Vagandzeri Va Ntiyiso Va Vonaka Hi Ku Va Ni Vun’we
Vagandzeri Va Ntiyiso Va Vonaka Hi Ku Va Ni Vun’we
“Ndzi ta va veka hi vun’we, kukota ntlhambi etshangeni.”—MIK. 2:12.
1. Ntumbuluko wu byi kombisa njhani vutlhari bya Xikwembu?
MUPISALEMA u te: “Mintirho ya wena yi tele swinene, Wena Yehovha! Hinkwayo ka yona u yi endle hi vutlhari. Misava yi tele rifuwo ra wena.” (Ps. 104:24) Vutlhari bya Xikwembu byi vonaka eka ndlela leyi swimilana swa timiliyoni, switsotswana, swiharhi ni tibaktheriya swi tirhisanaka ha yona emisaveni leyi nga ni swivumbiwa leswi hlamarisaka leswi rharhanganeke. Nakambe, swirho swa miri wa wena leswikulu ni swiyenge leswitsongo swa tisele ta wena swa tirhisana leswaku u va munhu la heleleke la nga ni rihanyo lerinene.
2. Hilaha swi kombisiweke hakona eka tluka 13, ha yini vun’we lebyi a byi ri kona exikarhi ka Vakreste byi tikombe byi endleke hi singita?
2 Yehovha u vumbe vanhu leswaku va titshega hi vanhu van’wana. Vanhu va ni swivumbeko, vumunhu ni vuswikoti byo hambana-hambana. Ku tlula kwalaho, u vumbe vanhu vo sungula va ri ni timfanelo to fana ni ta yena leti a ti ta endla leswaku va kota ku tirhisana ni ku titshega hi vanhu van’wana. (Gen. 1:27; 2:18) Nilokoswiritano, vanhu hi ku angarhela va fularhele Xikwembu naswona a va si tshama va kota ku endla swilo hi vun’we. (1 Yoh. 5:19) Hikwalaho, leswi vandlha ra Vukreste ra lembe-xidzana ro sungula a ri vumbiwa hi vanhu vo hambana-hambana vo kota mahlonga ya Vaefesa, vavasati va Magriki lava dumeke, vavanuna va Vayuda lava dyondzekeke ni vanhu lava khale a va gandzela swifaniso, vun’we lebyi a va ri na byona byi fanele byi tikombe byi endleke hi singita.—Mint. 13:1; 17:4; 1 Tes. 1:9; 1 Tim. 6:1.
3. Bibele yi byi hlamusela njhani vun’we bya Vakreste, naswona hi ta kambisisa yini exihlokweni lexi?
3 Vugandzeri bya ntiyiso byi endla leswaku vanhu va kota ku tirhisana hi vun’we ku fana ni swirho swa miri wa hina. (Hlaya 1 Vakorinto 12:12, 13.) Swivutiso swin’wana leswi hi nga ta swi kambisisa exihlokweni lexi hi leswi nge: Vugandzeri bya ntiyiso byi va hlanganisa njhani vanhu? Ha yini ku ri Yehovha ntsena loyi a nga endlaka leswaku vanhu va timiliyoni lava humaka eka matiko hinkwawo va va ni vun’we? Hi swihi swihinga leswi sivelaka ku va ni vun’we leswi Yehovha a hi pfunaka ku swi hlula? Naswona loko swi ta emhakeni yo va ni vun’we, xana Vukreste bya ntiyiso byi hambana njhani ni Vujagana?
Vugandzeri Bya Ntiyiso Byi Va Hlanganisa Njhani Vanhu?
4. Vugandzeri bya ntiyiso byi va hlanganisa njhani vanhu?
4 Vagandzeri va ntiyiso va swi twisisa leswaku leswi Yehovha a vumbeke swilo hinkwaswo, u ni mfanelo yo va Hosi leyi Lawulaka evuakweni hinkwabyo. (Nhlav. 4:11) Hikwalaho, hambileswi Vakreste va ntiyiso va hanyaka ni vanhu vo tala eka swiyimo swo hambana-hambana, hinkwavo va yingisa milawu leyi fanaka ya Xikwembu va tlhela va hanya hi milawu leyi fanaka ya le Bibeleni. Swi fanerile leswi vagandzeri va ntiyiso hinkwavo va tekaka Yehovha tanihi “Tata” wa vona. (Esa. 64:8; Mat. 6:9) Hikwalaho, hinkwavo i vamakwavo va moya naswona va nga tiphina hi vun’we lebyi hlamarisaka lebyi hlamuseriweke hi mupisalema loko a ku: “Waswivo! Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!”—Ps. 133:1.
