Buku Leyi Pfunaka Vantshwa Ku Tsundzuka Muvumbi Wa Vona

EMALEMBENI ya kwalomu ka 3 000 lama hundzeke, wanuna wo tlhariha Solomoni u tsarile a ku: “Tsundzuka Muvumbi wa wena loko wa ha ri muntshwa.” (Ekl. 12:1, Today’s English Version) Vantshwa lava nga Vakreste va na buku yin’wana leyi nga va pfunaka leswaku va endla tano. Buku ya kona hi leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, leyi humesiweke eMintsombanweni ya Muganga ya Timbhoni ta Yehovha, leyi a yi ri na nhloko-mhaka leyi nge “Kongomisiwa Hi Moya Wa Xikwembu,” leyi khomiweke emisaveni hinkwayo ku sukela hi May 2008 ku fika hi January 2009.

Eka tluka ro sungula ra xifunengeto xa buku leyi, ku na papila leri humaka eka Huvo leyi Fumaka leri tsaleriweke vantshwa. Xiphemu xa rona xi ri: “Hi khongelela leswaku rungula leri nga ebukwini leyi, ri ku pfuna u hlula miringo ni mintshikilelo leyi vantshwa va namuntlha va langutanaka na yona, nileswaku u endla swiboho leswi fambisanaka ni ku endla ku rhandza ka Xikwembu.”

Vatswari va fanele va kurisa vana va vona “hi ku tshinya ni nkongomiso wa mianakanyo wa Yehovha.” (Efe. 6:4) Hambiswiritano, loko vantshwa vo tala va fika emalembeni ya kondlo-a-ndzi-dyi a va titshembi naswona va lava ku kongomisiwa. Loko u ri mutswari wa n’wana la nga muntshwa, u nga n’wi pfuna njhani n’wana wa wena leswaku a vuyeriwa swinene ebukwini leyi? Hileswi swiringanyeto swin’wana leswi u nga swi tirhisaka.

▪ Tikumele kopi ya buku leyi kutani u tolovelana na yona kahle. Sweswo a swi katsi ku yi hlaya ntsena. Nakambe ringeta ku xiya ndlela leyi rungula ra kona ri hlamuseriweke ha yona ebukwini leyi. Ematshan’weni yo byela vantshwa ntsena leswi nga swinene ni leswi hoxeke, buku leyi yi letela “matimba ya vona ya ku twisisa.” (Hev. 5:14) Yi tlhela yi va nyika swiringanyeto leswi tirhaka malunghana ni ndlela leyi va nga swi yimelaka ha yona swilo leswinene. Hi xikombiso, Ndzima 15 (“Xana Ndzi Nga Wu Hlula Njhani Ntshikilelo Wa Tintangha?”) a yo byela vantshwa leswaku va ala ntsena. Yi hlamusela ndlela leyi va nga yi tirhisaka ha yona milawu ya le Bibeleni leswaku va tlhantlha swiphiqo ni ndlela leyi va nga kotaka “ku hlamula un’wana ni un’wana ha yona” eka swiyimo leswi nga ha va humelelaka evuton’wini.—Kol. 4:6.

▪ Kambisisa swiyenge leswi swi lavaka u tiphofula. Hambileswi swiyenge leswi swi endleriweke vantshwa, swi nga va njhani loko wo tsala ebukwini ya  wena laha swi faneleke? * Hi xikombiso, loko u hlaya tluka 16 eka swivutiso swimbirhi leswi lavaka u tiphofula malunghana ni timhaka ta ku rhandzana, ringeta ku tsundzuka ndlela leyi u titweke ha yona loko wa ha ringana ni n’wana wa wena. Kumbexana eka ndhawu leyi siyiweke leswaku u tsala eka yona, u nga ha tsala tinhlamulo leti a wu ta va u ti tsarile hi nkarhi wolowo. Hikwalaho u nga ha tivutisa: ‘Xana ndlela leyi ndzi titwaka ha yona hi mhaka leyi yi cince njhani emalembeni lama hundzeke? Xana ndzi dyondze yini ku sukela loko ndza ha ri muntshwa, naswona leswi ndzi swi dyondzeke ndzi nga swi hundzisela njhani eka n’wana wa mina leswaku a vuyeriwa?’

▪ Xixima nkarhi lowu n’wana wa wena la nga muntshwa a lavaka ku va yexe ha wona. Swiyenge leswi muntshwa a faneleke a tiphofula eka swona swi endleriwe ku n’wi pfuna leswaku a tiphofula eka swona hi ku tsala mhaka ya kona ehansi ebukwini ya yena kumbe a yi anakanya kunene. Pakani ya wena i ku twisisa leswi nga embilwini ya yena ku nga ri ku kambisisa leswi nga ebukwini ya yena. Eka tluka 3 ra xiyenge lexi nge “Eka Vatswari,” buku leyi yi ringanyeta leswi: “Leswaku vantshwa va nga titwi va chava ku tsala ndlela leyi va titwaka ha yona, u nga languti leswi va swi tsaleke. Hi ku famba ka nkarhi va ta bula na wena hi leswi va swi tsaleke.”

