Xana Wa Ri Tsakela Hakunene Rito Ra Xikwembu?

LORRAINE u ri: “Loko ndzi sungula ku hlaya Bibele nkarhi ni nkarhi, ndzi kume leswaku ya ndzi phirha ematshan’weni yo ndzi tsakisa. A swi ndzi tikela ku yi twisisa, kutani minkarhi yo tala miehleketo ya mina a yi famba-famba.”

Van’wana va vula leswaku na vona loko va sungula ku hlaya Bibele a va nga yi tsakeli. Kambe va hambete va yi hlaya hikuva a va swi tiva leswaku i swinene ku endla tano. Marc u ri: “Swa olova ku pfumelela swilo leswi nga ta ku kavanyeta ku hlaya Bibele ni ku va ni dyondzo ya munhu hi yexe. Ndzi boheke ku khongela nkarhi ni nkarhi ni ku endla matshalatshala leswaku ku hlaya Bibele siku ni siku ku va xiphemu xa mintirho ya mina ya siku ni siku.”

U nga endla yini leswaku u hlakulela ku tsakela Rito ra Xikwembu, ku nga Bibele? U nga swi tsakela njhani ku ri hlaya? Kambisisa swiringanyeto leswi landzelaka.

Tipakani Ni Maendlelo Ya Kona

Khongela u tlhela u lunghisa mianakanyo ya wena loko u lava ku hlaya Bibele. Kombela Yehovha leswaku a ku pfuna u lwela ku tiyimisela ku dyondza Rito rakwe. N’wi kombele leswaku a pfula mianakanyo ni mbilu ya wena leswaku u twisisa vutlhari byakwe hi ku helela. (Ps. 119:34) Loko u nga endli tano, u nga sungula ku dyondza Bibele hi xikongomelo xo hetisa nawu ntsena naswona u nga ha tshika ku hambeta u yi dyondza. Lynn u ri: “Minkarhi yin’wana ndzi yi hlaya hi ku hatlisa kutani ndzi lahlekeriwa hi tinhla tin’wana. Hakanyingi a ndzi ti twisisi tinhla ta nkoka. Kambe ndzi khongelela ku lawula miehleketo ya mina naswona sweswo swi ndzi pfuna leswaku yi nga famba-fambi.”

Swi teke swi ri swa nkoka leswi u swi dyondzaka. Tsundzuka leswaku ku twisisa ni ku tirhisa tidyondzo ta Bibele swi vula leswaku u ta kuma vutomi lebyi nga heriki. Hikwalaho, tikarhatele ku kuma tinhla leti pfunaka kutani u ti tirhisa. Chris u ri: “Ndzi lava timhaka leti nga ta ndzi pfuna ku tsuvula langutelo ni minsusumeto leyi hoxeke embilwini ya mina. Swa phyuphyisa ku vona ndlela leyi Bibele ni minkandziyiso ya hina yo tala yi nga ni rungula leri ndzi pfunaka hambileswi vatsari va rona va nga si tshamaka va ndzi vona.”

Tivekele tipakani leti u nga ta kota ku ti fikelela. Ringeta ku dyondza swilo leswintshwa hi vanhu va le Bibeleni. U nga kuma tinhla to tsakisa ha vona hi ku kambisisa Insight on the Scriptures kumbe Watch Tower Publications Index. U ta vuyeriwa swinene loko u ri karhi u dyondza hi vumunhu ni ndlela leyi vanhu va le Bibeleni a va titwa ha yona.

Lavisisa tindlela letintshwa to kanerisana hi Matsalwa. (Mint. 17:2, 3) Sophia u dyondza Bibele a ri karhi a ehleketa hi sweswo. U ri: “Leswi ndzi swi lavaka i ku dyondza tindlela letintshwa to kanerisana ni vanhu ensin’wini ni hi minkarhi yin’wana leswaku ndzi kota ku ti hlamusela kahle tidyondzo ta Bibele. Xihondzo xo Rindza i xitirho lexinene ngopfu lexi pfunaka ku endla tano.”—2 Tim. 2:15.

