Tsima Ro Hlawuleka Ra Le Bulgaria Ri Ve Ni Vuyelo Lebyinene

“Ntshovelo i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.”—MAT. 9:37, 38.

MAYANA ndlela leyi marito lawa ya Yesu ma fambisanaka ha yona ni xiyimo xa le Bulgaria, tiko ro saseka ra le Balkan leri nga edzonga-vuxa bya Yuropa! Ku ni xilaveko lexikulu xa vatirhi vo tala lava nga ta chumayela mahungu lamanene eka vaaka-tiko vo tlula nkombo wa timiliyoni. Ku ni vahuweleri va kwalomu ka 1 700 eBulgaria, kambe a va swi koti ku hlanganisa nsimu yoleyo hinkwayo. Hikwalaho, Huvo leyi Fumaka yi pfumerile leswaku ku rhambiwa Timbhoni leti vulavulaka Xibulgaria, leti humaka ematikweni yo hlayanyana ya le Yuropa leswaku ti ta hlanganyela eka tsima ro hlawuleka hi 2009. Tsima leri a ku hleriwe leswaku ri heta mavhiki ya nkombo hi ximumu, lawa a ma ta hela hi vhiki ra Ntsombano wa Muganga wa le Sofia lowu a wu ri ni nhloko-mhaka leyi nge, “Tshamani Mi Rindzile!” lowu khomiweke hi August 14-16, 2009.

Vamakwerhu Va Ta Hi Vunyingi

Vamakwerhu va le rhavini ra le Sofia a va tivutisa leswaku ku ta fika vamakwerhu vangani lava sukaka eFurwa, eGreece, eItaly, eJarimani, ePoland ni le Spain. Sweswo a swi ta vula leswaku a va fanele va tihakelela ku ya eBulgaria va tlhela va tirhisa masiku ya vona yo wisa leswaku va chumayela. A swi tsakisa swinene ku vona nhlayo ya vamakwerhu lava a va endla swikombelo yi ya yi engeteleka vhiki na vhiki ku kondza yi fika eka 292! Leswi va teke va tele, a swi ta koteka ku rhumela vatirhi lava vo tirhandzela emadorobeni manharhu ya le Bulgaria: eKazanlak, eSandanski ni le Silistra. Valanguteri va swifundzha va le Bulgaria va rhambe maphayona ni vahuweleri va le tikweni rero leswaku na vona va seketela tsima rero. Eku heteleleni, vatirhi vo tirhandzela lava ringanaka 382 a va chumayela hi ku hiseka ensin’wini leyi mahungu lamanene a ma nga chumayeriwi nkarhi na nkarhi eka yona.

Ku rhumiwe vamakwerhu va le mavandlheni ya le kusuhi ka ha ri emahlweni leswaku va lunghiselela tindhawu to tshama eka tona. Va hirhe tifuleti va tlhela va buka ni le tihotela leti nga durhiki. Vamakwerhu volavo va kwalaho va tirhe hi matimba leswaku va pfuna vamakwerhu lava a va fiketela va va yisa laha va nga ta tshama kona ni ku khathalela swilaveko swa vona. Ku hirhiwe tindhawu to hlanganyela eka tona emadorobeni lawa hamanharhu. Ku endliwe malunghiselelo ya leswaku minhlangano ya vandlha yi fambisiwa hi vamakwerhu lava endzeke. A swi tsakisa ku vona vahuweleri vo ringana 50 va hlangana leswaku va dzunisa Yehovha etindhawini leti a ku nga ri na Mbhoni leyi tshamaka kona.

Ndlela leyi vamakwerhu lava humaka ematikweni man’wana a va ri hisekela ha yona tsima rero a yi tsakisa swinene. Hi ximumu, eBulgaria ku nga hisa ku tlula 40 wa tidigrisi Celsius. Hambiswiritano, a ku ri hava nchumu lowu a wu ta tshikisa vamakwerhu lava lava hisekaka, ku chumayela. Ku nga si hela mavhiki manharhu yo sungula se a ku chumayeriwe hi rixaladza edorobeni ra Silistra leri nga eNambyeni wa Danube naswona ri nga ni vaaki vo tlula 50 000. Hikwalaho, vamakwerhu va ye va ya chumayela ni le swimitanini swa le kusuhi, va tlhela va chumayela eTutrakan, ku nga tikhilomitara ta 55 evupela-dyambu bya Silistra. Hi ntolovelo a va sungula nsimu hi 9:30 nimixo. Endzhaku ko dya swakudya swa ninhlikanhi, hakanyingi a va tirha ku kondza ku ba awara ya nkombo nimadyambu kumbe ku tlula. Hilaha ku fanaka, hikwalaho ko hiseka ka vatirhi lava  vo tirhandzela, tsima ra le Kazanlak ni le Sandanski ri fike ni le swimitanini swa le kusuhi swin’we ni le madorobeni.

Hi Byihi Vuyelo Lebyi Veke Kona?

