Murhangeri Wa Hina Loyi A Nga Le Ku Tirheni Ninamuntlha
Murhangeri Wa Hina Loyi A Nga Le Ku Tirheni Ninamuntlha
“A huma a ri karhi a hlula, ni ku hetisa ku hlula ka yena.”—NHLAV. 6:2.
1, 2. (a) Ntirho lowu Kreste a wu endleke loko a ri hosi ku sukela hi 1914 wu hlamuseriwa njhani eBibeleni? (b) Hi swihi swilo leswi Kreste a swi endleke ku sukela loko a vekiwe exiluvelweni?
KRESTE u vekiwe ku va Hosi eMfun’weni wa Yehovha hi 1914. Xana loko hi n’wi anakanya hi mahlo ya mianakanyo hi n’wi teka a ri munhu wa njhani? Xana hi n’wi teka a ri hosi leyi anakanyisisaka leyi tshameke exiluvelweni xa yona, leyi tshamelaka ku languta laha misaveni ku vona leswaku swilo swi famba njhani evandlheni ra yona? Loko hi n’wi teka hi ndlela yoleyo, hi fanele hi cinca langutelo ra hina. Eka Tipisalema ni le bukwini ya Nhlavutelo u hlamuseriwa tanihi hosi leyi nga ni matimba leyi gadeke hanci yi ri karhi yi “hlula ni ku hetisisa ku hlula ka [yona],” yi ya emahlweni yi “humelela” hilaha ku heleleke.—Nhlav. 6:2; Ps. 2:6-9; 45:1-4.
2 Nchumu wo sungula lowu Kreste a wu endleke endzhaku ka ku vekiwa ka yena exiluvelweni tanihi hosi, a ku ri ku hlula ‘dragona ni tintsumi ta yona.’ Leswi Mikayele a nga ntsumi leyikulu leyi rhangelaka tintsumi ta yena, Kreste u hlongole Sathana ni madimona yakwe ematilweni yo kwetsima a va lahlela emisaveni. (Nhlav. 12:7-9) Hikwalaho, Yesu u te ni Tata wakwe leswaku va ta kambela tempele ya moya, a tirha tanihi “murhumiwa wa ntwanano” wa Yehovha. (Mal. 3:1) U avanyise Vujagana, ku nga xiphemu lexi nyenyetsaka ngopfu xa “Babilona Lonkulu,” a byi kuma byi ri ni nandzu wo halata ngati ni wo endla vuoswi hi tlhelo ra moya ni mafambiselo ya tipolitiki ta misava leyi.—Nhlav. 18:2, 3, 24.
Kreste A Basisa Hlonga Ra Yena Ra Laha Misaveni
3, 4. (a) Hi wihi ntirho lowu Kreste a wu endleke tanihi “murhumiwa” wa Yehovha? (b) Loko ku ri karhi ku kambisiwa tempele ku kumeke yini, naswona tanihi leswi Yesu a nga Nhloko ya vandlha u fike a veka mani?
3 Loko Yehovha ni “murhumiwa” wakwe va ri karhi va endla ntirho wo kambela, va kume leswaku exivaveni xa laha misaveni xa tempele yoleyo ya moya a ku ri ni ntlawa wa Vakreste va ntiyiso, lava a va nga ri swirho swa tikereke ta Vujagana. Hambiswiritano, Vakreste lava lava totiweke kumbe “vana va Levhi,” a va fanele va basisiwa. Swi ve hilaha muprofeta Malakiya a profeteke hakona a ku: “[Yehovha] u fanele a tshama a ri la tengisaka ni mubasisi wa silivhere naswona u fanele a va tengisa ku fana ni vana va Levhi; a va tengisa ku fana ni nsuku ni silivhere, kunene eka Yehovha va ta va vanhu lava va endlaka gandzelo ra nyiko hi ku lulama.” (Mal. 3:3) Yehovha u tirhise “murhumiwa [wa yena] wa ntwanano” ku nga Kreste Yesu, leswaku a basisa Vaisrayele lava va moya.
