“Mfanelo Ya N’wana Yo Endla Nhluvuko Hi Tlhelo Ra Moya”

HI December 9, 2008, Xikolo xa Timfanelo ta Vana xa le Sweden a xi ri na seminara leyi a yi hambane ni tin’wana, leyi a yi ri na nhloko-mhaka leyi nge, “Mfanelo Ya N’wana Yo Endla Nhluvuko Hi Tlhelo Ra Moya.” A ku ri na swivulavuri leswi a swi vula mavonelo ya swona yo tala leswi a swi yimela Kereke ya le Sweden, mintlawa yin’wana ya Vujagana, Mamoslem swin’we ni ntlawa wa vanhu lava tihanyelaka hi milawu ya vona.

Exikarhi ka swivulavuri swoleswo a ku ri na mufundhisi un’wana loyi a nga te: “Munhu a nge swi koti ku nyikela nhlamuselo leyi nga ntiyiso ni leyi twalaka malunghana ni ndlela leyi marungula ya le Bibeleni ma nga ya nkoka swinene ha yona eka vumoya bya vana.” Xana tindzimana ta le Matsalweni ti swi enerisa njhani swilaveko swa moya swa vana?

Mufundhisi yoloye u te: “Tindzimana ni rungula ra kona swi pfuna vana leswaku va kota ku anakanyisisa loko va ri voxe.” U vulavule hi “xitori xa Adamu na Evha, xa Kayini na Avele, xa Davhida na Goliyadi, xa ku velekiwa ka Yesu, xa muluvisi Zakiya, xifaniso xa n’wana wa vusopfa ni xa Musamariya lonene.” Ku vulavuriwe hi switori leswi tanihi “marungula man’wana lama nga tirhisiwaka ku kongomisa mianakanyo [ya n’wana] leswaku a anakanya hi timhaka ta nkoka evuton’wini, to tanihi ku kanganyisa, ku rivalela, ku kombela ku rivaleriwa, rivengo, ku tsongahatiwa, ndzivalelano ni rirhandzu ra vumakwerhu leri nga riki na vutianakanyi.” U ye emahlweni a ku: “Tindzimana leti ti nyika n’wana nkongomiso lowu a nga wu tirhisaka evuton’wini bya yena naswona loko se a kurile a nga vula leswaku wu n’wi pfunile.”

Entiyisweni, i nchumu lowunene ku khutaza vana leswaku va hlaya Bibele. Hambiswiritano, xana vana va swi kota hakunene “ku anakanyisisa loko va ri voxe” hi leswi va swi hlayeke eMatsalweni ni ku tlhela va vuyeriwa?

Hambi vanhu lavakulu va fanele va hlamuseriwa tindzimana to karhi ta le Matsalweni. Hi xikombiso, Bibele yi vulavula hi munhu un’wana loyi a a nga swi twisisi swilo swa moya leswi a a swi hlaya hambiloko a “anakanyisisa a ri yexe.” Munhu yoloye a ku ri ndhuna ya Muetiyopiya. A a hlaya vuprofeta bya Esaya kambe a a nga byi twisisi. Tanihi leswi a a lava ku twisisa rungula ra muprofeta yoloye, u yi amukerile nhlamuselo leyi mudyondzisiwa Filipi a n’wi hlamuseleke yona. (Mint. 8:26-40) Muetiyopiya yoloye a hi yena ntsena loyi a a lava ku hlamuseriwa Matsalwa. Hinkwerhu ka hina—ngopfu-ngopfu vana—ha swi lava ku hlamuseriwa tindzimana to karhi ta le Matsalweni.

Bibele ya hi tsundzuxa: “Vuphukuphuku byi tsimbiwe embilwini ya mufana.” (Swiv. 22:15) Vana va lava nkongomiso naswona vatswari va vona va ni vutihlamuleri byo va dyondzisa mahanyelo lamanene ni timhaka ta moya leti sekeriweke eBibeleni, swin’we ni leswi dyondzisiwaka evandlheni ra Vukreste. Vana va ni mfanelo yo leteriwa hi ndlela yoleyo. Ku sukela loko va ha ri vatsongo, va fanele va pfuniwa leswaku va va ni masungulo lama tiyeke lama sekeriweke eBibeleni leswaku va kota ku endla nhluvuko hi tlhelo ra moya, xisweswo va kota ku va “vanhu lava wupfeke, lava va letelaka matimba ya vona ya ku twisisa hi ku ma tirhisa leswaku va hambanisa leswi lulameke ni leswi hoxeke.”—Hev. 5:14.