Rhandza Ku Lulama Hi Mbilu Ya Wena Hinkwayo

“U rhandze ku lulama.”—PS. 45:7.

1. I yini leswi nga hi pfunaka ku famba “emintileni ya ku lulama”?

YEHOVHA u kongomisa vanhu vakwe “emintileni ya ku lulama” hi ku tirhisa Rito rakwe ni moya wakwe lowo kwetsima. (Ps. 23:3) Hambiswiritano, leswi hi nga hetisekangiki hi tala ku hambuka emintileni yoleyo. Swi lava matshalatshala lamakulu ku va munhu a tlhela a endla leswinene. I yini leswi nga hi pfunaka leswaku hi humelela? Ku fana na Yesu, hi fanele hi rhandza ku endla leswinene.—Hlaya Pisalema 45:7.

2. ‘Mintila ya ku lulama’ i yini?

² ‘Mintila ya ku lulama’ i yini? Ntila i xindledyana xo khuma. ‘Mintila’ yoleyo yi lawuriwa hi milawu yo lulama ya Yehovha. Hi Xiheveru ni Xigriki, rito leri nge “vululami” ri vula ku namarhela milawu ya mahanyelo. Leswi Yehovha a nga “ndhawu yo lulama ya ku tshama eka yona,” vagandzeri vakwe va swi langutela hi ntsako ku va a va kongomisa entileni wo lulama wa mahanyelo lowu va faneleke va famba eka wona.—Yer. 50:7.

3. Hi nga swi dyondza njhani swilo swo tala malunghana ni ku lulama ka Xikwembu?

³ Hi nga kumiwa hi ri lava amukelekaka eka Xikwembu ntsena loko hi tikarhatela ku hanya hi milawu ya xona yo lulama. (Det. 32:4) Sweswo hi sungula ku swi endla loko hi dyondza hinkwaswo leswi hi nga swi kotaka hi Yehovha Xikwembu eRitweni rakwe, ku nga Bibele. Loko hi hambeta hi dyondza ni ku tshinela eka yena siku ni siku, hi ta ya hi ku rhandza swinene ku lulama kakwe. (Yak. 4:8) Nakambe hi fanele hi tirhisa nkongomiso wa Rito ra Xikwembu leri huhuteriweke loko hi lava ku endla swiboho swa nkoka evuton’wini.

Lava Ku Lulama Ka Xikwembu

4. I yini leswi katsekaka eku laveni ka ku lulama ka Xikwembu?

⁴ Hlaya Matewu 6:33. Ku lava ku lulama ka Xikwembu a swi katsi ku heta nkarhi wo tala entirhweni wo chumayela mahungu lamanene ya Mfumo ntsena. Leswaku ntirho wa hina wo kwetsima wu amukeleka eka Yehovha, mahanyelo ya hina ya siku ni siku ma fanele ma fambisana ni milawu yakwe leyi tlakukeke. I yini leswi hinkwavo lava lavaka ku lulama ka Yehovha va faneleke va swi endla? Va fanele va “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Efe. 4:24.

5. I yini leswi nga ta hi pfuna ku hlula ku hela matimba?

⁵ Loko hi ri karhi hi tikarhatela ku hanya hi milawu ya Xikwembu yo lulama, minkarhi yin’wana hi nga ha hela matimba hikwalaho ka swihoxo swa hina vini. I yini leswi nga hi pfunaka ku hlula ku hela matimba loku tsanisaka miri ni ku dyondza ku rhandza leswo lulama ni ku hanya ha swona? (Swiv. 24:10) Hi fanele hi khongela eka Yehovha nkarhi na nkarhi “hi timbilu ta ntiyiso exitiyisekisweni lexi heleleke xa ripfumelo.” (Hev. 10:19-22) Ku nga khathariseki leswaku hi Vakreste lava totiweke kumbe hi va ntshungu lowukulu, hi kombisa ripfumelo eka gandzelo ra nkutsulo ra Yesu Kreste ni le mintirhweni leyi a yi endlaka tanihi Muprista wa hina Lonkulu. (Rhom. 5:8; Hev. 4:14-16) Ndlela leyi ngati leyi halatiweke ya Yesu yi tirhaka ha yona yi hlamuseriwe enkandziyisweni wo sungula wa magazini lowu. (1 Yoh. 1:6, 7) Xihloko xa kona xi te: “I ntiyiso leswaku  [loko] nchumu wa ribungu kumbe wo tshwuka [wu] langutiwa eka nghilazi yo tshwuka endhawini leyi nga ni ku vonakala, nchumu wolowo wu ta vonaka wu ri wo basa; kutani hambiloko swidyoho swa hina swi ri swa ribungu kumbe swo tshwuka, loko hi ta laha Xikwembu xi nga ta swi languta kona hi ngati ya Kreste, swi ta tekiwa tanihi swo basa.” (July 1879, tl. 6) Hakunene swa tsakisa leswi Yehovha a hakeleleke ku kutsuriwa ka hina hi ku tirhisa N’wana wakwe loyi a rhandzekaka!—Esa. 1:18.