5. Hi yihi mfanelo leyi endlaka leswaku vagandzeri va ntiyiso va va ni vun’we?
5 Hambileswi Vakreste va ntiyiso va nga hetisekangiki, va gandzela swin’we hi vun’we hikuva va dyondze ku rhandzana. Yehovha hi yena ntsena loyi a va dyondzisaka ku rhandzana. (Hlaya 1 Yohane 4:7, 8.) Rito rakwe ri ri: “Tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha. Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo. Kambe, handle ka swilo leswi hinkwaswo, ambalani rirhandzu, hikuva i xiboho lexi hetisekeke xa vun’we.” (Kol. 3:12-14) Xiboho lexi hetisekeke xa vun’we ku nga rirhandzu, i mfanelo leyi hlawulaka Vakreste va ntiyiso. Xana se u swi xiyile leswaku vagandzeri va ntiyiso va vonaka hi ku va ni vun’we lebyi?—Yoh. 13:35.
6. Ntshembo wa Mfumo wu hi pfuna njhani leswaku hi va ni vun’we?
6 Nakambe vagandzeri va ntiyiso va ni vun’we hikuva va teka Mfumo wa Xikwembu tanihi wona ntsena ntshembo wa vanhu. Va swi tiva leswaku ku nga ri khale Mfumo wa Xikwembu wu ta siva tihulumendhe ta vanhu kutani wu katekisa vanhu lava yingisaka hi ku rhula ka xiviri loku nga heriki. (Esa. 11:4-9; Dan. 2:44) Hikwalaho, Vakreste va yingisa leswi Yesu a swi vuleke malunghana ni valandzeri vakwe a ku: “Vona a hi xiphemu xa misava, tanihi leswi mina ndzi nga riki xiphemu xa misava.” (Yoh. 17:16) Vakreste va ntiyiso a va hlanganyeli etinyimpini ta misava; hikwalaho va ni vun’we hambiloko lava va hanyaka na vona va ri eku lweni.
Lunghiselelo Leri Tirhisiwaka Ku Hi Dyondzisa
7, 8. Swiletelo swa le Bibeleni swi hoxa xandla hi ndlela yihi eka vun’we lebyi hi nga na byona?
7 Vakreste va lembe-xidzana ro sungula a va ri ni vun’we hikuva hinkwavo a va kuma xikhutazo lexi humaka eka xihlovo xin’we. A va swi xiya leswaku Yesu a a dyondzisa ni ku kongomisa vandlha hi ku tirhisa huvo leyi fumaka, leyi a yi vumbiwa hi vaapostola ni vakulukumba va le Yerusalema. Vavanuna lava lava a va tinyiketerile a va sekela swiboho swa vona eRitweni ra Xikwembu ivi va tirhisa valanguteri lava endzelaka mavandlha ku hundzisa swiletelo swa vona emavandlheni ya le matikweni yo tala. Bibele yi vula leswi malunghana ni valanguteri van’wana vo tano: “Loko va hundza hi le mitini a va nyika lava a va ri eka yona swileriso swa nawu leswaku va swi hlayisa, leswi bohiweke hi vaapostola ni vakulukumba lava a va ri eYerusalema.”—Mint. 15:6, 19-22; 16:4.
8 Hilaha ku fanaka namuntlha, Huvo leyi Fumaka leyi vumbiwaka hi Vakreste lava totiweke hi moya yi hoxa xandla eka vun’we bya vandlha ra misava hinkwayo. Huvo leyi Fumaka yi humesa minkandziyiso leyi khutazaka hi tlhelo ra moya hi tindzimi to tala. Swakudya leswi swa moya swi sekeriwe eRitweni ra Xikwembu. Hikwalaho leswi dyondzisiwaka a swi humi eka vanhu kambe swi huma eka Yehovha.—Esa. 54:13.
