Mindyangu Ya Vakreste—‘Hitekani’

“A hi hitekeni hi hlayisa mianakanyo ya hina leyi hlutekeke.”—1 TES. 5:6.

1, 2. Ku laveka yini loko ndyangu wu lava ku tshama wu hitekile hi tlhelo ra moya?

LOKO muapostola Pawulo a vulavula hi “siku lerikulu ni leri chavisaka ra Yehovha,” u tsalele Vakreste va le Tesalonika a ku: “Vamakwerhu, a mi le munyameni, lerova siku rero a ri nge mi jumi hilaha ri jumaka makhamba hakona, hikuva hinkwenu mi vana va ku vonakala ni vana va nhlikanhi. A hi va vusiku kumbe munyama.” Pawulo u tlhele a ku: “Hikwalaho, hi nga etleli ku fana ni lavan’wana hinkwavo lava etlelaka, kambe a hi hitekeni hi hlayisa mianakanyo ya hina leyi hlutekeke.”—Yuw. 2:31; 1 Tes. 5:4-6.

² Ndzayo ya Pawulo leyi a yi tsaleleke Vatesalonika ya tirha, ngopfu-ngopfu eka Vakreste lava hanyaka “enkarhini wa makumu.” (Dan. 12:4) Tanihi leswi makumu ya mafambiselo ya Sathana yo biha ya swilo ma tshineleke, u tiyimisele ku hambukisa vagandzeri vo tala va ntiyiso hilaha a nga swi kotaka hakona leswaku va tshika ku tirhela Xikwembu. Hikwalaho, hi endla hi vutlhari loko hi yi tekela enhlokweni ndzayo ya Pawulo yo tshama hi hitekile hi tlhelo ra moya. Leswaku ndyangu wa Vakreste wu kota ku tshama wu hitekile, i swa nkoka leswaku xirho ha xin’we xi hetisisa vutihlamuleri bya xona bya le Matsalweni. Kutani, hi byihi vutihlamuleri lebyi vavanuna, vavasati ni vana va nga na byona lebyi nga pfunaka mindyangu ya vona leswaku yi ‘hiteka’?

Vavanuna—Tekelelani “Murisi Lonene”

3. Hi ku ya hi 1 Timotiya 5:8, i yini leswi katsekaka eka vutihlamuleri bya wanuna bya ku va nhloko ya ndyangu?

³ Bibele yi ri: “Nhloko ya wansati i wanuna.” (1 Kor. 11:3) I yini leswi katsekaka eka vutihlamuleri bya wanuna bya ku va nhloko ya ndyangu? Loko Matsalwa ma boxa ntirho wun’wana wa ku va nhloko ya ndyangu, ma ri: “Loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.” (1 Tim. 5:8) Hakunene wanuna u fanele a wundla ndyangu wakwe. Kambe leswaku a kota ku pfuna ndyangu wakwe wu tshama wu hitekile hi tlhelo ra moya, a nga fanelanga a wu wundla hi tlhelo ra nyama ntsena. U fanele a aka ndyangu wakwe hi ku wu pfuna wu tiyisa vuxaka bya wona ni Xikwembu. (Swiv. 24:3, 4) A nga swi endlisa ku yini sweswo?

4. I yini leswi nga pfunaka wanuna leswaku a kota ku aka ndyangu wakwe hi tlhelo ra moya?

⁴ Wanuna loyi a tekeke u fanele a kambisisa ni ku tekelela ndlela leyi Yesu a byi kombisaka ha yona vunhloko byakwe evandlheni hikuva “wanuna i nhloko ya nsati wakwe tanihi leswi Kreste na yena a nga nhloko ya vandlha.” (Efe. 5:23) Xiya ndlela leyi Yesu a byi hlamuselaka ha yona vuxaka byakwe ni valandzeri vakwe. (Hlaya Yohane 10:14, 15.) Hi wihi nchumu wa nkoka lowu wanuna a nga wu endlaka loko a lava ku aka ndyangu wakwe hi tlhelo ra moya? Hi lowu: I ku dyondza leswi Yesu a swi vuleke ni ku swi endla tanihi “murisi lonene” ni ku “landzelerisisa mikondzo yakwe.”—1 Pet. 2:21.

