Ku Tshama Ndzi Khomekile eNhlengeletanweni Ya Yehovha

Hi ku vula ka Vernon Zubko

NDZI kuriseriwe epurasini ekusuhi ni le Stenen, ku nga ximutana lexi nga le xifundzheni xa Saskatchewan eCanada. Vatswari va mina Fred na Adella, va tirhe hi matimba leswaku va hi dyondzisa hi Yehovha va tlhela va khathalela mina na sesi wa mina Aurellia swin’we ni tindzisana ta mina Alvin, Allegra na Daryl. Ninamuntlha, ha va nkhensa vatswari va hina hileswi va hi dyondziseke ntiyiso.

Tata wa mina, loyi a a ri Mukreste la totiweke a a ri muchumayeri la nga ni xivindzi. A a tirha hi matimba leswaku hi kota ku hanya kambe a a tlhela a tiyiseka leswaku vanhu va swi tiva leswaku a ri Mbhoni. Minkarhi hinkwayo a a vulavula hi ntiyiso. A ndzi nge xi rivali xikombiso xa yena lexinene xa ku hiseka ni xivindzi lexi a ri na xona. A a tshamela ku ndzi byela a ku, “Tshama u khomekile enhlengeletanweni ya Yehovha, leswaku u ta papalata swiphiqo swo tala.”

Minkarhi yo tala a hi chumayela exitarateni le Stenen ni le tindhawini ta le kusuhi. Minkarhi yo tala a swi ndzi tikela ku chumayela. Doroba rin’wana ni rin’wana a ri ri ni vana lava a va xanisa hina vantshwa va tlhela va hi vungunya. Siku rin’wana loko ndza ha ri ni malembe ya nhungu, a ndzi yime ekhonweni ndzi khome Xihondzo xo Rindza ni Xalamuka! ku te ntlawa wa vafana wu fika wu ndzi rhendzela. Wu ndzi hluvule xihuku xa mina lexi a xa ha ri xintshwa kutani wu xi hayeka emhandzini leyi a yi ri etlhelo ka mina. Nkateko wa kona, makwerhu la kuleke loyi a ndzi langutile u swi vonile leswi a swi humelela. U tile a fika a ndzi vutisa a ku, “Vern, xana ku ni xiphiqo?” Vafana volavo va balekile hi ku hatlisa. Hambileswi mhaka yoleyo yi ndzi khunguvanyiseke, yi ndzi dyondzise leswaku loko munhu a ri karhi a chumayela exitarateni, a nga fanelanga a yima ndhawu yin’we ku fana ni nsika. Ndzetelo wolowo ndzi wu kumeke loko ndza ha kula, wu ndzi pfune leswaku ndzi va ni xivindzi xo chumayela hi yindlu ni yindlu.

Mina na Alvin hi khuvuriwe hi May 1951. A ndzi ri ni malembe ya 13. Ndza ha swi tsundzuka leswaku Makwerhu Jack Nathan, loyi a nyikeleke nkulumo ya nkhuvulo, u hi khutaze leswaku ku nga tshuki ku hela n’hweti hi nga si vulavula hi Yehovha. * Endyangwini wa ka hina, minkarhi hinkwayo ku phayona a ku tekiwa ku ri ntirho wa nkoka. Kutani hi 1958, endzhaku ka loko ndzi hete xikolo ndzi rhurhele eWinnipeg le Manitoba leswaku ndzi ya phayona. Hambileswi Tatana a a tsakela leswaku ndzi tirha na yena ebindzwini ra le kaya ro tsema timhandzi, yena na Manana va ndzi khutaze swinene ku nghenela ntirho wa nkarhi hinkwawo naswona va pfumerile leswaku ndzi rhurhela eWinnipeg ndzi ya phayona kona.

Kaya Lerintshwa Ni Munghana Lontshwa

Hi 1959, hofisi ya rhavi yi rhambe vanhu lava nga swi kotaka leswaku va rhurhela eQuebec, laha a ku ri ni xilaveko lexikulu xa vahuweleri. Ndzi ye ndzi ya phayona eMontreal. Koloko a ku  ri ku cinca lokukulu! A ku ri ntokoto lowuntshwa tanihi leswi a ndzi dyondza ku vulavula Xifurwa ni ku tolovela ndhavuko lowu hambaneke. Mulanguteri wa hina wa xifundzha u te, “U nga tshuki u ku, ‘Ekaya a hi endla swilo hi ndlela leyi.’” Xexo a ku ri xitsundzuxo lexinene.—1 Kor. 9:22, 23.

A ndzi nga ri na munghana wo tirha na yena loko ndzi rhurhela eQuebec. Hambiswiritano, hi February 1961 muntshwa la vuriwaka Shirley Turcotte, loyi ndzi hlanganeke na yena eWinnipeg. Na yena a a huma endyangwini lowu rhandzaka Yehovha. Hambileswi hi nkarhi wolowo a ndzi nga swi xiyi leswaku u ta ndzi pfuna swinene hi ku ndzi tiyisa ni ku ndzi khutaza emalembeni hinkwawo lawa hi veke swin’we.

