Yehovha U Yingisa Xirilo Xa Loyi A Pfotlokeke eMoyeni

HOSI SOLOMONI wo tlhariha wa le Israyele wa khale u vule leswaku “nkarhi ni xiendlakalo lexi nga languteriwangiki swa [hi wela hinkwerhu].” (Ekl. 9:11) Khombo kumbe maxangu yo karhi swi nga kavanyeta vutomi bya hina hi ndlela yo vava. Hi xikombiso, loko hi loveriwa hi xirho xa ndyangu hi nga swi langutelanga hi nga sala hi karhateke swinene. Eka mavhiki ni tin’hweti leti nga ta landzela, hi nga ha va hi ri ni gome lerikulu naswona hi heleriwe hi ntshembo. Munhu a nga ha titwa a pfilunganyekile lerova a tivona a nga faneleki ku tshinela eka Yehovha hi xikhongelo.

Munhu u lava ku khutaziwa, ku anakanyeriwa ni ku rhandziwa loko a ri exiyin’weni xo tano. Mupisalema Davhida u yimbelerile a ri karhi a tiyiseka a ku: “Yehovha u seketela hinkwavo lava waka, naswona u yimisa hinkwavo lava nkhinsamaka.” (Ps. 145:14) Bibele yi hi byela leswaku “mahlo [ya Yehovha] ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikr. 16:9) U swin’we “ni loyi a pfotlokeke ni lava va moya wo titsongahata, leswaku [a] hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.” (Esa. 57:15) Yehovha u n’wi seketela njhani loyi a pfotlokeke a tlhela a va ni moya wo titsongahata, naswona u n’wi chavelela njhani?

“Rito Leri Fikeke Hi Nkarhi Wa Kona”

Yehovha minkarhi yin’wana u nyikela mpfuno hi nkarhi wa kona hi ku tirhisa vamakwerhu lava nga Vakreste. Vakreste va khutaziwa leswaku va “[vulavula] hi ku chavelela eka mimoya-xiviri leyi karhatekeke.” (1 Tes. 5:14) Loko munhu a ri emaxangwini naswona a ri ni gome a nga ha kuma matimba loko vapfumeri-kulobye lava nga ni ntwela-vusiwana va kombisa leswaku va khathala ha yena naswona va n’wi rhandza. Marito yo chavelela ma nga khutaza munhu la heleke matimba hambiloko ma vuriwa eka bulo ro koma. Marito yo tano yo chavelela ma nga ha vuriwa hi munhu loyi a tshameke a langutana ni xiyimo lexi fanaka lexi tshikilelaka xi tlhela xi vanga gome. Kumbe ma nga ha vuriwa hi munghana loyi a nga ni ntokoto evuton’wini malunghana ni timhaka to fana ni teto. Yehovha a nga khutaza munhu la pfotlokeke emoyeni hi ku tirhisa tindlela teto.

Anakanya hi xiyimo xa Alex, nkulu la nga Mukreste loyi a a ha ku nghenela vukati, loyi nsati wa yena a feke a nga swi rindzelanga a dlayiwa hi vuvabyi lebyi nga tshungulekiki. Mulanguteri un’wana la famba-fambaka u tinyike nkarhi wa leswaku a ya chavelela Alex. Na yena u tshame a feriwa hi nsati kambe a a tlhele a teka. Mulanguteri la famba-fambaka u hlamusele ndlela leyi ku vava loku a ku tweke ku n’wi heteleke ntsako ha yona. A a titwa a chavelelekile loko a ri ni van’wana entirhweni wa nsimu ni le minhlanganweni ya vandlha. Hambiswiritano, loko a nghena laha  a a tshama kona naswona a pfala nyangwa, a a titwa a ri ni xivundza swinene. Alex u ri: “Swi ndzi khutaze swinene ku tiva leswaku ndlela leyi a ndzi titwa ha yona a yi ri ya ntumbuluko naswona van’wana va tshame va titwa hi ndlela yoleyo.” Hakunene, “rito leri fikeke hi nkarhi wa kona” ri nga khutaza hi minkarhi ya maxangu.—Swiv. 15:23.

