Ku Landzela Kreste, Murhangeri Loyi A Hetisekeke

VANHU lava landzelaka vafumi lava nga vanhu va nyama hakanyingi va hela matimba. Hambiswiritano, lava tivekaka ehansi ka vurhangeri bya Kreste a va heli matimba nikatsongo. Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.” (Mat. 11:28, 29) Ndlela leyi Yesu a rhangelaka ha yona ya phyuphyisa naswona ya khutaza. U khathala swinene hi swisiwana ni lava tshikileriwaka naswona wa va rhamba leswaku va ta tlhandleka joko rakwe ro olova ehenhla ka vona. Kambe, i yini leswi katsekaka eku landzeleni ka nkongomiso wa Yesu?

Muapostola Petro u tsale a ku: “Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Pet. 2:21) I swa nkoka hi ndlela yihi eka hina ku landzelerisisa mikondzo ya Yesu? Anakanya u ri exikarhi ka ntlawa wa vanhu lava faneleke va tsemakanya ndhawu leyi fuhlekiweke tibomo naswona i munhu un’we ntsena exikarhi ka n’wina loyi a tivaka ndlela leyi sirhelelekeke yo tsemakanya ha yona. Xana a wu nga ta landzelerisisa mikondzo yakwe hambi ku ri ku kandziya laha a kandziyaka kona? Hilaha ku fanaka, ku hlayiseka ka hina enkarhini lowu taka swi titshege hi ku landzela xikombiso xa Yesu hilaha hi nga swi kotaka hakona evuton’wini bya hina. Ku endla sweswo swi katsa ku twa ni ku endla leswi a hi lerisaka swona swin’we ni ku khomisana ni lava n’wi yimelaka.

Twana U Tlhela U Endla

Loko Yesu a ri emakumu ka Dyondzo yakwe ya le Ntshaveni, u te: “Un’wana ni un’wana la twaka leswi ndzi swi vulaka kutani a swi endla u ta fanisiwa ni wanuna wo tlhariha, la akeke yindlu ya yena ehenhla ka ribye lerikulu. Kutani mpfula yi halaka ni tindhambi ti ta ni timheho ti hunga ti ba yindlu yoleyo, kambe yi nga wi, hikuva yi akiwe ehenhla ka ribye lerikulu.”—Mat. 7:24, 25.

Xisweswo, Yesu u vule leswaku wanuna loyi a twaka a tlhela a endla leswi yena a swi vulaka u ‘tlharihile.’ Xana hi kombisa ku yingisa Kreste hi mbilu hinkwayo hi ku n’wi xixima ni ku tlangela xikombiso xakwe, kumbe hi ni mukhuva wo hlawula ntsena yin’wana ya milawu yakwe leyi hina hi yi vonaka yi olova kumbe yi hi vuyerisaka loko hi yi yingisa? Yesu u te: “Nkarhi hinkwawo ndzi endla swilo leswi . . . tsakisaka [Xikwembu].” (Yoh. 8:29) A hi tikarhateleni ku n’wi tekelela.

Hi lembe-xidzana ro sungula, vaapostola va veke xikombiso lexinene xo tiveka ehansi ka nkongomiso wa Kreste. Siku rin’wana Petro u byele Yesu a ku: “Waswivo! Hi siye swilo hinkwaswo naswona ha ku landzela.” (Mar. 10:28) Hakunene vaapostola a va teka nkongomiso wa Yesu wu ri wa nkoka swinene lerova a va tiyimisele ku siya swilo swin’wana leswaku va n’wi landzela.—Mat. 4:18-22.

Ku Khomisana Ni Vayimeri Va Kreste

Emahlweninyana ko va Yesu a dlayiwa, u vule ndlela yin’wana leyi hi nga landzelaka nkongomiso wakwe ha yona. U te: “Loyi a amukelaka un’wana ni un’wana loyi ndzi n’wi rhumaka, wa ndzi amukela na mina.” (Yoh. 13:20) Entiyisweni, Yesu u vulavule hi vayimeri vakwe lava totiweke leswaku i ‘vamakwavo’ vakwe. (Mat. 25:40) Endzhaku ka loko Yesu a pfuxiwile eku feni ivi a tlhandlukela etilweni, ‘vamakwavo’ vakwe va vekiwe endhawini yakwe, va ‘khomela Kreste’ tanihi vayimeri lava rhambaka van’wana leswaku va vuyelelana na Yehovha Xikwembu. (2 Kor. 5:18-20) Ku tekela nkongomiso wa Kreste enhlokweni  swi katsa ku va hi tiveka ehansi ka ‘vamakwavo’ vakwe.