Kambisisa Mahavelo Ya Wena Ya Moya

6. Ha yini swi ri swa nkoka swinene ku va hi kambela mahavelo ya hina ya moya?

⁶ Minkarhi hinkwayo hi fanele hi vehela “xisirhelelo xa xifuva xa ku lulama,” hikuva i xa nkoka swinene eka mahavelo ya moya lama humaka eka Xikwembu. (Efe. 6:11, 14) Ku nga khathariseki leswaku ha ha ku tinyiketela eka Yehovha kumbe se hi ni malembe yo tala hi n’wi tirhela, i swa nkoka swinene leswaku hi kambisisa mahavelo ya hina ya moya siku ni siku. Ha yini? Hikuva Diyavulosi ni madimona yakwe va lahleriwe laha misaveni. (Nhlav. 12:7-12) Sathana u hlundzukile naswona wa swi tiva leswaku nkarhi wakwe wu komile. Hikwalaho, u va hlasela swinene vanhu va Xikwembu. Kutani i swa nkoka ku tshama hi vehele “xisirhelelo xa xifuva xa ku lulama.”

7. Hi ta tikhoma njhani loko hi swi xiya leswaku “xisirhelelo xa xifuva xa ku lulama” i xa nkoka?

⁷ Xisirhelelo xa xifuva xi sirhelela mbilu ya xiviri. Leswi hi nga hetisekangiki, mbilu ya hina yo fanekisela yi tala ku hi kanganyisa ni ku hi vangela khombo. (Yer. 17:9) Tanihi leswi mbilu ya hina yi voyameleke eku endleni ka leswo biha, i swa nkoka leswaku hi yi letela. (Gen. 8:21) Loko hi swi xiya leswaku “xisirhelelo xa xifuva xa ku lulama” i xa nkoka, a hi nge xi hluvuli minkarhi yin’wana hi ku hlawula vuhungasi lebyi nga ni swilo leswi Xikwembu xi swi vengaka; naswona a hi nge tsakeli ku ehleketisisa hi ku endla xidyoho. A hi nge tlangisi nkarhi wo tala hi ku hlalela thelevhixini. Ematshan’weni ya sweswo, hi ta ya emahlweni hi tikarhatela ku endla leswi tsakisaka Yehovha. Hambiloko ho tshuka hi khuguleka hi wa hi ku ehleketa swilo swa nyama leswi nga lulamangiki swa xinkarhana, hi ta tlhela hi pfuka hi ku pfuniwa hi Yehovha.—Hlaya Swivuriso 24:16.

8. Ha yini hi lava “xitlhangu lexikulu xa ripfumelo”?

⁸ Rin’wana ra mahavelo ya hina ya moya i “xitlhangu lexikulu xa ripfumelo.” Xi hi pfuna “ku timela . . . miseve hinkwayo leyi pfurhaka ya lowo homboloka.” (Efe. 6:16) Kutani ripfumelo ni ku rhandza Yehovha hi mbilu hinkwayo swi hi pfuna ku endla leswo lulama ni ku tshama endleleni leyi yisaka evuton’wini lebyi nga heriki. Loko hi hambeta hi dyondza ku rhandza Yehovha, hi ta ya hi byi teka byi ri bya nkoka vululami byakwe. Kambe ku vuriwa yini hi ripfalo ra hina? Ri hi pfuna njhani loko hi tikarhatela ku rhandza vululami?

