Ku Hlanganisiwa Hi Rirhandzu Xiviko Xa Nhlangano Wa Lembe Ni Lembe

VANHU a va tsake swinene eHolweni ya Tinhlengeletano ya Timbhoni ta Yehovha le Dorobeni ra Jersey, eNew Jersey, le U.S.A. Hi October 3, 2009 nimixo, vanhu vo tlula 5 000 a va hlengeletanile eka nhlangano wa lembe ni lembe wa vu-125 wa Watch Tower Bible and Tract Society of Pennsylvania. Vanhu lavan’wana va magidi va yingisele nongonoko lowu va tlhela va wu hlalela eka thelevhixini va ri emiakweni yinharhu ya Bethele eUnited States ni le Bethele ya le Canada. Vanhu vo ringana 13 235 lava a va hlanganile hikwalaho ka leswi va rhandzaka Yehovha, va wu tsakele swinene nhlangano wolowo wa tiawara tinharhu.

Geoffrey Jackson xirho xa Huvo leyi Fumaka a a ri mutshama-xitulu. U sungule nongonoko hi ku vitana khwayere ya lava tshamaka eBethele lava va yimbeleleke tinsimu leti humaka eka buku ya hina ya tinsimu leyintshwa. Loyi a a yimbelerisa khwayere yoleyo a ku ri David Splane, loyi na yena a nga xirho xa Huvo leyi Fumaka, loyi hi ku komisa a hlamuseleke ndlela leyi vuyimbeleri byi nga bya nkoka ha yona evugandzerini lebyi tengeke. Vayingiseri na vona va rhambiwe leswaku va yimbelela tinsimu tinharhu letintshwa; ku sungule ku yimbelela khwayere ivi endzhaku ka sweswo vayingiseri va yimbelela swin’we na khwayere. Lunghiselelo ra khwayere a ku ri ra nhlangano lowu wo hlawuleka; a ku fanelanga ku endliwa tano emavandlheni, etinhlengeletanweni ta xifundzha kumbe emintsombanweni leyi nga ta landzela.

Swiviko Leswi Humaka eMarhavini Man’wana

Swirho swa Komiti ya Rhavi leswi a swi endzile swi nyikele swiviko leswi humaka emarhavini ya ntlhanu. Kenneth Little u vule leswaku ku nga ri khale rhavi ra le Canada ri ta sungula ku kandziyisa timagazini to tala ri ti kandziyisela tiko ra United States ni ra Canada, kutani sweswo a swi ta endla ntirho wa rhavi rolero wu engeteleka hilaha ku phindhiweke ka khume. Leswaku va hetisisa ntirho wolowo, muchini wo gandlisa lowu va ha ku wu kumaka wu ta tirha tiawara ta 16 hi siku, laha ku nga ta va ku tirha mintlawa yimbirhi leyi nga ta tirha tiawara ta nhungu hi siku.

Reiner Thompson u nyikele xiviko hi ntirho wa Mfumo eDominican Republic kasi Albert Olih u hlamusele hi ta ntirho wa hina eNigeria. Emile Kritzinger wa le Mozambhiki u hlamusele leswaku Timbhoni ta Yehovha ti tsarisiwe ximfumo hi 1992 endzhaku ka malembe yo tala ti ri karhi ti xanisiwa. Vahuweleri va le matikweni lawa manharhu va ha ku andza hi ndlela leyikulu. Viv Mouritz la humaka erhavini ra le Australia, u vulavule hi nhluvuko wa ntirho le East Timor, ku nga xihlala lexi khathaleriwaka hi vamakwerhu va le Australia.

Tikomiti Ta Huvo Leyi Fumaka

Hi 1976 mintirho hinkwayo ya Timbhoni ta Yehovha yi sungule ku languteriwa hi tikomiti ta tsevu ta Huvo leyi Fumaka. Hi ku famba ka nkarhi, ku hlawuriwe swirho swa ntlawa wa tinyimpfu tin’wana leswaku swi ta pfuneta. Sweswi vanhu va 23 va pfuneta eka ntirho lowu endliwaka. Ku vulavurisaniwe ni vanhu va tsevu lava pfunetaka. Hinkwavo va ni malembe ya 341 va ri entirhweni wa nkarhi hinkwawo—un’wana ni un’wana u ni xiringaniso xa malembe ya 57.

Don Adams loyi a fikeke eBethele hi 1943 u hlamusele leswaku Komiti ya Vahlanganisi yi vumbiwa hi vahlanganisi va ntlhanu va tikomiti letin’wana, leyi tiyisekaka leswaku swilo swi famba kahle eka tikomiti letin’wana ta ntlhanu. Komiti leyi yi teka goza leri faneleke eka swilo swo tanihi swiyimo swa xihatla, ku xanisiwa, milandzu ya le hubyeni, timhangu ni timhaka tin’wana ta xihatla leti khumbaka Timbhoni ta Yehovha emisaveni hinkwayo.