9. Ntirho lowu Xikwembu xi hi nyikeke wona wu hi pfuna njhani leswaku hi va ni vun’we?
9 Valanguteri va Vakreste na vona va kondletela vun’we hi ku rhangela entirhweni wo chumayela. Vuxaka lebyikulu lebyi nga kona exikarhi ka lava va tirhaka swin’we entirhweni wa Xikwembu byi tiyile ku tlula bya vanhu van’wana lava ngo hungasa swin’we ntsena. Vandlha ra Vukreste a ri simekiwanga leswaku ri va ndhawu yo tiendlela vanghana ntsena, kambe i ndhawu yo dzunisa Yehovha ni yo endla ntirho wo chumayela mahungu lamanene, yo endla vadyondzisiwa ni yo aka vandlha. (Rhom. 1:11, 12; 1 Tes. 5:11; Hev. 10:24, 25) Hi yona mhaka muapostola Pawulo a vuleke leswi malunghana ni Vakreste: “Mi yima mi tiyile hi moya wun’we, mi pfunana hi moya-xiviri wun’we ku lwela ripfumelo eka mahungu lamanene.”—Filp. 1:27.
10. Hi tihi tindlela tin’wana leti hina vanhu va Xikwembu hi nga ni vun’we ha tona?
10 Hikwalaho, leswi hi nga vanhu va Yehovha, hi ni vun’we hikuva hi amukela vuhosi bya yena, hi rhandza vamakwerhu, hi ni ntshembo eka Mfumo wa Xikwembu naswona hi xixima lava Xikwembu xi va tirhisaka leswaku va hi rhangela. Yehovha wa hi pfuna leswaku hi hlula malangutelo yo karhi lawa ma nga xungetaka vun’we bya hina hikwalaho ka leswi hi nga hetisekangiki.—Rhom. 12:2.
Ndlela Yo Hlula Ku Tikukumuxa Ni Mavondzo
11. Ha yini ku tikukumuxa ku hambanisa vanhu naswona Yehovha u hi pfuna njhani leswaku hi ku hlula?
11 Ku tikukumuxa ku hambanisa vanhu. Munhu la tikukumuxaka u rhandza ku titeka a tlakukile naswona hi ntolovelo u va ni ntsako wa vutianakanyi loko a tibuma. Kambe leswi minkarhi yo tala swi sivela vun’we; lava va twaka marito wolawo yo tibuma va nga ha va ni mavondzo. Mudyondzisiwa Yakobo u hi byela hi ku kongoma a ku: “Ku tinyungubyisa ko tano hinkwako ku hombolokile.” (Yak. 4:16) Ku tekela van’wana ehansi a swi kombisi rirhandzu. Lexi tsakisaka, Yehovha i xikombiso xa ku titsongahata hikuva u tirhisana na hina vanhu lava nga hetisekangiki. Davhida u tsarile: “Ku titsongahata ka wena [Xikwembu] ku ndzi endla ndzi va lonkulu.” (2 Sam. 22:36) Rito ra Xikwembu ra hi pfuna ku hlula ku tikukumuxa hi ku hi dyondzisa ku anakanya hi ndlela leyinene. Pawulo u huhuteriwe ku vutisa a ku: “I mani la ku endlaka u hambana ni un’wana? Kahle-kahle i yini lexi u nga na xona lexi u nga nyikiwangiki? Kahle-kahle loko u lo nyikiwa, ha yini u tibuma onge a wu lo nyikiwa?”—1 Kor. 4:7.
12, 13. (a) Ha yini swi olova ku va ni mavondzo? (b) Hi byihi vuyelo bya ku tekelela langutelo leri Yehovha a nga na rona hi van’wana?
12 Mavondzo i xihinga xin’wana lexi tolovelekeke lexi sivelaka vun’we. Leswi hi tswariweke hi nga hetisekanga, hinkwerhu hi “taleriwa hi mona” naswona hambi ku ri lava ku nga khale va ri Vakreste, minkarhi yin’wana va nga ha va ni mavondzo hikwalaho ka swiyimo swa van’wana, rifuwo ra vona, malunghelo ya vona kumbe vuswikoti bya vona. (Yak. 4:5) Hi xikombiso, makwerhu la nga ni ndyangu a nga ha vondzoka malunghelo lawa makwerhu loyi a nga le ntirhweni wa nkarhi hinkwawo a nga na wona, a nga swi xiyi leswaku makwerhu la nga le ntirhweni wa nkarhi hinkwawo a nga ha va a n’wi vondzoka. Hi nga ma sivela njhani mavondzo yo tano leswaku ma nga kavanyeti vun’we bya hina?