Vona timhaka ta le Bibeleni hi mahlo ya miehleketo. Vaheveru 4:12 yi ri: “Rito ra Xikwembu ra hanya.” Loko u ri karhi u hlaya Matsalwa, endla rungula ra Xikwembu ri hanya emianakanyweni ya wena hi ku ehleketa hi leswi vanhu va le Bibeleni a va swi vona. Ringeta ku twa leswi a va swi twa ni ku twisisa ndlela leyi a va titwa ha yona. Ringanisa leswi va humeleleke ni swiyimo swo karhi leswi u langutanaka na swona  evuton’wini. Dyondza ndlela leyi va swi tameleke ha yona swiyimo sweswo. Leswi swi ta ku pfuna leswaku u twisisa ni ku tsundzuka timhaka ta le Bibeleni.

Tinyike nkarhi wo kambisisa matsalwa lama tikaka ni tinhlamuselo ta wona leswaku u ta ma twisisa kahle. Tinyike nkarhi lowu eneleke eka dyondzo yin’wana ni yin’wana. U nga ha kuma swivutiso swa nkoka leswi lavaka leswaku u endla ndzavisiso wun’wana. Lava marito lama nga tolovelekangiki, kambisisa tinhlamuselo ta le hansi ni swikombo eBibeleni. Loko u ya u twisisa leswi u swi hlayaka u tlhela u swi tirhisa, u ta ya u ri tsakela Rito ra Xikwembu. Kutani u ta vula ku fana ni mupisalema loyi a nga te: “Ndzi teke switsundzuxo swa wena [Yehovha] swi ri ndzhaka ya mina hilaha ku nga riki na makumu, hikuva swi endla mbilu ya mina yi khana.”—Ps. 119:111.

Papalata ku hatlisela ku heta rungula leri u ri hlayaka. Tivekele nkarhi lowu ringaneke wa dyondzo ya munhu hi yexe. Tivekele nkarhi lowu fanaka wo lunghiselela minhlangano ya vandlha. Raquel u ri: “Minkarhi yo tala ndza tshikileleka lerova ndzi tsandzeka ku dzikisa miehleketo ya mina eka leswi ndzi swi hlayaka. Kutani ndzi kuma leswaku ndza vuyeriwa loko ndzi nga dyondzi nkarhi wo leha. Sweswo swi ndzi pfuna leswaku dyondzo ya mina yi va leyi vuyerisaka swinene.” Chris u ri: “Loko ndzi titwa onge ndzi hatlisela ku heta dyondzo ya mina, ripfalo ra mina ra ndzi kingindza hikuva ndzi vuyeriwa katsongo. Rungula ra kona ri tala ku nga yi fikeleli mbilu ya mina.” Hikwalaho, tinyike nkarhi lowu eneleke wo dyondza.

Hlakulela ku navela lokukulu ka rito ra Xikwembu. Muapostola Petro u te: “Kukota tincece leta ha ku velekiwaka, hlakulelani ku navela ntswamba wa rito lowu nga pfanganyisiwangiki na nchumu, leswaku ha wona mi kula mi ta ponisiwa.” (1 Pet. 2:2) Tincece a swi kali swi lava leswaku ti hlakulela ku navela ntswamba. Ti va ni ku navela koloko hi ntumbuluko. Kambe Matsalwa ma vula leswaku hina hi fanele hi hlakulela ku navela rito ra Xikwembu. Loko siku ni siku wo hlaya ndzima yin’we ntsena ya Bibele, hi ku hatlisa ku navela koloko ku ta va kona. Nchumu lowu a wu wu vona wu tika eku sunguleni, ku nga ri khale wu ta va lowu tsakisaka.

Anakanyisisa hi tindzimana ta Matsalwa. Ku anakanyisisa hi leswi u swi hlayaka na swona swa vuyerisa swinene. Leswi swi ta ku pfuna leswaku u hlanganisa tinhloko-mhaka hinkwato leti u endleke ndzavisiso ha tona. Loko u endla tano u ta tikuma u ri ni ndzhaka leyi fuweke ya tidyondzo ta risima ta Matsalwa.—Ps. 19:14; Swiv. 3:3.