Yi Nga Tirhisiwa Eka Dyondzo Ya Ndyangu Ya Bibele

Buku leyi nge Vantshwa Va Vutisa, Vholumo 2, yi nga pfuna swinene hi nkarhi wa Dyondzo ya n’wina ya Ndyangu. Leswi buku leyi yi nga riki na tindzimana leti nga ni swivutiso, xana u nga yi tirhisa njhani? Ha yini u nga endli leswaku ndlela leyi mi dyondzaka ha yona yi va leyi nga ta vuyerisa vana va wena swinene?

Hi xikombiso, mindyangu yin’wana yi nga ha praktisa loko yi kambisisa bokisi leri nge “Ku Tilunghiselela Ku Langutana Ni Ntshikilelo Wa Tintangha” eka matluka 132 na 133. Xivutiso xo sungula kwalaho xi nga ha pfuna n’wana wa wena wa mufana kumbe wa nhwanyana leswaku a boxa xiphiqo lexi n’wi karhataka swinene. Xivutiso xa vumbirhi xi hlamusela swiyimo leswi ntshikilelo wolowo wu talaka ku humelela eka swona. Endzhaku ko kambisisa vuyelo bya ku pfumelela ntshikilelo wa tintangha kumbe ku wu ala, n’wana wa wena u komberiwa ku tilunghiselela tinhlamulo ta leswaku u ta amukela leswi swi vuriwaka, a bakanya mhaka ya kona kumbe a nga yi teki mhaka ya kona. Pfuna n’wana wa wena wa mufana kumbe wa nhwanyana leswaku a va ni vuswikoti byo hlamula naswona a lunghiselela tinhlamulo leti a nga ta titwa a ntshunxekile ku ti tirhisa ni leti a tiyisekaka ha tona.—Ps. 119:46.

Ya Pfuna eTimhakeni To Vulavurisana

Buku leyi nge Vantshwa Va Vutisa, Vholumo 2, yi khutaza vantshwa leswaku va vulavurisana ni vatswari va vona. Hi xikombiso bokisi leri nga ni nhloko-mhaka leyi nge “Xana Ndzi Nga Bula Njhani Na Tatana Kumbe Manana Hi Timhaka Ta Masangu?” (matluka 63-64) ni leri nge “Vulavula Ni Vatswari Va  Wena!” (tluka 189) ma nyikela swiringanyeto leswi tirhaka malunghana ni ndlela leyi u nga sungulaka bulo ha yona hi tinhloko-mhaka leti lavaka vuxiya-xiya. Xinhwanyatana xin’wana xa malembe ya 13 xi tsarile xi ku: “Buku leyi yi ndzi nyike xivindzi xo vulavula ni vatswari va mina malunghana ni swilo leswi ndzi swi anakanyaka—hambi swilo leswi ndzi swi endleke.”

Buku leyi yi tlhela yi khutaza ku vulavurisana ni hi tindlela tin’wana. Emakumu ka dyondzo yin’wana ni yin’wana ku ni bokisi leri nge, “U Nga Ku Yini?” Mi nga ha tirhisa bokisi leri ku pfuxeta leswi mi swi hlayeke, kambe mi nga tlhela mi bula ha rona tanihi ndyangu. Loko ndzima yin’wana ni yin’wana yi ri ekusuhi ni ku hela ku na bokisi leri nge, “Leswi Ndzi Tiyimiseleke Ku Swi Endla!” Bokisi leri ri pfuna vantshwa leswaku va tsala ndlela leyi va nga swi tirhisaka ha yona leswi va swi dyondzeke eka ndzima yoleyo. Xiyenge xo hetelela xa bokisi leri nge, “Leswi Ndzi Tiyimiseleke Ku Swi Endla!” xi ri: “Leswi ndzi lavaka ku vutisa (va-)mutswari wa mina hi mhaka leyi . . . ” Leswi swi nga pfuna vantshwa leswaku va lava xitsundzuxo lexinene eka vatswari va vona.

Fikelela Mbilu Ya N’wana Wa Wena!

Tanihi mutswari, xikongomelo xa wena i ku fikelela mbilu ya n’wana wa wena. Buku leyi nge Vantshwa Va Vutisa, Vholumo 2, yi nga ku pfuna leswaku u endla sweswo. Xiya ndlela leyi tatana un’wana a swi koteke ha yona ku tirhisa buku leyi leswaku yena ni n’wana wakwe wa nhwanyana va kota ku va ni mabulo lama sukaka embilwini.

“Mina na Rebekah hi na tindhawu leti hi rhandzaka ku ya eka tona, hi milenge, hi swikanyakanya kumbe hi movha. Ku ya etindhawini leti swi n’wi pfuna leswaku a ntshunxeka.

