Xana Wa Tsaka Leswi U Nga Ni ‘Lunghelo Ra Ku Nyika Hi Musa’?

VAKRESTE vo sungula va le Filipiya a va dume hi ku hanana hi xikongomelo xo seketela vugandzeri bya ntiyiso. Epapileni leri muapostola Pawulo a va tsaleleke rona, u te: “Ndzi nkhensa Xikwembu xa mina nkarhi hinkwawo loko ndzi mi tsundzuka eka xikombelo xin’wana ni xin’wana xa mina lexi ndzi xi endlelaka n’wina hinkwenu, ndzi ri karhi ndzi endla xikombelo xa mina hi ntsako, hikwalaho ka munyikelo lowu mi wu endleke eka mahungu lamanene ku sukela eka siku ro sungula ku fika enkarhini lowu.” (Filp. 1:3-5) Pawulo a ha ri tsundzuka kahle siku leri Lidiya ni ndyangu wakwe va khuvuriweke ha rona ni ndlela leyi Lidiya a n’wi sindziseke ha yona swin’we ni lava a a chumayela na vona leswaku va tshama endlwini yakwe hikwalaho ka leswi a a ri ni malwandla.—Mint. 16:14, 15.

Endzhakunyana ka sweswo, vandlha leri a ra ha ku simekiwa eFilipiya ri rhumelele Pawulo swakudya kambirhi enkarhini lowu a heteke mavhiki ma nga ri mangani ni vapfumeri-kulobye emutini wa Tesalonika, lowu a swi teka tikhilomitara leti nga ehansinyana  ka 160 ku ya eka wona. (Filp. 4:15, 16) Endzhaku ka malembe yo hlayanyana loko vamakwerhu va le Filipiya ni van’wana va le Makedoniya va ri enhlomulweni ni le ‘vusiwaneni lebyikulu,’ va twe hi ta xilaveko xa Vakreste va le Yerusalema lava a va xanisiwa kutani va lave ku va pfuna. Pawulo u vule leswaku sweswo hakunene “a swi ri ehenhla ka vuswikoti bya vona bya xiviri.” Kambe u tsale a ku: ‘Va hambete va hi kombela hi xikhongotelo lexikulu hi lunghelo ra ku nyika ka musa.’—2 Kor. 8:1-4; Rhom. 15:26.

Vafilipiya a va ha ri na wona moya wo hanana hambileswi se a ku hundze malembe ya kwalomu ka khume va amukele vukhongeri bya Vukreste. Naswona loko va twe leswaku Pawulo u khotsiwile eRhoma, va rhume Epafrodito leswaku a famba tikhilomitara ta 1 287 leswaku a n’wi yisela swakudya ni swilo swin’wana. Swi le rivaleni leswaku Vafilipiya a va lava ku pfuna Pawulo leswaku a hambeta a tiyisa vamakwavo ni ku chumayela a ri ekhotsweni.—Filp. 1:12-14; 2:25-30; 4:18.

Namuntlha, Vakreste va ntiyiso va swi teka ku ri lunghelo lerikulu ku seketela ntirho wo chumayela hi Mfumo ni wo endla vadyondzisiwa. (Mat. 28:19, 20) Va seketela timhaka ta Mfumo hi ku nyikela hi nkarhi, matimba ni mali ya vona. Bokisi leri fambisanaka ni xihloko lexi ri kombisa tindlela tin’wana leti wena u nga wu seketelaka ha tona ntirho lowu, lowu humaka eka Xikwembu.

[Bokisi leri nga eka matluka 22, 23]

TINDLELA LETI VAN’WANA VA HLAWULAKA KU NYIKELA HA TONA

MINYIKELO YA NTIRHO WA MISAVA HINKWAYO

Vanhu vo tala va tivekela mali yo karhi leyi va nga ta yi hoxa emabokisini ya munyikelo lama nga ni mfungho lowu nge “Ntirho Wa Misava Hinkwayo.”

N’hweti ni n’hweti mavandlha ma rhumela minyikelo yoleyo erhavini ra Timbhoni ta Yehovha leri langutelaka matiko lawa mavandlha wolawo ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe erhavini ra Timbhoni ta Yehovha leri langutelaka tiko ra ka n’wina. (Minyikelo ya ku tirhandzela leyi hlamuseriweke laha hansi yi nga rhumeriwa erhavini ra Timbhoni ta Yehovha leri langutelaka tiko ra ka n’wina.) Loko u lava ku rhumela munyikelo wa wena hi cheke eka adirese leyi nga laha henhla, tsala vito leri nge “Watch Tower Society” endhawini leyi faneleke ya cheke. Ku nga ha nyikeriwa ni hi swin’wetsin’wetsi kumbe swilo swin’wana swa nkoka. Ku fanele ku rhumeriwa papila ro koma leri fambisanaka ni tinyiko to tano, leri hlamuselaka leswaku swilo leswi i nyiko leyi heleleke.

KU NYIKELA LOKU KUNGUHATIWEKE

Handle ko nyikela mali hi ku kongoma, ku ni tindlela tin’wana to nyikela leti vuyerisaka ntirho wa Mfumo emisaveni hinkwayo. Tona ti katsa:

Ndzindza-khombo: Watch Tower Bible and Tract Society of South Africa yi nga ha tsarisiwa tanihi leyi nga ta sala yi kuma mali ya ndzindza-khombo wa vutomi kumbe wa mudende loko n’wini wa wona a fa.

Tiakhawunti ta Bangi: Tiakhawunti ta bangi ni mali leyi lombisiweke hi ntswalo (certificates of deposit) swi nga ha hoxiwa eka nhlangano wa le nawini (trust) lowu endleriweke Watch Tower Bible and Tract Society of South Africa kumbe swi nyikiwa yona loko n’wini wa swona a fa, loko sweswo swi fambisana ni swilaveko swa tibangi ta tiko ra ka n’wina.

Tixere ni Mali leyi Lombisiweke hi Ntswalo (Bonds): Tixere ni mali leyi lombisiweke hi ntswalo swi nga ha nyikeriwa eka Watch Tower Bible and Tract Society of South Africa tanihi nyiko leyi heleleke kumbe Watch Tower Bible and Tract Society of South Africa yi nga ha tsarisiwa tanihi leyi nga ta nyikiwa swona loko n’wini wa swona a fa.

Muako ni Ndhawu: Muako ni ndhawu swi nga ha nyikeriwa hi ku helela kumbe loko ku ri yindlu, ku endliwa ntwanano wa leswaku yi ta tekiwa ntsena loko loyi a nyikeleke ha yona a fa. Tivisa rhavi ra le tikweni ra ka n’wina u nga si nyikela hi muako kumbe ndhawu.

Testamente (Wills) ni Minhlangano ya le Nawini (Trusts): Muako kumbe mali swi nga ha nyikeriwa eka Watch Tower Bible and Tract Society of South Africa hi ku tirhisa testamente ya le nawini ya mufi kumbe Watch Tower Bible and Tract Society of South Africa yi nga ha tsarisiwa tanihi leyi nga ta kuma mali eka nhlangano wolowo. Loko nhlangano wu nyikela hi mali ya wona eka vukhongeri, wu nga ha tshikiwa wu nga hakerisiwi xibalo xa mali ya kona.

Loko u lava rungula leri engetelekeke, u nga ha bela ndzawulo ya Accounting Office riqingho kumbe u yi tsalela eka adirese leyi nga laha hansi kumbe u vutisa rhavi leri langutelaka tiko ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: 011 761 1323