko xikhongelo xi hela. Hambiswiritano, leswaku va kota ku vula swoleswo va fanele va pfumelelana ni leswi vuriweke. Eka xikhongelo xa xikombiso xa Yesu a ku na marito lama tsemaka nhlana kumbe yo tlhava. (Luka 11:2-4) Ku tlula kwalaho, a nga swi hlamuselanga hi vuenti swilo hinkwaswo leswi vanhu lava a va n’wi yingiserile a va swi pfumala kumbe swiphiqo swa vona. Munhu u fanele a khongela hi leswi n’wi karhataka loko a ri yexe hayi loko a ri emahlweni ka vandlha. Loko hi khongela emahlweni ka vandlha hi fanele hi papalata ku boxa timhaka leti nga xihundla.
19. Hi fanele hi tikhoma hi ndlela yihi loko ku khongeriwa?
19 Loko ku khongeriwa evandlheni hi fanele hi kombisa leswaku hi ‘chava Xikwembu.’ (1 Pet. 2:17) Ku nga ha va ni swiendlo swo karhi leswi nga ha endliwaka hi nkarhi wo karhi kambe swi nga fanelangiki swi endliwa eminhlanganweni ya Vukreste. (Ekl. 3:1) Hi xikombiso, a hi nge un’wana u lava leswaku vanhu hinkwavo va khomana hi mavoko loko ku khongeriwa. Leswi swi nga ha khunguvanyisa van’wana ku katsa ni vanhu lava hi endzeleke lava nga riki Timbhoni kumbe swi va karhata. Vanhu van’wana lava tekaneke va nga ha khomana hi mavoko hi ndlela leyi faneleke, kambe loko va angarhana loko ku khongeriwa, vanhu lava nga ha va vonaka va nga ha khunguvanyeka. Va nga ha anakanya leswaku vatekani volavo va dzike eka rirhandzu ra vona ematshan’weni yo komba Yehovha xichavo. Hikwalaho a hi kombiseni Xikwembu xichavo lexi enteke, hi ‘endla hinkwaswo leswaku hi vangamisa Xikwembu’ naswona hi papalata swiendlo leswi nga ha karhataka, kumbe ku khunguvanyisa van’wana.—1 Kor. 10:31, 32; 2 Kor. 6:3.
I Yini Leswi Hi Nga Swi Khongelelaka?
20. U nga yi hlamusela njhani Varhoma 8:26, 27?
20 Minkarhi yin’wana hi nga ha va hi nga swi tivi leswi hi faneleke ku swi vula loko hi khongela hi ri hexe. Pawulo u tsale a ku: “Xiphiqo xa leswi hi faneleke ku khongelela swona, hilaha hi fanelaka ku endla hakona, a hi xi tivi, kambe moya [lowo kwetsima] hi woxe wa hi kombelela hi ku konya loku nga phofuriwiki. Kambe [Xikwembu lexi] lavisisaka timbilu [xi] tiva leswi moya wu vulaka swona.” (Rhom. 8:26, 27) Yehovha u endle leswaku swikhongelo swo tala swi tsariwa eMatsalweni. U amukela swikhongelo sweswo leswi huhuteriweke onge hiloko swi vuriwe hi hina kutani a swi hetisisa. Xikwembu xa hi tiva naswona xi tiva ni nhlamuselo ya swilo leswi xi endleke leswaku moya wa xona wu swi vula hi ku tirhisa vatsari va Bibele. Yehovha u hlamula swikhongelo swa hina loko moya wu hi “kombelela.” Kambe loko hi ya hi tiva Rito ra Xikwembu, leswi hi faneleke hi swi khongelela swi ta titela kunene emianakanyweni.
21. Hi ta kambisisa yini exihlokweni lexi landzelaka?
21 Hilaha se hi swi xiyeke hakona, swikhongelo swa hina swi paluxa swo tala hi hina. Hi xikombiso, swi nga ha paluxa ndlela leyi vuxaka bya hina na Yehovha byi nga byikulu ha yona ni ndlela leyi hi ri tivaka ha yona Rito ra yena. (Yak. 4:8) Exihlokweni lexi landzelaka, hi ta kambisisa swikhongelo swin’wana leswi tsariweke eBibeleni. Xana loko hi kambisisa Matsalwa hi nga pfuneka njhani leswaku hi kota ku tshinela eka Xikwembu hi xikhongelo?
U Nga Hlamula Njhani?
• Hi fanele hi khongela njhani eka Yehovha?
• Ha yini hi fanele hi khongelela Vakreste-kulorhi?
• Swikhongelo swa hina swi nga paluxa yini hi hina ni swikongomelo swa hina?
• Hi fanele hi tikhoma njhani loko ku khongeriwa evandlheni?
[Swivutiso Swa Dyondzo]
[Xifaniso lexi nga eka tluka 4]
Xana u dzunisa Yehovha ni ku n’wi nkhensa nkarhi ni nkarhi?
[Xifaniso lexi nga eka tluka 6]
Ndlela leyi hi tikhomaka ha yona loko ku khongeriwa evandlheni minkarhi hinkwayo yi fanele yi vangamisa Yehovha