Tshama U Ri Ni Ripfalo Lerinene

9. Hi vuyeriwa njhani hi ku tshama hi ri ni ripfalo lerinene?

⁹ Loko hi khuvuriwa, hi kombele Yehovha leswaku a hi nyika “ripfalo lerinene.” (1 Pet. 3:21) Leswi hi kombisaka ripfumelo eka nkutsulo, ngati ya Yesu yi funengeta swidyoho swa hina naswona hi tiphina hi ku va vanhu lava amukelekaka  eka Xikwembu. Hambiswiritano, hi fanele hi tshama hi ri ni ripfalo lerinene leswaku hi tshama hi ri lava amukelekaka eka xona. Loko minkarhi yin’wana ripfalo ra hina ri hi hehla ni ku hi lemukisa, hi fanele hi tsaka leswaku ri tirha kahle. Sweswo swi kombisa leswaku ripfalo ra hina a ri si tlanyala etindleleni ta Yehovha to lulama. (1 Tim. 4:2) Kambe ripfalo ri nga tlhela ri va pfuna hi ndlela yin’wana lava lavaka ku rhandza vululami.

10, 11. (a) Vula ntokoto lowu kombisaka leswaku ha yini hi fanele hi yingisa ripfalo ra hina leri leteriweke hi Bibele. (b) Ha yini ku rhandza vululami swi hi tisela ntsako lowukulu?

¹⁰ Loko hi endla swo biha, ripfalo ra hina ri nga ha hi avanyisa kumbe ri hi kingindza. Muntshwa un’wana u hambuke “emintileni ya ku lulama.” U godzomberiwe hi swifaniso swo navetisa rimbewu naswona u sungule ku dzaha mbangi. U titwe nandzu loko a ya eminhlanganweni naswona u tivone a fana ni mukanganyisi loko a ya ensin’wini, kutani u tshike ku ya eminhlanganweni ni le nsin’wini. U te: “A ndzi nga swi tivi leswaku ripfalo ra mina ri ta ndzi avanyisa hikwalaho ka swiendlo swa mina.” U tlhele a ku: “Ndzi hanye hi ndlela yoleyo yo biha kwalomu ka mune wa malembe.” Kutani u sungule ku ehleketa hi ku tlhelela evandlheni. Hambileswi a a ehleketa leswaku Yehovha a nge xi yingisi xikhongelo xakwe, u khongerile a kombela ndzivalelo. Ku nga si hela timinete ta khume a khongerile, u endzeriwe hi mana wakwe naswona u n’wi khutaze ku tlhelela evandlheni. U ye eHolweni ya Mfumo naswona u kombele nkulu un’wana leswaku a dyondza na yena. Hi ku famba ka nkarhi u khuvuriwile naswona u nkhensa Yehovha hileswi a n’wi poniseke.

¹¹ A swi kanakanisi leswaku hi vuyeriwile hi ku endla leswi lulameke. Loko hi ri karhi hi dyondza ku rhandza leswi lulameke ni ku swi endla hi xitalo, hi kuma ntsako lowukulu hi ku endla leswi tsakisaka Tata wa hina wa le tilweni. Nakambe ehleketa leswaku ra ta siku leri vanhu hinkwavo va nga ta ka va nga ha hehliwi hi ripfalo ra vona; va ta kombisa vumunhu bya Xikwembu hi ndlela leyi hetisekeke. Hikokwalaho, a hi ngheniseni ku rhandza vululami evuentweni bya timbilu ta hina xisweswo hi tsakisa Yehovha.—Swiv. 23:15, 16.

12, 13. Hi nga ri letela njhani ripfalo ra hina?

¹² Hi nga endla yini leswaku hi letela ripfalo ra hina? Loko hi hlaya Matsalwa ni minkandziyiso leyi sekeriweke eBibeleni, i swa nkoka ku tsundzuka leswaku “mbilu ya lowo lulama ya anakanyisisa leswaku a ta hlamula.” (Swiv. 15:28) Xiya ndlela leyi leswi swi vuyerisaka ha yona loko hi langutane ni swivutiso leswi khumbaka ntirho. Loko ntirho wo karhi wu lwisana hi ku kongoma ni swilaveko swa Matsalwa, vunyingi bya hina hi hatlisela ku yingisa nkongomiso wa hlonga ro tshembeka ni ro tlhariha. Hambiswiritano, loko swi nga ri erivaleni leswaku ntirho wo karhi wa amukeleka kumbe a wu amukeleki, hi fanele hi kuma milawu ya Bibele leyi tirhaka emhakeni yoleyo kutani hi khongela ha yona. * Leswi swa tirha eka milawu yo fana ni leyi yi hi khutazaka ku papalata ku khunguvanyisa ripfalo ra van’wana. (1 Kor. 10:31-33) Hi fanele hi yi tekela enhlokweni milawu leyi ngopfu-ngopfu yi  khumbaka vuxaka bya hina ni Xikwembu. Loko Yehovha a ri wa xiviri eka hina, hi ta tivutisa hi ku, ‘Xana loko ndzo endla ntirho lowu swi ta n’wi khunguvanyisa Yehovha ni ku n’wi twisa ku vava?’—Ps. 78:40, 41.

