VANHU va Yehovha va ni matimu lama tsakisaka malunghana ni vugandzeri bya vona. Matimu wolawo lama tsakisaka a hi dyondzi ha wona eminkandziyisweni ya hina ntsena kambe ni le ka swinepe, mapapila, mintokoto ya vanhu swin’we ni switirhisiwa leswi fambisanaka ni vugandzeri bya hina, ntirho wa hina wo chumayela ni matimu ya hina. Kambe swi pfuna yini ku hlayisa swilo sweswo ni ku kambisisa matimu ya hina? Tinhloko ta mindyangu ta le tikweni ra khale ra Israyele a ti fanele ti dyondzisa vana va tona milawu ni mintirho leyi hlamarisaka ya Yehovha leswaku “va ta veka ntshembo wa vona eka Xikwembu.”—Ps. 78:1-7.

Ku kambisisa timhaka ta matimu i khale swi hoxa xandla eku hetisekeni ka xikongomelo xa Yehovha. Hi xikombiso, loko vakaneti va ringete ku yimisa ntirho wo aka tempele eYerusalema, xileriso xa hosi xa leswaku ku kambisisiwa tirhekhodo eswitlatini swa le Ekibatana, ku nga ntsindza wa Mfumo wa Meda, xi endle leswaku ku kumiwa tsalwa leri tsariweke hi Hosi Korexe, leri pfumeleleke Vaisrayele ku endla ntirho wolowo. (Ezra 6:1-4, 12) Xisweswo, tempele yi tlhele yi akiwa hi ku ya hi ku rhandza ka Xikwembu. Luka, mutsari un’wana wa tibuku ta Tievhangeli, loyi a “lavisiseke swilo hinkwaswo ku sukela emasungulweni hi ku kongoma,” na yena u kambisise timhaka ta matimu.—Luka 1:1-4.

Huvo leyi Fumaka ya khathala swinene hi matimu ya vugandzeri bya hina. Loko xirho xin’wana xa Huvo leyi  Fumaka xi vulavula hi xilaveko xo hlayisa, xo tsala ni xo hangalasa matimu ya vugandzeri bya hina, xi te: “Leswaku hi tiva laha hi yaka kona, hi fanele hi tiva lomu hi humaka kona.” Hikwalaho ka sweswo, ka ha ku simekiwa Ndzawulo ya Matimu eyindlu-nkulu ya misava hinkwayo eBrooklyn le New York, naswona yi kongomisiwa hi Komiti ya Vatsari.

ALBAMU YA NDYANGU NI NDZHAKA YA HINA YO FANEKISELA

Swilo swa khale swa hundza hi ku famba ka karhi naswona vo tala va hina hi nga ha navela onge a hi fanele hi hlayise tirhekhodo hinkwato ta ndyangu. Sweswi Ndzawulo ya Matimu yi le ku tirheni hi matimba leswaku yi hlayisa ni ku tsala hi matimu ya hina lama tsakisaka. Swinepe leswi hlayisiweke hi vukheta eNdzawulweni ya Matimu swi nga tekiwa tanihi xiphemu xa albamu ya ndyangu wa hina. Minkandziyiso ya hina yo sungula, mintokoto leyi tsakisaka ni swilo swa risima i swin’wana swa swilo swa nkoka leswi nga eNdzawulweni ya Matimu. Swilo sweswo i ndzhaka leyi hi dyondzisaka hi vugandzeri bya hina naswona swi hi pfuna ku byi langutela hi mahlo-ngati vumundzuku bya ndyangu wa hina wa vapfumeri-kulorhi.

Ha ku rhamba leswaku u kambisisa Ndzawulo ya Matimu hi ku tirhisa xihloko lexintshwa lexi nge “Tolo A Nga Ha Vuyi.” Xi ta humelela nkarhi ni nkarhi enkandziyisweni wa vandlha wa Xihondzo xo Rindza. Hi xikombiso, enkandziyisweni lowu landzelaka hi hlele ku kandziyisa rungula leri nga ni swinepe hi xikongomelo xo hlamula swivutiso leswi: A ku ri yini xigolonyana xa Millennial Dawn? I vamani lava a va xi tirhisa? Xi tirhisiwe rini naswona hi xikongomelo xihi?

