Nhlangano Lowu Nga Ta Ka Wu Nga Rivariwi

STEPHEN LETT, xirho xa Huvo leyi Fumaka ya Timbhoni ta Yehovha, u koke rinoko ra vayingiseri vo tala hi ku vula marito lawa: “Loko nhlangano lowu wu hela, un’wana ni un’wana u ta ku, ‘Lowu a wu ri nhlangano wo hlawuleka lowu ndzi nga ta ka ndzi nga wu rivali!’” Lowu a wu ri nhlangano wa vu-126 wa lembe ni lembe wa Watch Tower Bible and Tract Society of Pennsylvania, lowu khomiweke hi October 2, 2010 eHolweni ya Tinhlengeletano ya Timbhoni ta Yehovha eJersey City, le New Jersey, U.S.A. Hi tihi timhaka tin’wana leti tsakisaka swinene leti ku vulavuriweke ha tona eka nhlangano lowu lowu nga ta ka wu nga rivariwi?

Nkulumo yo sungula ya nhlangano lowu leyi nyikeriweke hi Makwerhu Lett, a yi vulavula hi kalichi ra Yehovha ra le tilweni hilaha ri hlamuseriwaka hakona ebukwini ya Bibele ya Ezekiyele. Kalichi leri lerikulu ni leri vangamaka ri fanekisela nhlengeletano ya Yehovha leyi kongomisiwaka hi yena. Makwerhu Lett u vule leswaku xiphemu xa yona xa le tilweni lexi vumbiwaka hi swivumbiwa swa moya, xi tsutsuma hi rivilo ra rihati, ku nga rivilo ra miehleketo ya Yehovha. Xiphemu xa laha misaveni xa nhlengeletano ya Yehovha Xikwembu na xona xi tsutsuma hi rivilo leri fanaka. Makwerhu Lett u boxe swiendlakalo swo hlayanyana leswi tsakisaka leswi endlekaka eka xiphemu xa laha misaveni xa nhlengeletano ya Xikwembu emalembeni ya sweswinyana.

Hi xikombiso, marhavi yo hlayanyana ma hlanganisiwa naswona sweswo swi ta endla leswaku vanhu vo tala lava a va tirha emakaya ya Bethele ematikweni wolawo va dzika ngopfu entirhweni wo chumayela. Makwerhu Lett u khutaze vayingiseri leswaku va ya emahlweni va khongelela Huvo leyi Fumaka, tanihi leswi yi yimelaka ntlawa wa hlonga, leswaku yi hambeta yi tshembeka naswona yi tlhariha.—Mat. 24:45-47.

Swiviko Leswi Khutazaka Ni Mimbulavurisano Leyi Tsakisaka

Tab Honsberger, xirho xa Komiti ya Rhavi eHaiti, u nyikele xiviko lexi khumbaka mbilu malunghana ni vuyelo bya ku tsekatseka ka misava loku humeleleke hi January 12, 2010, loku dlayeke vanhu va kwalomu ka 300 000 etikweni rero. U vule leswaku vafundhisi a va byeletela vanhu leswaku Xikwembu xi xupule vanhu volavo hileswi a va nga ri na ripfumelo kambe xi sirhelele vanhu vo lulama. Hambiswiritano, swivochwa swa magidi swi balekile loko makhumbi ya khotso ma wisiwe hi ku tsekatseka ka misava. Vanhu vo tala va timbilu letinene va le Haiti va kuma nchavelelo hi ku dyondza ntiyiso wa leswaku ha yini ku ri ni swiphiqo swonghasi namuntlha. Makwerhu Honsberger, u tshahe makwerhu un’wana wo tshembeka wa le Haiti loyi a feriweke hi nsati eka mhangu yoleyo, loyi a vuleke a ku: “Ndza ha rila ninamuntlha. A ndzi swi tivi leswaku ndzi ta hlakarhela rini, kambe ndza tsaka leswi nhlengeletano ya Yehovha yi ndzi kombaka rirhandzu. Ndzi ni ntshembo naswona ndzi tiyimisele ku pfuna van’wana leswaku va va ni ntshembo lowu fanaka.”