Ku nyikeriwe vumbhoni lebyikulu hi mavhiki lawa ya nkombo. Hilaha swi vuriweke hakona emasikwini ya vaapostola, vaaki va le madorobeni wolawo a va ta vula va ku, ‘Mi tate doroba ra hina hi dyondzo ya n’wina.’ (Mint. 5:28) Timbhoni leti hlanganyeleke eka tsima leri ti fambise kwalomu ka 50 000 wa timagazini naswona ti sungule tidyondzo ta Bibele ta 482. Lexi tsakisaka ku sukela hi September 1, 2009, ku simekiwe vandlha eSilistra naswona ku ni mintlawa eKazanlak ni le Sandanski. Swa khutaza ku vona vanhu lava tweke mahungu lamanene ro sungula hi nkarhi wa tsima leri va endla nhluvuko hi tlhelo ra moya.

Hi vhiki ro sungula ra tsima, makwerhu un’wana wa xisati la humaka eSpain la vulavulaka Xibulgaria naswona a nga phayona ro hlawuleka u chumayele Karina, wansati wa le Silistra loyi a a xavisa maphepha-hungu exitarateni. Karina u tsakele rungula rero kutani a ta eminhlanganweni. U nambe a pfumela ku dyondzeriwa Bibele. U kombele leswaku va khoma dyondzo ya vona ya Bibele ephakini tanihi leswi nuna wa yena a nga pfumeriki leswaku Xikwembu xi kona. A a dyondza Bibele a ri ni vana vakwe vambirhi va vanhwanyana. Lonkulu ku nga Daniela, u wu tlangele swinene ntiyiso wa le Bibeleni. U hlaye buku leyi nge, Leswi Bibele Yi Swi Dyondzisaka hi vhiki, kutani hi ku hatlisa a tirhisa leswi Bibele yi swi vulaka malunghana ni ku nga tirhisi swifaniso evugandzerini. Endzhaku ka sweswo u sungule ku byela vanghana vakwe ntiyiso lowu a wu dyondzeke. Endzhaku ka mavhiki manharhu a sungule ku ya eminhlanganweni ya vandlha, u byele makwerhu wa xisati loyi a a n’wi fambisela dyondzo a ku: “Ndzi titwa onge ndzi un’wana wa n’wina. Ndzi fanele ndzi endla yini leswaku na mina ndzi sungula ku chumayela?” Daniela u ya emahlweni a endla nhluvuko lowunene swin’we ni mana wakwe ni ndzisana yakwe.

Le Kazanlak, makwerhu wa Mubulgaria la vuriwaka Orlin, loyi a a te eka tsima leri a huma eItaly, a a tlhelela laha a tshamaka kona a huma ensin’wini. Loko a ri endleleni u chumayele majaha mambirhi lawa a ma tshame ebenceni ra le phakini. U ma fambisele buku leyi nge Leswi Bibele Yi Swi Dyondzisaka ivi a hlela ku tlhelela eka wona hi siku leri landzelaka. Eka riendzo rakwe ro vuyela, Orlin u sungule dyondzo ya Bibele na Svetomir, leyi yeke emahlweni hi siku leri landzeleke. Hi masiku ya kaye, Orlin se a a dyondze na Svetomir minkarhi ya nhungu. Svetomir u te: “Masiku mambirhi ndzi nga si hlangana na wena, ndzi khongele eka Xikwembu leswaku xi ndzi pfuna ndzi xi tiva. Naswona ndzi xi tshembise leswaku loko xo ndzi pfuna, ndzi ta nyiketela vutomi bya mina eka xona.” Endzhaku ka loko Orlin a tlhelele eItaly, vamakwerhu va kwalaho va sale va dyondza na Svetomir naswona u rhandza ntiyiso.

 Mikateko Leyikulu Leyi Kumiwaka Hi Lava Titsonaka Swo Karhi

Xana vanhu lava tirhisaka masiku ya vona yo wisa ni timali ta vona leswaku va ya chumayela mahungu lamanene etikweni rin’wana va titwa njhani? Nkulu wa le Spain u tsale a ku: “Tsima leri ri endle leswaku vamakwerhu lava tirhaka nsimu ya vanhu lava vulavulaka Xibulgaria le Spain va rhandzana ngopfu. Vamakwerhu lava hlanganyeleke eka rona va vuyeriwile swinene.” Mpatswa wun’wana wa le Italy wu tsale wu ku: “Leyi a ku ri n’hweti yo hlawuleka swinene evuton’wini bya hina!” Va tlhele va ku: “Tsima leri ri cince vutomi bya hina! Sweswi a ha ha fani ni le ku sunguleni.” Mpatswa lowu wu sungule ku anakanyisisa swinene hi ku rhurha wu ya tshama eBulgaria leswaku wu tirha laha ku nga ni xilaveko lexikulu. Carina i makwerhu wa xisati la nga tekiwangiki, la nga phayona ra nkarhi hinkwawo la humaka eSpain, loyi a seketeleke tsima ra le Silistra. Endzhaku ka sweswo u tshike ntirho eSpain kutani a rhurhela eBulgaria leswaku a ta seketela vandlha lerintshwa edorobeni rero. U tivekele mali leyi eneleke leswaku a ta tshama eBulgaria ku ringana lembe. Carina u vula leswi malunghana ni xiboho xakwe: “Ndzi tsake ngopfu leswi Yehovha a ndzi pfumeleleke leswaku ndzi ta tirha laha Bulgaria naswona ndzi tshemba leswaku ndzi ta tshama laha nkarhi wo leha. Se ndzi dyondza Bibele ni vanhu va ntlhanu naswona vanharhu va ta eminhlanganweni.”