Ku Chumayela eGaspé

Endzhaku ka malembe mambirhi hi tekanile, hi averiwe ku tirha tanihi maphayona yo hlawuleka eRimouski le Quebec. Eka ximun’wana lexi landzeleke, hofisi ya rhavi yi hi kombele leswaku hi ya chumayela eNhlohleni hinkwayo ya Gaspé eribuweni leri nga le vuxeni bya Canada. Ntirho wa hina a ku ri ku byala timbewu to tala ta ntiyiso hilaha hi nga kotaka hakona. (Ekl. 11:6) Hi rhwale timagazini to tlula 1 000 ni tibuku ta kwalomu ka 400 swin’we ni swakudya ni swiambalo emovheni wa hina kutani hi sungula ku chumayela n’hweti hinkwayo. Hi chumayele eswimitanini hinkwaswo swa le Gaspé. Xitichi xa kwalaho xa xiya-ni-moya xi tivise vanhu va kwalaho leswaku Timbhoni ti le ku teni naswona xi vule leswaku vanhu va nga yi amukeli minkandziyiso ya hina. Hambiswiritano, vaaki vo tala va kwalaho a va xi twisisanga xitiviso xexo naswona a va anakanya leswaku a xi navetisa minkandziyiso ya hina, kutani va yi amukerile.

Emalembeni wolawo, ku chumayela hi ku ntshunxeka a ku ri nchumu lowuntshwa etindhawini tin’wana ta le Quebec naswona a swi tolovelekile ku yimisiwa hi maphorisa. Leswi swi humelerile edorobeni rin’wana laha a hi ri karhi hi fambisa minkandziyiso hi yindlu ni yindlu. Phorisa rin’wana ri hi kombele leswaku hi famba na rona exitichini xa maphorisa hiloko hi famba na rona. Ndzi kume leswaku gqweta ra le dorobeni rolero ri humese xileriso xa leswaku hi tshika ku chumayela. Leswi ndhuna ya maphorisa a yi nga ri kona siku rero, ndzi nyike gqweta rero papila leri tsariweke kahle leri humaka ehofisini ya rhavi ra le Toronto, leri a ri hlamusela hi mfanelo ya hina yo chumayela. Endzhaku ka loko gqweta rero ri hlaye papila rolero, ri hatle ri ku: “Vona, a ndzi lavi swiphiqo nikatsongo. Mufundhisi wa laha mugangeni hi yena a ndzi byeleke leswaku ndzi mi tshikisa ku chumayela.” Leswi a hi lava leswaku vanhu va le nsin’wini yoleyo va xiya leswaku ntirho wa hina wu le nawini, hi hatle hi tlhelela endhawini leyi phorisa ri nga hi tshikisa ku chumayela eka yona ivi hi ya emahlweni ni ntirho wo chumayela.

Hi siku leri landzelaka nimixo, loko hi ye hi ya vona ndhuna ya maphorisa, yi hlundzukile loko yi twa leswaku hi tshikisiwe ku chumayela. A yi hlundzuke ngopfu loko yi vulavula ni gqweta hi riqingho! Phorisa rero ri hi byele leswaku loko ho tshuka hi va ni swiphiqo hi fanele hi ri bela riqingho naswona ri ta swi lulamisa. Hambileswi a hi nga ri vanhu va le ndhawini yoleyo nileswi a hi nga xi tivi kahle Xifurwa, vanhu va kwalaho a va ri ni musa ni malwandla. Kambe a hi tivutisa leswaku, ‘Xana va ta hetelela va tive ntiyiso?’ Hi kume nhlamulo endzhaku ka malembe yo tala loko hi tlhelela hi ya aka Tiholo ta Mfumo eGaspé. Hi kume leswaku vanhu vo tala lava hi va chumayeleke se a va ri vamakwerhu. Hakunene Yehovha hi yena la swi kurisaka.—1 Kor. 3:6, 7.