 Nkarhi Lowu Tirhisiweke Kahle

Ku namarhela xiyimiso xo dyondza Bibele swi lava matshalatshala, kambe swa vuyerisa swinene. U ta ma twisisa kahle Matsalwa. (Hev. 5:12-14) Ku twisisa ni vutlhari lebyi u byi kumaka eMatsalweni lama huhuteriweke swi tisa ntsako, ku eneriseka ni ku rhula. Vutlhari lebyi nga eRitweni ra Xikwembu leri huhuteriweke i “murhi wa vutomi” eka lava va byi tekaka va tlhela va byi tirhisa.—Swiv 3:13-18.

Dyondzo leyi dzikeke ya Rito ra Xikwembu yi nga endla leswaku u va ni mbilu leyi twisisaka. (Swiv. 15:14) Sweswo swi ta ku pfuna leswaku u nyikela switsundzuxo leswi humaka embilwini ni leswi sekeriweke hi ku helela eBibeleni. Loko u pfumelela swiboho swa wena swi kongomisiwa hi leswi u swi hlayaka eMatsalweni ni le ka minkandziyiso ya “hlonga ro tshembeka ni ro tlhariha,” u ta phyuphyisiwa ni ku tiyisiwa hi Rito ra Yehovha leri huhuteriweke. (Mat. 24:45) U ta va ni langutelo lerinene naswona miehleketo, swiendlo ni mavulavulelo ya wena swi ta susumeteriwa hi Rito ra Yehovha. Ku tlula kwalaho, hinkwaswo leswi khumbaka vuxaka bya wena ni Xikwembu swi ta humelela.—Ps. 1:2, 3.

Mbilu ya wena leyi khapakhapaka hi ku rhandza Xikwembu yi ta ku susumetela ku byela van’wana hi ripfumelo ra wena. Leswi na swona swi ta ku vuyerisa swinene. Sophia u tikarhatela ku tsundzuka ni ku tirhisa matsalwa yo hambana-hambana leswaku a koka rinoko ra vini va miti ni ku endla leswaku vutirheli byakwe bya Vukreste byi humelela byi tlhela byi tsakisa. U ri: “Swa tsakisa ku vona ndlela leyi vanhu va angulaka ha yona eka marito lama humaka eBibeleni.”

Kambe vuyelo lebyikulu ngopfu lebyi tisiwaka hi ku tsakela Rito ra Xikwembu i ku va ni vuxaka lebyikulu na Yehovha. Dyondzo ya Bibele yi endla leswaku u tiva milawu yakwe ni ku tlangela rirhandzu, ku hanana ni vululami byakwe. Ku hava nchumu lowu nga wa nkoka ngopfu kumbe lowu vuyerisaka swinene ku tlula dyondzo yoleyo. Kutani dzika eka dyondzo ya Rito ra Xikwembu. Loko u endla tano u ta va u wu tirhise kahle nkarhi wa wena.—Ps. 19:7-11.

[Bokisi/Swifaniso leswi nga eka tluka 5]

KU HLAYA RITO RA XIKWEMBU: TIPAKANI NI MAENDLELO YA KONA

▪ Khongela u tlhela u lunghisa mianakanyo ya wena loko u lava ku hlaya Bibele.

▪ Swi teke swi ri swa nkoka leswi u swi dyondzaka.

▪ Tivekele tipakani leti u nga ta kota ku ti fikelela.

▪ Lavisisa tindlela letintshwa to kanerisana hi Matsalwa.

▪ Vona timhaka ta le Bibeleni hi mahlo ya miehleketo.

▪ Tinyike nkarhi wo kambisisa matsalwa lama tikaka ni tinhlamuselo ta wona leswaku u ma twisisa kahle.

▪ Papalata ku hatlisela ku heta rungula leri u ri hlayaka.

▪ Hlakulela ku navela lokukulu ka rito ra Xikwembu.

▪ Anakanyisisa hi tindzimana ta Matsalwa.

[Xifaniso lexi nga eka tluka 4]

Loko u ri karhi u hlaya rungula ra le Bibeleni, tivone u ri exiyin’weni xexo