Makwerhu un’wana wa xisati wa le Italy a a lava ku hlanganyela eka tsima rero, kambe leswi a ha ku kuma ntirho, a a ri hava masiku yo wisa. Handle ko chava, u kombele ku ya eku wiseni ku ringana n’hweti a nga holeriwi naswona a a tiyimiserile ku tshika ntirho wakwe loko xikombelo xakwe xi nga amukeriwi. Lexi n’wi hlamariseke, muthori wakwe u te: “Hi swona, kambe ndzi ta ku pfumelela loko wo endla leswi: U fanele u ndzi rhumela poskarata yo huma eBulgaria.” Makwerhu yoloye u swi vonile leswaku Yehovha u hlamule swikhongelo swakwe.

Makwerhu un’wana wa xisati la ha riki muntshwa la vuriwaka Stanislava wa le dorobeni ra Varna le Bulgaria loyi a a tirha ntirho lowu holelaka kahle, u teke masiku yo wisa leswaku a ta hlanganyela eka tsima ra le Silistra. Loko a vona ntsako wa maphayona yo tala lama teke ma huma etindhawini ta le kule leswaku ma ta chumayela mahungu lamanene etikweni ra ka vona, u ririle. U sungule ku ehleketa hi leswi a a swi endla hi vutomi byakwe, ku nga ku rhandza ntirho wo tihanyisa ku tlula mpimo. Loko a tlhelele ekaya endzhaku ka mavhiki mambirhi, u tshike ntirho kutani a va phayona ra nkarhi hinkwawo. Sweswi u titwa a tsakile swinene hi leswi a tsundzukaka Mutumbuluxi wakwe a ha ri muntshwa.—Ekl. 12:1.

Hakunene i nkateko ku hiseka entirhweni wa Yehovha. A wu kona nchumu wa nkoka lowu u nga wu endlaka ku tlula ku nyikela hi nkarhi wa wena ni matimba ya wena eka ntirho wa nkoka wo dyondzisa ni wo chumayela mahungu lamanene. Xana swi kona leswi u nga swi endlaka leswaku u tirha hilaha ku engetelekeke entirhweni lowu wo ponisa vutomi? Swi nga ha endleka etikweni leri u tshamaka eka rona ku ri ni tindhawu leti ku nga ni xilaveko lexikulu. Xana u nga rhurhela endhawini yoleyo? Kumbe u nga ha anakanya hi ku dyondza ririmi rin’wana leswaku u pfuna vanhu va le tikweni ra ka n’wina lava nga ni torha ra ntiyiso wa Bibele. Ku nga khathariseki leswaku i yini leswi u nga swi endlaka leswaku u tirha hilaha ku engetelekeke ensin’wini, u nga tiyiseka leswaku Yehovha u ta ku katekisa swinene.—Swiv. 10:22.

[Bokisi/Xifaniso lexi nga eka tluka 32]

Siku Leri Nga Rivalekiki

Vo tala lava teke va huma ematikweni ya le Yuropa leswaku va ta seketela tsima ro hlawuleka ra le Bulgaria va hlele ku va kona eNtsombanweni wa Muganga wa le Sofia lowu a wu ri ni nhloko-mhaka leyi nge “Tshamani Mi Rindzile!” Vamakwerhu va kwalaho va khutazekile swinene loko va hlangana ni vaendzi vo tala lava humaka ematikweni yo hambana-hambana. Vanhu va 2 039 lava a va ri kona a va tsake swinene loko Makwerhu Geoffrey Jackson la nga xirho xa Huvo leyi Fumaka a humesa Vuhundzuluxeri Bya Misava Leyintshwa Bya Matsalwa Yo Kwetsima lebyi heleleke hi Xibulgaria! Hinkwavo lava a va ri kona hi Ravuntlhanu va tlangele swi suka embilwini hi ku phokotela mavoko nkarhi wo leha. Vo tala va rile mihloti ya ntsako. Vuhundzuluxeri lebyi lebyi olovaka ku byi twisisa byi ta pfuna vanhu va timbilu letinene va le Bulgaria leswaku va tiva Yehovha.

[Mepe lowu nga eka tluka 30, 31]

(Leswaku u vona rungula leri hleriweke hi ku helela, vona nkandziyiso wa kona)

BULGARIA

Silistra

Kazanlak

Sandanski

SOFIA

[Swifaniso leswi nga eka tluka 31]

Ku nyikeriwe vumbhoni lebyikulu hi mavhiki lawa ya nkombo