“Xiyenge xo sungula xa buku leyi lexi hi buleke ha xona, i papila leri humaka eka Huvo leyi Fumaka swin’we ni nhloko-mhaka leyi nge, ‘Eka Vatswari.’ A ndzi lava leswaku n’wana wa mina wa nhwanyana a swi tiva leswaku hilaha swi hlamuseriweke hakona eka tluka 3, a a fanele a titwa a ntshunxekile ku tsala ebukwini ya yena. A ndzi nga languti leswi a swi tsaleke.

“Ndzi pfumelele Rebekah leswaku a longoloxa tindzima leti a nga tsakelaka leswaku hi bula ha tona. Yin’wana ya tindzima to sungula leyi a yi hlawuleke a yi ku ‘Xana Ndzi Fanele Ndzi Tlanga Mintlangu Ya Khompyuta?’ A ndzi nga ehleketi leswaku u ta hlawula nhloko-mhaka yoleyo! Hambiswiritano, a a ri na xivangelo. Vanghana vakwe vo tala a va tlanga mintlangu leyi chavisaka swinene. A ndzi nga swi tivi leswaku tivhidiyo teto a ti ri ni madzolonga swin’we ni nhlambha. Kambe swilo leswi ndzi swi tive loko hi bula hi bokisi leri nge, “Leswi Ndzi Tiyimiseleke Ku Swi Endla!” leri nga eka tluka 251. Bokisi rero ri tlhele ri pfuna Rebekah leswaku a tiva ndlela leyi a nga hlamulaka ha yona loko un’wana a ringeta ku n’wi tshikilela leswaku a tlanga mintlangu yoleyo.

“Sweswi Rebekah se u kota ku ndzi byela leswi a swi tsaleke ebukwini ya yena. Eka dyondzo ya hina hi bula nkarhi wo leha. Ha cincana ku hlaya tindzimana, kutani endzhaku ka sweswo Rebekah u lava ku vulavula hi swilo hinkwaswo, ku katsa ni swifaniso ni mabokisi. Leswi swi ndzi nyika nkarhi wo n’wi hlamusela ndlela leyi xiyimo a xi ri ha yona loko ndza ha ringana na yena, kutani endzhaku ka sweswo u ndzi byela ndlela leyi swilo swi nga ha yona namuntlha. U lava ku ndzi byela swilo hinkwaswo!”

Loko u ri mutswari, a swi kanakanisi leswaku a wu tsakile loko ku humesiwa buku leyi. Sweswi u ni nkarhi wo yi tirhisa hi ndlela leyinene. Huvo leyi Fumaka yi tshemba leswaku buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, yi ta va nkateko endyangwini wa wena. Onge yi nga pfuna vanhu hinkwavo—ngopfu-ngopfu vantshwa va hina lava rhandzekaka—leswaku va ‘hambeta va famba hi moya lowo kwetsima.’—Gal. 5:16.

[Nhlamuselo ya le hansi]

[Bokisi leri nga eka tluka 30]

Leswi Vantshwa Van’wana Va Swi Vulaka

“Leyi i buku leyi u faneleke u tshama ehansi u yi hlaya u khome pensele naswona u anakanyisisa hi leswi u swi hlayaka. Leswi yi endleriweke ku tirhisiwa tanihi dayari ya munhu hi yexe, yi endla leswaku u kota ku anakanyisisa u ri ni pakani yo tisungulela ndlela leyinene evuton’wini.”—Nicola.

“Va tele vanhu lava va ndzi khutazaka leswaku ndzi rhandzana, hambi ku ri vanhu lava nga ni xikongomelo lexinene. Xiyenge xo sungula xa buku leyi xi ndzi khorwisile leswaku ku nga khathariseki leswi vanhu va swi vulaka, a ndzi si swi lunghekela ku rhandzana ni munhu.”—Katrina.

“Bokisi leri nge ‘Xana U Lava Ku Khuvuriwa?’ ri ndzi pfunile leswaku ndzi teka nkhuvulo wa mina wu ri wa nkoka swinene. Ri ndzi khutaze leswaku ndzi tlhela ndzi kambisisa ndlela leyi ndzi dyondzaka ha yona ni ndlela leyi ndzi khongelaka ha yona.”—Ashley.

“Hambileswi vatswari va mina lava nga Vakreste va ndzi dyondziseke ku sukela loko ndza ha ri ntsongo, buku leyi yi ndzi endle ndzi anakanyisisa hi magoza lawa ndzi faneleke ndzi ma teka evuton’wini. Yi tlhele yi ndzi pfuna leswaku ndzi vulavula hi ku ntshunxeka swinene ni vatswari va mina.”—Zamira.

[Xifaniso lexi nga eka tluka 31]

Vatswari, yi tiveni kahle buku leyi

[Xifaniso lexi nga eka tluka 32]

Tivekele pakani ya ku fikelela mbilu ya n’wana wa wena