Swivutiso Swa Vahlayi

Yesu u byele vayingiseri va yena a ku: “Mi fanele mi va lava hetisekeke, tanihi leswi Tata wa n’wina wa le tilweni a hetisekeke.” Xana vanhu namuntlha va nga va “lava hetisekeke” hi ndlela yihi?—Mat. 5:48.

Leswaku hi kota ku hlamula xivutiso lexi, hi fanele hi twisisa ndlela leyi rito leri nge “hetisekeke” ni leri nge “ku hetiseka” ma tirhisiweke ha yona eBibeleni. A hi swilo hinkwaswo leswi Matsalwa ma vulaka leswaku swi ‘hetisekile’ swi nga vaka leswi hetisekeke hi ku helela. I ntiyiso leswaku i Yehovha ntsena loyi a hetisekeke hilaha ku heleleke. Vanhu kumbe swilo swi nga ha va leswi hetisekeke hi mpimo wo karhi ntsena. Marito ya le Bibeleni ya Xiheveru ni Xigriki lama hundzuluxeriweke ma va “hetisekeke” minkarhi yo tala ma vula “ku helela,” “ku wupfa,” kumbe “ku pfumala xihoxo” hi ku ya hi milawu leyi vekiweke hi vulawuri.

Loko Adamu na Evha va vumbiwa, a va ri ni mahanyelo lama hetisekeke, a va hetisekile hi tlhelo ra moya naswona a va hetisekile emirini. A va hetisekile hi ku ya hi nawu lowu a wu vekiwe hi Muvumbi wa vona. Leswi va aleke ku yingisa, a va nga ha hanyi hi nawu lowu hikwalaho a va nga ha hetisekanga kasi ni vana va vona a va nga ta hetiseka. Hikwalaho, xidyoho xa Adamu xi endle leswaku vanhu va nga ha hetiseki naswona va fa.—Rhom. 5:12.

Hambiswiritano, hilaha Yesu a vuleke hakona eDyondzweni yakwe ya le Ntshaveni, hambi ku ri vanhu lava nga hetisekangiki va nga va lava hetisekeke hi ndlela yo karhi. Edyondzweni yoleyo, u veke milawu ya rirhandzu leri hetisekeke kumbe leri heleleke. Leri i rirhandzu leri fanaka ni leri Xikwembu xi rhandzeke vanhu ha rona. Yesu u te: “Hambetani mi rhandza valala va n’wina, mi khongelela lava mi xanisaka; leswaku mi tikombisa mi ri vana va Tata wa n’wina la nge matilweni, tanihi leswi a tsuvukisaka dyambu ra yena eka vanhu vo homboloka ni lavanene naswona a nisaka mpfula yakwe ehenhla ka vanhu lava lulameke ni lava nga lulamangiki.” (Mat. 5:44, 45) Loko vadyondzisiwa va Yesu va kombisa rirhandzu hi ndlela yoleyo, a va ta va va tekelela xikombiso lexi hetisekeke xa Xikwembu.

Namuntlha, Timbhoni ta Yehovha emisaveni hinkwayo ti tikarhatela ku fikelela nawu wolowo lowu tlakukeke wa ku rhandza vanhu van’wana. Ti navela ku pfuna vanhu va mindhavuko yo hambana-hambana, va tinxaka to hambana-hambana swin’we ni va vukhongeri byo hambana-hambana leswaku va ta kuma vutivi lebyi pakanisaka bya le Bibeleni. Sweswi Timbhoni ti fambisa tidyondzo ta Bibele ni vanhu lava tsakelaka lava tlulaka 7 000 000 ematikweni ya 236.

Yesu u vutisile a ku: “Loko mi rhandza lava mi rhandzaka, mi vuyeriwa hi yini? Xana valuvisi na vona a va endli nchumu lowu fanaka? Kutani loko mi xeweta vamakwenu ntsena, i yini xo hlawuleka lexi mi xi endlaka? Xana vanhu va matiko na vona a va endli nchumu lowu fanaka?” (Mat. 5:46, 47) Vakreste va ntiyiso a va rhandzi vanhu lava dyondzekeke ntsena kumbe va rixaka ro karhi ntsena; naswona a va rhandzi vanhu lava va va rhandzaka ntsena. Ematshan’weni ya sweswo, va pfuna swisiwana swin’we ni vanhu lava vabyaka, vantshwa swin’we ni vanhu lavakulu. Vakreste va nga tekelela rirhandzu ra Yehovha xisweswo va va lava hetisekeke hi ndlela yo karhi hi tindlela toleto.

Xana siku rin’wana hi ta tlhela hi tiphina hi vutomi lebyi hetisekeke lebyi Adamu a lahlekeriweke ha byona? Ina, hi ku va ni ripfumelo eka xitlhavelo xa nkutsulo wa Yesu, vanhu lava yingisaka va ta va lava hetisekeke hi nkarhi wa Mfumo wa Kreste wa Gidi ra Malembe, loko ‘N’wana wa Xikwembu a herisa mintirho ya Diyavulosi.’—1 Yoh. 3:8.