Hi endla kahle loko hi kambisisa ndlela leyi hi yi amukelaka ha yona ndzayo ya le Matsalweni leyi nyikeriwaka eka minkandziyiso leyi sekeriweke eBibeleni. Loko hi dyondza Matsalwa ni ku va kona eminhlanganweni, hi tsundzuxiwa marito ya Kreste. (2 Pet. 3:1, 2) Hi kombisa leswaku hi swi tlangela hi mbilu hinkwayo swakudya leswi swa moya hi ku swi hlaya nkarhi ni nkarhi. Kambe hi fanele hi endla yini loko ndzayo yin’wana yi tshamela ku phindha-phindhiwa? Hi xikombiso, Rito ra Xikwembu ri tsundzuxa Vakreste leswaku va teka “eHosini ntsena.” (1 Kor. 7:39) Se swi endla malembe lama tlulaka dzana ku ri karhi ku vulavuriwa hi mhaka leyi eka Xihondzo xo Rindza. Swi le rivaleni leswaku vamakwavo va Kreste va kombisa leswaku va khathala hi vuxaka bya hina na Yehovha hi ku kandziyisa swihloko leswi vulavulaka hi mhaka leyi ni ndzayo yin’wana leyi huhuteriweke. Ku yingisa switsundzuxo leswi i ndlela yin’wana leyi hi kombisaka ha yona leswaku hi landzela Murhangeri wa hina la hetisekeke, Yesu Kreste.

Swivuriso 4:18 yi ri: “Ndlela ya lavo lulama yi fana ni ku vonakala ko vangama loku vonakalaka hakatsongo-tsongo kukondza siku ri simekiwa ri tiya.” Hakunene nkongomiso wa Yesu wu hambeta wu hi kongomisa. Ndlela yin’wana leyi hi nga khomisanaka ha yona ni ‘vamakwavo’ va Kreste i ku va ni langutelo lerinene hi mindzulamiso yihi ni yihi eka matwisiselo ya hina hi tidyondzo ta le Bibeleni leti kandziyisiwaka hi “hlonga ro tshembeka ni ro tlhariha.”—Mat. 24:45.

Hi tlhela hi kombisa ku tiveka ehansi eka ‘vamakwavo’ va Yesu hi ku khomisana ni valanguteri lava vekiweke evandlheni ra Vukreste. Muapostola Pawulo u te: “Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina.” (Hev. 13:17) Hi xikombiso, nkulu a nga ha hi khutaza malunghana ni ndlela leyi swi nga swa nkoka ha yona ku va ni Vugandzeri bya Ndyangu nkarhi ni nkarhi kumbe a nga ha hi nyika swiringanyeto malunghana ni swiyenge swin’wana swa vutirheli bya hina bya nsimu. Mulanguteri loyi a famba-fambaka a nga ha hi nyika ndzayo yin’wana leyi pfunaka ya Matsalwa malunghana ni mhaka yo karhi ya vutomi bya Vakreste. Loko hi tiyimisela ku tirhisa ndzayo yo tano, hi kombisa leswaku hi landzela Yesu tanihi Murhangeri wa hina.

Misava yi kayivela nkongomiso lowunene hi ndlela leyi terisaka vusiwana. Kambe swa phyuphyisa hakunene ku landzela nkongomiso wa Kreste lowu nga ni rirhandzu. A hi tiyimiseleni ku yingisa Murhangeri wa hina ni ku khomisana ni lava a va tirhisaka namuntlha.

[Swifaniso leswi nga eka tluka 27]

Xana wa yi amukela ndzayo ya Matsalwa leyi nge u nga paniwi ni loyi a nga riki mupfumeri?