Ku Sunguriwa Ka Nkandziyiso Wa Xinghezi Lexi Olovisiweke

HI TSAKELA ku mi tivisa leswaku ku sukela enkandziyisweni lowu wa vandlha wa Xihondzo xo Rindza, hi ta kandziyisa nkandziyiso wa Xinghezi lexi olovisiweke n’hweti ni n’hweti ku ringana lembe ku vona loko swi ta tirha. Wu ta va ni swihloko leswi dyondziwaka evandlheni naswona loko ndhawu yi pfumela ku ta hoxiwa ni swihloko swin’wana leswi hlawuriweke. Hi tshemba leswaku leswi swi ta enerisa xilaveko xa nkoka xa moya xa Timbhoni to tala ta Yehovha. Ha yini?

Xinghezi i ririmi leri tolovelekeke leri vulavuriwaka hi vamakwerhu ematikweni yo fana na Fiji, Ghana, Kenya, Liberia, Nigeria, Papua New Guinea ni le Swihlaleni swa Solomon. Hambileswi vamakwerhu ematikweni lawa va nga ha vulavulaka tindzimi tin’wana ta kwalaho kumbe ta xintu, hakanyingi va tirhisa Xinghezi ku vulavurisana ha xona siku ni siku eminhlanganweni ya vandlha ni le ntirhweni wo chumayela. Hambiswiritano, Xinghezi lexi va xi vulavulaka xi olovile ku tlula lexi tirhisiwaka eminkandziyisweni ya hina. Nakambe ku ni vanhu van’wana va Yehovha lava rhurheleke ematikweni lawa va faneleke va tirhisa Xinghezi ku vulavurisana ha xona hambileswi va nga xi tiviki kahle. Ku tlula kwalaho, a va nge swi koti ku ya eminhlanganweni ya vandlha leyi fambisiwaka hi ririmi ra vona.

Swihloko leswi hi swi dyondzaka vhiki ni vhiki eka Dyondzo ya Xihondzo xo Rindza hi swona leswi tirhisiwaka hi ku kongoma ku hi nyika swakudya swa moya nkarhi ni nkarhi. Hikokwalaho, leswaku ku pfuniwa hinkwavo lava nga eminhlanganweni leswaku va vuyeriwa hi ku helela eka rungula leri, nkandziyiso wa Xinghezi lexi olovisiweke wu tirhisa marito lama tiviwaka ya Xinghezi ni swivulwa swo olova. Nkandziyiso lowu lowuntshwa wu ta va ni xifunengeto lexi hambaneke ni xa lowun’wana. Swihlokwana, tindzimana, swivutiso swo pfuxeta ni swifaniso eka swihloko leswi hlayiwaka evandlheni swi ta fana ni swa nkandziyiso lowu tolovelekeke. Xisweswo, hinkwavo va nga kota ku fambisana hambiloko va tirhisa minkandziyiso leyimbirhi ni ku nyikela tinhlamulo eka Dyondzo ya Xihondzo xo Rindza. Leswaku u vona ndlela leyi mavekelo ya marito ma hambanaka ha yona eminkandziyisweni leyimbirhi, hlaya xikombiso lexi nga laha hansi lexi humaka eka ndzimana ya vumbirhi ya xihloko xo sungula lexi hlayiwaka evandlheni enkandziyisweni lowu.

Hi tshemba leswaku lunghiselelo leri lerintshwa ri ta va nhlamulo ya swikhongelo swa vanhu vo tala lava kombeleke Yehovha va ku: “Ndzi endle ndzi twisisa, leswaku ndzi ta dyondza swileriso swa wena.” (Ps. 119:73) Ha tiyiseka leswaku lava nga xi tiviki ngopfu Xinghezi ni vana van’wana lava vulavulaka Xinghezi, va ta swi kota ku yi lunghiselela kahle Dyondzo ya Xihondzo xo Rindza ya vhiki ni vhiki. Ha n’wi nkhensa Yehovha hikuva rirhandzu leri a nga na rona hi ‘nhlengeletano ya vamakwerhu hinkwayo’ ri n’wi susumetela ku tirhisa “hlonga ro tshembeka ni ro tlhariha” ku hi nyika swakudya swa moya hi xitalo.—1 Pet. 2:17; Mat. 24:45.

Huvo leyi Fumaka ya Timbhoni ta Yehovha