¹³ Loko hi lunghiselela Dyondzo ya Xihondzo xo Rindza kumbe Dyondzo ya Bibele ya Vandlha, hi fanele hi tsundzuka ku anakanyisisa hi rungula ra kona. Xana minkarhi hinkwayo hi hatlisela ku khwatihata nhlamulo ya xivutiso xa dyondzo kutani hi hundzela eka ndzimana leyi landzelaka? Ku lunghiselela hi ndlela leyi swi nga ha endla leswaku rirhandzu ra leswo lulama ri nga dziki etimbilwini ta hina kumbe ku endla leswaku ripfalo ra hina ri nga tirhi kahle. Loko hi lava ku rhandza vululami, hi fanele hi dyondza hi vuenti ni ku anakanyisisa hi leswi hi swi dyondzaka eRitweni ra Xikwembu. Ku dyondza ku rhandza vululami hi timbilu ta hina hinkwato swi lava matshalatshala.

Ndlala Ni Torha Ra Leswo Lulama

14. Yehovha Xikwembu na Yesu Kreste va lava leswaku hi titwa njhani hi ntirho wa hina wo kwetsima?

¹⁴ Yehovha Xikwembu na Yesu Kreste va lava leswaku hi tsaka loko hi ri karhi hi endla ntirho wa hina wo kwetsima. I yini leswi nga ta hi endla hi tsaka? I ku rhandza leswo lulama. EDyondzweni yakwe ya le Ntshaveni, Yesu u te: “Va tsaka lava nga ni ndlala ni torha ra leswo lulama, hikuva va ta xurha.” (Mat. 5:6) Xana marito lawa ma vula yini eka lava va navelaka ku rhandza leswo lulama?

15, 16. Hi tihi tindlela leti ndlala ni torha ra moya swi nga ta enerisiwa ha tona?

¹⁵ Misava leyi hi hanyaka eka yona yi fumiwa hi lowo homboloka. (1 Yoh. 5:19) Loko hi hlaya phepha-hungu etikweni rin’wana ni rin’wana, hi kuma swiviko swa tihanyi ni madzolonga yo tala swinene. Munhu loyi a rhandzaka leswo lulama swi n’wi tsema nhlana ku anakanyisisa hi ndlela ya tihanyi leyi vanhu va khomaka van’wana ha yona. (Ekl. 8:9) Tanihi leswi hi rhandzaka Yehovha, ha swi tiva leswaku hi yena ntsena loyi a nga enerisaka ndlala ni torha ra moya ra vanhu lava navelaka ku dyondza leswo lulama. Lava nga xi chaviki Xikwembu va ta lovisiwa ku nga ri khale naswona varhandzi va leswo lulama a va nge he tlheli va vangeriwa nhlomulo hi vanhu lava tlulaka nawu ni hi swiendlo swa vona leswo biha. (2 Pet. 2:7, 8) Hakunene vanhu va ta kuma ntshunxeko lowukulu!

¹⁶ Tanihi malandza ya Yehovha ni valandzeri va Yesu Kreste, ha swi tiva leswaku hinkwavo lava nga ni ndlala ni torha ra leswo lulama “va ta xurha.” Va ta enerisiwa hi ku helela hi ku tirhisa lunghiselelo ra Xikwembu ra matilo lamantshwa ni misava leyintshwa laha ‘eka swona ku nga ta va ni ku lulama.’ (2 Pet. 3:13) Kutani hi nga hetiwi matimba kumbe hi tsemiwa nhlana hileswi ku tshikileriwa ka vanhu ni madzolonga swi siveke vululami emisaveni leyi ya Sathana. (Ekl. 5:8) Yehovha, La nge Henhla-henhla, wa swi tiva leswi humelelaka naswona ku nga ri khale u ta kutsula varhandzi va leswo lulama.