5. I yini leswi Murisi Lonene a swi tivaka hi vandlha?

⁵ Hi ndlela yo fanekisela, vuxaka bya murisi ni tinyimpfu takwe byi titshege hi vutivi ni ku tshembana. Murisi u tiva xin’wana ni xin’wana hi tinyimpfu takwe, ni tinyimpfu ta n’wi tiva murisi wa tona naswona ta n’wi tshemba. Ta ri tiva rito rakwe naswona ta ri yingisa. Yesu u te: “Tinyimpfu ta mina ndza ti tiva ni tinyimpfu ta mina ta ndzi tiva.” A ngo ri tivanyana ntsena vandlha. Rito ra Xigriki leri laha ri hundzuluxeriweke ri va “tiva” ri vula “ku tiva munhu hi ndlela leyi enteke.” Kutani Murisi Lonene u tiva tinyimpfu takwe  ha yin’we-yin’we. U tiva swilaveko swa yin’wana ni yin’wana, ku tsana ka tona ni vuswikoti bya tona. Ku hava nchumu ni wun’we lowu a nga wu tiviki. Naswona tinyimpfu ti n’wi tiva kahle murisi naswona ti tshemba nkongomiso wakwe.

6. Vavanuna va nga n’wi tekelela njhani Murisi Lonene?

⁶ Leswaku wanuna a tirhisa vunhloko byakwe ku fana na Kreste, u fanele a dyondza ku titeka tanihi murisi ni ku teka lava nga ehansi ka nkhathalelo wakwe tanihi tinyimpfu. U fanele a tikarhatela ku wu tiva kahle ndyangu wakwe. Xana wanuna a nga swi kota hakunene ku wu tiva hi ndlela yoleyo ndyangu wakwe? Ina, a nga swi kota loko a vulavurisana kahle ni swirho hinkwaswo swa ndyangu wakwe, a yingisela leswi swi swi karhataka, a rhangela emintirhweni ya ndyangu naswona a tikarhatela ku endla swiboho leswinene leswi katsaka timhaka to fana ni vugandzeri bya ndyangu, ku ya eminhlanganweni, ku ya ensin’wini ni ku tihungasa. Loko wanuna loyi a nga Mukreste a dyondza hi vukheta leswi Rito ra Xikwembu ri swi vulaka ni ku tiva swirho swa ndyangu wakwe kahle leswaku a swi vekela xikombiso lexinene ni ku endla swiboho leswinene, a swi kanakanisi leswaku swi ta tshemba nkongomiso wakwe naswona u ta tsakela ku swi vona swi gandzela Xikwembu xa ntiyiso hi vun’we.

7, 8. Wanuna a nga n’wi tekelela njhani Murisi Lonene hi ku rhandza lava nga ehansi ka nkhathalelo wakwe?

⁷ Murisi lonene u tlhela a rhandza tinyimpfu takwe. Loko hi hlaya swiviko swa tibuku ta Tievhangeli swa vutomi ni vutirheli bya Yesu, timbilu ta hina ti susumeteleka ku tlangela rirhandzu leri Yesu a a ri na rona hi vadyondzisiwa vakwe. U kale a ‘nyiketa moya-xiviri wakwe hikwalaho ka tinyimpfu.’ Vavanuna va fanele va tekelela Yesu hi ku rhandza lava nga ehansi ka nkhathalelo wa vona. Ematshan’weni yo khoma nsati wakwe hi tihanyi, wanuna loyi a lavaka ku amukeriwa hi Xikwembu u hambeta a n’wi rhandza “hilaha Kreste na yena a rhandzeke vandlha hakona.” (Efe. 5:25) U fanele a vulavula ni nsati wakwe hi ndlela ya musa ni ku anakanyela hikuva u faneriwa hi ku xiximiwa.—1 Pet. 3:7.

⁸ Nhloko ya ndyangu yi fanele yi namarhela milawu ya Xikwembu loko yi letela vana va yona. Hambiswiritano, a yi fanelanga yi tshika ku rhandza vana va yona. Loko vana va yona va lava ku tshinyiwa, yi fanele yi va tshinya hi rirhandzu. Vana van’wana swi nga ha va tekela nkarhi ku twisisa leswi swi languteriweke eka vona ku tlula van’wana. Exiyin’weni xexo, tatana u fanele a va lehisela mbilu swinene. Loko vavanuna va landzela xikombiso xa Yesu nkarhi ni nkarhi, va endla leswaku ekaya ku va ndhawu leyi sirhelelekeke. Mindyangu ya vona yi tiphina hi nsirhelelo wa moya lowu mupisalema a yimbeleleke ha wona.—Hlaya Pisalema 23:1-6.

9. Ku fana na Nowa, hi byihi vutihlamuleri lebyi vavanuna lava nga Vakreste va nga na byona naswona i yini leswi nga ta va pfuna ku byi byarha?

