Tshama U Tiyile Hi Tlhelo Ra Moya Loko U Ri Karhi U Khathalela Xaka Leri Vabyaka

ENDZHAKU ka loko ku kumiwe tshumba ekusuhi ni longo ra Mbhoni yin’wana leyi vuriwaka Kim, ku vuriwe leswaku u ni vuvabyi bya khensa. * Steve nuna wa yena, u ri: “Endzhaku ka loko tshumba rolero ri susiwile, Kim u endliwe X-rheyi a tlhela a tshunguriwa hi ku tirhisa tikhemikhali. Vutshunguri byebyo byi endle leswaku a heleriwa hi matimba emirini. A a nga ha swi koti ngopfu ku famba-famba.”

Anakanya gome leri Steve a veke na rona loko a vona murhandziwa wa yena a xanisiwa hi vuvabyi lebyi lebyi hetaka matimba! Kumbexana u ni xaka leri nga ni vuvabyi lebyi yaka byi nyanya hakatsongo-tsongo kumbe leri dyuhaleke. (Ekl. 12:1-7) Loko swi ri tano, wa swi tiva leswaku loko u ta kota ku khathalela munhu loyi u n’wi rhandzaka hi ndlela leyinene u fanele u tikhathalela. Loko u sungula ku vabya hi tlhelo ra moya, ndlela leyi u titwaka ha yona swin’we ni rihanyo ra wena na swona swi nga khumbeka naswona u nga ha tsandzeka ku ri khathalela kahle xaka ra wena. U nga swi kota njhani ku tshama u tiyile hi tlhelo ra moya loko u ri karhi u khathalela xaka leri vabyaka kumbe leri dyuhaleke? Xana swi kona leswi Vakreste van’wana evandlheni va nga swi endlaka leswaku va pfuna vanhu volavo lava vabyaka?

U Nga Ringanisela Njhani?

Leswaku u kota ku tshama u tiyile hi tlhelo ra moya ni ku va ni rihanyo lerinene loko u ri karhi u khathalela xaka leri vabyaka, u fanele u titwananisa ni swiyimo u tirhisa nkarhi ni matimba ya wena hi ndlela ya vutlhari. Swivuriso 11:2 yi ri: “Vutlhari byi ni lava va titsongahataka.” Eka mongo lowu, rito “titsongahataka” ri vula ku xiya leswaku ku ni swilo leswi munhu a nga kotiki ku swi endla. U nga ha boheka ku hlela swiyimo swa wena ni vutihlamuleri bya wena leswaku u ta tiyiseka leswaku a wu endli swilo leswi swi nga ehenhla ka matimba ya wena.

Steve u kombise vutlhari ni ku titsongahata hi ku tlhela a kambisisa mintirho ya yena. A a tirha ntirho wo tihanyisa, a a ri muhlanganisi wa huvo  ya vakulu a tlhela a va mulanguteri wa ntirho evandlheni ra Timbhoni ta Yehovha leri a hlanganyelaka eka rona le Ireland. Nakambe a a ri xirho xa Komiti yo Vulavurisana ni Swibedlhele laha a tshamaka kona. Steve u ri: “Kim a nga si tshama a vilela a vula leswaku a ndzi na mhaka na yena ndzi na mhaka ngopfu ni vutihlamuleri bya mina. Kambe a ndzi swi vona leswaku a ndzi tikarhatela ku endla swilo swo tala ku tlula mpimo.” Xana Steve u xi lulamise njhani xiyimo lexi? U ri: “Endzhaku ka loko ndzi anakanyisise swinene hi mhaka leyi, ndzi endle xiboho xa ku tshika ku va muhlanganisi wa huvo ya vakulu. Ndzi ye emahlweni ndzi ri nkulu, kambe leswi ndzi nyikeke van’wana vutihlamuleri bya mina bya le vandlheni, ndzi swi kotile ku heta nkarhi wo tala ndzi khathalela Kim.”

Hi ku famba ka nkarhi, rihanyo ra Kim ri ye ri antswa. Steve na Kim va tlhele va kambisisa xiyimo xa vona, naswona Steve u swi kotile ku tlhela a endla swiavelo swa yena evandlheni hikwalaho ko seketeriwa hi nsati wa yena. Steve u ri: “Havumbirhi bya hina hi dyondze ku endla swilo hi ku pfumelelana ni swiyimo swa hina. Ndzi wu nkhensa swinene mpfuno wa Yehovha, ndzi nkhensa ni nsati wa mina hikuva hambileswi a nga riki na rihanyo lerinene, a nga tshameli ku vilela.”

Nakambe anakanya hi ntokoto wa Jerry, mulanguteri la famba-fambaka, swin’we ni nsati wa yena, Maria. Va boheke ku cinca tipakani ta vona  leswaku va ta khathalela vatswari va vona lava dyuhaleke. Maria u ri: “Mina ni nuna wa mina a hi ri ni pakani ya ku va varhumiwa etikweni rimbe. Kambe Jerry o va n’wana a ri yexe naswona vatswari vakwe a va lava ku khathaleriwa. Hikwalaho, hi hlawule ku tshama eIreland leswaku hi ta va khathalela. Hi ku endla tano, a hi swi kota ku tshama hi ri kona exibedlhele loko tata wa Jerry a nga si fa. Sweswi siku rin’wana ni rin’wana hi tshama hi ri karhi hi vulavurisana na mana wa Jerry, naswona loko a lava mpfuno hi le kusuhi na yena. Vandlha leri mana wa Jerry a hlanganyelaka eka rona ri n’wi pfuna swinene ri tlhela ri n’wi seketela, leswi endlaka leswaku hi kota ku ya emahlweni ni ntirho wa hina wo endzela mavandlha.”