Vuyeriwa Hi Ku Rhandza Leswo Lulama

17. Hi yihi mikateko yin’wana leyi kumiwaka hi lava rhandzaka leswo lulama?

¹⁷ Pisalema 146:8 yi kandziyisa vuyelo lebyikulu bya ku famba endleleni yo lulama. Mupisalema u yimbelerile a ku: “Yehovha u rhandza lavo lulama.” Ehleketa hi mhaka leyi. Hosi leyi Lawulaka ya vuako hinkwabyo ya hi rhandza hi leswi hi rhandzaka leswo lulama! Hikwalaho ka rirhandzu ra Yehovha, ha tiyiseka leswaku u ta hi nyika swilaveko swa hina swa nyama loko hi rhangisa Mfumo evuton’wini bya hina. (Hlaya Pisalema 37:25; Swivuriso 10:3.) Eku heteleleni, varhandzi va leswo lulama hi vona lava nga ta tshama eka pulanete leyi. (Swiv. 13:22) Nkateko lowu nga ta kumiwa hi vunyingi bya vanhu va  Xikwembu hileswi va hanyeke hi leswo lulama, ku ta va ntsako lowukulu ni vutomi lebyi nga heriki emisaveni yo xonga ya paradeyisi. Hambi ku ri namuntlha, lava rhandzaka ku lulama ka Xikwembu va vuyeriwa hi ku va ni ku rhula ka mianakanyo loku endlaka leswaku va va ni vun’we emindyangwini ni le mavandlheni ya vona.—Filp. 4:6, 7.

18. I yini leswi hi faneleke hi hambeta hi swi endla loko ha ha rindzele siku ra Yehovha?

¹⁸ Loko ha ha rindzele ku fika ka siku lerikulu ra Yehovha, hi fanele hi hambeta hi lava ku lulama kakwe. (Sof. 2:2, 3) Hikwalaho, a hi kombiseni leswaku ha ti rhandza swinene tindlela to lulama ta Yehovha Xikwembu. Sweswo swi katsa ku tshama hi vehele “xisirhelelo xa xifuva xa ku lulama” xi tiya leswaku xi sirhelela mbilu ya hina yo fanekisela. Hi fanele hi tlhela hi hlayisa ripfalo lerinene, leri nga ta hi tsakisa swin’we ni ku tsakisa mbilu ya Xikwembu xa hina.—Swiv. 27:11.

19. I yini leswi hi faneleke hi tiyimisela ku swi endla naswona ku ta vulavuriwa hi yini exihlokweni lexi landzelaka?

¹⁹ “Mahlo [ya Yehovha] ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikr. 16:9) Hakunene marito lawa ma hi chavelela tanihi leswi hi endlaka leswo lulama emisaveni leyi hasahasa, madzolonga ni vuhomboloki swi yaka swi nyanya eka yona! I ntiyiso leswaku tindlela ta hina to lulama ti nga ha hlamarisa vanhu va ntsandza-vahlayi lava tihambaniseke ni Xikwembu. Kambe ha vuyeriwa swinene hi ku namarhela vululami bya Yehovha. (Esa. 48:17; 1 Pet. 4:4) Kutani a hi tiyimiseleni hi mbilu leyi heleleke ku hambeta hi kuma ntsako hi ku rhandza leswo lulama ni ku swi endla. Hambiswiritano, ku va ni mbilu leyi heleleke swi katsa ni ku venga ku kala nawu. Xihloko lexi landzelaka xi ta hi kombisa leswaku sweswo swi vula yini.

[Nhlamuselo ya le hansi]

U Nga Hlamula Njhani?

• Ha yini ku xiya nkoka wa nkutsulo swi laveka leswaku hi kota ku rhandza leswo lulama?

• Ha yini swi ri swa nkoka leswaku hi vehela “xisirhelelo xa xifuva xa ku lulama”?

• Hi nga ri letela njhani ripfalo ra hina?

[Swivutiso Swa Dyondzo]

[Xifaniso lexi nga eka tluka 26]

Ripfalo leri leteriweke ri hi pfuna ku hlamula swivutiso swa malunghana ni ntirho