Pfuna Vana Va Wena Ku Tiva Nhlengeletano Ya Yehovha

VANA va lava ku dyondza. Anakanya hi swivutiso leswi vana va Vaisrayele va nga ha vaka va swi vutisile aEgipta hi vusiku bya Paseka yo sungula: ‘Ha yini ku fanele ku dlayiwa xinyimpfana?’ ‘Ha yini Tatana a tota ngati emarimbeni ya nyangwa?’ ‘Hi ya kwihi?’ Ku komba leswaku Yehovha a a swi amukela swivutiso sweswo, swi vonaka eka leswi a swi leriseke vatatana va Vaisrayele. Yehovha u va byele leswi malunghana ni minkhuvo ya Paseka leyi a yi ta landzela: “Loko vana va n’wina va ku eka n’wina, ‘Vutirheli lebyi byi vula yini eka n’wina?’ kutani mi ta ku, ‘I xitlhavelo xa paseka ya Yehovha, loyi a nga hundza ehenhla ka tindlu ta vana va Israyele aEgipta loko a tisa khombo eka Vaegipta, kambe a kutsula tindlu ta hina.’” (Eks. 12:24-27) Endzhakunyana, Yehovha u tsundzuxe vatswari va Vaisrayele hi nkoka wo hlamula swivutiso leswi vana va vona va swi vutiseke malunghana ni “swileriso ni swiboho swa vuavanyisi” leswi Yehovha a a va lerise swona.—Det. 6:20-25.

 Swi le rivaleni leswaku Yehovha a a lava leswaku vana va kuma tinhlamulo leti enerisaka ta swivutiso swa vona malunghana ni vugandzeri bya ntiyiso—tinhlamulo leti a ti ta va susumetela ku rhandza Yehovha tanihi Xikwembu xa vona ni Muponisi wa vona. Ninamuntlha, Yehovha u lava leswaku vana va hina va kuma tinhlamulo leti enerisaka. Ndlela yin’wana leyi vatswari va nga va dyondzisaka ha yona vana va vona leswaku va rhandza Xikwembu hi mbilu hinkwayo ni vanhu va xona, i ku va pfuna leswaku va tolovelana ni nhlengeletano ya Yehovha ni ku twisisa leswi yi hi endlelaka swona. Hikwalaho, a hi kambisiseni tindlela tin’wana leti vana va nga pfuniwaka ha tona leswaku va dyondza leswi engetelekeke hi nhlengeletano ya Xikwembu.

Vandlha Leri Mi Hlanganyelaka Eka Rona

Vana va fanele va tiva vandlha leri ndyangu wa n’wina wu hlanganyelaka eka rona. Leswaku va ri tiva, n’wina tanihi vatswari mi fanele mi famba na vona eminhlanganweni hinkwayo ya Vukreste. Loko mi endla tano, mi va mi landzela ntila lowu Yehovha a wu vekeleke Vaisrayele, lava a va leriseke a ku: “Hlengeletani vanhu, vavanuna ni vavasati ni vana . . . , leswaku va yingisa nileswaku va dyondza, hikuva va fanele va chava Yehovha Xikwembu xa n’wina, va khathalela ku hetisisa marito hinkwawo ya nawu lowu. Kutani vana va vona lava va nga swi tivangiki va ta yingisa, va fanele va dyondza ku chava Yehovha Xikwembu xa n’wina.”—Det. 31:12, 13.

Vana va nga sungula ku dyondza hi Rito ra Yehovha loko va ha ri tincece. Muapostola Pawulo u vule leswi malunghana na Timotiya: “Ku sukela loko wa ha ri ricece u tive matsalwa yo kwetsima.” (2 Tim. 3:15) Hambi ku ri vana lavatsongo ngopfu va sungula ku twisisa rungula leri dyondzisiwaka eminhlanganweni eHolweni ya Mfumo ni ku tiva tinsimu ta Mfumo. Va dyondza  ku tirhisa ni ku xixima Bibele ni minkandziyiso leyi sekeriweke eBibeleni. Ku tlula kwalaho, eminhlanganweni ya hina va ta vona mfanelo leyi valandzeri va Kreste va ntiyiso va tiviwaka ha yona, ku nga rirhandzu ra xiviri. Yesu u te: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yoh. 13:34, 35) Vana va ta vona rirhandzu ni nsirhelelo wa xiviri lowu nga kona eHolweni ya Mfumo naswona sweswo swi ta endla leswaku va tsakela ku va kona eminhlanganweni ya Vukreste vutomi bya vona hinkwabyo.