Ku fana ni albamu ya ndyangu leyi hi tsundzuxaka hi swilo leswi hundzeke, swilo leswi nga eNdzawulweni ya Matimu swi hi byela swo tala hi hina swin’we ni vachumayeri vo sungula—ripfumelo ni xivindzi xa vona, ntsako ni mintlhontlho yo tirhela Tata wa hina wa le tilweni la nga ni rirhandzu, nkongomiso wa Xikwembu ni ndlela leyi xi va seketelaka ha yona vanhu va xona minkarhi hinkwayo. (Det. 33:27) Ha tiyiseka leswaku Yehovha u ta ma katekisa matshalatshala lama nga eku endliweni yo hlayisa matimu ya nhlengeletano ya hina leswaku hi tshama hi tiyile ni ku va ni vun’we leswaku hi endla ku rhandza kakwe.

[Bokisi/Xifaniso lexi nga eka tluka 31]

Ku Kambisisa Ndzawulo Ya Matimu

Loko ku ri karhi ku lunghiseleriwa tibuku ta Vukreste, ti-DVD ni swilo swin’wana leswi sekeriweke eBibeleni, vatsari, vampfampfarhuti, valavisisi ni van’wana va tirhisa switlati leswi nga ni tirhekhodo ta khale. Hikwalaho, Ndzawulo ya Matimu yi teka magoza lama faneleke leswaku yi hlengeleta ni ku hlayisa swilo swa matimu swo hambana-hambana leswi humaka eka swihlovo swo fana ni marhavi, tindzawulo ta Bethele, mavandlha, vanhu swin’we ni minhlangano ya tiko. Kambisisa nkatsakanyo lowu landzelaka wa ntirho lowu:

Ku Kuma Swilo Ni Ku Swi Kambisisa: Swilo swo hlawuleka swi tshamela ku engeteriwa eswitlatini swa Ndzawulo ya Matimu. Swo tala swa swona swi lo nyikeriwa kumbe swi lo lombiwa eka vamakwerhu lava mindyangu ya vona yi nga ni nkarhi wo leha yi tirhela Yehovha hi ku tshembeka. Ku kambisisa ni ku pimanisa swilo sweswo swi hi pfuna ku ma twisisa kahle matimu ya hina ni lava va hanyeke enkarhini wolowo.

Ku Swi Veka Hi Nxaxamelo: Switlati swa Ndzawulo ya Matimu swi vumbiwa hi swilo swa magidi, leswi swin’wana swa swona swi nga ni malembe yo tlula dzana. Ku ni swilo swo hambana-hambana naswona swi fanele swi vekiwa hi nxaxamelo leswaku swi ta kumiwa hi ku olova ni ku tirhisiwa enkarhini lowu taka.

Ku Swi Lunghisa Ni Ku Swi Hlayisa: Tibuku leti hlakaleke ni switirhisiwa swin’wana swa khale swa lunghisiwa ni ku hlayisiwa hi tindlela leti faneleke. Mapapila, swinepe, matluka lama tsemiweke eka maphepha-hungu, tifilimi ni swilo leswi rhekhodiweke swi hoxiwa eka khompyuta. Xisweswo, swi nga voniwa eka khompyuta leswaku ku nga tirhisiwi matsalwa ya kona hi ku kongoma kumbe swilo swin’wana leswi nga swa nkoka ematin’wini.

Vuhlayiselo Ni Ku Tirhisa Swilo Leswi Hlayisiweke: Swilo leswi nga eswitlatini swi hlayisiwa hi ndlela leyi hlelekeke ni leyi hlayisekeke leswaku swi nga onhaki nileswaku swi sirheleriwa eka dyambu ni ndzhongo. Rungula ra nkoka leri vulavulaka hi matimu ya hina ri karhi ri hoxiwa eka tikhompyuta leswaku ri tirhisiwa loko ku endliwa ndzavisiso nileswaku ri hlayiwa eka tona.

[Swifaniso leswi nga eka tluka 32]

1. Xifaniso lexikulu xa vhidiyo ya “Photo-Drama of Creation.” 2.Buku yo tsarisa xikhokhelo. 3. Movha lowu nga ni xikurisa-marito. 4.Xifunengeto xa Xihondzo xo Rindza xa April 15, 1912. 5. Papila ra ku khomiwa ka J. F. Rutherford. 6. Xikurisa-marito xa xitichi xa xiya-ni-moya xa WBBR. 7. Gramafoni. 8. Putumendhe yo rhwala tibuku. 9. Tinhla ta munhu hi yexe. 10. Telegramu leyi rhumeriweke J. F. Rutherford.