N’wana Wa Wena A A Ta Ku Yini?

VATSWARI: Eka nkandziyiso wa January 15, 2010, matluka 16-20, hi vulavule hi ku va mi endla minkombiso ni vana va n’wina. Xihloko lexi xi ni tinhla leti nga ta mi pfuna mi hlomisela vana va n’wina ku langutana ni mintlhontlho exikolweni. Mi nga ha endla minkombiso leyi hi nkarhi wa Dyondzo ya Ndyangu ya nimadyambu.

VANA lava nga Timbhoni ta Yehovha va langutana ni mintlhontlho yo tala. Hakanyingi lava va nghenaka na vona xikolo va va vutisa leswaku ha yini va nga hlanganyeli eka mikhuva yin’wana yo tanihi ku losa mujeko, ku tlangela masiku ya ku velekiwa ni tiholideyi. Loko n’wana wa wena a vutisiwa swivutiso swo tano, u ta hlamula njhani?

Vana van’wana lava nga Vakreste va hlamula hi ku olova va ku: “A ndzi pfumeleriwi ku endla sweswo. Swi lwisana ni vukhongeri bya mina.” Vana volavo va fanele va bumabumeriwa hikwalaho ko yima va tiyile. Tinhlamulo ta vona ti nga endla leswaku va nga vutisiwi ngopfu. Kambe, Bibele yi hi tsundzuxa leswaku hi “lunghekela ku tihlamulela emahlweni ka mani na mani la lavaka ku tiva” leswi hi swi pfumelaka. (1 Pet. 3:15) Ku endla tano swi vula swo tala ku tlula ku vula ntsena u ku, “A ndzi pfumeleriwi ku endla sweswo.” Hambiloko van’wana va nga pfumelelani na hina, van’wana va nga ha lava ku tiva swivangelo swa ku va hi endle swiboho swo karhi.

Vantshwa vo tala va Timbhoni va tirhise tibuku to tanihi leyi nge Dyondza Eka Mudyondzisi Lonkulu leswaku va hlamusela lava nghenaka na vona xikolo hi switori swa le Bibeleni. Switori leswi swi nga va pfuna ku hlamusela leswaku ha yini vana lava nga Timbhoni va endla kumbe va nga endli swilo swo karhi. Vana van’wana va swi yingisela hi vukheta switori swa le Bibeleni naswona tidyondzo to tala ta Bibele ti sunguriwe hi ndlela yoleyo. Vana van’wana swi nga ha va tikela ku yingisela xitori hinkwaxo xa Bibele. Switori swin’wana swa le Bibeleni swi nga va tikela vana lava nghenaka xikolo leswaku va swi twisisa loko swi nga hlamuseriwi. Loko Minhee la nga ni malembe ya 11 a rhambiwe hi munghana wakwe leswaku va ta tlangela siku rakwe ra ku velekiwa, u byele munghana wakwe a ku: “Bibele a yi hi byeli leswaku hi tlangela masiku ya ku velekiwa. Yohane lowo Khuvula loyi ku vulavuriwaka ha yena eBibeleni, u dlayiwile loko ku tlangeriwa siku ra ku velekiwa.” Hambiswiritano, Minhee u tsundzuka leswaku munghana wakwe swi tikomba a nga swi twisisanga leswi a n’wi hlamuleke swona.

Minkarhi yin’wana swa pfuna ku komba loyi u nghenaka na yena xikolo xifaniso kumbe xitori lexi nga eka yin’wana ya tibuku ta hina. U ta endla yini loko valawuri va xikolo va vula leswaku a va swi lavi leswaku vana va kombana minkandziyiso ya vukhongeri? Xana vana va hina va nga swi kota ku nyikela vumbhoni hi ndlela leyi humelelaka hambiloko va nga ri na yona minkandziyiso? U nga va pfuna njhani vana va wena leswaku va lunghekela ku tihlamulela?

Endlani Minkombiso Na Vona

Ku endla minkombiso ekaya swa pfuna loko vatswari va tiendla vana lava nghenaka ni vana va vona xikolo. Loko vana va ringeta ku lwela ripfumelo ra vona, vatswari va ta va bumabumela hikwalaho ka matshalatshala ya vona ni ku va komba ndlela leyi va nga ti antswisaka ha yona tinhlamulo ta vona nileswaku ha yini  sweswo swi laveka. Hi xikombiso, va tsundzuxe leswaku va tirhisa marito lawa tintangha ta vona ti nga ta ma twisisa. Joshua, mufana la nga ni malembe ya kaye, u vule leswaku vana lava a nghenaka na vona xikolo a va ma twisisi marito yo tanihi “ripfalo” ni ku “tshembeka.” Hikwalaho a a fanele a va hlamula hi ku tirhisa marito yo olova.—1 Kor. 14:9.