Mukreste un’wana la nga nkulu, loyi a tolovelaneke ni vanhu vo hlayanyana lava feriweke hi vanghana va vukati, u susumeteleke ku khutaza Alex. Hi ntwela-vusiwana, u kombise leswaku Yehovha wa yi tiva ndlela leyi hi titwaka ha yona ni leswaku hi lava yini. Makwerhu loyi u te: “Eka tin’hweti ni malembe lama taka, loko u vona onge u lava munghana wa vukati, lunghiselelo ra rirhandzu ra Yehovha hi leswaku u tlhela u nghenela vukati.” Entiyisweni, a hi vanhu hinkwavo lava feriweke hi vanghana va vukati naswona va navelaka ku tlhela va nghenela vukati, va swi kotaka ku tlhela va nghenela vukati. Kambe loko Alex a anakanya hi leswi vuriweke hi makwerhu loyi, u te: “Ku tsundzuxiwa leswaku leri i lunghiselelo ra Yehovha swa ku ntshunxa leswaku u nga titwi nandzu wa leswaku a wu tshembekanga eka munghana wa wena wa vukati, kumbe eka lunghiselelo ra Yehovha ra vukati hi ku tlhela u teka enkarhini lowu taka.”—1 Kor. 7:8, 9, 39.

Mupisalema Davhida, loyi a langutaneke ni miringo ni maxangu yo tala u te: “Mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno.” (Ps. 34:15) Hakunene Yehovha a nga xi hlamula xirilo xa loyi a pfotlokeke emoyeni hi nkarhi wa kona, hi ku tirhisa Vakreste-kulobye lava nga ni ntwela-vusiwana va tlhela va wupfa, lava nga ta vula marito ya vutlhari ni lama kombisaka ku twisisa. Lunghiselelo ro tano i ra risima naswona ra pfuna.

Mpfuno Lowu Hi Wu Kumaka eMinhlanganweni Ya Vukreste

Munhu la tshikilelekeke a nga ha va ni miehleketo yo biha leyi nga endlaka leswaku a tihambanisa ni van’wana. Hambiswiritano, Swivuriso 18:1 ya lemukisa: “Loyi a tihambanisaka ni van’wana u tilavela swa yena ntsena; u ta hambana ni vutlhari hinkwabyo lebyi pfunaka.” Alex u pfumerile a ku: “Loko u feriwa hi munghana wa vukati u anakanya swilo swo tala leswi nga akiki.” U tsundzuka a ri karhi a tivutisa a ku: “‘Xana a ndzi ta va ndzi endle swin’wana? Xana a ndzi ta va  ndzi kombise ku anakanyela lokukulu ni ku twisisa?’ A ndzi nga swi lavi ku va ndzexe. A ndzi nga swi lavi ku pfumala munghana wa vukati. Swa tika ku tshika ku anakanya hi mhaka leyi hikuva siku ni siku u tshama u ri karhi u tsundzuka leswaku u wexe.”

Ku tlula rini na rini munhu loyi a nga ni gome u lava vanghana lavanene. Vanghana vo tano va kumeka hi ku olova eminhlanganweni ya vandlha. Eminhlanganweni yoleyo, hi anakanya hi mianakanyo ya Xikwembu leyinene ni leyi akaka.

Minhlangano ya Vukreste yi hi pfuna ku va ni langutelo lerinene hi swiyimo swa hina. Loko hi ri karhi hi yingisela ni ku anakanyisisa hi tindzimana ta Bibele, hi dzikisa mianakanyo ya hina eka timhaka timbirhi ta nkoka swinene—ku lweriwa ka vuhosi bya Yehovha ni ku kwetsimisiwa ka vito rakwe—ku nga ri eka maxangu ya hina. Ku tlula kwalaho, loko hi ri karhi hi dyondzisiwa malunghana na Yehovha, ha tiyisiwa hi ku tiva leswaku hambiloko vanhu van’wana va nga wu tivi nhlomulo lowu hi nga na wona kumbe va nga yi twisisi ndlela leyi hi titwaka ha yona, Yehovha wa yi twisisa. Wa swi tiva leswaku “moya wa tshoveka hikwalaho ka ku vava ka mbilu.” (Swiv. 15:13) Xikwembu xa ntiyiso xi lava ku hi pfuna naswona sweswo swa hi khutaza swi tlhela swi hi tiyisa leswaku hi ya emahlweni.—Ps. 27:14.

Loko Hosi Davhida a tshikileriwe swinene hi valala va yena, u huwelele eka Xikwembu a ku: “Moya wa mina wa tsana endzeni ka mina; mbilu ya mina yi vonaka yi hele matimba endzeni ka mina.” (Ps. 143:4) Hakanyingi maxangu ma heta munhu matimba, hambi ku n’wi tshova mbilu. Nhlomulo wa hina wu nga ha vangiwa hi vuvabyi kumbe ku vabya nkarhi wo leha. Hi nga tiyiseka leswaku Yehovha u ta hi pfuna leswaku hi tiyisela. (Ps. 41:1-3) Hambileswi namuntlha Xikwembu xi nga ha hanyisiki munhu hi singita, xi nyika la nga le nhlomulweni vutlhari ni matimba yo langutana ni xiyimo xa yena. Tsundzuka leswaku loko Davhida a tshikileriwe hi miringo u kombele mpfuno eka Yehovha. U yimbelele a ku: “Ndzi tsundzuke masiku ya khale swinene; ndzi anakanyisise hi ntirho wa wena hinkwawo; ndzi hambete ndzi anakanyisisa hi ntirho wa mavoko ya wena hi ku tirhandzela.”—Ps. 143:5.

