Vona Vito Ra Xikwembu eNkoveni

ST. MORITZ. Xana vito leri u ri toloverile? Kumbexana u ri toloverile hileswi ri nga vito ra ndhawu leyi dumeke swinene leyi nga eNkoveni wa Engadine le tikweni ra Switzerland, laha vanhu va yaka kona loko va teke masiku yo wisa. Kambe St. Moritz i ndhawu leyi ku ringana malembe yo tala yi kokeke vanhu ku ya enkoveni lowu wo saseka lowu nga exikarhi ka tintshava ta Alps leti funengetiwaka hi gamboko, leti nga edzonga-vuxa bya Switzerland ekusuhi ni ndzilakano wa tiko ra Italy. Nakambe enkoveni wolowo ku ni Ntanga wa Swiharhi wa Switzerland, laha vuxongi bya ntumbuluko bya ndhawu ni swimilana swin’we ni swiharhi swa yona swo tala swi dzunisaka Muvumbi Lonkulu, Yehovha. (Ps. 148:7-10) Kambe nchumu wun’wana lowu dzunisaka Yehovha i mukhuva wun’wana wa khale lowu sunguleke exikarhi ka lembe-xidzana ra vu-17.

Nchumu wun’wana lowu nga tolovelekangiki lowu nga kona etindlwini to tala enkoveni wolowo wu nga ku koka rinoko. Swi tolovelekile ku vona vito  ra Xikwembu ri kovotliwe emahlweni ka yindlu, ko fana ni le henhla ka nyangwa. Khale ka khaleni, a ku ri mukhuva wa kona ku khavisa ehandle ka tiyindlu hi ku tsala marito, kumbexana hi ku ma penda kumbe ku ma kovotla ekhumbini kumbe eribyeni. Laha u vona yindlu leyi nga eximutanini xa Bever leyi tsariweke marito wolawo. Loko ma hundzuluxeriwa ma vula leswi: “Hi lembe ra 1715. Yehovha i masungulo, naswona Yehovha i makumu. Swilo hinkwaswo swi nga endliwa hi ku pfuniwa hi Xikwembu, naswona ku hava lexi nga endliwaka handle ka xona.” Vito ra Xikwembu ri humelela kambirhi eka marito lawa lama tsariweke khale.

U nga tlhela u vona marito man’wana lama tsariweke khale swinene eximutanini xa Madulain. Marito ya kona ma vula leswi: “Pisalema 127. Handle ka loko Yehovha a aka yindlu, i swa hava leswi vaaki va yona va tirheke hi matimba eka yona. Lucius Rumedius. Hi lembe ra 1654.”

Ha yini vito ra Xikwembu ri tsariwe erivaleni hi ndlela leyi enkoveni lowu? Hi nkarhi wa Tsima ro Lwela Fambiselo Lerintshwa ra Kereke ya Khatoliki, ku kandziyisiwe Bibele ya Xirhomanishi, ku nga ririmi leri humaka eka Xilatini leri vulavuriwaka aEngadine. Entiyisweni, a ku ri buku yo sungula leyi hundzuluxeriweke hi ririmi rero. Leswi vaaki vo tala va kwalaho va tsakisiweke ngopfu hi leswi va swi hlayeke eRitweni ra Xikwembu, va tsale emakhumbini ya le handle ya tiyindlu ta vona mavito ya vona ni mintshaho ya le Bibeleni leyi a yi ri ni vito ra Xikwembu.

Ku fikela namuntlha marito wolowo ma ha huwelela ni ku dzunisa vito ra Yehovha hambileswi se ku hundzeke malembe yo tala ma tsariwe etindlwini. Vaendzi ni vaaki va le nkoveni lowu va swi tsakela ku dyondza leswi engetelekeke malunghana na Yehovha Xikwembu xo lulama, hi ku ya emuakweni wun’wana lowu tsariweke vito rakwe, ku nga Holo ya Mfumo ya Timbhoni ta Yehovha eBever.

[Laha Xifaniso Xi Humaka Kona eka tluka 7]

© Stähli Rolf A/age fotostock