⁹ Xikombiso xin’wana lexi tinhloko ta mindyangu ti nga xi tekelelaka i xa Nowa. Nowa u hanye hi nkarhi wa makumu ya misava ya le masikwini yakwe. Kambe Yehovha u n’wi ‘hlayisile ni van’wana va nkombo loko a tisa ndhambhi ehenhla ka misava ya vanhu lava nga n’wi xiximiki.’ (2 Pet. 2:5) Nowa a a ri ni vutihlamuleri byo pfuna ndyangu wakwe leswaku wu pona Ndhambi. Tinhloko ta mindyangu ya Vakreste ti ni vutihlamuleri lebyi fanaka emasikwini lawa yo hetelela. (Mat. 24:37) Hakunene i swa nkoka leswaku ti dyondza eka xikombiso xa “murisi lonene” naswona ti tikarhatela ku n’wi tekelela!

Vavasati—‘Akani Yindlu Ya N’wina’

10. Swi vula yini eka wansati ku tiveka ehansi ka nuna wakwe?

¹⁰ Muapostola Pawulo u tsale a ku: “Vavasati a va tiveke ehansi ka vanuna va vona hilaha va endlaka hakona eHosini.” (Efe. 5:22) Marito lawa a ma vuli swona nikatsongo leswaku xikhundlha xa wansati a xi pfuni nchumu. Loko Xikwembu xa ntiyiso xi nga si vumba wansati wo sungula Evha, xi te: “A hi swinene leswaku munhu a hambeta a tshama a ri yexe. Ndzi ta n’wi endlela mupfuni, a va muhetisisi wa yena.” (Gen. 2:18) Hakunene ntirho wa wansati wa ku va “mupfuni” ni “muhetisisi,” lowu katsaka ku seketela nuna wakwe loko a ri karhi a hetisisa vutihlamuleri bya ndyangu wakwe wa xiximeka swinene.

11. Wansati wo tlhariha ‘u aka yindlu yakwe’ hi ndlela yihi?

¹¹ Wansati wo tlhariha u tirhela ku pfuna ndyangu  wakwe. (Hlaya Swivuriso 14:1.) Ku hambana ni wansati wa xiphukuphuku loyi a delelaka lunghiselelo ra vunhloko, wansati wo tlhariha u ri xixima swinene lunghiselelo leri. Ematshan’weni yo va ni moya wo delela ni wo tifuma lowu lawulaka misava, yena wa titsongahata eka nuna wakwe. (Efe. 2:2) Wansati wa xiphukuphuku u namba a vulavula ku biha hi nuna wakwe, kambe wansati wo tlhariha u tikarhatela ku endla leswaku xichavo lexi vana vakwe ni vanhu van’wana va nga na xona hi nuna wakwe xi kula swinene. Wansati wo tano u lwela ku nga byi deleli vunhloko bya nuna wakwe hi ku n’wi holovela kumbe hi ku phikizana na yena. Nakambe loko swi ta emhakeni yo hlayisa mali, wansati wa xiphukuphuku u tala ku tlangisa mali leyi ndyangu wakwe wu yi tirheleke ku vava. Wansati loyi a seketelaka nuna wakwe a nga endli tano. U tirhisana ni nuna wakwe etimhakeni ta timali. U endla swilo hi ndlela leyi kombisaka leswaku u hlutekile emianakanyweni naswona u kota ku londzovota mali. A nga n’wi sindzisi nuna wakwe ku tirha tiawara leti engetelekeke entirhweni.

12. Wansati a nga endla yini ku pfuna ndyangu wakwe leswaku wu ‘hiteka’?

¹² Wansati wo tlhariha u pfuna ndyangu leswaku wu ‘hiteka’ hi ku pfuna nuna wakwe ku dyondzisa vana hi Yehovha. (Swiv. 1:8) U seketela Vugandzeri bya Ndyangu hi ku hiseka. Ku tlula kwalaho, u seketela nuna wakwe loko a nyika vana ndzayo ni ku va tshinya. Hakunene u hambane ngopfu ni wansati loyi a nga tirhisaniki ni nuna wakwe, loyi vana va vona va xanisekaka hi tlhelo ra nyama ni ra moya!

13. Ha yini swi ri swa nkoka ku va wansati a seketela nuna wakwe loko a gingiriteka hi mintirho ya vandlha ni ya nhlengeletano?

¹³ Wansati loyi a seketelaka nuna wakwe u titwa njhani loko a vona nuna wakwe a gingiriteka evandlheni ra Vukreste? Wa tsaka. Ku nga khathariseki leswaku i nandza wa vutirheli, i nkulu, kumbe i xirho xa Komiti yo Vulavurisana ni Swibedlhele kumbe xa Komiti yo Aka ya Xifundzha, u tsakela lunghelo ra nuna wakwe. A swi kanakanisi leswaku ku seketela nuna wakwe hi marito ni swiendlo swi ta lava leswaku a titsona swo karhi. Kambe wa swi tiva leswaku ku va nuna wakwe a gingiriteka hi mintirho ya vandlha ni ya nhlengeletano swi pfuna ndyangu wakwe hinkwawo leswaku wu tshama wu hitekile.