13 Lexi nga hi pfunaka ku papalata ku va ni mavondzo i ku tsundzuka leswaku Bibele yi fanisa swirho leswi totiweke swa vandlha ra Vukreste ni swirho swa miri wa munhu. (Hlaya 1 Vakorinto 12:14-18.) Hi xikombiso, hambileswi tihlo ra wena ri vonakaka ngopfu ku tlula mbilu ya wena, xana swirho sweswo haswimbirhi a hi swa nkoka eka wena? Hilaha ku fanaka, Yehovha u teka swirho hinkwaswo swa vandlha swi ri swa nkoka hambileswi swin’wana swi nga ha tivekaka ngopfu ku tlula swin’wana ku ringana nkarhi wo karhi. Hikwalaho a hi tekeleleni langutelo leri Yehovha a nga na rona hi vamakwerhu. Ematshan’weni yo vondzoka van’wana, hi nga va kombisa leswaku ha khathala ha vona naswona ha va rhandza. Loko hi endla tano, hi hoxa xandla eku kombiseni ka ku hambana loku nga kona exikarhi ka Vakreste va ntiyiso ni lava nga etikerekeni ta Vujagana.
Vujagana Byi Vonaka Hi Ku Avana
14, 15. Vukreste bya vagwinehi byi avane hi ndlela yihi?
14 Vun’we bya Vakreste va ntiyiso bya hambana ni mpfilumpfilu lowu nga kona etikerekeni ta Vujagana. Hi lembe-xidzana ra vumune, Vukreste bya vagwinehi a byi hangalakile swinene lerova byi kale byi lawuriwa hi mufumi wa Rhoma la nga muhedeni, a hoxa xandla eku kuriseni ka Vujagana. Kutani eka ku avana loku veke kona, matiko yo tala ma herise vuxaka bya wona ni tiko ra Rhoma kutani ma tisungulela vukhongeri bya Matiko ya wona.
15 Yo tala ya matiko wolawo ma lwe hi xiwona ku ringana madzana ya malembe. Hi lembe-xidzana ra vu-17 ni ra vu-18, vanhu va le Britain, Furwa ni le United States va kondletele ku tinyiketela eMatikweni ya ka vona, hikwalaho ku rhandza tiko ra rikwavo ku fane ni vukhongeri. Hi lembe-xidzana ra vu-19 ni ra vu-20, vanhu vo tala va sungule ku lawuriwa hi ku rhandza tiko ra rikwavo. Eku heteleleni, tikereke ta Vujagana ti avanile ti va mimpambukwa yo tala, leyi yo tala ya yona yi pfumeleleke ku rhandza tiko. Vanhu lava nghenaka kereke va kale va lwa ni vapfumeri-kulobye va le matikweni man’wana. Namuntlha Vujagana byi hambanisiwe hi tidyondzo leti nga faniki leti byi ti dyondzisaka ni ku rhandza tiko ra rikwavo.
16. Hi tihi timhaka leti vangaka ku avana exikarhi ka vanhu lava nga le vukhongerini bya Vujagana?
16 Hi lembe-xidzana ra vu-20, mimpambukwa ya madzana ya Vujagana yi sungule ku endla matshalatshala yo kondletela vun’we. Kambe endzhaku ko tikarhata ku ringana makume yo tala ya malembe, i tikereke ti nga ri tingani ntsena leti veke na vun’we naswona vanhu lava nghenaka kereke va ha ri ni mavonelo yo hambana eka timhaka to tanihi ku tiendlekela ka swilo, ku susa khwiri, vusodoma ni ku vekiwa ka vavasati leswaku va va vafundhisi. Ematikweni man’wana ya Vujagana, vafundhisi va ringeta ku endla leswaku vanhu lava humaka eka mimpambukwa yo hambana-hambana va va ni vun’we hi ku nga ti tekeli enhlokweni tidyondzo leti a ti va holovisa. Hambiswiritano, ku nga ti tekeli enhlokweni tidyondzo to karhi swi endla leswaku vanhu va va ni ripfumelo leri tsaneke naswona a swi endli leswaku vukhongeri lebyi avaneke bya Vujagana byi va ni vun’we.
Vagandzeri Va Ntiyiso A Va Hlanganyeli Eka Ku Rhandza Tiko Ra Rikwavo
17. Xana ku profetiwe leswaku vugandzeri bya ntiyiso a byi ta endla leswaku vanhu va va ni vun’we hi ndlela yihi “exiphen’wini xo hetelela xa masiku”?
