“Xi Ndzi Pfuna Ku Fikelela Timbilu Ta Vanhu”

LE PORTO ALEGRE, ku nga doroba leri nga edzongeni wa Brazil ku tshame ku khomiwa nhlengeletano ya matiko yo hambana-hambana leyi eka yona a ku vulavuriwa hi timhaka leti khumbaka vanhu. Makume ya magidi ya vanhu lava humaka ematikweni ya 135 va tile enhlengeletanweni leyi. Hi nkarhi wo wisa, ntlawa wa Timbhoni lowu humaka evandlheni ra le Porto Alegre wu vulavule ni vapfhumba vo tala hi rungula ra Mfumo ra le Bibeleni. Xana a va vulavurisana njhani?

Elizabete la nga phayona u ri: “Hi tirhise xibukwana lexi nge Good News for People of All Nations.” U ye emahlweni a ku: “Vapfhumba vo tala a va nga si tshama va ma twa mahungu lamanene ya Mfumo, kambe va ma tsakerile. Hi vulavule ni vanhu lava humaka eBolivia, eChayina, eFurwa, eIndiya, eIsrael ni le Nigeria. Vapfhumba van’wana hi va nyike minkandziyiso leyi sekeriweke eBibeleni hi tindzimi ta vona naswona va yi tsakerile swinene.”

Phayona ra le Mexico leri vuriwaka Raúl, na rona ri tirhisa xibukwana lexi naswona ri kuma vuyelo lebyinene. Siku rin’wana ri tshame ri vulavula ni mukhalabye wa Muarabu la nga ni malembe ya 80, loyi a ha ku feriwa hi nsati. Endzhaku ka loko mukhalabye yoloye a hlaye rungula ra Mfumo hi Xiarabu eka xibukwana lexi, u rile mihloti ya ntsako. Ha yini? Xitshembiso xa Xikwembu xa leswaku rifu a ri nge he vi kona, hilaha xi hlamuseriweke hakona eka Nhlavutelo 21:3, 4, xi n’wi khumbile swinene loko a xi hlaya hi ririmi rakwe. Siku rin’wana, loko Raúl a ri karhi a chumayela hi xitshuketa u hlangane ni wanuna un’wana la vulavulaka Xiputukezi. Wanuna yoloye na yena a a feriwe hi n’wana wakwe wa jaha loyi a a n’wi rhandza. Raúl u n’wi hlayise rungula ra Xiputukezi exibukwanini lexi. Loko a heta ku hlaya, wanuna yoloye u kombise leswaku a a lava ku dyondza swo tala hi Bibele naswona u pfumele ku dyondzeriwa Bibele.

Raúl u tirhise xibukwana lexi nge Good News for People of All Nations leswaku a chumayela vanhu lava vulavulaka Xiarmenia, Xichayina, Xifurwa, Xihindi, Xijarimani, Xikorea, Ximixe, Xinghezi, Xiperesiya, Xirhaxiya ni Xizapotec. U ri: “Ndzi swi xiyile leswaku i swa nkoka ku tirhisa xibukwana lexi loko ndzi ri ensin’wini. Xi ndzi pfuna ku fikelela timbilu ta vanhu, hambiloko ndzi nga vulavuli ririmi ra vona.”

Leswi vanhu vo tala va fambaka swinene naswona va rhurhelaka ematikweni man’wana, swa olova leswaku hi hlangana ni vanhu lava vulavulaka ririmi rin’wana. Hi ta swi kota ku va chumayela rungula ra Mfumo hi ku tirhisa xibukwana lexi nge Good News for People of All Nations. Xana u tshama u ri na xona?

[Swifaniso leswi nga eka tluka 32]

Raúl a khome xibukwana lexi n’wi pfunaka ku fikelela timbilu ta vanhu