Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Olivétan a ku ri mani naswona ha yini ntirho wakwe wu fanele wu hi tsakisa?

Pierre Robert wa le Furwa a a tiviwa hi vito rero. Enkarhini wa tsima ro lwisana ni tidyondzo ta kereke ya Khatoliki hi lembe-xidzana ra vu-16, u hundzuluxele Bibele hi Xifurwa. U tirhise rito leri nge “mulanguteri” ematshan’weni ya leri nge “bixopo” ni leri nge “vandlha” ematshan’weni ya leri nge “kereke.” Etindhawini tin’wana, u tirhise vito ra Xikwembu leri nge “Yehovha.”—9/1, matluka 18-20.

• Xikwembu a xi vula yini loko xi byela Valevhi xi ku: “Mina ndzi xiavelo xa [n’wina]”?

Nyimba yin’wana ni yin’wana ya rixaka ra Israyele yi nyikiwe ndhawu ya yona, kambe “xiavelo” xa Valevhi a ku ri Yehovha. (Tinhl. 18:20) A va nga ta kuma ndzhaka ya tiko kambe va nyikiwe ntirho wo hlawuleka. Nilokoswiritano, Yehovha u khathalele swilaveko swa vona swa xisekelo. Namuntlha, lava nga ni lunghelo ro yisa timhaka ta Mfumo emahlweni va nga tiyiseka leswaku swilaveko swa vona swa nyama swi ta khathaleriwa.—9/15, matluka 7-8, 13.

• Hi ri tiva njhani lembe leri muti wa khale wa Yerusalema wu lovisiweke ha rona hi Vababilona?

Van’wamatimu va le Grikiya ni va le Rhoma va nyikela vuxokoxoko lebyi hambaneke ni lebyi kanetanaka malunghana ni tihosi ta Babilona ni malembe lawa ti fumeke ha wona. Kambe swidyondzi swa pfumela leswaku Korexe wa Vumbirhi u hlule Babilona hi 539 B.C.E., ku nga lembe ra nkoka. Vayuda va ntshunxiwile naswona va fike etikweni ra rikwavo hi 537 B.C.E. Bibele yi vule leswaku a va ta heta malembe ya 70 evuhlongeni. Hikwalaho, muti wa Yerusalema wu fanele wu lovisiwe hi 607 B.C.E. (2 Tikr. 36:21, 22; Yer. 29:10; Dan. 9:1, 2)—10/1, matluka 26-31.

• I yini lexi nga pfunaka Mukreste ku tiva loko vuhungasi byo karhi byi ta n’wi vuyerisa kumbe e-e?

Leswaku a kumisisa loko vuhungasi byo karhi byi ta n’wi vuyerisa naswona byi amukeleka eka Xikwembu, i swa nkoka leswaku a tivutisa swivutiso leswi: Byi katsa yini? Ndzi ta heta nkarhi wo tanihi kwihi eka byona? I vamani lava nga ta va vanghana va mina?—10/15, matluka 9-12.

• Ha yini swi hoxile ku susa khwiri?

Xikwembu xi teka vutomi byi ri lebyi kwetsimaka naswona xi teka xitumbulukwa xa munhu tanihi xivumbiwa lexi hanyaka. (Ps. 139:16) Ku susa khwiri i ku dlaya, hikuva hi ku ya hi Nawu wa Muxe, munhu a a ta tihlamulela hikwalaho ko dlaya n’wana loyi a nga si velekiwaka. (Eks. 21:22, 23)—11/1, tluka 6.

• Mhaka leyi nga eka Swivuriso 7:6-23 yi nga hi pfuna njhani leswaku hi papalata ku hlalela swifaniso leswi pfuxaka ku navela ka rimbewu?

Mhaka yoleyo yi vulavula hi jaha leri hundzeke hi le ndhawini leyi eka yona a swi tiveka leswaku ku tshama nghwavava. Jaha rero ri wongiwe hi nghwavava yoleyo. Namuntlha, hi fanele hi papalata ku nghena eka ti-website ta le ka Internet leti nga ni swifaniso leswi pfuxaka ku navela ka rimbewu naswona i swa nkoka ku khongela eka Xikwembu hi kombela mpfuno wo hlula ku navela ku hlalela swifaniso swo tano hi nga si nghena eka ti-website ta le ka Internet.—11/15, matluka 9-10.

• Hi swi tiva njhani leswaku misava a yi nge heli hi 2012?

Hikwalaho ka mindzhendzheleko ya swiendlakalo leswi fanaka eka khalendara ya khale ya Vamaya, van’wana va ehleketa leswaku misava yi ta hela hi 2012. Kambe sweswo a swi nge endleki hikuva Yehovha u vumbe misava leswaku vanhu va tshama eka yona. Bibele yi vula leswaku misava yi ta tshama hilaha ku nga heriki. (Ekl. 1:4; Esa. 45:18)—12/1, tluka 10.

• Hi vahi vatsari va Bibele lava a va ri kona hi Pentekosta ya 33 C.E.?

Swi tikomba onge vatsari va tsevu va Matsalwa ya Vukreste ya Xigriki a va ri kona. Vaapostola vanharhu lava a va ri kona a ku ri Matewu, Yohane na Petro. Nakambe a ku ri ni vamakwavo vambirhi va Yesu hi manana, ku nga Yakobo na Yudha. Swi nga ha endleka leswaku jaha leri vuriwaka Marka na rona a ri ri kona.—12/1, tluka 22.