Dan Molchan u hlamusele ntirho lowu endliwaka hi Komiti yo Khathalela Vatirhi, leyi khathalaka hi vuhlayiseki bya moya ni bya nyama bya vatirhi va le Bethele lava endlaka 19 851 emisaveni hinkwayo.  David Sinclair u vulavule hi ndlela leyi Komiti ya Vukandziyisi yi ku langutelaka ha yona ku xaviwa ka swilo ni switirho swa le marhavini man’wana. Endzhaku ka sweswo, Robert Wallen, loyi a tirheke eBethele ku ringana malembe ya kwalomu ka 60, u hlamusele ndlela leyi Komiti ya Ntirho yi wu langutelaka ha yona ntirho wa vanhu va Yehovha ensin’wini ni le mavandlheni. William Malenfant u katsakanye ndlela leyi Komiti yo Dyondzisa yi tirhaka ha yona hi matimba ku lunghiselela nongonoko wa ntsombano. Eku heteleleni, John Wischuk u hlamusele ndlela leyi Komiti ya Vatsari yi ku langutelaka hi vurhon’wana ha yona ku lunghiseleriwa ni ku humesiwa ka minkandziyiso ya hina. *

Ndzimana Ya Lembe Ya 2010 Yi Vulavula Hi Rirhandzu

Tinkulumo tinharhu leti landzeleke ti nyikeriwe hi swirho swa Huvo leyi Fumaka. Gerrit Lösch u sungule hi xivutiso lexi nge, “Xana wa swi lava ku rhandziwa hi vanhu van’wana?” U vule leswaku vanhu hinkwavo va swi lava ku rhandziwa naswona hinkwerhu swilo swi hi fambela kahle hikwalaho ka rona. Hi ve kona hikwalaho ka rirhandzu hikuva Yehovha u hi tumbuluxe hikwalaho ka rirhandzu leri nga riki na vutianakanyi. Nchumu lowukulu lowu hi susumetelaka ku chumayela ni ku dyondzisa hi leswi hi rhandzaka Yehovha.

Rirhandzu ra hina a hi ri kombisi ntsena eka varikwerhu kambe ni le ka valala va hina. (Mat. 5:43-45) Vayingiseri va khutaziwe leswaku va anakanyisisa hi swilo leswi Yesu a endliweke swona, u biwile, a vungunyiwa, a tshwuteriwa a tlhela a tlhaviwa. Hambiswiritano, u khongelele masocha lama n’wi beleleke. Xana leswi a swi hi endli leswaku hi n’wi rhandza swinene? Endzhaku ka sweswo Makwerhu Lösch u tivise ndzimana ya lembe ya 2010: 1 Vakorinto 13:7, 8, ‘Rirhandzu ri tiyisela swilo hinkwaswo, naswona a ri heli.’ Hi ni ntshembo wo hanya hilaha ku nga heriki ni wo rhandza van’wana hi tlhela hi rhandziwa hilaha ku nga heriki.

Xana U Famba Hi Mafurha Matsongo Ngopfu?

Samuel Herd u sungule nkulumo ya yena hi xifaniso. A hi nge munghana wa wena u ku khandziyisa movha wa yena leswaku mi ta famba mpfhuka lowu endlaka 50 wa tikhilomitara. Loko u tshame exitulwini xa vakhandziyi wa swi xiya leswaku nchumu lowu kombisaka mafurha lama nga sala emovheni wu kombisa leswaku ku sele mafurha matsongo ngopfu. U byela munghana wa wena leswaku mafurha ya movha ma ta hela ku nga ri khale. U ku byela leswaku u nga vileli; ku sele mune wa tilitara ta mafurha. Kambe swi nga si ya kwihi, mi heleriwa hi mafurha. Xana swa pfuna ku ‘famba hi mafurha matsongo ngopfu’ u ri karhi u swi tiva leswaku u ta heleriwa hi mafurha endleleni? Swa antswa swinene ku famba hi thangi leri nga ni mafurha yo tala! Hi ndlela yo fanekisela, hi fanele hi tshama hi ri ni thangi leri teleke mafurha, tanihi leswi mafurha wolawo ku nga vutivi bya hina hi Yehovha.

Leswaku thangi ra hina ri tshama ri tele hi fanele hi kuma mafurha lama ringaneke naswona hi endla sweswo nkarhi na nkarhi. Sweswo hi nga swi endla hi tindlela ta mune. Yo sungula, dyondzo ya munhu  hi yexe, ku tolovelana ni Bibele hi ku yi hlaya siku ni siku. A hi fanelanga hi hlaya marito ntsena, hi fanele hi twisisa leswi hi swi hlayaka. Ya vumbirhi, ku yi tirhisa hi ndlela leyinene Dyondzo ya Ndyangu ya nimadyambu. Xana vhiki na vhiki ha ri tatisa thangi ra hina kumbe hi chela mafurha matsongo? Ya vunharhu, ku va kona eminhlanganweni yo hambana-hambana ya vandlha. Ya vumune, ku anakanyisisa hi tindlela ta Yehovha u nga kavanyetiwi hi nchumu. Pisalema 143:5 yi ri: “Ndzi tsundzuke masiku ya khale swinene; ndzi anakanyisise hi ntirho wa wena hinkwawo.”

