Swivutiso Swa Vahlayi

Hi swihi swivangelo leswi nga ha endlaka leswaku munhu a vona onge u fanele a khuvuriwa nakambe?

Ehansi ka swiyimo swo karhi, munhu la khuvuriweke a nga ha lava ku anakanyisisa hi ntikelo wa ku khuvuriwa kakwe kutani a nga ha anakanya ku tlhela a khuvuriwa. Hi xikombiso, swi nga ha endleka leswaku loko munhu a khuvuriwa, a ka ha ri ni swilo leswi a a swi endla exihundleni, leswi loko se a a khuvuriwile a swi ta endla leswaku a susiwa eku hlanganyeleni. Xana a nga tinyiketela eka Xikwembu ehansi ka swiyimo sweswo? Munhu yoloye a a ta faneleka ku tinyiketela eka Yehovha hi ndlela leyi amukelekaka ntsena loko a a tshike ku hanya hi ndlela leyi nga pfumelelaniki ni Matsalwa. Hikwalaho, munhu la khuvuriweke a nga si tshika mikhuva yoleyo swi nga ha endleka a vona swi fanerile ku tlhela a khuvuriwa.

Ku vuriwa yini hi munhu loyi loko a nga si khuvuriwa a nga endlangiki xidyoho, kambe endzhaku ka loko a khuvuriwile a endleke xidyoho lexi laveke leswaku ku vumbiwa komiti ya vuavanyisi? A hi nge u vula leswaku a a nga swi twisisi hi ku helela leswi nkhuvulo wakwe a wu vula swona kutani a vula leswaku ku khuvuriwa kakwe a ku nga ri na ntikelo. Loko vakulu va vulavula ni munhu yoloye la dyoheke, a va fanelenga va n’wi byela leswaku nkhuvulo wa yena a wu nga ri na ntikelo kutani va n’wi vutisa leswaku xana a a ku teka ku ri ka nkoka ku tinyiketela ni ku khuvuriwa ka yena. Phela, ana se a a swi twile leswi nkulumo leyi sekeriweke eMatsalweni yi swi vuleke hi nkoka wa nkhuvulo. U pfumerile loko a hlamula swivutiso swa ku tinyiketela ni ku khuvuriwa. Kutani u endle xiboho xa ku khuvuriwa ivi hiloko a khuvuriwa. Hikwalaho, swa twala ku pfumela leswaku u wu twisise hilaha ku heleleke nkoka wa leswi a a swi endla. Xisweswo, vakulu va ta n’wi teka tanihi munhu la khuvuriweke.

Loko munhu yoloye a vula leswaku nkhuvulo wa yena a wu nga ri na ntikelo, vakulu va nga ha burisana na yena hi Xihondzo xo Rindza (xa Xinghezi) xa March 1, 1960, matluka 159 na 160, ni xa February 15, 1964, matluka 123 ku ya eka 126, laha mhaka ya ku va munhu a tlhela a khuvuriwa yi tlhuvutsiwaka hi vuenti. Ku va munhu a tlhela a khuvuriwa hikwalaho ka swiyimo swo karhi (swo tanihi ku nga vi ni vutivi lebyi eneleke hi Bibele loko a khuvuriwa) i mhaka ya munhu hi yexe.

I yini leswi Vakreste va faneleke va anakanya ha swona loko swi ta emhakeni yo tshama ni van’wana endlwini yin’we?

Hinkwerhu ha yi lava ndhawu yo tshama eka yona. Hambiswiritano, vanhu vo tala namuntlha a va na ndhawu ya vona vini yo tshama eka yona. Swiyimo swa munhu swa timali, swiphiqo swa rihanyo kumbe swivangelo swin’wana, swi nga ha endla leswaku maxaka ma tshama swin’we. Etindhawini tin’wana, maxaka ma nga ha tshama ma tele ekamareni rin’we lerova ma nga ha koti ku tiendlela swilo ma ri woxe.

A hi vutihlamuleri bya nhlengeletano ya Yehovha ku nyika mavandlha ya le misaveni hinkwayo milawu ya malunghana ni ndhawu leyi va faneleke va tshama eka yona. Vakreste va khutaziwa ku anakanyisisa hi milawu ya le Matsalweni leswaku va ta tiyiseka loko ndhawu leyi va tshamaka eka yona yi amukeleka eka Xikwembu. Hi yihi yin’wana ya milawu yoleyo?

