Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Vukhongeri lebyi pfumelaka eka dyondzo ya ku kunguhateriwa byi huma eka mani?

Vukhongeri lebyi sunguriweke hi Calvin byi dyondzisa dyondzo ya ku kunguhateriwa. Tidyondzo ta Mulweri wa Fambiselo Lerintshwa eKerekeni ya Khatoliki, Jean Cauvin (John Calvin), ti tinyike matimba etikerekeni ta Maprotestente, to tanihi Reformed, Presbeteriya, Congregational na Puritan.—9/1, matluka 18-21.

• Kayini u n’wi kume kwihi nsati?

Nsati wa Kayini u fanele a ri n’wana wa Evha hikuva u veleke “vana va majaha ni va vanhwanyana.” (Gen. 5:4)—9/1, tluka 25.

• Hi yihi ntsumi leyi Xikwembu xi yi rhumeke emahlweni ka Vaisrayele loko xi va humesa aEgipta? (Eks. 23:20, 21)

Swa twala ku pfumela leswaku ntsumi leyi a yi ri ni ‘vito ra Yehovha endzeni ka yona’ a ku ri N’wana wa Xikwembu wa mativula loyi endzhaku ka nkarhi a veke Yesu.—9/15, tluka 21.

• Ha yini buku ya Vakorinto vo Sungula yi vulavula hi nyama leyi nyikeriweke eka swifaniso swa hava?

A ku endliwa magandzelo hi swifuwo etitempeleni ta Magriki ni Marhoma, kambe nyama ya swona leyi a yi nga dyiwi enkhubyeni wa kona a yi xavisiwa etimakete ta mani na mani leti xavisaka nyama. Vakreste a va nga hlanganyeli evugandzerini bya vuhedeni; kambe a va nga fanelanga va teka nyama leyi humaka etitempeleni teto tanihi leyi nyameke loko yi xavisiwa emakete. Muapostola Pawulo u tsale a ku: “Dyanani hinkwaswo leswi xavisiwaka evuxaviselweni bya nyama, mi nga vutisisi nchumu hikwalaho ka ripfalo ra n’wina; hikuva ‘misava ni leswi swi teleke eka yona i swa Yehovha.’” (1 Kor. 10:25, 26)—10/1, tluka 12.

• Malunghana ni vugandzeri bya ntiyiso, hi swihi swivangelo swin’wana swa ku tiyimelela leswi Xikwembu xi nga swi amukeriki?

‘Wa tika swinene. A ndzi swi lavi ku wu endla. Ndzi khomeke ngopfu. A ndzi faneleki. Munhu wo karhi u ndzi khunguvanyisile.’ Sweswo a hi swivangelo leswi twalaka swo tiyimelela swo tshika ku endla leswi Xikwembu xi hi lerisaka swona.—10/15, matluka 12-15.

• Hi tihi tindlela tin’wana leti ha tona u nga endlaka leswaku minhlangano ya Vukreste yi va leyi akaka eka wena ni le ka van’wana?

Lunghiselela ka ha ri emahlweni. Vana kona nkarhi na nkarhi. Fika hi nkarhi. Tana ni leswi u nga ta swi tirhisa. Papalata swikavanyeto. Hlamula. Komisa tinhlamulo ta wena. Endla swiavelo swa wena. Bumabumela lava hlamuleke. Bula ni vanhu minhlangano yi nga si sungula niloko se yi herile.—10/15, tluka 22.

• Nhlokonho, leyi sweswi yi katsaka vuvabyi lebyi vuriwaka Hansen’s disease, ku vulavuriwe hi yona eka rungula rihi ra le Bibeleni leri katsaka xinhwanyetana?

Tihosi ta Vumbirhi ndzima ya vuntlhanu yi vulavula hi xinhwanyetana xa Muisrayele lexi a xi ri nandza endlwini ya ndhuna ya vuthu ra Vaasiriya leyi a yi vuriwa Namani. Leswi a a yi ri ni vuvabyi bya nhlokonho, xi n’wi kombele leswaku a ya eka muprofeta Elixa leswaku a ta hanyisiwa.—11/1, tluka 22.

• Hi nga dyondza yini emhakeni ya ku va Aroni a hluriwe hi ntshikilelo wa tintangha?

Loko Muxe a fambile, Vaisrayele va kombele Aroni leswaku a va endlela xikwembu. U tsandzeke ku ala hiloko a xi endla. Leswi swi kombisa leswaku a hi vantshwa ntsena lava nga langutanaka ni ntshikilelo wa tintangha. Wu nga khumba hambi ku ri vanhu lavakulu lava lavaka ku endla leswinene. Hi fanele hi lwisana ni ntshikilelo wa tintangha.—11/15, tluka 8.

• Hi yihi mhaka leyi nga ntiyiso ni leyi nga mavunwa?

Sathana i munhu wa xiviri: i ntiyiso. (2 Kor. 11:14) Loko hinkwerhu hi fa hi ya exivandleni xa moya: i mavunwa. (Ekl. 9:5) Tintsumi to tshembeka ta khathala hi hina: i ntiyiso. (Ps. 34:7) Yesu u ringana ni Xikwembu: i mavunwa. (1 Kor. 11:3)—12/1, matluka 8-9.