‘Swilo Leswi A Swi Endleke Swi Fambe Swin’we Na Yena’

THEODORE JARACZ, xirho xa Huvo leyi Fumaka ya Timbhoni ta Yehovha, u hete pfhumba ra yena ra laha misaveni hi Ravunharhu nimixo, hi June 9, 2010. A a ri ni malembe ya 84 naswona u siye nsati wa yena Melita loyi a nga ni malembe ya 53. Swirho swin’wana swa ndyangu wa yena leswa ha hanyaka swi katsa sesi wa yena loyi a nga ni n’wana wa mufana ni vana vambirhi va vanhwanyana.

Makwerhu Jaracz loyi a velekiweke hi September 28, 1925, le Xifundzheni xa Pike, eKentucky, le U.S.A., u kombise ku tinyiketela ka yena eka Yehovha a ri ni malembe ya 15, hi August 10, 1941. Endzhaku ka malembe mambirhi, loko a ri ni malembe ya 17, u nghenele ntirho wa vuphayona, xisweswo a sungula ntirho wa nkarhi hinkwawo lowu a wu endleke malembe ya kwalomu ka 67.

Hi 1946 loko Makwerhu Jaracz a ri ni malembe ya 20, u ye eka ntlawa wa vunkombo wa Xikolo xa Bibele xa Giliyadi xa Watchtower. Loko Makwerhu Jaracz a thwasile u averiwe ku va mulanguteri la famba-fambaka eCleveland, le Ohio, le United States. Hi 1951, u averiwe ku ya tirha erhavini ra le Australia laha a fikeke a langutela ntirho erhavini rolero. Buku Ya Lembe Ya Timbhoni Ta Yehovha Ya 1983 (ya Xinghezi) yi vule leswaku Makwerhu Jaracz “u va khutaze swinene vamakwerhu etikweni rero hinkwaro hikwalaho ka leswi a a hisekela ku hlela swilo swa nhlengeletano ya Xikwembu a tlhela a rhangela hi ndlela leyinene ensin’wini.”

Loko Makwerhu Jaracz a tlhelele eUnited States u tekane na Melita Lasko hi December 10, 1956. Endzhaku ka loko va tekanile va nghenele ntirho wo famba-famba, va endzela swifundzha ni miganga va hlanganisa ndhawu leyikulu eUnited States hi ku hiseka. Eku heleni ka 1974, Makwerhu Jaracz u rhambiwe ku va xirho xa Huvo leyi Fumaka ya Timbhoni ta Yehovha.

Makwerhu Jaracz u ta tsundzukiwa tanihi nandza wa Yehovha la tinyiketeleke a tlhela a tshembeka, loyi a a endla mintirho ya nhlengeletano ya Xikwembu hi mbilu hinkwayo. A a ri nuna la nga ni rirhandzu ni la khathalaka a tlhela a va wanuna la nga na mhaka ni timhaka ta moya loyi a a rhangisa swilaveko swa van’wana eka swa yena. (1 Kor. 13:4, 5) Ku khathala ka yena hi vanhu van’wana loku humaka embilwini a ku kombisiwa hi ku karhateka ka yena swinene hi mhaka ya leswaku vanhu hinkwavo va fanele va khomiwa hi ndlela leyinene ni hi tintswalo. Ku engetela kwalaho, ndlela leyikulu leyi a a rhandza vanhu ha yona a tlhela a khathala ha vona yi kombisiwe hi ku hisekela ka yena ntirho wa nsimu.

Hambileswi hi nga ni gome lerikulu hikwalaho ko lahlekeriwa hi xirho xa ndyangu wa Bethele tlhelo xa nhlengeletano ya misava hinkwayo lexi a xi tirha hi matimba ni lexi a xi rhandzeka, ha tsaka hi leswi Makwerhu Jaracz a tirheleke Yehovha ku ringana makume ya malembe yo tala hi ku tshembeka. Ha tiyiseka leswaku u ‘tikombise a tshembekile ku ya fikela eku feni naswona u kume harhi ya vutomi.’ (Nhlav. 2:10) Nakambe ha tiyiseka leswaku ‘swilo leswi a swi endleke swi fambe swin’we na yena.’—Nhlav. 14:13.