 Mark Sanderson, khale ka xirho xa Komiti ya Rhavi ePhilippine loyi sweswi a nga xirho xa ndyangu wa Bethele ya le Brooklyn, u nyikele xiviko hi tiko rero. U vulavule a tsakile malunghana ni tinhlohlorhi ta 32 leti veke kona hi ku landzelana ta nhlayo ya vahuweleri va Mfumo etikweni rero ni ndlela leyi tidyondzo ta Bibele ti andzeke ha yona ku tlula nhlayo ya vahuweleri. U vule ntokoto wa Miguel loyi ntukulu wakwe a dlayiweke. Miguel u tirhe hi matimba leswaku mudlayi wa ntukulu wakwe a tengisiwa a tlhela a pfaleriwa. Endzhaku ka nkarhi, Miguel u hlangane ni mudlayi yoloye loko a ri eku chumayeleni ekhotsweni. Hambileswi Miguel a a chuhile, u vulavule na yena hi musa. Eku heteleleni u dyondze na yena naswona u tsakele ntiyiso a tlhela a sungula ku rhandza Yehovha. Sweswi se u khuvuriwile. Miguel se i munghana wakwe lonkulu naswona u ringeta ku n’wi kombelela leswaku a hatla a ntshunxiwa ekhotsweni. *

Ku landzele nongonoko lowu a wu ri ni mimbulavurisano leyi fambisiweke hi Mark Noumair, muleteri eka Ndzawulo ya Swikolo swa Vutirheli bya le Tilweni. U vulavurisane ni mimpatswa yinharhu—Alex na Sarah vaka Reinmueller, David na Krista vaka Schafer na Robert na Ketra vaka Ciranko. Alex Reinmueller, loyi a nga mupfuni eka Komiti ya Vukandziyisi, u hlamusele ndlela leyi a endleke ntiyiso wu va wa yena loko a ri karhi a phayona eCanada a ri ni malembe ya 15, laha minkarhi yo tala a a chumayela a ri yexe. Loko Makwerhu Reinmueller a vutisiwe leswaku i vamani lava n’wi pfuneke ngopfu eBethele, u boxe vavanuna vanharhu vo tshembeka naswona u hlamusele ndlela leyi ha un’we wa vona a n’wi pfuneke ha yona leswaku a kula hi tlhelo ra moya. Nsati wakwe Sarah, u vulavule hi vunghana byakwe ni makwerhu un’wana wa xisati loyi a tiyiseleke makume ya malembe emakhotsweni ya le Chayina hikwalaho ka ripfumelo rakwe. U vule leswaku xikhongelo xi n’wi dyondzise ku titshega hi Yehovha.

David Schafer, loyi a nga mupfuni eka Komiti yo Dyondzisa, u bumabumele mana wakwe hikwalaho ka ripfumelo rakwe naswona u vulavule hi vamakwerhu lava a va tirha ku tsemelela misinya lava n’wi pfuneke leswaku a teka vuphayona bya nkarhinyana loko a ha ri jaha. Nsati wakwe Krista, u vulavule kahle hi ndlela leyi swirho swa khale swa ndyangu wa Bethele swi n’wi susumeteleke ha yona hileswi swi tikombiseke swi ‘tshembekile eka leswitsongo,’ hilaha Yesu a khutazeke hakona.—Luka 16:10.

Robert Ciranko, loyi a nga mupfuni eka Komiti ya Vutsari, u vulavule hi vakokwa wakwe va mune lava totiweke, lava a va ri valuveri lava humaka etikweni ra Hungary. Loko a ha ri mufana, u tsakisiwe hi ku ya emintsombanweni leyikulu hi va-1950 ni ku dyondza leswaku nhlengeletano ya Yehovha a yi ri yikulu swinene ku tlula vandlha ra ka vona. Nsati wakwe Ketra, u hlamusele ndlela leyi a dyondzeke ha yona ku tshembeka loko a ri phayona evandlheni leri a ri karhatiwa hi vugwinehi ni swiphiqo swin’wana. U tiyiserile naswona eku  heteleleni u averiwe ku va phayona ro hlawuleka evandlheni rin’wana leri vun’we bya rona byi n’wi khumbeke mbilu.

Ku landzele Manfred Tonak, loyi a nyikeleke xiviko xa tiko ra Etiyopiya. Tiko leri ku vulavuriwe ha rona eminkarhini ya ku tsariwa ka Bibele naswona sweswi ri katekisiwe hi vahuweleri va mahungu lamanene lava tlulaka 9 000. Vo tala va vona va tshama edorobeni ra Addis Ababa, leri nga ntsindza wa tiko, kumbe ekusuhi na rona. Xisweswo, tindhawu leti nga ekule ni ntsindza ti lava vahuweleri va Mfumo. Leswaku ku lulamisiwa xiphiqo lexi, ku komberiwe Timbhoni ta le Etiyopiya leti tshamaka ematikweni man’wana leswaku ti ya chumayela etindhawini ta le kule ta tiko rero. Timbhoni to tala ti tile, ti khutaze Timbhoni leti tshamaka kwalaho naswona ti kume vanhu lava tsakeleke.