4 Nilokoswiritano, Kreste u kume Vakreste volavo vo tshembeka lava totiweke va ri karhi va tikarhatela ku phamela vagandzeri va Xikwembu swakudya swa moya hi nkarhi lowu faneleke. Ku sukela hi 1879 ku ya emahlweni, va kandziyise ntiyiso wa le Bibeleni malunghana ni Mfumo wa Xikwembu eka magazini lowu, loko swilo swi famba kahle ni loko swi nga fambi kahle. Yesu a a profetile leswaku loko “a fika” ku ta kambela va yindlu yakwe hi nkarhi wa “makumu ya mafambiselo ya swilo,” a a ta kuma hlonga ri ri karhi ri va nyika ‘swakudya hi nkarhi lowu faneleke.’ Hlonga rero a a ta ri vula leri tsakeke naswona a a ta “ri veka ehenhla ka hinkwaswo leswi nga swa yena” emisaveni. (Mat. 24:3, 45-47) Leswi a nga Nhloko ya vandlha ra Vukreste, Kreste u tirhise “hlonga [leri] ro tshembeka ni ro tlhariha” leswaku ri kongomisa timhaka ta Yena ta Mfumo ta laha misaveni. U tirhise Huvo leyi Fumaka ku nyikela nkongomiso eka “va yindlu yakwe” lava totiweke ni vanghana va vona va “tinyimpfu tin’wana.”—Yoh. 10:16.
Ntirho Wo Tshovela Misava
5. Exivon’weni muapostola Yohane u vone Hosi leyi nga Mesiya yi endla yini?
5 Muapostola Yohane u vone xivono xa swilo leswi Hosi leyi nga Mesiya yi nga ta swi endla “esikwini ra Hosi,” endzhaku ka loko A vekiwe exiluvelweni hi 1914. Yohane u tsale a ku: “Ndzi languta, kutani waswivo, a ku ri ni papa ro basa, naswona ehenhla ka papa ku tshame un’wana la fanaka ni n’wana wa munhu, a ri ni harhi ya nsuku enhlokweni ya yena naswona a tamele rihwevo ro kariha evokweni ra yena.” (Nhlav. 1:10; 14:14) Yohane u twe ntsumi ya Yehovha yi byela Mutshoveri loyi leswaku a nghenisa rihwevo rakwe hikuva “ntshovelo wa misava wu wupfe hi ku helela.”—Nhlav. 14:15, 16.
6. Hi swihi swilo leswi Yesu a vuleke leswaku swi ta endleka hi ku famba ka nkarhi?
6 “Ntshovelo [lowu] wa misava” wu hi tsundzuxa xifaniso xa Yesu xa koroni ni mfava. Yesu u ti fanise ni munhu loyi a byaleke koroni ensin’wini ya yena, hi xikongomelo xo tshovela koroni yo tala leyinene, leyi fanekiselaka “vana va mfumo,” ku nga Vakreste va ntiyiso lava totiweke lava nga ta fuma na yena eMfun’weni wakwe. Kambe nivusiku, nala, ku nga “Diyavulosi” u fike a haxa mfava ensin’wini, ku nga “vana va lowo homboloka.” Mubyari u byele vatirhi vakwe leswaku va tshika koroni ni mfava swi kula swin’we ku fikela hi nkarhi wa ntshovelo, ku nga “makumu ya mafambiselo ya swilo.” Hi nkarhi wolowo, a a ta rhuma tintsumi takwe leswaku ti hlawula koroni eka mfava.—Mat. 13:24-30, 36-41.
7. Kreste u wu hetisisa njhani ntirho wo ‘tshovela misava’?
7 Yesu u kongomisa ntirho wo tshovela emisaveni hinkwayo leswaku a ta hetisisa xivono lexi voniweke hi Yohane. “Ntshovelo wa misava” wu sungule hi ku hlengeletiwa ka masalela ya “vana va mfumo” va 144 000, ku nga “koroni” ya le xifanisweni xa Yesu. Ku hambana exikarhi ka Vakreste va ntiyiso ni va mavunwa, ku sungule ku vonaka ngopfu endzhaku ka Nyimpi yo Sungula ya Misava, lerova ku hoxe xandla eka xiphemu xa vumbirhi xa “ntshovelo wa misava,” ku nga ku hlengeletiwa ka tinyimpfu tin’wana. Lava a hi “vana va mfumo” kambe i “ntshungu lowukulu” wa vanhu lava tiyimiseleke ku fumiwa hi Mfumo wolowo. Va tshoveriwa va huma eka “vanhu [hinkwavo] va matiko ni tindzimi hinkwato.” Va titsongahatela Mfumo wa Mesiya lowu vumbiwaka hi Kreste Yesu ni “vakwetsimi” va 144 000 lava nga ta fuma na yena emfun’weni wolowo wa le tilweni.—Nhlav. 7:9, 10; Dan. 7:13, 14, 18.
Valanguteri Va Mavandlha
8, 9. (a) I yini leswi kombisaka leswaku Kreste u tiva leswi endlekaka evandlheni hinkwaro swin’we ni mahanyelo ya munhu ha un’we evandlheni? (b) Hilaha swi kombisiweke hakona eka tluka 26, hi swihi “swilo leswi enteke swa Sathana” leswi hi faneleke hi swi papalata?