“Lava Va Lulameke Va Ta Voninga”

John Barr u nyikele nkulumo ya vunharhu leyi a yi ri yo hetelela, laha a hlamuseleke xifaniso xa Yesu xa koroni ni mfava. (Mat. 13:24-30, 38, 43) Xifaniso xolexo xi vulavula hi “ntshovelo” laha “vana va mfumo” va hlengeletiwaka ivi mfava wu hlengeletiwa leswaku wu ta hisiwa.

Makwerhu Barr u swi veke erivaleni leswaku ntirho wo hlengeleta a wu nge yi emahlweni hilaha ku nga heriki. U vulavule hi Matewu 24:34, leyi nge: “Xitukulwana lexi xi nga ka xi nga hundzi ku nga si humelela swilo leswi hinkwaswo.” U hlaye xivulwa lexi kambirhi: “Yesu entiyisweni a a vula ntsena vatotiwa lava voneke ku sungula ka masiku yo hetelela hi 1914 swin’we ni vatotiwa lava a va ta vona ku sungula ka nhlomulo lowukulu.” A hi nge swi koti ku wu pima hi ku kongoma nkarhi lowu “xitukulwana lexi” xi wu hanyaka, kambe wu katsa mintlawa leyimbirhi ya vanhu lava hanyaka enkarhini wo karhi. Hambileswi vatotiwa va nga ni malembe yo hambana-hambana, vanhu lava nga le ka mintlawa leyimbirhi lava vumbaka xitukulwana lexi va hanya nkarhi wun’we eka xiyenge xo karhi xa masiku ya makumu. Swa chavelela ku tiva leswaku vatotiwa lava nga dyuhalangiki ngopfu lava hanyeke nkarhi wun’we ni vatotiwa lava dyuhaleke ngopfu lava voneke xikombiso loko xi sungula ku vonaka ku sukela hi 1914, va nge fi hinkwavo ku nga si sungula nhlomulo lowukulu!

“Vana va mfumo” va yi langutele hi mahlo-ngati hakelo ya vona ya le tilweni, kambe hinkwerhu ka hina hi fanele hi tshama hi tshembekile, hi voninga ngopfu ku fikela emakumu. Mawaku lunghelo leri hi nga na rona ra ku vona ku hlengeletiwa ka “koroni” enkarhini wa hina.

Endzhaku ka risimu ro gimeta, Theodore Jaracz la nga xirho xa Huvo leyi Fumaka u pfale hi xikhongelo. Nhlangano wa lembe ni lembe wu ve nongonoko lowu akaka hakunene!

[Nhlamuselo ya le hansi]

[Bokisi leri nga eka tluka 5]

XIKOLO XA VAKULU

Eka nhlangano wa lembe ni lembe, Anthony Morris, xirho xa Huvo leyi Fumaka, u tivise leswaku vakulu va le mavandlheni va ta ya emahlweni va leteriwa. Xikolo xa vakulu eUnited States xi sungule ku va kona eku sunguleni ka 2008 entsindza wa dyondzo le Patterson, eNew York. Ntlawa wa vu-72 wa ha ku heta naswona se ku leteriwe vakulu va 6 720. Wa ha tele ntirho lowu faneleke wu endliwa. Le United States ntsena, ku ni vakulu vo tlula 86 000. Hikwalaho, Huvo leyi Fumaka yi pfumerile leswaku ku khomiwa xikolo xin’wana le Brooklyn, eNew York, eku sunguleni ka December 7, 2009.

Ku ringana tin’hweti timbirhi, valanguteri va miganga ni va swifundzha a va fanele va leteriwa leswaku va va valeteri le Patterson. Valanguteri lava a va yisiwa eBrooklyn leswaku va ya dyondzisa kona, ivi endzhaku ka sweswo ku leteriwa van’wana va mune. Endzhaku ka sweswo a va ya dyondzisa exikolweni eBrooklyn, naswona lavaya vo sungula va mune a va ya dyondzisa exikolweni eTiholweni ta Tinhlengeletano ni le Tiholweni ta Mfumo. Endlelo rero a ri phindhiwa kukondza ku va ni valeteri va 12 lava dyondzisaka eswikolweni swa tsevu vhiki na vhiki hi Xinghezi le United States. Endzhaku ka sweswo a ku leteriwa valeteri va mune leswaku va ya dyondzisa hi Xipaniya. Xikolo lexi a xi nge sivi Xikolo xa Vutirheli bya Mfumo lexi nga kona sweswi; xikongomelo xa xona i ku pfuna vakulu leswaku va ya emahlweni va endla nhluvuko entiyisweni. Marhavi emisaveni hinkwayo ma ta sungula ku khoma swikolo leswi eTiholweni ta Tinhlengeletano ni le Tiholweni ta Mfumo hi lembe ra ntirho ra 2011.

[Swifaniso leswi nga eka tluka 4]

Nhlangano wa lembe ni lembe wu sunguriwe hi ku yimbelela tinsimu leti nga eka buku ya hina ya tinsimu leyintshwa leyi nge “Yimbelelelani Yehovha”