Vana van’wana va xikolo lava vutisaka xivutiso va nga ha heleriwa hi ku tsakela loko nhlamulo ya kona yi lehile. Vantshwa lava nga Timbhoni va nga ha endla leswaku vana va xikolo va hambeta va tsakela loko va burisana ni ku kombisana na vona. Haneul, xinhwanyetana lexi nga ni khume ra malembe, xi ri: “Vana lava ndzi nghenaka na vona xikolo va lava leswaku hi burisana ku nga ri ku va hlamusela.” Leswaku u vulavurisana na vona va vutise swivutiso u tlhela u va yingisela hi vukheta loko va vula mavonelo ya vona.

Mimbulavurisano leyi nga laha hansi yi kombisa ndlela leyi vana lava nga Vakreste va nga va hlamulaka ha yona vana lava va nghenaka na vona xikolo. A swi kali swi lava u nhlokohata mbulavurisano lowu—vana a va fani naswona swiyimo swa vona leswi nga faniki swi endla leswaku u va hlamula hi ndlela leyi hambaneke. Hikwalaho, muntshwa la nga  Mbhoni u fanele a twisisa kahle mhaka, a yi veka hi marito ya yena, naswona a yi hlamusela hi ndlela leyi fambisanaka ni xiyimo ni lava a nghenaka na vona xikolo. Loko u ri ni n’wana loyi a nghenaka xikolo, ringeta ku vulavurisana na yena hi swilo leswi.

Ku letela vana swi lava nkarhi ni matshalatshala. Vatswari lava nga Vakreste va fanele va phindha-phindha milawu ya Bibele eka vana va vona ni ku endla leswaku va hanya hi yona.—Det. 6:7; 2 Tim. 3:14.

Eka Dyondzo ya n’wina ya Ndyangu ya nimadyambu leyi landzelaka, ringetani ku tirhisa mimbulavurisano leyi kombisiweke laha ni vana va n’wina. Vonani ndlela leyi leswi swi pfunaka ha yona. Tsundzukani leswaku xikongomelo xa kona a hi ku nhlokohata tinhlamulo kumbe marito. Entiyisweni mi nga ha phindha-phindha mbulavurisano wolowo, mi hlamula hi ndlela leyi hambaneke ni leswi tsariweke kutani mi vona ndlela leyi vana va n’wina va nga ta hlamula ha yona. Loko va ri karhi va ringeta ku hlamusela leswaku ripfumelo ra vona ri sekeriwe kwihi, va pfuneni leswaku va antswisa tinhlamulo ni vuswikoti bya vona. Hi ku famba ka nkarhi mi ta dyondzisa vana va n’wina ku tiyimela eka leswi va swi pfumelaka loko va ri ni lava va nghenaka na vona xikolo, vaakelani ni vadyondzisi.

[Bokisi/Swifaniso leswi nga eka tluka 4, 5]

KU TLANGELA SIKU RA KU VELEKIWA

Mary: Xewani John. Ndzi tsakela ku ku rhamba exinkhubyanini xa mina.

John: Ndza nkhensa ku va u anakanye hi mina Mary. Kambe i xinkhubyana xa yini lexi u ndzi rhambelaka eka xona?

Mary: I xa ku tlangela siku ra mina ra ku velekiwa. Xi ta va xi tsakisa swinene.

John: U ta ndzi khomela, a ndzi nge swi koti ku ta hikuva a ndzi ma tlangeli masiku ya ku velekiwa.

Mary: Ha yini? Phela swinkhubyana swa tsakisa swinene.

John: Na mina ndza swi rhandza swinkhubyana. Kambe hina Timbhoni ta Yehovha hi lava ku tekelela Yesu, a nga ri tlangelanga siku rakwe ra ku velekiwa. Kutani hi yona mhaka leyi ndzi nga ma tlangeriki masiku ya ku velekiwa.

Mary: Kambe, xana u nge ti exinkhubyanini ku nga ri hi xikongomelo xa ku ta tlangela siku ra mina ra ku velekiwa naswona u nga ndzi khomelanga nyiko?