8 Exihlokweni lexi hundzeke, hi vone ndlela leyi Kreste a a xi tiva ha yona xiyimo xa vandlha rin’wana ni rin’wana ra lembe-xidzana ro sungula C.E. Enkarhini wa hina, leswi Kreste Murhangeri wa hina a nga Hosi leyi fumaka leyi nyikiweke “vulawuri hinkwabyo etilweni ni le misaveni,” u rhangela mavandlha emisaveni hinkwayo ni valanguteri va wona. (Mat. 28:18; Kol. 1:18) Yehovha u “n’wi [endle] nhloko ya swilo hinkwaswo evandlheni” ra vatotiwa. (Efe. 1:22) Hikwalaho, u vona swilo hinkwaswo leswi humelelaka emavandlheni hinkwawo ya Timbhoni ta Yehovha lama tlulaka 100 000.
9 Yesu u rhumele rungula leri eka vandlha ra khale ra le Tiyatira a ku: “N’wana wa Xikwembu, loyi mahlo yakwe ma fanaka ni langavi leri pfurhaka, . . . u ri, ‘Ndzi tiva swiendlo swa wena.’” (Nhlav. 2:18, 19) U tshinye swirho swa vandlha rero hikwalaho ka mahanyelo ya swona yo biha ni hikwalaho ko rhandza ku titsakisa ku tlula mpimo, a ku: “Hi mina loyi a lavisisaka tinso ni timbilu, naswona ndzi ta mi nyika ha un’we-un’we hi ku ya hi swiendlo swa n’wina.” (Nhlav. 2:23) Marito wolawo ma kombisa leswaku Kreste u tiva leswi endlekaka evandlheni rin’wana ni rin’wana swin’we ni mahanyelo ya xirho xin’wana ni xin’wana xa vandlha. Yesu u bumabumele Vakreste va le Tiyatira “lava nga swi tivangiki ‘swilo leswi enteke swa Sathana.’” (Nhlav. 2:24) Ninamuntlha, u tsakela vanhu lavatsongo kumbe lavakulu lava papalataka ku lavisisa “swilo leswi enteke swa Sathana” hi ku tirhisa Internet kumbe mintlangu ya vhidiyo leyi nga ni madzolonga kumbe hi ku amukela mianakanyo ya vanhu ya ku tilawula. Hakunene wa tsaka loko a vona Vakreste vo tala namuntlha va endla matshalatshala va tlhela va titsona swo karhi leswaku va endla hinkwaswo leswi va nga swi kotaka leswaku va landzela nkongomiso wa yena evuton’wini bya vona.
10. Nkongomiso wa Kreste wa vakulu va vandlha wu fanekiseriwa hi yini, kambe i yini leswi va faneleke va swi xiya?
10 Kreste u langutela mavandlha yakwe laha misaveni hi rirhandzu hi ku tirhisa vakulu lava vekiweke. (Efe. 4:8, 11, 12) Hi lembe-xidzana ro sungula, valanguteri hinkwavo a va tswariwe hi moya. Ebukwini ya Nhlavutelo, va hlamuseriwe tanihi tinyeleti leti nga le vokweni ra xinene ra Kreste. (Nhlav. 1:16, 20) Namuntlha vakulu vo tala emavandlheni i va ntlawa wa tinyimpfu tin’wana. Va hlawuriwa endzhaku ko khongela naswona ehansi ka nkongomiso wa moya lowo kwetsima, hikwalaho na vona va nga tekiwa va ri ehansi ka nkongomiso wa Kreste, kumbe ehansi ka voko rakwe leri kongomisaka. (Mint. 20:28) Hambiswiritano, va swi xiya leswaku Kreste u tirhisa ntlawa lowutsongo wa vavanuna va Vakreste lava totiweke lava nga Huvo leyi Fumaka leswaku a rhangela ni ku kongomisa vadyondzisiwa vakwe laha misaveni.—Hlaya Mintirho 15:6, 28-30.