14. (a) I yini leswi nga ha vaka ntlhontlho eka wansati loyi a seketelaka nuna wakwe naswona a nga langutana njhani ni ntlhontlho wolowo? (b) Wansati a nga xi hoxa njhani xandla eka vuhlayiseki bya ndyangu wakwe hinkwawo?

¹⁴ Wansati swi nga ha n’wi tikela ku va xikombiso lexinene emhakeni yo seketela nuna wakwe loko a endla swiboho leswi yena a nga pfumelelaniki na swona. Hambiswiritano, u kombisa “moya wo rhula ni wo olova” naswona u tirhisana na yena leswaku swiboho swakwe swi humelela. (1 Pet. 3:4) Wansati lonene u ringeta ku tekelela swikombiso leswinene swa vavasati lava xiximaka Xikwembu va le minkarhini ya khale vo kota Sara, Rhuti, Abigayele na Mariya mana wa Yesu. (1 Pet. 3:5, 6) Naswona u tekelela vavasati lava kuleke va manguva lawa lava nga ni “mahanyelo ya xichavo.”  (Tito 2:3, 4) Loko wansati lonene a rhandza ni ku xixima nuna wakwe, u endla leswaku vukati bya vona byi humelela nileswaku ndyangu wakwe hinkwawo wu hlayiseka. Muti wakwe i ndhawu leyi eka yona swirho swa ndyangu swi kumaka nchavelelo ni ku titwa swi hlayisekile. Eka wanuna loyi a rhandzaka Yehovha, wansati loyi a n’wi seketelaka i wa risima swinene.—Swiv. 18:22.

Vantshwa—‘Vekani Mahlo Ya N’wina Eka Swilo Leswi Nga Voniwiki’

15. Vantshwa va nga tirhisana njhani ni vatswari va vona leswaku ndyangu wa ka vona wu ‘hiteka’?

¹⁵ N’wina vantshwa mi nga tirhisana njhani ni vatswari va n’wina leswaku ndyangu wa ka n’wina wu ‘hiteka’ hi tlhelo ra moya? Ehleketisisani hi hakelo leyi Yehovha a mi vekeleke yona. Kumbexana loko ma ha ri vatsongo, vatswari va n’wina va mi kombe swifaniso leswi kombisaka ndlela leyi ku nga ta hanyiwa ha yona eParadeyisini. Loko mi ri karhi mi kula, kumbexana va tirhise Bibele ni minkandziyiso ya Vukreste leswaku va mi pfuna mi swi vona hi mahlo ya mianakanyo leswaku swi ta va njhani ku hanya hilaha ku nga heriki emisaveni leyintshwa. Loko mi dzikisa mahlo ya n’wina entirhweni wa Yehovha ni ku kunguhata vutomi bya n’wina leswaku byi fambisana na wona swi ta mi pfuna leswaku mi ‘hiteka.’

16, 17. Vantshwa va nga endla yini leswaku va kuma hakelo emphikizanweni wa vutomi?

¹⁶ Ma tekeleni enhlokweni marito ya muapostola Pawulo lama kumekaka eka 1 Vakorinto 9:24. (Yi hlaye.) Tsutsumani emphikizanweni wa vutomi hi xikongomelo xo kuma hakelo. Hlawulani tidyondzo leti nga ta endla leswaku mi kuma hakelo ya vutomi lebyi nga heriki. Vantshwa vo tala va pfumelele ku hlongorisa rifuwo swi va kavanyeta ku hambeta va dzikisa mahlo ya vona eka hakelo. Hakunene sweswo i vuphukuphuku! Ku kunguhata vutomi hi xikongomelo xo kuma rifuwo a swi n’wi tiseli munhu ntsako wa xiviri. Swilo leswi mali yi kotaka ku swi xava i swa xinkarhana. Kambe n’wina vekani mahlo ya n’wina eka “swilo leswi nga voniwiki.” Ha yini? Hikuva “swilo leswi nga voniwiki i swa hilaha ku nga heriki.”—2 Kor. 4:18.