17 Hambileswi vanhu va avaneke hi ndlela yo vava ku tlula rini na rini, vagandzeri va ntiyiso va ha ya emahlweni va vonaka hi ku va ni vun’we. Mikiya muprofeta wa Xikwembu u profetile a ku: “Ndzi ta va veka hi vun’we, kukota ntlhambi etshangeni.” (Mik. 2:12) Mikiya u profete leswaku vugandzeri bya ntiyiso byi ta tlakusiwa eka mixaka hinkwayo ya vugandzeri, ku nga khathariseki leswaku i vugandzeri bya swikwembu swa mavunwa kumbe i ku gandzeriwa ka Tiko. U tsarile: “Exiphen’wini xo hetelela xa masiku ntshava ya yindlu ya Yehovha yi ta simekiwa yi tiya ehenhla ka tintshava, kunene yi ta tlakuseriwa ehenhla ka switsunga; kutani vanhu va fanele va khitikanela eka yona. Loko ku ri vanhu hinkwavo, un’wana ni un’wana u ta famba hi vito ra xikwembu xakwe; kambe loko ku ri hina, hi ta famba hi vito ra Yehovha Xikwembu xa hina.”—Mik. 4:1, 5.
18. Vugandzeri bya ntiyiso byi hi pfune leswaku hi endla ku cinca kwihi?
18 Mikiya u tlhele a hlamusela ndlela leyi vugandzeri bya ntiyiso a byi ta va hlanganisa ha yona vanhu lava tshameke va va valala. “Kunene [vanhu lava humaka eka] matiko yo tala [va] ta ya, [va] ku: ‘Tanani, a hi tlhandlukeleni entshaveni ya Yehovha ni le ndlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.’ . . . Kutani va ta fula mabanga ya vona ma va swikomu ni mafumu ya vona ma va swikhutulo. A va nge ri tlakusi banga, tiko rin’wana ku lwa ni tiko rin’wana, naswona a va nge he dyondzi nyimpi.” (Mik. 4:2, 3) Lava va tshikaka ku gandzela swikwembu leswi endliweke hi vanhu kumbe swa matiko ivi va va vagandzeri va Yehovha va ni vun’we emisaveni hinkwayo. Xikwembu xi va dyondzisa tindlela ta rirhandzu.
19. Ku va vanhu va timiliyoni va ri ni vun’we evugandzerini bya ntiyiso i vumbhoni lebyi nga erivaleni bya yini?
19 Vun’we lebyi Vakreste va ntiyiso va nga na byona namuntlha emisaveni hinkwayo byi hlawulekile naswona i vumbhoni lebyi nga erivaleni bya leswaku Yehovha u ya emahlweni a kongomisa vanhu va yena hi ku tirhisa moya wa yena. Vanhu vo tala lava humaka ematikweni hinkwawo va hlanganisiwa ku tlula rini na rini ematin’wini ya vanhu. Koloko i ku hetiseka loku hlamarisaka ka leswi vuriweke eka Nhlavutelo 7:9, 14, naswona swi komba leswaku ku nga ri khale tintsumi ta Xikwembu ti ta tshika “timheho” leti nga ta herisa mafambiselo lawa yo homboloka ya swilo. (Hlaya Nhlavutelo 7:1-4, 9, 10, 14.) I lunghelo ku va ni vun’we ni vamakwerhu emisaveni hinkwayo. Xana un’wana ni un’wana wa hina a nga hoxa xandla njhani eka vun’we byolebyo? Mhaka leyi yi ta kambisisiwa exihlokweni lexi landzelaka.
U Nga Hlamula Njhani?
• Vugandzeri bya ntiyiso byi va hlanganisa njhani vanhu?
• Hi nga ma sivela njhani mavondzo leswaku ma nga herisi vun’we bya hina?
• Ha yini vagandzeri va ntiyiso va nga avanyisiwi hi ku rhandza tiko ra rikwavo?
[Swivutiso Swa Dyondzo]
[Xifaniso lexi nga eka tluka 13]
Vakreste va lembe-xidzana ro sungula a va ri vanhu va swiyimo swo hambana-hambana
[Swifaniso leswi nga eka tluka 15]
Xana ku pfuneta ka wena eku basiseni ni le ku sasekiseni ka Holo ya Mfumo swi nga hoxa xandla njhani eka vun’we?