“Tana, Hosi Yesu”
11. Ha yini hi swi langutele hi mahlo-ngati ku vona Murhangeri wa hina a ta hi ku hatlisa?
11 Eka nhlavutelo leyi nyikiweke muapostola Yohane, Yesu u vule ko hlayanyana leswaku wa ta hi ku hatlisa. (Nhlav. 2:16; 3:11; 22:7, 20) A swi kanakanisi leswaku a a vulavula hi ku ta ka yena a ta lovisa Babilona Lonkulu ni mafambiselo hinkwawo yo biha ya swilo ya Sathana. (2 Tes. 1:7, 8) Leswi muapostola Yohane la dyuhaleke a a swi langutele hi mahlo-ngati ku vona ku hetiseka ka swilo hinkwaswo swo hlamarisa leswi ku profetiweke ha swona, u te: “Amen! Tana, Hosi Yesu.” Na hina lava hi hanyaka enkarhini wa makumu ya mafambiselo lawa yo biha ya swilo, hi swi langutele hi mahlo-ngati ku vona Murhangeri wa hina tlhelo Hosi ya hina yi ta yi ri ematimbeni ya Mfumo leswaku yi ta kwetsimisa vito ra Tata wa yona ni ku lwela vuhosi bya Yena.
12. Hi wihi ntirho lowu Kreste a nga ta wu hetisa loko timheho ta ndzoviso ti nga si ntshunxiwa?
12 Loko Yesu a nga si ta a ta herisa nhlengeletano leyi vonakaka ya Sathana, swirho swo hetelela swa 144 000 swa Israyele wa moya swi ta funghiwa ro hetelela. Bibele yi swi veka erivaleni leswaku timheho ta ku lovisa mafambiselo ya Sathana a ti nge ntshunxiwi loko ku funghiwa loku ka lava 144 000 ku nga si hela.—Nhlav. 7:1-4.
13. Kreste u ta endla leswaku vukona byakwe byi vonaka njhani hi nkarhi wa xiyenge xo sungula xa “nhlomulo lowukulu”?
13 Vaaki vo tala va laha misaveni a va byi xiyanga “vukona” bya Kreste lebyi sunguleke hi 1914. (2 Pet. 3:3, 4) Hambiswiritano, ku nga ri khale u ta kombisa vukona byakwe hi ku hetisisa vuavanyisi bya Yehovha eka swiyenge swo hambana-hambana swa mafambiselo ya swilo ya Sathana. Ku lovisiwa ka “munhu wo kala nawu,” ku nga vafundhisi va Vujagana ku ta va ku ri ‘vukona byakwe lebyi humeseriwaka erivaleni.’ (Hlaya 2 Vatesalonika 2:3, 8.) Ku ta nyikela vumbhoni lebyi tiyeke bya leswaku Kreste i Muavanyisi la vekiweke hi Yehovha. (Hlaya 2 Timotiya 4:1.) Ku lovisiwa ka Vujagana, lebyi nga xiphemu lexi nyenyetsaka swinene xa Babilona Lonkulu, ku ta rhangela ku loviseriwa makumu ka mfumo wolowo wo homboloka wa misava wa vukhongeri bya mavunwa. Yehovha u ta susumetela varhangeri va tipolitiki leswaku va lovisa nghwavava leyi ya moya. (Nhlav. 17:15-18) Xolexo ku ta va ku ri xiyenge xo sungula xa “nhlomulo lowukulu.”—Mat. 24:21.
14. (a) Ha yini masiku ya xiyenge xo sungula xa nhlomulo lowukulu ma ta hungutiwa? (b) “Xikombiso xa N’wana wa munhu” xi ta vula yini eka vanhu va Yehovha?
14 Yesu u vule leswaku masiku ya nhlomulo wolowo ma ta hungutiwa “hikwalaho ka vahlawuriwa,” ku nga masalela ya Vakreste lava totiweke lava nga ta va va ha ri laha misaveni. (Mat. 24:22) Yehovha a nge pfumeli leswaku ku lovisiwa loku ka vukhongeri bya mavunwa ku lovisa ni Vakreste lava totiweke swin’we ni vanghana va vona va tinyimpfu tin’wana. Yesu u ye emahlweni a vula leswaku “endzhaku ka nhlomulo wa masiku wolawo,” ku ta va ni swikombiso edyambyini, en’wetini ni le ka tinyeleti, “endzhaku ka sweswo xikombiso xa N’wana wa munhu xi ta humelela etilweni.” Leswi swi ta endla leswaku matiko ya misava ma “tiba hi xirilo.” Leswi a swi nge humeleli eka vatotiwa lava nga ni ntshembo wo ya hanya etilweni ni vanghana va vona lava nga ni ntshembo wo hanya laha misaveni. Va ta ‘yima va ololoka va tlakusa tinhloko ta vona, hikuva ku kutsuriwa ka vona ka tshinela.’—Mat. 24:29, 30; Luka 21:25-28.