Xiphemu lexi tsakiseke ngopfu eka nongonoko lowu a ku ri tinkulumo ta nxaxamelo leti vulavulaka hi Timbhoni ta Yehovha ta le Rhaxiya ni ku hlula ka tona ka le nawini. Aulis Bergdahl, loyi a nga xirho xa Komiti ya Rhavi ra le Rhaxiya, u hlamusele matimu ya ku xanisiwa ka Timbhoni etikweni, ngopfu-ngopfu edorobeni ra Moscow. Philip Brumley, loyi a tirhaka eka Ndzawulo ya swa le Nawini erhavini ra le United States, u vulavule hi swiendlakalo leswi tsakisaka leswi endlekeke etin’hwetini ta sweswinyana loko Huvo ya le Yuropa ya Timfanelo ta Vanhu (European Court of Human Rights [ECHR]) yi kambisise swihehlo swa kaye leswi Timbhoni ti hehliweke ha swona. Huvo hinkwayo yi kume leswaku ku hava xihehlo ni xin’we eka leswa kaye lexi twalaka naswona yi kale yi hlamusela hi vuenti leswaku ha yini swihehlo swo hlayanyana swi hoxile. Hambileswi swi nga tiviwiki leswaku sweswo swi ta va ni vuyelo byihi eRhaxiya, Makwerhu Brumley u vule hi ku tiyiseka leswaku xiboho lexi tekiweke hi Huvo leyi xi nga ha khumba milandzu leyi nga vaka kona ni le matikweni man’wana.

Endzhaku ka mahungu wolawo yo tsakisa, Makwerhu Lett u tivise leswaku ECHR yi vone swi fanerile ku kambisisa nandzu wa khale wa xibalo exikarhi ka hulumendhe ya Furwa ni Timbhoni ta Yehovha. Huvo leyi, leyi xiximiwaka swinene, ya pfumela leswaku a yi talanga milandzu yo tano leyi yi yisiweke eka yona. Ku fikela sweswi, ECHR yi kambisise milandzu ya 39 leyi khumbaka Timbhoni ta Yehovha naswona yi yime na hina eka ya 37. Makwerhu Lett u khutaze vanhu hinkwavo va Xikwembu leswaku va khongela hi timhaka leti eka Yehovha Xikwembu.

Xiviko xo hetelela xi nyikeriwe hi Richard Morlan, loyi a nga muleteri eXikolweni xa Vakulu va Vandlha. U vulavule a tsakile hi xikolo xexo ni ndlela leyi vakulu lava yeke eka xona va xi tlangeleke ha yona.

Tinkulumo Tin’wana Leti Nyikeriweke Hi Swirho Swa Huvo Leyi Fumaka

Guy Pierce, xirho xa Huvo leyi Fumaka, u nyikele nkulumo leyi khumbaka mbilu leyi a yi dzike  eka ndzimana ya lembe ya 2011 leyi nge, “Tumbela evitweni ra Yehovha.” (Sof. 3:12) U vule leswaku hambileswi lowu ku nga nkarhi wo tsakisa eka vanhu va Yehovha hi tindlela to tala, kambe i nkarhi wa nkoka. Siku lerikulu ra Yehovha ri le kusuhi; kambe vanhu va hambeta va lava vutumbelo eka vukhongeri bya mavunwa, eka minhlangano ya tipolitiki, eka rifuwo naswona va ringeta ku balekela ntiyiso hi ku honisa swilo leswi endlekaka emisaveni ni ku endla swilo swin’wana swo fana ni sweswo. Leswaku hi kuma vutumbelo bya xiviri, hi fanele hi vitana vito ra Yehovha, leswi katsaka ku tiva, ku xixima ni ku tshemba Loyi a yimeriwaka hi vito rero ni ku n’wi rhandza hi swilo hinkwaswo leswi hi nga na swona.

Ku landzele David Splane, xirho xa Huvo leyi Fumaka, loyi a nyikeleke nkulumo leyi tlhontlha mianakanyo leyi nga ni nhloko-mhaka leyi nge, “Xana U Nghenile Eku Wiseni Ka Xikwembu?” U vule leswaku ku wisa ka Xikwembu a swi vuli ku tshama hi mavoko hikuva Yehovha ni N’wana wakwe va ya ‘emahlweni va tirha’ esikwini ra ku wisa ro fanekisela leswaku va hetisisa xikongomelo xa Xikwembu hi swilo leswi xi swi tumbuluxeke malunghana ni misava. (Yoh. 5:17) Kutani hi nga nghena njhani eku wiseni ka Xikwembu? Ndlela yin’wana leyi hi nga nghenaka ha yona eku wiseni ka xona i ku tshika ku dyoha ni ku tivekela milawu ya hina vini ya leswo lulama leyi nga fambisaniki na Kreste Yesu swin’we ni gandzelo rakwe ra nkutsulo. Hi fanele hi kombisa ripfumelo ni ku hanya hi ri karhi hi tsundzuka xikongomelo xa Xikwembu ni ku endla hinkwaswo leswi hi nga swi kotaka leswaku xikongomelo xexo xi hetiseka. Minkarhi yin’wana ku endla sweswo swi nga ha va ntlhontlho lowukulu, kambe hi fanele hi amukela ndzayo hi tlhela hi fambisana ni nkongomiso wa nhlengeletano ya Yehovha. Makwerhu Splane u kombele vayingiseri hinkwavo leswaku va endla hinkwaswo leswi va nga swi kotaka leswaku va nghena eku wiseni ka Xikwembu.