Loko u swi endla mukhuva ku fika hi nkarhi eHolweni ya Mfumo ni ku tshama nkarhinyana endzhaku ka minhlangano, vana va wena va ta kuma nkarhi wo endla vanghana. Ematshan’weni yo va tshika va tihlanganisa ni vana van’wana ntsena, ha yini u nga va tivisi eka vamakwerhu va malembe yo hambana-hambana? Loko vana va wena va tolovelana ni vanhu lavakulu, va ta swi xiya leswaku vanhu lavakulu va ni ntokoto lowu hlamarisaka ni vutlhari. Hilaha Zakariya wa khale, loyi a a ri “muleteri emhakeni ya ku chava Xikwembu xa ntiyiso” a veke ni nkucetelo lowunene eka Uzhiya, hosi ya Yuda, loyi a ri muntshwa, ninamuntlha vanhu lava tirheleke Yehovha hi ku tshembeka ku ringana malembe yo tala, va ni nkucetelo lowunene eka vantshwa. (2 Tikr. 26:1, 4, 5) Loko mi ri eHolweni ya Mfumo, u nga tlhela u hlamusela vana va wena leswi layiburari, bodo ya rungula ni swilo swin’wana swi tirhaka swona.

Nhlengeletano Ya Misava Hinkwayo

Vana va fanele va swi twisisa leswaku vandlha leri mi hlanganyelaka eka rona i xiphemu xa nhlengeletano ya misava hinkwayo leyi nga ni mavandlha yo tlula 100 000. Hlamusela swiyenge swa nhlengeletano leyi, ndlela leyi yi tirhaka ha yona nileswaku vana va nga endla yini leswaku va seketela ntirho wa yona. Va byele leswaku ha yini u ti langutela hi mahlo-ngati tinhlengeletano ta xifundzha, mintsombano ya muganga ni maendzo ya mulanguteri wa xifundzha.—Vona bokisi leri nge  “Tinhloko-mhaka Leti Mi Nga Ti Kambisisaka Hi Nkarhi Wa Dyondzo Ya Ndyangu,” eka tluka 28.

Loko swi koteka, rhamba valanguteri va miganga ni va swifundzha, varhumiwa, swirho swa ndyangu wa Bethele ni vatirhi van’wana va nkarhi hinkwawo ekaya ra wena leswaku mi ta dya na vona. U nga anakanyi leswaku a va na wona nkarhi wa vana. Vatirheli lava va nkarhi hinkwawo, va ringeta ku tekelela Yesu, loyi minkarhi hinkwayo a a amukela vana a tlhela a vulavula na vona. (Mar. 10:13-16) Loko vana va wena va twa vatirheli volavo va Yehovha va hlamusela mintokoto ya vona ni loko va vona ntsako lowu va nga na wona entirhweni wo kwetsima, na vona va nga tivekela pakani yo va vatirheli va nkarhi hinkwawo.

I yini swin’wana leswi mi nga swi endlaka tanihi ndyangu leswaku mi pfuna vana va n’wina ku ya va tolovela nhlengeletano ya Yehovha? Hi leswi swiringanyeto swin’wana: Kambisisani buku leyi nge Timbhoni ta Yehovha I Vahuweleri Va Mfumo Wa Xikwembu, tanihi ndyangu. Kandziyisa ku tinyiketela, ku titsongahata ni ku tshembeka loku malandza ya Yehovha ma ku kombiseke. Va kombise ndlela leyi Yehovha a va tirhiseke ha yona ku chumayela mahungu lamanene emisaveni hinkwayo. Tirhisa tivhidiyo leti humesiweke hi nhlengeletano ya Yehovha leswaku u va dyondzisa tidyondzo ta nkoka ta nkarhi lowu nga hundza ni ta sweswi. Loko swi koteka, endzelani hofisi ya rhavi ni kaya ra Bethele etikweni ra ka n’wina kumbe hambi ku ri ematikweni man’wana. Maendzo wolawo ma ta endla leswaku vana va wena va twisisa ndlela leyi xiyenge xa laha misaveni xa nhlengeletano ya Yehovha leyi kongomisiwaka hi ntlawa wa hlonga ro tshembeka yi hleriweke ha yona leswaku yi phamela swakudya swa moya ni ku kongomisa vamakwerhu emisaveni hinkwayo hilaha yi endleke hakona hi lembe-xidzana ro sungula C.E.—Mat. 24:45-47; Mint. 15:22-31.