15. Hi wihi ntirho lowu Kreste a nga ta wu endla loko a ta?
15 Loko N’wana wa munhu a nga si heta ku hlula ka yena, u ta tlhela a ta hi ndlela yin’wana. U profete a ku: “Loko N’wana wa munhu a fika hi ku vangama kakwe, tintsumi hinkwato ti ri na yena, u ta tshama exiluvelweni xakwe xo vangama. Naswona matiko hinkwawo ma ta hlengeletiwa emahlweni kakwe, kutani u ta hambanisa vanhu van’wana eka van’wana, ku fana ni loko murisi a hambanisa tinyimpfu eka timbuti. Naswona u ta veka tinyimpfu evokweni rakwe ra xinene, kambe timbuti eka lera ximatsi.” (Mat. 25:31-33) Leswi swi vula ku ta ka Kreste tanihi Muavanyisi a ta hambanisa vanhu va “matiko hinkwawo” hi swiyenge swimbirhi: “tinyimpfu,” ku nga lava nga ta va va va seketele hi ku hiseka vamakwavo va yena va moya (Vakreste lava totiweke lava nga ta va va ha ri emisaveni) ni “timbuti,” ku nga “lava va nga ma yingisiki mahungu lamanene malunghana ni Hosi ya hina Yesu.” (2 Tes. 1:7, 8) Tinyimpfu leti hlamuseriweke tanihi “lavo lulama,” ti ta kuma “[vutomi] lebyi nga heriki” laha misaveni, kambe timbuti ti “ta loviseriwa makumu.”—Mat. 25:34, 40, 41, 45, 46.
Yesu A Hetisa Ku Hlula Ka Yena
16. Kreste Murhangeri wa hina u ta ku hetisa njhani ku hlula kakwe?
16 Loko tihosi tlhelo vaprista lava nga ta fuma na yena va ta va se va funghiwe hinkwavo naswona tinyimpfu ti ta va se ti vekiwe evokweni ra yena ra xinene leswaku ti ta ponisiwa, Kreste a nga ya emahlweni a “hetisa ku hlula ka yena.” (Nhlav. 5:9, 10; 6:2) Leswi a nga ta va a rhangele vuthu ra tintsumi leti nga ni matimba swinene, leti handle ko kanakana ku nga ta va ku ri vamakwavo va yena lava pfuxiweke, u ta herisa mafambiselo hinkwawo ya Sathana ya tipolitiki, ya tinyimpi ni ya swa mabindzu emisaveni. (Nhlav. 2:26, 27; 19:11-21) Ku hlula ka Kreste ku ta va ku herile loko a lovisa mafambiselo yo homboloka ya Sathana. Kutani u ta pfalela Sathana ni madimona yakwe ekheleni ro enta ku ringana malembe ya gidi.—Nhlav. 20:1-3.
17. Kreste u ta ti kongomisa kwihi tinyimpfu tin’wana ta yena hi nkarhi wa Mfumo wakwe wa Gidi ra Malembe, naswona hi fanele hi tiyimisela ku endla yini?
17 Loko muapostola Yohane a vulavula hi “ntshungu lowukulu” wa tinyimpfu tin’wana, lowu nga ta pona nhlomulo lowukulu, u profete leswaku “Xinyimpfana, lexi nga exikarhi ka xiluvelo, xi ta va risa, xi va kongomisa eminseledyaneni ya mati ya vutomi.” (Nhlav. 7:9, 17) Ina, hi nkarhi wa Mfumo wakwe wa Gidi ra Malembe, Kreste u ta hambeta a rhangela lava tinyimpfu tin’wana, lava va yingisaka rito rakwe hakunene kutani a va kongomisa evuton’wini lebyi nga heriki. (Hlaya Yohane 10:16, 26-28.) Onge hi nga tiyimisela ku n’wi landzela hi ku tshembeka Murhangeri wa hina la nga hosi—sweswi ni ku ya fika emisaveni leyintshwa leyi tshembisiweke hi Yehovha!
Mpfuxeto
• I yini leswi Kreste a swi endleke endzhaku ko vekiwa exiluvelweni?
• I vamani lava Kreste a va tirhisaka laha misaveni leswaku va langutela mavandlha?
• Kreste Murhangeri wa hina wa ha ta ta hi tindlela tihi?
• Kreste u ta hambeta a hi kongomisa emisaveni leyintshwa hi ndlela yihi?
[Swivutiso Swa Dyondzo]
[Xifaniso lexi nga eka tluka 29]
Ku lovisiwa ka mafambiselo yo biha ya Sathana ku ta endla leswaku vukona bya Kreste byi vonaka