Ndlela Leyi Van’wana Va Nga Pfunaka Ha Yona

Loko a vulavula hi malunghiselelo lawa ma faneleke ma endliwa leswaku ku ta pfuniwa tinoni leti dyuhaleke evandlheni, muapostola Pawulo u tsarile a ku: “Loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.” Pawulo u tsundzuxe Vakreste-kulobye leswaku loko va lava ku “amukeleka emahlweni ka Xikwembu,” va fanele va khathalela vatswari va vona ni vakokwa wa vona lava dyuhaleke, hi tlhelo ra timali. (1 Tim. 5:4, 8) Hambiswiritano, van’wana evandlheni va nga ha pfuneta naswona va fanele va endla tano.

Xiya mhaka ya Hakan na Inger, ku nga vatekani lava dyuhaleke lava tshamaka eSweden. Hakan u ri: “Loko ku kumiwe leswaku nsati wa mina u na vuvabyi bya khensa, havambirhi ka hina swi hi tseme nhlana. Nkarhi lowu hinkwawo Inger a a hanye kahle. Sweswi a hi fanele hi ya exibedlhele siku ni siku leswaku a ta tshunguriwa naswona vutshunguri bya yena a byi n’wi tsanisa emirini. Inger a a tshama a ri ekaya hi nkarhi wolowo naswona a ndzi fanele ndzi tshama ndzi ri na yena leswaku ndzi n’wi khathalela.” Xana vandlha leri Hakan na Inger va hlanganyelaka eka rona ri va pfune njhani?

Vakulu evandlheni va endle lunghiselelo ra leswaku mpatswa lowu wu kota ku yingisela minhlangano ya Vukreste hi ku tirhisa riqingho. Ku engetela kwalaho, vamakwerhu a va va endzela va tlhela va va bela riqingho. A va tlhela va va rhumelela mapapila ni makhadi. Hakan u ri: “A hi swi vona leswaku vamakwerhu hinkwavo va hi seketela ni leswaku Yehovha wa hi pfuna. Mpfuno wa vona a wu endla leswaku hi tshama hi tiyile hi tlhelo ra moya. Lexi tsakisaka hileswaku Inger u hlakarherile naswona se ha swi kota nakambe ku ya eminhlanganweni ya Vukreste eHolweni ya Mfumo.” Loko swirho swa vandlha swi endla leswi swi nga swi kotaka leswaku swi pfuna lava vabyaka swin’we ni vadyuhari, swi tikombisa swi ri ‘vanakulobye va ntiyiso lava nga ni rirhandzu nkarhi hinkwawo, ni vamakwavo lava velekiweke loko ku ri ni maxangu.’—Swiv. 17:17.

Yehovha Wa Ma Tlangela Matshalatshala Ya Wena

I ntiyiso leswaku ku khathalela xaka leri vabyaka swi nga karharisa. Kambe Hosi Davhida u tsarile a ku: “Wa tsaka un’wana ni un’wana la ehleketelaka xisiwana,” munhu la lavaka mpfuno hikwalaho ka leswi a vabyaka.—Ps. 41:1.

Ha yini lava khathalelaka lava vabyaka kumbe lava xanisekaka va nga tsakaka? Swivuriso 19:17 yi ri: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.” Xikwembu xa ntiyiso xa khathala hi malandza ya xona yo tshembeka lama karhatiwaka hi vuvabyi naswona xi katekisa lava ma khathalelaka. Mupisalema Davhida u yimbelerile a ku: “Yehovha u ta n’wi seketela [munhu yoloye] ehenhla ka mubedo wa vuvabyi; kunene sangu ra yena u ta ri cinca hi nkarhi wa ku vabya.” (Ps. 41:3) Hi nga tiyiseka leswaku loko munhu loyi a khathalelaka munhu la vabyaka hi rirhandzu o langutana ni maxangu kumbe o weriwa hi khombo ro karhi, Yehovha u ta n’wi pfuna.

Swa tsakisa hakunene ku tiva leswaku Yehovha Xikwembu wa swi vona leswi hi swi endlaka leswaku hi khathalela xaka leri vabyaka naswona wa swi tlangela! Hambileswi loko hi pfuna xaka leri vabyaka swi nga ha lavaka hi endla matshalatshala, Matsalwa ma hi tiyisekisa leswaku “Xikwembu xi tsakisiwa swinene hi switlhavelo swo tano.”—Hev. 13:16.

[Nhlamuselo ya le hansi]

[Swifaniso leswi nga eka tluka 18]

Tshama u tiyile hi tlhelo ra moya u tlhela u amukela mpfuno wa van’wana