Nchumu wo sungula lowu hi faneleke hi anakanya ha wona i ndlela leyi ku tshama ni vanhu van’wana swi nga hi khumbaka ha yona hina vini swin’we ni vumoya bya hina. Xana i vanhu  va muxaka muni? Xana i vagandzeri va Yehovha? Xana va hanya hi ku pfumelelana ni milawu ya le Bibeleni? Muapostola Pawulo u tsale a ku: “Mi nga xisiwi. Vunakulobye byo biha byi onha mikhuva leyi pfunaka.”—1 Kor. 15:33.

Matsalwa ma hlamusela leswaku Yehovha a nga byi amukeli vumbhisa ni vuoswi. (Hev. 13:4) Hikwalaho, swi le rivaleni leswaku lunghiselelo rin’wana ni rin’wana leri endlaka leswaku vanhu vambirhi va rimbewu leri hambaneke lava nga tekanangiki va tshama swin’we onge hiloko va ri nuna na nsati, a ri amukeleki eka Xikwembu. Mukreste a nge swi lavi ku tshama endlwini leyi ku pfumeleriwaka vumbisa.

Ku engetela kwalaho, Bibele yi khutaza hinkwavo lava lavaka ku amukeriwa hi Xikwembu leswaku va ‘balekela vumbhisa.’ (1 Kor. 6:18) Hikwalaho, ku ta va ku ri vutlhari leswaku Vakreste va papalata ndlela yin’wana ni yin’wana yo tshamisana leyi nga ta endla leswaku va ringeka ivi va tikhoma hi ndlela yo biha. Hi xikombiso, anakanya hi xiyimo laha Vakreste vo hlayanyana va etlelaka endlwini yin’we. Xana ku tshama endlwini yoleyo swi nga ku ringa hikwalaho ka swiyimo leswi nga languteriwangiki? Ku vuriwa yini loko vanhu vambirhi lava nga tekanangiki va tikuma va ri swin’we hikwalaho ka leswi van’wana lava tshamaka na vona va nga riki kona kwalaho hi nkarhi wolowo? Hilaha ku fanaka, swi nga va ni khombo loko vanhu vambirhi lava nga tekanangiki lava rhandzanaka, va tshama endlwini yin’we. I vutlhari ku papalata swiyimo swo fana ni leswi.

Nakambe vanhu lava dlayeke vukati a va fanelanga va ya emahlweni va tshama endlwini yin’we. Tanihi leswi a va tekanile naswona a va tshama swin’we, sweswo swi nga ha endla leswaku va tikhoma hi ndlela yo biha.—Swiv. 22:3.

Nchumu wun’wana wa nkoka lowu faneleke wu tsundzukiwa, i ndlela leyi vanhu va le ndhawini yoleyo va ma langutaka ha yona malunghiselelo wolawo yo tshama endlwini yin’we. Malunghiselelo wolawo lawa Mukreste a nga ma vonaka ma ri manene kambe ma tlakusaka swivutiso eka vanhu van’wana, i swinene leswaku ku anakanyisisiwa ha wona. A hi lavi leswaku ndlela leyi hi tikhomaka ha yona yi tisa xisandzu evitweni ra Yehovha. Pawulo u ri: “Kendlukelani ku va xikhunguvanyiso eka Vayuda ni le ka Magriki ni le ka vandlha ra Xikwembu, tanihi leswi mina ndzi tsakisaka vanhu hinkwavo eka swilo hinkwaswo, ndzi nga lavi leswaku ku pfuneka mina, kambe ku pfuneka vo tala, leswaku va ponisiwa.”—1 Kor. 10:32, 33.

Eka lava lavaka ku hanya hi milawu ya Yehovha leyinene, swi nga ha tika ku kuma ndhawu leyi fanelekaka yo tshama eka yona. Hambiswiritano, Vakreste va fanele va ‘hambeta va tiyiseka hi leswi amukelekaka eHosini.’ Va fanele va tiyiseka leswaku emindyangwini ya vona a ku endleki nchumu lowu nga basangiki. (Efe. 5:5, 10) Leswi swi lava leswaku Vakreste va khongelela nkongomiso wa Xikwembu naswona va endla hinkwaswo leswi nga le matimbeni ya vona leswaku va sirhelelana hi tlhelo ra nyama, emahanyelweni va tlhela va sirhelela ni vito lerinene ra Yehovha.