Hi Kuma Ndzhaka

N’wana wa hina wa nhwanyana Lisa u velekiwe hi 1970. Ndzhaka leyi leyi humaka eka Yehovha yi hi tisele ntsako lowukulu evuton’wini bya hina. Shirley na Lisa a va tirha na mina eka matsima yo aka Tiholo ta Mfumo. Loko Lisa a heta xikolo u te: “Tatana na Manana, leswi ndzi mi humeseke entirhweni wa nkarhi hinkwawo swa xinkarhana, ndzi ta ringeta ku hakela nkarhi wolowo hi ku va phayona.” Lisa u ni malembe yo tlula 20 a ri karhi a phayona kambe sweswi u phayona ni nuna wakwe Sylvain. Hinkwavo va ve ni lunghelo ro tirha eka matsima yo aka miako ematikweni yo hambana-hambana. Pakani ya hina tanihi ndyangu i ku hanya vutomi byo olova  ni ku tiyimisela ku amukela ntirho wun’wana ni wun’wana lowu Yehovha a hi nyikaka wona. A ndzi si ma rivala marito lawa Lisa a ma vuleke loko a sungula ku phayona. Kahle-kahle, u ndzi khutaze ku tlhelela eka ntirho wa nkarhi hinkwawo hi 2001 naswona ni sweswi ndza ha phayona. Ku phayona swi ndzi dyondzise ku tshemba Yehovha eka hinkwaswo leswi ndzi swi endlaka ni ku hanya vutomi byo olova kambe lebyi enerisaka ni lebyi tsakisaka.

Tsima Ro Aka Ri Lava Leswaku U Va Ni Rirhandzu Naswona U Tshembeka

Yehovha u ndzi dyondzise leswaku loko hi tiyimisela ku amukela ntirho wun’wana ni wun’wana lowu a hi nyikaka wona, hi ta kuma mikateko yo tala. Ku tirha eka Komiti yo Aka ya Xifundzha ni le ka matsima yo aka swin’we ni vamakwerhu eQuebec ni le tindhawini tin’wana i lunghelo ra risima.

Hambileswi vatirhi van’wana va ku tirhandzela va nga riki swivulavuri, eka matsima yo aka Tiholo ta Mfumo va endla ntirho wo hlamarisa. Vamakwerhu lava lava rhandzekaka va endla ntirho wa vona hi timbilu ta vona hinkwato naswona va kombisa vuswikoti bya vona. Minkarhi hinkwayo vuyelo bya ntirho wa vona i miako yo saseka leyi nga ta tirhiseriwa ku gandzela Yehovha eka yona.

Ndzi vutisiwe leswaku, “Hi tihi timfanelo ta nkoka ngopfu eka vatirhi va ku tirhandzela lava akaka Tiholo ta Mfumo?” Hi ku ya hi leswi ndzi swi tivaka, xo sungula munhu u fanele a rhandza Yehovha ni N’wana wakwe swin’we ni vamakwerhu. (1 Kor. 16:14) Xa vumbirhi, u fanele a tshembeka. Loko swilo swi nga fambi hi ndlela leyi hi lavaka swi famba ha yona, ku nga nchumu lowu nga ta endleka, munhu la tshembekaka u ta ya emahlweni a landzela nkongomiso wa nhlengeletano. Ku tshembeka ka yena ku ta n’wi endla leswaku a tirha hi ku tirhandzela ni le ka matsima man’wana yo aka.

Ndza N’wi Tlangela Yehovha

Hambileswi tatana a feke hi 1985, xitsundzuxo xa yena xo tshama ndzi khomekile enhlengeletanweni ya Yehovha a ndzi xi rivali. A swi kanakanisi leswaku na yena u khomekile ku fana ni lavan’wana lava amukeleke xiavelo xa vona eka xiphemu xa le tilweni xa nhlengeletano ya Yehovha. (Nhlav. 14:13) Manana u ni malembe ya 97. A nga ha swi koti ku vulavula hi ndlela leyi a a vulavula ha yona khale hikwalaho ka vuvabyi byo oma swirho; kambe wa ha yi tiva Bibele ya yena. U tshaha matsalwa eka mapapila lawa a hi tsalelaka wona naswona u hi khutaza leswaku hi hambeta hi tirhela Yehovha hi ku tshembeka. Hina vana hi tsaka swinene hi leswi hi veke ni vatswari lava nga ni rirhandzu ro tano!

Nakambe ndza n’wi nkhensa Yehovha hikwalaho ka nsati wa mina wo tshembeka Shirley. A nga xi rivali xitsundzuxo lexi mana wakwe a tshameke a n’wi byela xona a ku: “Vern u ta tshama a khomekile entiyisweni naswona u fanele u swi tiva leswaku u ta pfuna ni vanhu van’wana.” Loko hi tekana eka malembe ya 49 lama hundzeke, a hi tiyimisele ku dyuhala swin’we, hi tirhela Yehovha naswona loko ho pona makumu ya mafambiselo lawa, hi tlhelela evuntshweni hi ri swin’we hi ta hambeta hi n’wi tirhela hilaha ku nga heriki. Hakunene hi ve “ni swo tala swo swi endla entirhweni wa Hosi.” (1 Kor. 15:58) Hakunene Yehovha u hi khathalerile naswona u hi nyike swilo hinkwaswo leswinene.

[Nhlamuselo ya le hansi]

[Xifaniso lexi nga eka tluka 31]

“Pakani ya hina tanihi ndyangu i ku hanya vutomi byo olova ni ku tiyimisela ku amukela ntirho wun’wana ni wun’wana lowu Yehovha a hi nyikaka wona”