Leswi marito lawa lama huhuteriweke ma tsariweke eRitweni ra Xikwembu swi kombisa leswaku Yehovha wa yi twisisa ndlela leyi hi titwaka ha yona. Marito wolawo ma swi tiyisekisa leswaku wa swi yingisa swikombelo swa hina. Loko hi amukela mpfuno wa Yehovha, ‘u ta hi seketela.’—Ps. 55:22.

“Khongelani Minkarhi Hinkwayo”

Yakobo 4:8 yi ri: “Tshinelani eka Xikwembu, kutani xi ta tshinela eka n’wina.” Ndlela yin’wana leyi hi nga tshinelaka eka Xikwembu ha yona i ku khongela. Muapostola Pawulo u hi khutaza leswaku hi ‘khongela minkarhi hinkwayo.’ (1 Tes. 5:17) Hambiloko swi hi tikela ku hlamusela ndlela leyi hi titwaka ha yona, “moya hi woxe wa hi kombelela hi ku konya loku nga phofuriwiki.” (Rhom. 8:26, 27) Hakunene Yehovha wa yi twisisa ndlela leyi hi titwaka ha yona.

Monika loyi a tiphinaka hi vuxaka byebyo na Yehovha u ri: “Ku khongela, ku hlaya Bibele ni dyondzo ya munhu hi yexe, swi endle leswaku ndzi swi vona leswaku Yehovha i Munghana wa mina lonkulu. U ve munhu wa xiviri eka mina, lerova ndza yi xiya ndlela leyi a ndzi pfunaka ha yona. Swa chavelela ku tiva leswaku hambiloko ndzi nga swi koti ku hlamusela ndlela leyi ndzi titwaka ha yona, wa ndzi twisisa. Ndza swi tiva leswaku musa ni mikateko ya yena i swa hilaha ku nga heriki.”

Hikwalaho, a hi amukeleni marito ya rirhandzu ni yo chavelela lama humaka eka Vakreste-kulorhi, hi tirhisa ndzayo ya musa ni switsundzuxo leswi tiyisaka ripfumelo leswi hi swi kumaka eminhlanganweni ya Vukreste naswona hi phofulela Yehovha leswi nga etimbilwini ta hina hi xikhongelo. Malunghiselelo lawa hinkwawo lama fikeke hi nkarhi, i ndlela leyi Yehovha a kombisaka ha yona leswaku wa hi khathalela. Loko Alex a vulavula hi ntokoto wa yena u ri: “Loko hi endla leswi hi faneleke hi swi endla leswaku hi ta fambisana ni swilo hinkwaswo leswi Yehovha Xikwembu a hi nyikaka swona leswaku hi tshama hi ri ni vuxaka lebyikulu na Yena, hi ta va ni ‘matimba lama tlulaka lama tolovelekeke’ lama nga ta hi pfuna ku tiyisela ndzingo wihi ni wihi lowu hi nga ha langutanaka na wona.”—2 Kor. 4:7.

[Bokisi/Xifaniso lexi nga eka tluka 18]

Nchavelelo Eka Loyi A Pfotlokeke eMoyeni

Tipisalema ti ni marito yo tala ya vanhu lava tiphofuleke lama fambisanaka ni switiyisekiso leswi phindha-phindhiweke swa leswaku hakunene Yehovha wa xi twa xirilo xa la pfotlokeke emoyeni, loyi a tshikilelekeke. Xiya tindzimana leti landzelaka:

“Ndzi tshamela ku vitana Yehovha emaxangwini ya mina, ndzi hambeta ndzi kombela mpfuno eka Xikwembu xanga. U twa rito ra mina a ri etempeleni yakwe, ku kombela ka mina ku pfuniwa emahlweni kakwe sweswi ku fike etindleveni ta yena.”—Ps. 18:6.

“Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Ps. 34:18.

“[Yehovha] u horisa vanhu lava timbilu ta vona ti vavisekeke, naswona u boha timbanga ta vona leti vavaka.”—Ps. 147:3.

[Xifaniso lexi nga eka tluka 17]

Hakunene “rito leri fikeke hi nkarhi wa kona” ri nga chavelela hi siku ra maxangu!