¹⁷ “Swilo leswi nga voniwiki” swi katsa mikateko ya Mfumo. Kunguhatani vutomi bya n’wina hi ndlela leyi nga ta endla leswaku mi yi kuma. Ntsako wa xiviri wu tisiwa hi ku va u tirhisa vutomi bya wena entirhweni wa Yehovha. Ku tirhela Xikwembu xa ntiyiso swi mi pfulela tindlela to tivekela tipakani leti tekaka nkarhinyana ku ti fikelela swin’we ni leti tekaka nkarhi wo leha ku ti fikelela. * Ku tivekela tipakani ta moya leti fikelelekaka swi nga mi pfuna leswaku mi dzika eku tirheleni Xikwembu hi xikongomelo xo kuma hakelo ya vutomi lebyi nga heriki.—1 Yoh. 2:17.

18, 19. Muntshwa a nga swi tiva njhani loko se a tiakele vuxaka na Yehovha?

¹⁸ Vantshwa, goza ro sungula leri mi nga ri tekaka endleleni leyi yisaka evuton’wini i ku va mi tiakela vuxaka na Yehovha. Xana u ri tekile goza rero? Tivutise: ‘Xana ndzi ni vuxaka ni Xikwembu kumbe ndzi titshege hi vatswari va mina ku hlanganyela emintirhweni leyi fambisanaka ni timhaka ta Mfumo? Xana ndzi hlakulela timfanelo leti endlaka leswaku ndzi tsakisa Xikwembu? Xana ndzi tikarhatela ku namarhela xiyimiso xo hlanganyela emintirhweni leyi fambisanaka ni vugandzeri bya ntiyiso yo fana ni ku khongela, ku dyondza, ku ya eminhlanganweni ni le nsin’wini nkarhi ni nkarhi? Xana ndzi tshinela eka Xikwembu hi ku khathalela vuxaka bya mina na xona?’—Yak. 4:8.

¹⁹ Ehleketisisa hi xikombiso xa Muxe. Hambileswi a kurisiweke hi ku ya hi ndhavuko wa tiko ra  Egipta, u hlawule ku vuriwa mugandzeri wa Yehovha ematshan’weni yo vuriwa n’wana wa N’wa-Faro. (Hlaya Vaheveru 11:24-27.) Na n’wina vantshwa lava nga Vakreste mi fanele mi tiyimisela ku tirhela Yehovha hi ku tshembeka. Loko mi endla tano mi ta kuma ntsako wa xiviri, ku nga mfanelo leyinene ya vutomi sweswi ni ntshembo wo “khomelela swinene evuton’wini bya xiviri.”—1 Tim. 6:19.

20. I vamani lava nga ta kuma hakelo eka mphikizano wa vutomi?

²⁰ Eka mintlangu ya khale, i mutsutsumi un’we ntsena loyi a a hlula emphikizanweni. Kambe a swi tano emphikizanweni wa vutomi. Ku rhandza ka Xikwembu hileswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:3, 4) Enkarhini lowu hundzeke vanhu vo tala va nghenele mphikizano lowu, va tlhela va hlula naswona vo tala va tsutsuma etlhelo ka wena. (Hev. 12:1, 2) Hakelo yi ta nyikiwa hinkwavo lava nga lan’wiki. Kutani tiyimisele ku hlula emphikizanweni lowu!

21. Ku ta tlhuvutsiwa yini exihlokweni lexi landzelaka?

²¹ “Siku lerikulu ni leri chavisaka ra Yehovha” ri ta fika hambi ko ba lexi dumaka. (Mal. 4:5) Siku rero a ri fanelanga ri juma mindyangu ya Vakreste. I swa nkoka leswaku hinkwavo endyangwini va byarha vutihlamuleri bya vona bya le Matsalweni. Hi swihi swilo swin’wana leswi u nga swi endlaka leswaku u tshama u hitekile ni ku tiyisa vuxaka bya wena ni Xikwembu? Xihloko lexi landzelaka xi ta tlhuvutsa swilo swin’wana leswi khumbaka vuhlayiseki bya ndyangu hinkwawo hi tlhelo ra moya.

[Nhlamuselo ya le hansi]

Xana U Dyondze Yini?

• Ha yini swi ri swa nkoka leswaku mindyangu ya Vakreste yi tshama yi ‘hitekile’?

• Wanuna a nga n’wi tekelela njhani Murisi Lonene?

• Wansati lonene a nga endla yini leswaku a seketela nuna wakwe?

• Vantshwa va nga yi pfuna njhani mindyangu ya ka vona leswaku yi hiteka hi tlhelo ra moya?

[Swivutiso Swa Dyondzo]

[Xifaniso lexi nga eka tluka 9]

Eka wanuna loyi a rhandzaka Yehovha, wansati loyi a n’wi seketelaka i wa risima swinene