John: A ndzi nge swi koti hikuva i swa nkoka ku va ndzi landzela leswi Bibele yi swi vulaka. Naswona yi vula leswaku valandzeri va Yesu a va ma tlangelanga masiku ya ku velekiwa naswona a va yanga eswinkhubyanini sweswo.

Mary: Xana u vula leswaku a ndzi fanelanga ndzi tlangela siku ra mina ra ku velekiwa?

John: Sweswo swi le ka wena. Hambiswiritano, ekaya hi hlawule ku ka hi nga ma tlangeli masiku ya ku velekiwa.

Mary: Xana vatswari va wena a va ku nyiki tinyiko?

John: Va ndzi nyika, kambe a va rindzi kukondza ku va siku ra mina ra ku velekiwa. Va ndzi nyika tinyiko nkarhi wun’wana ni wun’wana lowu va wu lavaka. Kambe, xana u nga swi tsakela ku tiva leswaku swi sungule rini ku tlangela masiku ya ku velekiwa?

Mary: Ina, ndzi nga swi tsakela.

John: Mundzuku ndzi ta ku byela xitori xin’wana lexi vulavulaka hi siku ra ku velekiwa lexi humeleleke khale swinene.

KU YIMBELELA RISIMU RA RIXAKA

Gail: Ha yini u nga yimbeleli risimu ra rixaka?

Claire: Ndzi ta ku hlamula, kambe ndzi kombela u rhanga u ndzi byela leswaku ha yini u yimbelela risimu ra rixaka.

Gail: Hikuva ndzi rhandza tiko ra ka hina.

Claire: Na mina ndza ri rhandza tiko ra ka hina. Kambe, xana a wu ma rhandzi matiko laman’wana?

Gail: Ndza ma rhandza.

Claire: Kambe a hi yimi kutani hi yimbelelela un’wana ni un’wana risimu kumbe nchumu wihi na wihi lowu hi wu xiximaka ni ku wu rhandza, a swi tano ke?

Gail: Ina a swi tano. Ndzi ehleketa leswaku a ndzi swi tivi leswaku ha yini ndzi yimbelela risimu ra rixaka, kumbexana ndzi yimbelela hileswi vanhu van’wana va yimbelelaka.

Claire: Vanhu vo tala va anakanya leswaku tiko ra ka vona ra antswa ku tlula matiko man’wana. Va nga endlela tiko ra ka vona xilo xin’wana ni xin’wana. Kambe mina a ndzi swi voni tano. A ndzi nge pfuki ndzi hlanganyele enyimpini ni ku fela tiko ra ka hina. Xikwembu a xi rhandzi tinyimpi ni moya wa ku teka tiko ra rikwenu ri tlakukile ku tlula man’wana, na mina ndzi tano. Hambileswi ndzi rhandzaka tiko ra rikwerhu, ndzi hlawule ku ka ndzi nga yimbeleli risimu ra rixaka.

Gail: Ndza ku twisisa.

Claire: Ndza tsaka leswi u swi twisisaka. Naswona loko u lava ku tiva leswaku ha yini ndzi endla kumbe ndzi nga endli swilo swo karhi, ndzi vutise. Hambiswiritano, Bibele yi vula leswaku khale ka khaleni, hosi ya Babilona yi lerise vanhu leswaku va nkhinsamela xifaniso. Van’wana a va nkhisamanga hambileswi a swi ta veka vutomi bya vona ekhombyeni.

Gail: Ku humelele yini ha vona?

Claire: Ndzi ta ku byela ha vona hi nkarhi wo wisa.

TIPOLITIKI TA XIKOLO

Mike: Tim, u anakanya leswaku i mani la nga ta va presidente ya tlilasi ya hina?

Tim: A nga kona ni un’we wa vadyondzi loyi ndzi nga ta n’wi hlawula.

Mike: Ha yini?

Tim: Ana se ndzi ni murhangeri lonene. Tanihi Mukreste ndzi endle xitshembiso xo landzela Yesu. Hikwalaho a ndzi nge hlawuli murhangeri un’wana. Wa swi tiva leswaku ha yini ndzi ehleketa leswaku Yesu i Murhangeri la hetisekeke?

Mike: Doo! Naswona a ndzi na mhaka na swona.

Tim: Swi lulamile, loko u lava ku swi tiva, ndzi nga swi tsakela ku ku byela.

[Xifaniso]

“Xewani John. Ndzi tsakela ku ku rhamba eka xinkhubyana xo tlangela siku ra mina ra ku velekiwa”

[Xifaniso lexi nga eka tluka 3]

“Ha yini u nga wu losi mujeko?”