Nkulumo yo hetelela leyi nyikeriweke hi Anthony Morris, xirho xa Huvo leyi Fumaka, a yi ri ni nhloko-mhaka leyi nge, “I Yini Leswi Hi Swi Rindzeleke?” Ku fana ni tatana loyi a nga ni rirhandzu, Makwerhu Morris u tsundzuxe vayingiseri hi swiendlakalo swa vuprofeta leswi nga siki hetisekaka, leswi vanhu hinkwavo vo tshembeka va swi languteleke hi mahlo-ngati. Leswi swi katsa ku huwelela mhaka ya “Ku rhula ni nsirhelelo!” ni ku herisiwa ka vukhongeri bya mavunwa. (1 Tes. 5:2, 3; Nhlav. 17:15-17) Makwerhu Morris u hi lemukise leswaku hi nga vuli hi ku “Leyi ku fanele ku ri Armagedoni,” loko hi vona swiendlakalo eka mahungu leswi nga hetisisiki vuprofeta byebyo. U hi khutaze leswaku hi tshama hi tsakile, hi lehisa mbilu ni ku rindza, ku nga langutelo leri hlamuseriwaka eka Mikiya 7:7. Kambe u tlhele a khutaza hinkwavo leswaku va va ni vun’we ni Huvo leyi Fumaka, ku fana ni masocha lama nghenaka laha nyimpi yi hisaka kona. U te: “Onge timbilu ta n’wina ti nga va ni ntamu, hinkwenu lava rindzelaka Yehovha.”—Ps. 31:24.

Loko ku gimetiwa nongonoko, ku tivisiwe switiviso swo tsakisa leswi nga ta ka swi nga rivariwi. Geoffrey Jackson, xirho xa Huvo leyi Fumaka, u tivise hi ta makungu ya ku humesiwa ka nkandziyiso wa vandlha wa Xihondzo xo Rindza hi Xinghezi lexi olovisiweke, lowu endleriweke lava nga xi tiviki kahle Xinghezi. Kutani Stephen Lett u tivise leswaku Huvo leyi Fumaka yi ta hlela leswaku valanguteri va miganga swin’we ni vasati va vona eUnited States va endleriwa maendzo ya vurisi. U tlhele a tivisa leswaku ku sukela sweswi Xikolo xa Ndzetelo wa Vutirheli xi ta vitaniwa Xikolo xa Bibele xa Vamakwerhu lava nga Tekangiki. Xi ta fambisana ni Xikolo xa Bibele xa Mimpatswa leyi nga Vakreste. Xikolo lexi xi ta nyika mimpatswa ndzetelo lowu engetelekeke leswaku yi hlomiseriwa ku tirhisiwa enhlengeletanweni ya Yehovha. Makwerhu Lett u tlhele a tivisa leswaku Xikolo xa Valanguteri va Swifundzha ni va Miganga Swin’we ni Vasati va Vona ni Xikolo xa Swirho swa Komiti ya Rhavi ni Vasati va Swona swi ta khomiwa kambirhi hi lembe ePatterson naswona lava yeke enkarhini lowu hundzeke va ta kota ku tlhela va ya ra vumbirhi.

John E. Barr, xirho xa Huvo leyi Fumaka, loyi a nga ni malembe ya 97 u gimete nongonoko hi xikhongelo lexi humaka embilwini. * Loko nhlangano lowu wu hela, vanhu hinkwavo va swi xiyile leswaku hakunene a wu ri nongonoko lowu nga ta ka wu nga rivariwi.

[Tinhlamuselo ta le hansi]

[Marito lama tshahiweke exihlokweni lama nga eka tluka 19]

Mimbulavurisano yi tsakeriwe hi vayingiseri hinkwavo

[Marito lama tshahiweke exihlokweni lama nga eka tluka 20]

Yehovha u katekise ntirho wo chumayela aEtiyopiya