Lunghiselela Rungula Leri Fanelaka N’wana Ha Un’we

Loko u dyondzisa vana va wena, tsundzuka ndlela leyi Yesu a va leteleke ha yona vaapostola vakwe. U tshame a va byela a ku: “Ndza ha ri ni swilo swo tala swo mi byela swona, kambe  sweswi a mi swi koti ku swi byarha.” (Yoh. 16:12) Yesu a nga va dyondzisanga rungula ro tala vadyondzisiwa vakwe. Ematshan’weni ya sweswo, u va dyondzise ntiyiso hakatsongo-tsongo leswaku va wu twisisa kahle. Hilaha ku fanaka, u nga va dyondzisi rungula ro tala vana va wena. Loko nkarhi ni nkarhi u va dyondzisa hi nhlengeletano ya Yehovha hakatsongo-tsongo, u ta endla leswaku swi va tsakisa ku dyondza hi vandlha ra Vukreste. Loko swilaveko swa vana va wena swi cinca, u nga ha va dyondzisa hi ku phindha-phindha u engetela eka leswi se va swi tivaka.

Vandlha ra Vukreste i xihlovo xa nkoka swinene xa mpfuno lexi hi pfunaka ku tiyisa vuxaka bya hina ni Xikwembu naswona vantshwa lava hlanganyelaka hi ku hiseka emintirhweni ya vandlha va hlomisiwe kahle leswaku va kota ku lwisana ni minkucetelo ya misava ya Sathana. (Rhom. 12:2) Ha tiyiseka leswaku u ta kuma ntsako lowukulu loko u pfuna vana va wena leswaku va tolovelana ni nhlengeletano ya Yehovha. Leswi xi nga ta va katekisa, onge va nga tshama va tshembekile eka nhlengeletano leyi ni le ka Xikwembu xa rirhandzu lexi hi xi tirhelaka.

[Bokisi/Xifaniso lexi nga eka tluka 28]

 Tinhloko-mhaka Leti Mi Nga Ti Kambisisaka Hi Nkarhi Wa Dyondzo Ya Ndyangu

Hi leti tinhloko-mhaka tin’wana leti vulavulaka hi nhlengeletano ya Yehovha leti mi nga ti kambisisaka hi nkarhi wa Dyondzo ya n’wina ya Ndyangu ya nimadyambu.

▪ Pfuxetani matimu ya vandlha leri mi hlanganyelaka eka rona. Ri sungule rini naswona njhani? Hi tihi Tiholo ta Mfumo leti vandlha rero ri ti tirhiseke? Ha yini mi nga rhambi makwerhu loyi ku nga khale a ri xirho xa vandlha rero leswaku a ta hlamula swivutiso leswi vana va n’wina va nga na swona?

▪ Hlamusela xikongomelo xa minhlangano yo hambana-hambana ya vandlha ni xa tinhlengeletano letikulu ni ndlela leyi vana va nga vuyeriwaka ha yona eka minhlangano yoleyo.

▪ Hlamusela xikongomelo xa swikolo swo hambana-hambana leswi simekiweke hi nhlengeletano ya Yehovha. Va byele mintokoto leyi kombisaka vuyelo lebyinene lebyi mathwasana ya swikolo sweswo ma veke na byona.

▪ Pfuna vana va wena ku vona nkoka wo va vahuweleri va nkarhi hinkwawo va mahungu lamanene. Va kombise ndlela leyi va nga hoxaka xandla ha yona eka xiviko xa misava hinkwayo lexi humesiwaka eka Buku Ya Lembe Ya Timbhoni ta Yehovha.

▪ Hlamusela mintirho yo hambana-hambana ya ntirho wa nkarhi hinkwawo leyi vantshwa lava nga enhlengeletanweni ya Yehovha va nga hlanganyelaka eka yona. U nga kuma rungula ro tala eka ndzima 10 ya buku leyi nge Ku Hleleriwa Ku Endla Ku Rhandza Ka Yehovha.

▪ Pfuna vana va wena ku twisisa leswaku ha yini ku landzeriwa maendlelo yo karhi evandlheni. Va hlamusele leswaku ha yini va nga fanelanga va tilawula enhlengeletanweni ya Yehovha, hambi ku ri eka swilo leswitsongo. Va kombise ndlela leyi va nga hoxaka xandla ha yona leswaku ku va ni ku hleleka evandlheni, hi ku landzela nkongomiso wa vakulu.

[Xifaniso]

Vana va wena va ta vuyeriwa loko va endla xinghana ni lava nga ni malembe yo tala va ri karhi va tirhela Xikwembu

[Swifaniso leswi nga eka tluka 26]

Ku fana ni le Israyele wa khale, namuntlha vatswari va tikarhatela ku nyika vana va vona tinhlamulo leti enerisaka loko va va vutisa swivutiso malunghana ni nhlengeletano ya Yehovha